لاہور: (ویب ڈیسک) پاکستان کرکٹ ٹیم کے مایہ ناز آل راؤنڈر شعیب ملک نے ایک بار پھر اہلیہ، بھارتی معروف ٹینس سٹار ثانیہ مرزا سے علیحدگی سے متعلق افواہوں پر جواب دینے سے انکار کردیا۔
ایک انٹرویو کے دوران شو کے میزبان کا پوچھنا تھا کہ آپ اور ثانیہ مرزا میں میں علیحدگی سے متعلق بہت سی افواہیں زیرِ گردش ہیں، اس سوال کا مختصر سا صرف ہاں یا ناں میں جواب دے دیں۔
انہوں نے اس سوال کے جواب میں کہنا تھا کہ یہ ہمارا نجی معاملہ ہے، اسے متعلق میں اور نہ میری اہلیہ اس معاملے کا جواب دے رہے ہیں، اس کے لیے معذرت، اس لیے میں چاہتا ہوں کہ علیحدگی سے متعلق سوالوں کو آپ ہم سے دور ہی رکھیں، اس سوال کو چھوڑ ہی دیں۔
میزبان کی جانب سے مزید سوال پر شعیب ملک کا کہنا تھا کہ آنے والے وقت میں اگر ٹی وی سے اداکاری کی کوئی آفر آتی ہے تو میں ناں نہیں کروں گا، دیکھیں آگے کیا ہوتا ہے آنے والی زندگی میں، میں ہر چیز کے لیے تیار ہوں۔
آل راؤنڈر نے بتایا کہ کرکٹ مصروفیات کی وجہ سے فیملی کے لیے وقت نہیں ملتا تھا اور اب بیٹے اذہان نے بھی اسکول جانا شروع کر دیا ہے جس کے بعد میں نے فیملی سے بات کی اور فیصلہ کیا کہ کرکٹ کم کھیلی جائے، پہلے میں ہر لیگ کھیلتا تھا جو اب میں نے کم کر دی ہے لیکن اب بھی کرکٹ پریکٹس اور فٹنس پر توجہ بھرپور ہے۔
انہوں نے بابر اعظم، ٹیم میں اپنی سلیکشن اور ٹی 20 ورلڈ کپ سے متعلق بات کی اور کہا کہ کپتان کو چھوٹا بھائی سمجھتا ہوں، بابر نے مجھے ایشیا کپ کے دوران ہی کہہ دیا تھا کہ ورلڈ کپ میں یہی ٹیم جائے گی، بابر کو جب بھی میری ضرورت پڑی ہمیشہ سے ہوں اور ہمیشہ اس کے پاس رہوں گا، اگر میں کسی وجہ سے ٹیم میں نہیں ہوا تو ایسا ہر گز نہیں ہے کہ میں بابر سے منہ بنا لوں یا ناراض ہو جاؤں، میری دعائیں ہمیشہ بابر کے ساتھ ہیں اور میں ہمیشہ سے چاہتا ہوں بابر ترقی کرے اور ہمیشہ وہ سرفہرست رہے، مجھے بابر سے کوئی گلہ نہیں تاہم ورلڈکپ کے بعد سے بابر سے کوئی گفتگو نہیں۔
ایک سوال کے جواب میں شعیب ملک کا کہنا تھا کہ جو لوگ یہ سوچتے ہیں میری سلیکشن سے متعلق ٹوئٹ کی وجہ سے قومی ٹیم میں سلیکشن نہیں ہو سکی وہ غلط سوچتے ہیں، میں نے وہ ٹوئٹ اس لیے کی جو میں نے دیکھا اس میں بہتری آسکی، میں ہرگز دل برداشتہ نہیں ہوں۔
کرکٹ سے ریٹائرمنٹ کے سوال پر شعیب ملک کا کہنا تھا کہ کرکٹ سے ریٹائر ہونے کا بالکل بھی ارادہ نہیں جب بھی ایسا سوچوں گا سب کو پتہ چل جائے گا، ابھی سارا فوکس کرکٹ پر ہے لیکن لیگ کرکٹ کو کم کردیا ہے، جب بھی ریٹائرمنٹ کا ارادہ کیا تو لیگ کرکٹ سمیت تمام فارمیٹ سے ریٹائر ہو جاؤں گا۔

