اسلام آباد: (ویب ڈیسک) وزیراعظم شہباز شریف نے کہا ہے کہ جعلی کاغذ لہرا کر کہا جاتا رہا سائفر آیا ہے اور یہ ایک امپورٹڈ حکومت ہے، حقائق نے اس جھوٹے پروپیگنڈے کو زمین بوس کردیا ہے۔ اسلام آباد اور راولپنڈی کے مختلف ترقیاتی منصوبوں کے افتتاح کے موقع پر وزیراعظم شہباز شریف نے کہا کہ چیئرمین پی ٹی آئی نے پاکستان کے وقار کو خاک میں ملانے کی کوشش کی، لوگوں کی جھوٹی ذہن سازی کی جا رہی تھی، قوم کو کہا گیا میری حکومت امریکا سے ہٹوائی گئی ہے۔ وزیراعظم نے کہا کہ روس سے 1 لاکھ ٹن خام تیل آیا ہے، روسی تیل کا پہلا جہاز کراچی آچکا ہے، انہوں نے روس سے ایک دمڑی کی چیز بھی نہیں منگوائی تھی، لوگ پوچھتے ہیں روسی تیل کی کیا خصوصیت ہے، روس کے تیل کی قیمت عالمی تیل کی قیمت سے کم ہے، روس کا تیل عالمی منڈی سے کم از کم 15 ڈالر فی بیرل سستا ہے۔ انہوں نے کہا کہ پاکستان کو اس وقت زرمبادلہ کی ضرورت ہے، عوام بجٹ دینے پر اسحاق ڈار اور ان کی ٹیم کو مبارکباد پیش کرتا ہوں، جب تک کسی ملک میں سیاسی استحکام نہیں ہوتا معاشی استحکام نہیں آسکتا، جب کسی ملک میں دن رات جھوٹا پروپیگنڈا ہوگا تو کون وہاں سرمایہ کاری کرے گا؟، گزشتہ حکومت نے پاکستان کی معیشت کا بیڑا غرق کردیا۔ وزیراعظم کا کہنا تھا کہ جو آئی ایم ایف سے معاہدہ کرکے توڑا گیا ہمیں اس کا بہت زیادہ نقصان ہوا، پوری کوشش کر رہے ہیں کہ آئی ایم ایف سے معاہدہ ہو جائے، آئی ایم ایف کی تمام شرائط پوری کرلی ہیں، ہم آئی ایم ایف سے معاہدہ کرنے میں کامیاب ہو جائیں گے۔ شہباز شریف نے کہا کہ اگر میرے خلاف بھی کوئی کرپشن کا ثبوت ہے تو لے کر آئیں، جھوٹے الزامات لگانا مناسب نہیں ہے، چیئرمین پی ٹی آئی نے پوری اپوزیشن کو دیوار سے لگا دیا تھا، پونے 4 سال ان کو کسی کے خلاف کرپشن کا ثبوت نہ ملا، اگر کرپشن کے ثبوت نہیں ہیں تو منہ بند رکھا جائے۔ انہوں نے کہا کہ کسی بھی ٹیم کا کپتان ایک ہوتا ہے، جب تک 10 کھلاڑی کپتان کے ساتھ محنت نہ کریں ٹیم کامیاب نہیں ہوسکتی، کسی بھی ٹیم کی کامیابی ٹیم ورک ہے، گزشتہ حکومت نے ترکیہ سے تعلقات خراب کیے، ہمیں اربوں ڈالرز کی گندم امپورٹ کرنی پڑی، گزشتہ حکومت میں گندم کی مقدار میں کمی ہوگئی تھی۔ وزیراعظم کا مزید کہنا تھا کہ نوجوان بچوں کو قرضے دینے کیلئے اربوں روپے رکھے گئے ہیں، دیہاتوں میں زرعی قرضے فراہم کیے جائیں گے، نوجوان نسل ہی پاکستان کی کامیابی کی ضمانت ہے، چیئرمین پی ٹی آئی کہتے تھے یہ لیپ ٹاپس نہیں رشوت ہے، چیئرمین پی ٹی آئی نے گزشتہ دور میں نوجوانوں کو گمراہ کیا، نوجوانوں کو 1 لاکھ لیپ ٹاپس دینے کا پروگرام دوبارہ شروع کر رہے ہیں۔

