کراچی: (ویب ڈیسک) غیرقانونی طور پر پاکستانی سمندری حدود میں داخل ہونے والے ترک جہاز کے عملے کے افراد کو گرفتاری کے بعد جوڈیشل مجسٹریٹ غربی کی عدالت میں پیش کر دیا گیا۔ ٹائمز آف اسلام آباد کے مطابق یہ جہاز 29مئی کو پاکستانی حدود میں داخل ہوا تھا، جس پر عملے کے 8افراد سوار تھے۔ عملے کے افراد کا تعلق انڈونیشیاءاور مصر سے ہے۔ اس جہاز کو گڈانی کے قریب میری ٹائم سکیورٹی ایجنسی نے تحویل میں لیا تھا۔ عدالت کی طرف سے ترک بحری جہاز کے عملے کو جسمانی ریمانڈ پر فیڈرل انویسٹی گیشن ایجنسی (ایف آئی اے) کے حوالے کر دیا گیا۔ اب عملے کے افراد کو ریمانڈ ختم ہونے پر15جون کو دوبارہ عدالت میں پیش کیا جائے گا۔

کراچی: (ویب ڈیسک) قازقستان سے لاہور کے لئے فلائٹ آپریشن شروع کرنےکا اعلان کر دیا گیا۔ قازقستانی سکیٹ ایئرلائن کی جولائی میں الماتے سے لاہور کے لیے دوطرفہ پروازیں آپریٹ ہوں گی، پروازوں کا آغاز 8 جولائی سے کیا جائے گا۔ سکیٹ ایئرلائن ہفتہ وار دوطرفہ 2 پروازیں بدھ اور ہفتے کے روز آپریٹ کرے گی، سکیٹ ایئرلائن بوئنگ 737 طیارے استعمال کرے گی۔ ذرائع کا کہنا ہے کہ قازقستان کے لیے پروازوں کے آغاز کے سلسلہ میں لاہور ایئرپورٹ پر تیاریوں کا آغاز کر دیا گیا۔

کراچی: (ویب ڈیسک) کراچی اور حیدر آباد میں میئر، ڈپٹی میئر کیلئے کاغذات نامزدگی جمع کروانے والے مختلف جماعتوں کے امیدواروں کے نام سامنے آ گئے ہیں۔ کراچی میں میئر کےعہدے کیلئے پیپلز پارٹی اور جماعت اسلامی کے 5 امیدواروں نے کاغذات نامزدگی جمع کروائے ہیں جبکہ ڈپٹی میئر کی نشست کیلئے پیپلز پارٹی، جماعت اسلامی، مسلم لیگ اور پی ٹی آئی کے 6 امیدوار مد مقابل ہوں گے۔ میئر کراچی کیلئے جماعت اسلامی کے امیدواروں میں حافظ نعیم الرحمان، سیف الدین ایڈووکیٹ، جنید مکاتی شامل ہیں، پیپلز پارٹی کی جانب سے میئر کیلئے مرتضیٰ وہاب، نجمی عالم امیدوار ہوں گے۔ ڈپٹی میئر کیلئے جماعت اسلامی کے امیدوار سیف الدین اور قاضی صدر الدین امیدوار ہیں، پیپلز پارٹی کی جانب سے سلمان مراد، ارشاد شر ایڈووکیٹ اور کرم اللہ وقاص ڈپٹی میئر کیلئے امیدوار نامزد کیا گیا ہے، ذیشان زیب پی ٹی آئی اور اکرم اعوان اور یعقوب کالرو مسلم لیگ (ن) کے امیدوار ہیں۔ حیدرآباد میں پیپلز پارٹی کے کاشف شورو اور ڈپٹی میئر کیلئے صغیر قریشی امیدوار ہیں، مجموعی طور پر پیپلز پارٹی کے میئر و ڈپٹی میئر کے 8 امیدواروں نے نامزدگی فارم جمع کروائے ہیں، ٹی ایل پی کی جانب سے زاہد علی اور تابش حسین کو میئر و ڈپٹی میئر کا امیدوار نامزد کیا گیا ہے۔

لاہور: (ویب ڈیسک) اینٹی کرپشن عدالت میں پنجاب اسمبلی میں غیر قانونی بھرتیوں کے کیس میں سابق وزیر اعلیٰ پرویز الہٰی اور رائے ممتاز کی بعد از گرفتاری درخواست ضمانت پر سماعت ہوئی۔ سپیشل جج اینٹی کرپشن علی رضا اعوان نے درخواست کی سماعت کی، اس دوران چودھری پرویز الہٰی کے وکیل نے اپنے دلائل مکمل کیے جبکہ پراسیکیوشن آج بھی مقدمے کا ریکارڈ پیش نہ کر سکی، اینٹی کرپشن کی جانب سے جزوی ریکارڈ پیش کیا گیا۔ سرکاری وکیل نے عدالت کو بتایا کہ تفتیشی افسر کوئٹہ گیا ہوا تھا وہ واپس آ رہا ہے اور راستے میں ہے، پراسیکیوشن نے مکمل ریکارڈ پیش کرنے کیلئے مہلت مانگی جس پر عدالت نے آئندہ سماعت پر مکمل ریکارڈ پیش کرنے کا حکم دیتے سماعت 13 جون تک ملتوی کر دی۔ واضح رہے چودھری پرویز الہٰی اور دیگر پر پنجاب اسمبلی میں ریکارڈ میں رد و بدل کر کے بھرتیوں کا الزام ہے، انہوں نے تحریری امتحان میں فیل 12 امیدواروں گریڈ 17 کی ملازمت دی، سابق وزیر اعلیٰ پنجاب کے شریک ملزم رائے ممتاز حسین نے بھی درخواست ضمانت دائر کر رکھی ہے۔