میٹا نے ٹویٹر کا مقابلہ کرنے کیلئے نئے فیچر بنانے پر غور شروع کر دیا

لاہور: (ویب ڈیسک) فیس بک کی مالک کمپنی میٹا نے ٹوئٹر کا مقابلہ کرنے کیلئے نئے متبادل فیچر بنانے پر غور شروع کر دیا ہے۔
امریکی میڈیا میں شائع رپورٹ کے مطابق نومبر میں میٹا کے ملازمین کی جانب سے ٹوئٹر کی موجودہ صورتحال کو دیکھتے ہوئے اس کے صارفین کو اپنی جانب لانے کیلئے مختلف منصوبوں پر غور کیا گیا۔ میٹا کے عملے نے ٹویٹر کے متبادل لانے کیلئے مختلف چیزوں پر تبادلہ خیال کیا۔
ایک خیال یہ کیا جا رہا ہے کہ انسٹاگرام میں نوٹس کے نام سے ٹویٹر جیسا فیچر متعارف کرایا جائے۔ اسی طرح یہ تجویز بھی سامنے آئی ہے کہ ٹیکسٹ پر مبنی ایک نئی ایپ تیار کی جائے یا ٹوئٹر جیسی نئی فیڈ انسٹاگرام میں شامل کی جائے، جسے رئیل ٹائم یا رئیل ریلز کا نام دیا جاسکتا ہے۔
میٹا کے ایک عہدیدار نے اس حوالے سے بتایا کہ ٹوئٹر کو بحران کا سامنا ہے جبکہ میٹا کو اپنا جادو پھر بحال کرنا ہے۔
اس وقت میٹا کی صورتحال بھی کچھ زیادہ اچھی نہیں، جس کے باعث بڑے پیمانے پر ملازمین کو فارغ کیا گیا۔ میٹا کی جانب سے کسی ایپ کی نقل کرنے کا سوچنا نیا نہیں، اس وقت انسٹاگرام ایپ کافی حد تک ٹک ٹاک کی طرح کام کررہی ہے۔
فیس بک پر بھی ٹک ٹاک کی طرح مختصر ویڈیوز پر زیادہ توجہ دی جارہی ہے۔ ٹک ٹاک سے قبل انسٹاگرام نے اسنیپ چیٹ کے کامیاب فیچر اسٹوریز کو اپنالیا تھا۔