ملتان: (ویب ڈیسک) قومی لیگ سپنر بولر ابرار احمد نے کہا کہ انگلش بلے باز جو روٹ اور کپتان بین سٹوکس کو آؤٹ کرنے کا خواب پورا ہو گیا۔
ابرار احمد نے کہا کہ بین اسٹوکس کی وکٹ شاندار تھی، انگلینڈ کے خلاف زبردست پرفارمنس پر بہت خوشی ہوئی، دوسری اننگز میں بھی اچھی بولنگ کا عزم ہے۔
قومی بولر ابرار احمد نے انگلینڈ کے خلاف سیریز کے دوسرے ٹیسٹ میچ میں ڈیبیو پر کھیلتے ہوئے لنچ سے قبل 5 وکٹیں لیکر 13ویں پاکستانی بولر ہونے کا اعزاز حاصل کرلیا۔
لیگ سپینر انگلینڈ کے خلاف ڈیبیو میچ میں 7 وکٹیں حاصل کرنے والے تیسرے پاکستانی بولر بھی بن گئے ہیں۔
ابرار نے 22 اوورز میں زیک کرولی کو 19، بین ڈکٹ 63، اولی پوپ 60، جو روٹ 8، ہیری بروک 9 کپتان بین اسٹوکس 30، ول جیکس کو 31 رنزپرآؤٹ کیا۔

ملتان: (ویب ڈیسک) دوسرے ٹیسٹ میچ کے پہلے روز ڈیبیو کرنے والے ابرار احمد کی تباہ کن باؤلنگ کی بدولت انگلینڈ کی ٹیم اپنی پہلی اننگز میں 281 رنز پر ڈھیر ہوگئی جبکہ پاکستان نے 2 وکٹ کے نقصان پر 107 رنز بنالئے ہیں۔
ملتان کرکٹ سٹیڈیم میں کھیلے جارہے میچ میں پاکستان نے اپنی اننگز کا پر اعتماد انداز میں آغاز کیا جبکہ پاکستان کو انگلینڈ کے خلاف 174 رنز کا خسارہ ہے، کپتان بابر اعظم 61 اور سعود شکیل 32 رنز پر ناٹ آؤٹ ہیں۔
قومی ٹیم کی جانب سے عبداللہ شفیق اور امام الحق نے اننگز کا آغاز کیا، عبداللہ 14 اور امام الحق صفر پر پویلین لوٹ گئے، جیمز اینڈرسن اور جیک لیچ نے ایک، ایک وکٹ اپنے نام کی۔
ملتان ٹیسٹ میں انگلینڈ کی ٹیم پاکستان کیخلاف دوسرے ٹیسٹ کے پہلے روز 281 رنز بنا کر پویلین واپس لوٹ گئی۔
ملتان کرکٹ سٹیڈیم میں کھیلے جارہے میچ میں قومی ٹیم کیلئے ڈیبیو کرنے والے ابرار احمد نے انگلش ٹیم کے 7 کھلاڑیوں کو پویلین کی راہ دیکھائی، زیک کرولی 19، بین ڈکٹ63، اولی پوپ 60، جو روٹ 8، ہیری بروک 9 ،بین سٹوکس 30 اور ول جیکس 31 رنز بنا کر آؤٹ ہوئے۔
اس سے قبل انگلش ٹیم کے کپتان بین اسٹوکس نے ٹاس جیت پہلے بیٹنگ کرنے کا فیصلہ کیا، انہوں نے کہا کہ راولپنڈی سے مختلف پچ ہے کوشش ہوگی پاکستان کو انڈر پریشر رکھیں۔
اس موقع پر قومی ٹیم کے کپتان بابراعظم نے کہا کہ ٹاس جیتتے تو پہلے بیٹنگ کرتے تاہم جلد انگلش بیٹرز کی وکٹیں حاصل کرکے میچ میں کم بیک کریں گے۔
دوسری جانب قومی ٹیم کے نوجوان فاسٹ باؤلر نسیم شاہ اور حارث رؤف انجریز کے باعث ملتان ٹیسٹ سے باہر ہو گئے ہیں۔
واضح رہے کہ قومی ٹیم میں تین تبدیلیاں کی گئیں، ابرار احمد کا آج ڈیبیو ہوا ہے جبکہ نسیم شاہ اور اظہر علی کی جگہ فہیم اشرف اور محمد نواز کو پلئینگ الیون کا حصہ بنایا گیا ہے۔