پاکستان ڈیمو کریٹک موومنٹ (پی ڈی ایم) نے مسجد نبویﷺ میں نعروں کے معاملے پر 6 مئی کو ملک بھر میں یوم حرمت رسول ﷺ منانے کا اعلان کر دیا ہے۔
پی ڈی ایم کی اسٹیئرنگ کمیٹی کا اجلاس شاہد خاقان عباسی کے زیر صدارت ہوا، اجلاس میں پی ڈی ایم میں شامل جماعتوں کے نمائندے ورچوئلی شریک ہوئے۔
اجلاس میں فیصلہ کیا گیا کہ 6 مئی کو ملک بھر میں یوم حرمت رسولﷺ منایا جائے گا، 6 مئی کو جمعہ کی نماز کے بعد ملک بھر میں اجتماعات ہوں گے۔
اس حوالے سے اجلاس میں فیصلہ کیا گیا کہ پی ڈی ایم کی صوبائی جماعتیں احتجاج کیلئے تیاریاں سے شروع کریں گی۔

امیر طالبان ملا ہبتہ اللہ اخوندزادہ دوسری بار منظر عام پر آگئے اور افغانستان کے صوبے قندھار میں عید الفطر کے اجتماع سے مختصر خطاب کیا۔
افغان میڈیا کے مطابق ملک بھر میں آج عید الفطر مذہبی جوش و جذبے کے ساتھ منائی گئی۔ طالبان کے حکومت سنبھالنے کے بعد یہ پہلی عید تھی جس کی سب سے خاص بات عید اجتماع میں امیر طالبان کی شرکت تھی۔
امیر طالبان ملا ہبتہ اللہ اخوندزادہ اپنی جماعت کے اقتدار میں آجانے کے باوجود سیاسی اور سماجی منظر نامے میں آنا پسند نہیں کرتے اور اب تک صرف دو مرتبہ منظر عام پر آئے ہیں۔
چند ماہ قبل امیر طالبان نے قندھار میں ہی ایک مدرسے کی تقریب اسناد کی تقریب میں سے شرکت کی تھی اور عوامی اجتماع سے خطاب کیا تھا۔
اسی طرح آج دوسری بار قندھار کی مرکزی عید گاہ میں امیر طالبان نے نماز عید ادا کی اور شرکاء سے مختصر خطاب بھی کیا۔ اس موقع پر لوگوں کا جوش و خروش دیدنی تھا۔
امیر طالبان نے کہا کہ اس عید کی خوشی اپنی سرزمین پر اللہ کا نظام نافذ ہونے سے دوگنی ہوگئی ہے۔ عظیم کامیابی اور آزادی پر پوری قوم کو مبارکباد دیتا ہوں۔
تاہم پہلی مرتبہ کی طرح اس بار بھی امیر طالبان کی آمد پر تصویریں بنانے اور موبائل فون کے استعمال پر پابندی عائد کی گئی تھی جس کے باعث تصاویر سامنے نہیں آئیں۔

پاکستان سپر لیگ (پی ایس ایل) کے 8 ویں سیزن کے لیے مجوزہ ونڈو کا تعین کرلیا گیا، ایونٹ آئندہ برس 15 فروری سے 31 مارچ تک مکمل کرلیا جائے گا۔
پی سی بی ذرائع کے مطابق پی ایس ایل کے میچز اس بار چار شہروں میں ہوں گے، ایونٹ کے لیے کراچی اور لاہور کے بعد ملتان اور راولپنڈی کو بھی میزبانی کے لیے فائنل کرلیا گیا ہے۔
ذرائع کے مطابق جنوری 2023ء میں نیوزی لینڈ کو دو ٹیسٹ اور وائٹ بال سیریز کے لیے دورہ کرنا ہے جس کے بعد ویسٹ انڈیز کی ٹیم ٹی ٹوئنٹی سیریز کے لیے پاکستان آئے گی۔
نیوزی لینڈ اور ویسٹ انڈیز سے سیریز کے فوری بعد پی ایس ایل کا انعقاد ہوگا، ٹیموں کی 4 شہروں میں آمدورفت کے پیش نظر ٹورنامنٹ کا دورانیہ زیادہ رکھا گیا ہے تاکہ شیڈول میں آسانی ہو اور کھلاڑیوں کو مناسب آرام بھی مل سکے۔

