شمالی وزیرستان ضلع کے علاقے شیوا میں دہشت گردوں کی جانب سے فوجی چیک پوسٹ پر فائرنگ کی گئی جس کے نتیجے میں 1 سپاہی شہید ہو گیا ہے۔

پاک فوج کے شعبہ تعلقات عامہ ( آئی ایس پی آر ) کے مطابق چیک پوسٹ پر موجود جوانوں نے دہشت گردوں کے حملے کا موثر جواب دیا ، فائرنگ کے شدید تبادلے میں نائیک نور مرجان نے جام شہادت نوش کیا۔

آئی ایس پی آر کا کہنا ہے کہ 32 سالہ نائیک نور مرجان شہید کا تعلق ضلع کرم سے ہے۔

پاک فوج کے ترجمان کا کہنا ہے کہ علاقے میں موجود دہشت گردوں کے خلاف سرچ آپریشن جاری ہے۔

وزیراعلی پنجاب سردار عثمان بزدار نے پاکستانی نژ ادامریکی خاتون کے قاتلوں کو ٹریس کرنے پر پولیس کو شاباش دی ہے۔
وزیراعلی کا کہنا تھا کہ تفتیشی ٹیم نے کیس کو پیشہ ورانہ اندازمیں حل کیا۔ پولیس ٹیم کاہائی پروفائل کیس کاسراغ لگانا قابل تعریف ہے۔ متعلقہ پولیس افسران،اہلکاروں نےکیس کومنطقی انجام تک پہنچایا۔ ملزمان کوقانون کی گرفت میں لاکرقانون کی عملداری کویقینی بنایاگیا۔
واضح رہے کہ پنجاب پولیس نے مورگاہ کے علاقہ سے اغواء ہونے والی پاکستانی نژاد امریکی خاتون وجہیہ سواتی کے اغواء کیس کا معمہ حل آج (ہفتے کو)حل کیا۔ مقتولہ کا سابقہ شوہر ہی قاتل نکلا، ملزم رضوان حبیب نے دوران تفتیش قتل کا اعتراف کیا۔ ملزم کے انکشاف پر مقتولہ کی نعش لکی مروت کے علاقہ پیزو سے برآمد کرلی گئی۔ سٹی پولیس آفیسر ڈی آئی جی ساجد کیانی نے پولیس لائنز ہیڈکوارٹرز میں وجیہہ سواتی کے اغواء کیس میں میڈیا سے گفتگو کرتے ہوئے بتایاکہ مورگاہ کے علاقہ سے 16 اکتوبر کو اغواء ہونے والی پاکستانی نژاد امریکی خاتون وجہیہ سواتی کے اغواء کا مقدمہ مقتولہ کے بیٹے کی مدعیت میں درج کیا گیا تھا جس کے بعد پولیس نے مغویہ کی رہائی کیلئے کاوشوں کا آغاز کردیا اور تمام ذرائع کو استعمال کرتے ہوئے کیس کی تفتیش کو آگے بڑھایا گیا، مورگاہ پولیس نے جدید ٹیکنالوجی اور ہیومن انٹیلی جینس کی مدد سے کئی شہروں میں تفتیش کی اور مقتولہ کے سابقہ شوہر رضوان حبیب کو گرفتار کیا، تفتیش کے دوران ملزم رضوان حبیب نے اعتراف کیا کہ وجہیہ سواتی کو راولپنڈی میں قتل کیا اور مقتولہ کی نعش کو لکی مروت کے علاقہ پیزو میں دفن کیا، ملزم کے انکشاف پر مقتولہ کی نعش کو مورگاہ پولیس نے لکی مروت کے علاقہ پیزو سے برآمد کر لیا ہے۔

