لاہور:(ویب ڈیسک) سابق وزیراعظم عمران خان کی اہلیہ بشری بی بی کے ساتھ آڈیو لیک ہونے کے معاملے پر پی ٹی آئی رہنما ذلفی بخاری کا ردعمل آ گیا۔
اپنی ٹوئٹ میں انہوں نے کہا کہ پہلے کہا جا رہا تھا کہ عمر ظہور نامی کسی شخص کو فرح گجر کے ذریعے گھڑیاں بیچی گئیں، جب ان کو لیگل نوٹس بھیجا تو اب نئی کہانی سامنے آگئی ہے
انہوں نے لکھا کہ اصل میں یہ گھڑی میرے ذریعے بیچی گئیں، میں واضع کر دوں کوئی گھڑی نہ میں نے لی نہ میں نے بیچی۔
ان کا کہنا تھا کہ اس طرح کی cut-copy-paste آڈیو کالج کے بچے بھی بنا لیتے ہیں۔ فوری اسکا فرانزک کرایا جائے ، میں اس کے پیسے اپنی جیب سے دینے کو تیار ہوں۔

لاہور: (ویب ڈیسک) پاکستان تحریک انصاف (پی ٹی آئی) کی رہنما اور پنجاب حکومت کی ترجمان مسرت جمشید چیمہ نے کہا ہے کہ عمران خان 15 سے 20 دسمبر کے درمیان اسمبلیوں کی تحلیل کا ارادہ رکھتے ہیں۔
اسمبلیوں کی تحلیل کے حوالے سے بیان دیتے ہوئے انہوں نے کہا کہ خیال احمد کاسترو ایک ہفتے کیلئے وزیر بنے ہیں، وزیر اعلیٰ پرویز الٰہی نے عمران خان سے خیال کاسترو کو صرف محکمہ دینے کی بات کی تھی، ان سے پرویز الٰہی نے وزارت دینے کی بات نہیں کی تھی۔
مسرت جمشید چیمہ کا مزید کہنا تھا کہ وزارت دینے پر عمران خان نے کم لیکن باقی قیادت نے زیادہ ردعمل دیا، وزرات کا حلف نہ ہوتا تو زیادہ بہتر ہوتا، عمران خان کی وزیر آباد واقعہ پر ایف آئی آر درج نہیں ہوتی، باقی ہوجاتی ہیں۔
انہوں نے کہا کہ ڈاکٹر شہباز گل کے خلاف ایف آئی آر کیسے درج ہوئی ہم تحقیقات کررہے ہیں۔

اسلام آباد: (ویب ڈیسک)وزیراعظم شہباز شریف نے ٹانک میں سیلاب متاثرین کے لیے تعمیرگھروں کی چابیاں متاثرین میں تقسیم کردیں ۔
ٹانک میں سیلاب متاثرین کے لیے رہائشی یونٹ کی افتتاحی تقریب سے خطاب کرتے ہوئے وزیراعظم شہباز شریف کا کہنا تھا کہ مخیر حضرات کے تعاون سے سیلاب متاثرین کے لیےگھروں کی تعمیر قابل تعریف ہے، آج کا پروگرام نبی کریم ﷺ کے اسوہ حسنہ کی جانب قدم ہے۔
وزیراعظم شہباز شریف کا کہنا تھا کہ سیلاب سے ملک بھر میں 20 لاکھ گھر مکمل یا جزوی تباہ ہوئے، وفاقی اور صوبائی حکومتوں کی سیلاب متاثرین کی مدد قابل تحسین ہے، سیلاب سے ملک بھر میں مواصلات اور بجلی کا نظام بھی تباہ ہوا، سندھ میں سیلاب سے سب سے زیادہ تباہی ہوئی، بی آئی ایس پی کے تحت حکومت متاثرین میں 70 ارب روپے تقسیم کرچکی ہے۔
وزیراعظم کا کہنا تھا کہ سیلاب کےدوران این ڈی ایم اے اور پی ڈی ایم اے نے بہترین کام کیا، دوست ملکوں کا شکریہ جنھوں نے مشکل گھڑی میں پاکستان کی مدد کی، مخیر حضرات نے سیلاب کے دوران خاموشی سے کام کیا، ڈھول نہیں بجایا، افواج پاکستان نے سیلاب متاثرین کی بہت مدد کی، وزیراعظم ریلیف اکاؤنٹ میں4 یا 5 ارب روپے کے فنڈز جمع ہوچکے ہیں۔
اس موقع پر وزیراعظم شہباز شریف نےکاروباری افراد اور بیرون ملک مقیم پاکستانیوں سے سیلاب زدگان کی مدد کرنے کی اپیل بھی کی۔