لاہور:(دنیا نیوز) زونل رویت ہلال کمیٹی کی جانب سے اعلان کیا گیا ہے کہ کراچی اور لاہور سمیت پنجاب میں شوال کا چاند نظر نہیں آیا۔

لاہور اور کراچی میں زونل رویت ہلال کمیٹی کے اجلاس کا انعقاد کیا گیا، چیئرمین کمیٹی کی جانب سے اعلان کیا گیا کہ لاہور سمیت پنجاب میں شوال کا چاند نظر نہیں آیا، حتمی اعلان مرکزی رویت ہلال کمیٹی ہی کرے گی۔

ادھر چیئرمین مرکزی رویت ہلال کمیٹی مولانا عبدالخبیر آزاد کے زیر صدارت شوال کے چاند کی رویت کے لیے اجلاس اسلام آباد میں جاری ہے۔

اجلاس میں زونل رویت ہلال کمیٹی کے ممبران اور محکمہ موسمیات کے افسران بھی چاند دیکھنے کے لئے موجود ہیں۔

محکمہ موسمیات کا کہنا ہے کہ 6 بجکر 44منٹ سے لے کر 7 بجکر 20 منٹ تک چاند کا دورانیہ ہے، چاند کی عمر 17 گھنٹے ہے، 20 گھنٹے ہونا ضروری ہے ۔

دوسری جانب محکمہ موسمیات نے پیش گوئی کی ہے کہ شوال کا چاند آج نظر آنے کا امکان نہیں ہے۔ عید الفطر 3 مئی کو ہو گی۔

واضح رہے کہ سعودی عرب میں بھی شوال کا چاند نظر نہیں آیا۔ عرب نیوز کی رپورٹ کے مطابق سعودی عرب میں یکم شوال عید الفطر دو مئی بروز سوموار کو ہو گی۔ متحدہ عرب امارات، اومان سمیت دیگر خلیجی ممالک میں بھی شوال کا چاند نظر نہیں آیا۔

شیخ رشید کے بھتیجے شیخ راشد شفیق کو مسجد نبوی ﷺ میں پیش آئے افسوسناک واقعے میں ملوث ہونے کے الزام میں اسلام آباد ائیرپورٹ پہنچنے پر گرفتار کیا گیا تھا۔اس معاملے پر ردعمل دیتے ہوئے شیخ رشید نے راشد شفیق کی گرفتاری کی مذمت کرتے ہوئے کہا کہ حکومت انتقام پر اتر آئی ہے۔ میڈیا سے گفتگو میں شیخ رشید کا کہنا تھا کہ مقدمے کے اندراج کے بعد 150 افراد کے گھروں پر چھاپے مارے جا رہے ہیں، یہ لوگ جہاں بھی جائیں گے ان کے خلاف نعرے لگیں گے، لوگ انہیں انڈے اور ٹماٹر ماریں گے۔شیخ رشید نے کہا کہ ہم میں سے کوئی سعودی عرب میں نہیں تھا پھر بھی مقدمہ درج کیا گیا۔تحریک انصاف کے رہنما فواد چوہدری نے کہا کہ ابھی تو لانگ مارچ کا اعلان ہوا ہے، آپ ابھی سے گھبرا گئے اور پی ٹی آئی قیادت پر ایف آئی آر درج کرنے کا سلسلہ شروع کر دیا، آپ نے اب گھبرانا ہے، عوام کا سمندر آپ کو بہالے جانے کے لیے تیار ہے۔فواد چوہدری نے مزید کہا کہ جب دماغ سن ہو جائے تو ایسی اوچھی حرکتیں ہوتی ہیں۔