مسلم لیگ ن کے سینئر رہنما اور سابق وفاقی وزیر داخلہ احسن اقبال نے کہا کہ سابق وزیراعظم نواز شریف کی واپسی کی خبریں آ رہی ہیں تو حکومت کی نیندیں اڑی ہوئی ہیں۔
تقریب سے خطاب میں مسلم لیگ ن کے سینئیر رہنما نے کہا کہ پاکستان بڑے بحرانوں میں گھرا ہوا ہے اور اگر تحریک پاکستان کی بنیاد ذاتی مفاد پر ہوتی تو پاکستان نہ بنتا لیکن ہزاروں کارکنوں نے لالچ سے پاک ہو کر پاکستان کے لیے قربانی دی۔
انہوں نے ملک کی سیاسی صورتحال پر بات کرتے ہوئے کہا کہ حزب اختلاف کے حکومت کے ساتھ مذاکرات جاری ہیں اور الیکشن کمیشن بلدیاتی و عام انتخابات میں اہم کردار ادا کرے گا۔ حکومت مذاکرات جلد مکمل کرے تاکہ اتفاق رائے سے تعیناتیاں ہوں اور حزب اختلاف کسی قسم کا ڈیڈلاک پیدا نہیں کرے گی۔ شہباز شریف سے وزیر اعظم کی بات نہ ہونے کے باعث عہدے خالی ہیں۔
ان کا کہنا تھا کہ خیبر پختونخوا اور پنجاب کے الیکشن کمیشن کے عہدے خالی ہیں اور آنے والے دنوں میں حکومت کے اتحادی بھی چھوڑ کر جا رہے ہیں۔
احسن اقبال نے کہا کہ محفوظ و خوشحال ملک بنانا چاہتے ہیں تو لیگی کارکنوں کو جدوجہد کو اپنانا ہو گا اور تصویروں کی سیاست سے پاکستان نہیں بن سکتا بلکہ ڈسپلن سے بنے گا۔ اس لیے ن لیگی کارکن ڈسپلن توڑنے کی روش ترک کریں۔
نواز شریف کی وطن واپسی سے متعلق بات کرتے ہوئے احسن اقبال نے کہا کہ جب نواز شریف کو معالجین کہیں تو وہ ایک دن ضائع کیے بغیر وطن واپس آئیں گے اور اب جب نواز شریف کی واپسی کی خبریں آ رہی ہیں تو حکومت کی نیندیں اڑی ہوئی ہیں۔
انہوں نے مزید کہا کہ ملک معاشی طور پر تباہ ہوا ہے اور اگر نئے ٹیکس لگ گئے تو عوام زندہ درگور ہو جائیں گے۔ ملک کو بچانا ہے تو نالائق و ناکام حکومت کو گھر بھیجنا ہو گا۔