لاہور: (ویب ڈیسک) چیئرمین پاکستان تحریک انصاف عمران خان نے کہا ہے کہ میں نے کبھی جنرل (ر) باجوہ کو باس نہیں کہا، میں وزیر اعظم تھا، نئے آرمی چیف کو پرانے آرمی چیف کی پالیسیز کو لے کر نہیں چلنا چاہئیے۔
سابق وزیر اعظم عمران خان نے زمان پارک میں یوٹیوبرز سے گفتگو کرتے ہوئے کہا کہ جنرل فیض کو آرمی چیف بنانے سے متعلق کبھی نہیں سوچا تھا ان کے خلاف پراپیگنڈہ کیا گیا۔ پرویز الٰہی نے مجھ پر مکمل اعتماد کیا ہے جیسا میں چاہوں گا وہ ویسا کریں گے۔
چیئرمین تحریک انصاف عمران خان نے مزید کہا کہ پہلے بھی نیب اسٹیبلشمنٹ کے ماتحت تھی صرف کمزروں پر ہاتھ ڈالتی رہی، معاشرہ اس وقت تک تگڑا نہیں ہوتا جب تک انصاف نہ ہوتا ہو۔
عمران خان نے کہا کہ سب سے بڑا اثاثہ اوورسیز پاکستانی ہیں اگر وہ سرمایہ کاری کریں تو پاکستان کو کسی اور ملک سے مانگنے کی ضرورت نہیں۔ ارشد شریف کی والدہ نے جن کے نام لئے وہی نام میں نے لئے ایف آئی آر ارشد شریف کی والدہ کی خواہش پر ہونی چاہئیے۔
چیئرمین تحریک انصاف نے کہا کہ سلمان شہباز کی واپسی این آر او ٹو کا حصہ ہے،دو خاندانوں نے اداروں کو کمزور کیا، اداروں کو مارشل لا کی عادت پڑ گئی تھی جب حکومت میں آئے تو ہر قسم کا مافیا موجود تھا مگر ان کے خلاف ایکشن نہیں لے سکے۔
سابق وزیر اعظم کا کہنا تھا کہ مذہبی انتہا پسندی کو روکنے کا ایک ہی طریقہ ہے کہ لوگوں کو دین کی زیادہ معلومات دی جائیں، میرے اوپر حملے کا اڑھائی ماہ پہلے پلان بنایا گیا، پلاننگ کے ذریعے ویڈیوز کو ریلیز کیا گیا۔

اسلام آباد: (ویب ڈیسک) نیب ترامیم کی حمایت کرتے ہیں یا نہیں؟ سپریم کورٹ نے نیب سے واضح جواب مانگ لیا۔
سپریم کورٹ میں نیب ترامیم کیخلاف عمران خان کی درخواست پر سماعت ہوئی اس دوران نیب سے تحریری جواب مانگ لیا۔ عدالت نے زیرالتواء تحقیقات میں مقدمات کی مالیت کی تفصیلات بھی مانگ لیں ہیں، جس پر وفاق کے وکیل مخدوم علی خان نے استدعا پرمہلت مانگی ہے۔
دوران سماعت عمران خان کے وکیل نے دلائل دیتے ہوئے کہا کہ سپریم کورٹ ماضی میں بھی قانون سازی کی ہدایات دے چکی ہے، آرمی چیف تعیناتی کیس میں بھی پارلیمان کو قانون سازی کیلئے وقت دیا گیا۔
خواجہ حارث نے دوران سماعت کہا کہ بعض فیصلوں میں عدالت نے مجوزہ قوانین کا مسودہ بھی پارلیمان کو دیا، نیب ترامیم سے وہ کیسز بھی دوبارہ کھلیں گے جن میں عدالتیں فیصلے کر چکی۔
خواجہ حارث کا مزید کہنا تھا کہ این آر او کیس میں بھی وہ مقدمات دوبارہ کھلے تھے جو آرڈیننس کے ذریعے بند ہوئے تھے،جن ملزمان کو عدالتیں سزائیں دے چکی ہیں انکے کیسز ترمیم کے بعد کیسے ختم ہوسکتے؟
جس کے بعد جسٹس منصور علی شاہ نے خواجہ حارث سے استفسار کیا کہ آپ کے دلائل مکمل ہوچکے ہیں؟ اس کے جواب میں عمران خان کے وکیل نے کہا کہ دلائل مکمل کرنے کیلئے مزید دو دن درکار ہیں۔
عدالت نے عمران خان کے وکیل کو سوموار تک دلائل مکمل کرنے کی ہدایت کر دی جبکہ وفاقی حکومت کے وکیل مخدوم علی خان آئندہ سال جنوری سے دلائل کا آغاز کرینگے، کیس کی مزید سماعت سوموار کو ہوگی۔