کراچی : (ویب ڈیسک) شہر قائد میں ٹریفک حادثے کے نتیجے میں ایک شخص جاں بحق ہوگیا۔ ریسکیو ذرائع کے مطابق آئی سی آئی پل کے قریب افسوسناک ٹریفک حادثہ پیش آیا جہاں دو ٹریلرز کی آپس میں ٹکر ہوئی جس کے نتیجے میں ایک ٹریلر کا ڈرائیور جاں بحق ہوگیا۔ ریسیکو ذرائع نے مزید بتایا کہ حادثے کے نتیجے میں جاں بحق ہونے والے ڈرائیور کی لاش کو ہسپتال منتقل کر دیا گیا ہے۔

کراچی: (ویب ڈیسک ) کراچی میں دفعہ 144 کی خلاف ورزی کرنے پر ساحل پر جانے والے17 افراد کو گرفتار کر کے مقدمات درج کرلیے گئے ہیں ۔ سمندری طوفان کے ممکنہ نقصانات کے پیش نظر ضلع جنوبی کی 36 خطرناک قرار دی گئی عمارتوں کو خالی کرا لیا گیا، خطرناک قرار دے گئی عمارتوں میں واقع دکانوں کو بھی سیل کردیا گیا ہے ، ڈپٹی کمشنر جنوبی کے مطابق ڈی ایچ اے فیز 8 میں ساحل پر تمام ریسٹورنٹس بھی مکمل بند کروا دیے گئے ہیں۔ ضلع میں زیر تعمیر عمارتوں کا کام بھی رکوا دیا گیا ہے، حفاظتی قوانین کے مطابق عمارتوں پر نصب مشینری کو بھی ہٹا دیا گیا ہے جبکہ آرام باغ، صدر، لیاری، گارڈن اور سول لائن سب ڈویژن میں شیلٹر ہاؤس بھی قائم کردیئے گئے ہیں۔ ڈپٹی کمشنر جنوبی کا کہنا تھا کہ پاک فوج، رینجرز، پی ڈی ایم اے، کے الیکٹرک، واٹر بورڈ سمیت تمام متعلقہ اداروں کے افسران سے رابطے میں ہیں، کسی بھی ایمرجنسی صورتحال سے نمٹنے کیلئے کنٹیجنسی پلان تیار ہے۔ ضلع میں تمام بل بورڈ، سائن بورڈز کو ہٹانے سمیت گھنے اور کمزور درختوں کی کٹائی کا کام بھی تیزی سے جاری ہے۔ ڈی سی جنوبی آفس میں ایمرجنسی کنٹرول روم قائم کیا گیا ہے اور کسی بھی ہنگامی صورتحال میں عوام 021-99205628، 021-99205629 پر اطلاع کریں۔ ضلع کے تمام ہسپتالوں میں ایمرجنسی نافذ ہے اور کسی بھی ہنگامی صورتحال سے نمٹنے کی لیے بھی تیاری مکمل کرلی گئی ہے ۔ خیال رہے کہ محکمہ موسمیات کی جانب سے سمندری طوفان کے حوالے سے ایک مرتبہ پھر الرٹ جاری کر دیا گیا ہے جس کے مطابق یہ سسٹم کراچی سے 350 کلومیٹر، ٹھٹھہ سے 360 کلومیٹر جنوب میں ہے۔ سمندری طوفان ’’بپر جوئے‘‘کا کراچی سے فاصلہ کم ہو کر 350 کلو میٹر رہ گیا جس کے باعث شہر میں گرد آلود ہوائیں چلنے لگی ہیں اور بعض مقامات پر مٹی کا طوفان بھی آیا، ناخوشگوار حالات سے نمٹنے کیلئے پاک فوج کے حفاظتی دستے بھی تیار ہیں۔