اگرچہ اڑن طشتریوں اور خلائی مخلوق کا باہمی تعلق ہوتا ہے لیکن اب میسا چیوسیٹس انسٹی ٹیوٹ آف ٹیکنالوجی (ایم آئی ٹی) کے سائنسدانوں نے چاند کی تسخیر و تحقیق کے لیے ایک اڑن طشتری کا تصور پیش کیا ہے۔
یہ اڑن طشتری کسی سائنس فکشن فلموں کی طرح برقِ سکونی دھکیل قوت (الیکٹرواسٹیٹک ریپلشن) کے تحت چند پر کسی سائے کی طرح منڈلاتی رہے گی۔ بہت ہموار انداز میں یہ وہاں تحقیق کرسکے گی۔ وجہ یہ ہے کہ چاند پر کوئی حفاظتی فضا موجود نہیں اور اسی لیے وہاں سورج کا پلازمہ اور بالائے بنفشی (الٹرا وائلٹ) شعاعیں بوچھاڑ کی شکل میں گرتی رہتی ہیں۔
اس طرح چاند کی سطح پر مثبت چارج ہوتا ہے جو ایک ہلکی پھلکی اڑن طشتری کو ایک میٹر تک بلند کرسکتا ہے۔ عین اسی طرح ہم پلاسٹک کے ٹھوس ٹکڑے سے کاغذ کشش کرتے ہیں اور ہمارے بال بھی کھڑے ہوجاتے ہیں۔
اس طرح اڑن طشتری کسی گلائیڈر کی طرح اڑتی رہتی ہے۔ خیال ہے کہ اگر اڑن طشتری کے نیچے مائلر نامی مٹیریئل لگایا جائے تو اس پر مثبت چارج جمع ہوگا۔ اس طرح چاند کی سطح اور خود اڑن طشتری کی نچلی سطح کے مثبت چارج ایک دوسرے کو دفع کریں گے اور یہ ہوا میں معلق رہے گی۔
اب بھی خیال ہے کہ چاند کی ثقل اسے دوبارہ نیچے گراسکتی ہے جسے دور کرنے کے لیے اڑن طشتری کے اندر ہی مثبت چارج خارج کرنے والا ایک نظام بھی لگایا جائے جو اسے اٹھا سکے گا۔ اس کے لیے خاص تھرسٹر اور نوزل لگائے جائیں گے۔
اس کی افادیت کے لیے ایک ہتھیلی نما ماڈل آزمایا گیا جس کا وزن 60 گرام تھا۔ اسے ایک ویکیوم چیمبر میں لٹکایا گیا جہاں چاند جیسا ماحول پیدا کیا گیا تھا ۔ اس ماحول میں ماڈل ہوا میں معلق رہا جو اس ڈیزائن کے قابلِ عمل ہونے کو ظاہر کرتا ہے۔

پاکستان سول ایوی ایشن اتھارٹی (سی اے اے) کے ایئرٹریفک کنٹرولرز گلڈ کے چھٹے جنرل باڈی انتخابات ہوئے جس میں آصف رسول 211 ووٹ لیکر صدر منتخب ہو گئے ہیں۔

ایئرٹریفک کنٹرولرز گلڈ کے چھٹے جنرل باڈی انتخابات میں عبدالمنان ملک جنرل سیکرٹری، غلام مصطفیٰ موریجو ساؤتھ ریجن کے نائب صدر منتخب ہوئے ہیں جبکہ راحیل مقصود 117 ووٹ لیکر  نارتھ ریجن کے نائب صدر منتخب ہوئے ہیں۔

سلمان نذیر نارتھ اور عبدالصمد مگسی ساؤتھ ریجن کے فنانس سیکرٹری منتخب ہوئے ہیں۔

واضح رہے کہ چیئرمین الیکشن کمیٹی نے ایئر ٹریفک کنٹرولرز گلڈ کے انتخابات کے نتائج جاری کیے۔

سعودی عرب کے شہر مدینہ منورہ میں غیر قانونی طریقے سے رقم بیرونِ مملک بھیجنے کے الزام میں 5 پاکستانیوں کو گرفتار کرلیا گیا۔
سعودی خبر رساں ایجنسی کے مطابق مدینہ منورہ میں منی لانڈرنگ کے الزام میں 5 پاکستانیوں کو حراست میں لیا گیا ہے۔ ملزمان کے قبضے سے خطیر رقم بھی برآمد کی گئی ہے جس کے بارے میں ملزمان ذرائع نہ بتا سکے۔
سعودی پولیس کا کہنا ہے کہ ملزمان کے بیانات میں تضاد پایا جاتا ہے۔ ملزمان نے یہ رقم بیرون ملک منتقل کرنے کے لیے جمع کی تھی تاہم اس سے قبل ہی کارروائی کرتے ہوئے ملزمان سے رقم تحویل میں لے لی گئی۔
پولیس نے امکان ظاہر کیا ہے کہ یہ رقم دھوکہ دہی سے حاصل کی گئی ہے جس کے بارے میں تفتیش کی جا رہی ہے۔ ملزمان کو کل عدالت میں پیش کیا جائے گا۔ ملزمان کی شناخت ظاہر نہیں کی گئی ہے۔