لاہور: (ویب ڈیسک) چیئرمین پاکستان کرکٹ بورڈ (پی سی بی) رمیز راجہ ٹیسٹ کرکٹ کو تجربہ گاہ بنانے کا سوچنے لگے۔
برطانوی میڈیا کو انٹرویو دیتے ہوئے چیئرمین پی سی بی رمیز راجہ نے کہا کہ پاکستانی عوام کرکٹ کے حوالے سے بہت جذباتی ہے، اسی لئے میرا کام دباؤ سے بھرپور ہے، ہم کھیل کا انداز تبدیل کرنے کیلئے کرکٹرز کا نیا پول لانے کی کوشش کر رہے ہیں، انگلینڈ کی ٹیم ٹیسٹ کرکٹ بھی ٹی 20 کی طرح کھیل رہی ہے، اسی مزاج کی وجہ سے راولپنڈی کی بے جان پچ پر میچ کا نتیجہ ممکن بنایا۔
رمیز راجہ کا کہنا تھا کہ انہوں نے بابر اعظم سے کہا ہے کہ ٹیسٹ کرکٹ کیلئے ٹی 20 کرکٹرز منتخب کریں، ایک مختلف اپروچ کے ساتھ آپ ٹیم میں نئے چہرے دیکھیں گے، ہم چاہتے ہیں کہ ہماری اگلی نسل انگلینڈ کے طرز کی کرکٹ کھیلے، انھوں نے کہا کہ کوئی بھی 5 روزہ ٹیسٹ کرکٹ میں دلچسپی نہیں لیتا، یہ بحث پہلے ہی جاری ہے۔
ایک سوال پر رمیز راجہ نے کہا کہ ہم آسٹریلیا سے ہوم سیریز کیلئے بھی ایسی پچز چاہتے تھے جہاں ریورس سوئنگ اور اسپن ہو مگر ایسا ممکن نہیں ہوا، آسٹریلوی کیوریٹر کی خدمات حاصل کیں، مٹی کے لیب ٹیسٹ سمیت کئی جتن کئے، شاید مٹی کا ہی مسئلہ ہے کہ مطلوبہ نتائج حاصل نہیں ہوئے، ملتان کی پچ کے بارے میں کم ازکم یہ تو معلوم تھا کہ پہلے روز ہی گیند اسپن ہوگی۔
انھوں نے ایک بار پھر یہ موقف دہرایا کہ اگر بھارتی ٹیم ایشیا کپ میں شرکت کیلئے نہ آئی تو ہم ورلڈ کپ کھیلنے نہیں جائیں گے، فی الحال انٹرنیشنل ٹیموں کی پشاور میں میزبانی نہیں کرسکتے، جلد پی ایس ایل میچز وہاں ہوں گے، کئی اسٹیڈیمز ہماری تحویل میں نہیں، ہر بار لیز کی تجدید کرنا پڑتی ہے، فیصل آباد میں کام کیا مگر وہاں سیاسی جلسہ ہوگیا تو بنگلادیش انڈر19 کی میزبانی نہ کرسکے۔

دوحا: (ویب ڈیسک) مراکش کی جیت پر واکا واکا گرل شکیرا نے بھی خوشی کا اظہار کیا ہے۔
دوہزار دس کے فٹبال ورلڈ کپ میں اپنے ٹائٹل سانگ واکا واکا سے مشہور ہونے والی کولمبیا کی گلوکارہ شکیرا نے مراکش کی ٹیم کے سیمی فائنل میں پہنچنے پر ٹویٹ کیا ہے۔
“دیس THIS ٹائم فار افریقہ”، شکیرا نے مراکش کی جیت پر خوشی کا اظہار کرتے ہوئے تالیوں کا ایموجی بھی پوسٹ کیا۔
واضح رہے کہ مراکش فیفا ورلڈ کپ کی تاریخ میں سیمی فائنل میں پہنچنے والی پہلی عرب اور پہلی افریقی ٹیم بن گئی ہے۔

دوحا : (ویب ڈیسک) قطر میں جاری فیفا ورلڈ کپ 2022 کی سیمی فائنل لائن اپ مکمل ہو گئی۔
تفصیلات کے مطابق فیفا ورلڈ کپ 2022 کا کوارٹر فائنل مرحلہ اختتام پزیر ہوگیا جسکے بعد میگا ایونٹ کی ٹاپ فور ٹیموں کا بھی فیصلہ ہوگیا ہے۔
فیفا شیڈول کے مطابق میگا ایونٹ کا پہلا سیمی فائنل 14 دسمبر کو کروشیا اور ارجنٹائن کی ٹیموں کے درمیان کھیلا جائے گا ، دونوں ٹیمیں قطر کے لوسیل سٹیڈیم میں مدمقابل ہوں گی۔
میگا ایونٹ کا دوسرا سیمی فائنل معرکہ فرانس اور مراکش کے درمیان 15 دسمبر کو ہوگا جس میں دونوں ٹیمیں قطر کے البیت سٹیڈیم میں ایک دوسرے کے آمنے سامنے ہوں گی۔

دوحا : (ویب ڈیسک) فیفا ورلڈ کپ 2022 کے سیمی فائنل میں پہنچنے والی پہلی عرب ٹیم مراکش کے کھلاڑی سفیان بوفال کی والدہ کے ساتھ رقص کی ویڈیو سوشل میڈیا پر وائرل ہو گئی۔
قطر کے الثمامہ سٹیڈیم میں مراکش، پرتگال کو صفر کے مقابلے میں ایک گول سے شکست دے کر کسی بھی ورلڈ کپ کے سیمی فائنل میں پہنچنے والی پہلی افریقن اور عرب ٹیم بن گئی ہے۔
مراکش کی کامیابی کے بعد ان کے کھلاڑی سفیان بوفال اپنی والدہ کو گراؤنڈ میں لے آئے اور ان کے ساتھ والہانہ انداز میں ناچتے ہوئے جیت کا جشن منایا، جسے گرائونڈ میں موجود شائقین نے بہت سراہا۔
سفیال بوفال اور انکی والدہ کے رقص کی ویڈیو سماجی رابطے کی ویب سائٹ ٹوئٹر پر بھی وائرل ہے جس پر صارفین انہیں مبارکباد پیش کرتے ہوئے تعریفی پیغامات بھیج رہے ہیں۔