اسلام آباد: (ویب ڈیسک) وزیر اعظم محمد شہباز شریف نے کہا ہے کہ پاکستان اور قطر کے قریبی اور برادرانہ تعلقات، مشترکہ مذہب، باہمی اعتماد اور مفاہمت پر مبنی ہیں۔
قطر کے سفیر سعود بن عبدالرحمٰن الثانی کی وزیراعظم شہباز شریف سے ملاقات ہوئی، ملاقات کے دوران قطر کے سفیر نے قطر کے عوام اور قیادت کی طرف سے پاکستان کی قیادت اور عوام کیلئے نیک خواہشات کا اظہار کیا۔
وزیراعظم نے دوطرفہ تعلقات میں مثبت پیشرفت کو سراہا اور قطر میں فیفا 2022 ء ورلڈ کپ کی کامیاب میزبانی پر قطری قیادت کو مبارکباد دی۔
انہوں نے افرادی قوت کے شعبے میں قطر کی جانب سے کی گئی قابل ذکر اصلاحات کو سراہا اور کہا کہ پاکستان فیفا ورلڈ کپ 2022 ءکے لئے سکیورٹی اہلکار فراہم کرکے ورلڈ کپ میں مدد کرنے پر خوشی اور اعزاز محسوس کررہا ہے، یہ فخر کی بات ہے کہ ورلڈ کپ میں استعمال ہونے والا فٹ بال ’’الرحلہ‘‘ میڈ ان پاکستان ہے۔
ان کا کہنا تھا کہ پاکستان اور قطر کے درمیان قریبی اور خوشگوار برادرانہ تعلقات ہیں جن کی بنیاد مشترکہ مذہب، باہمی اعتماد اور افہام و تفہیم اور قریبی تعاون ہے، قطر 2 لاکھ 10 ہزار سے زائد پاکستانیوں کا گھر ہے جو دونوں برادر ممالک کی ترقی، خوشحالی اور اقتصادی ترقی میں اپنا کردار ادا کر رہے ہیں۔

اسلام آباد: (ویب ڈیسک) وزیر داخلہ رانا ثنا اللہ نے کہا ہے کہ عمران خان مخالفین کو گالیاں دیتے ہیں، ایسے میں مذاکرات کیسے ہوسکتے ہیں۔
نجی ٹی وی کے پروگرام میں گفتگو کرتے ہوئے انہوں نے کہا کہ مذاکرات کی سنجیدہ آفر ہوئی تو حکومت ضرور غور کرے گی۔ اسحاق ڈار نے صدر کو اپنا اثرورسوخ استعمال کرنے کا مشورہ دیا ہے۔
انہوں نے کہا کہ سیاستدان بیٹھیں تو ڈیڈلاک ٹوٹتے ہیں، پی ٹی آئی نے اسمبلیاں توڑنی ہیں تو توڑ دیں، وفاقی حکومت صوبائی الیکشن لڑنے کیلئے تیار ہے، پرویز الہیٰ سے ہمارا ابھی رابطہ نہیں لیکن رابطہ ہو سکتا ہے۔
رانا ثنااللہ نے کہا کہ پرویز الہٰی پنجاب اسمبلی نہیں توڑیں گے،وہ پرانے اور تجربہ کار سیاستدان ہیں،اس قسم کے احمقانہ فیصلے عمران خان کر سکتے ہیں پرویز الہٰی نہیں۔
ایک سوال کے جواب میں ان کا کہنا تھا کہ عمران خان جیسا بندہ وزیراعظم بن سکتا ہے تو راجہ ریاض اپوزیشن لیڈر کیوں نہیں بن سکتا۔
ارشد شریف قتل کیس سے متعلق سوال ان کا کہنا تھا کہ اس کیس کی میرٹ پر تفتیش ہوگی، مخصوص لابی اسے ذاتی اور گروہی مقاصد کیلئے استعمال کرنے کی کوشش کررہی ہے۔
انہوں نے کہا کہ اس کیس میں پہلے کوئی تفتیش نہیں ہوئی،جے آئی ٹی بننے کے بعد وہی تفتیش کرے گی،ہم نے فوری طور پر فیکٹ فائنڈنگ کمیٹی بنائی تھی،حکومت نے انکوائری کمیشن کے لیے لکھا تھا۔
ان کا کہنا تھا کہ ارشد شریف کا قتل دوسرے ملک میں ہوا تھا،جب تک تفتیش کا رزلٹ نہ آئے کچھ نہیں کہہ سکتے2،3بندے ایسے ہیں جن کا اس واقعہ سے تعلق بنتا ہے۔
وزیر داخلہ نے کہا کہ ارشد شریف کو کینیا بجھوانے میں یہ لوگ ملوث ہیں،اگر کوئی پاکستانی اس میں ملوث نہ پائے تو کسی غیر ملکی کیخلاف مقدمہ درج نہیں کر سکتے۔

دوحہ: (ویب ڈیسک) ان دنوں قطر میں فیفا ورلڈکپ کے سنسنی خیز میچز جاری ہیں اس دوران پاکستان کے وزیر خارجہ اور پیپلز پارٹی کے چیئرمین بلاول بھٹو بھی قطر پہنچے اور میدان میں میچ دیکھا۔
وزیرخارجہ بلاول بھٹوزرداری فیفاورلڈ کپ میچزد یکھنےگز شتہ روز قطر پہنچے تھے، وہ قطری وزارت خارجہ کے دعوت نامے پر قطر گئے ہیں۔
سوشل میڈیا پر بیان جاری کرتے ہوئے بلاول بھٹو نے کہا کہ فیفاورلڈکپ میں مدعو کرنے پر قطر کے وزیرخارجہ کا مشکور ہوں۔
ان کا کہنا تھا کہ ورلڈ کپ کے تاریخی لمحات میں پاکستانی لیبر،سکیورٹی فورسز کی شراکت پر پاکستان کو فخر ہے۔
انہوں نے قطرکو تاریخ رقم کرنے پر مبارکباد پیش کی اور فیفا کے صدر کے ساتھ لیاری کی فٹبال صلاحیتوں پر بھی تبادلہ خیال کیا۔

لاہور: (ویب ڈیسک) پاکستان تحریک انصاف کے زیر اہتمام الیکشن کراؤ ملک بچاؤ ریلی جاری،ریلی کی قیادت بیرسٹر میاں حماد اظہر کر رہے ہیں۔
تحریک انصاف کی الیکشن کراؤ ملک بچاؤ ریلی میں عابد میر، عفیف صدیقی ،میاں عابد، ملک ظہیر ،انیس سروز، مرزا خان سمیت دیگر رہنماؤں نے شرکت کی۔
رہنما تحریک انصاف حماد اظہرنے ریلی کے شرکاء سے خطاب کرتے ہوئے کہا کہ کفرکا نظام چل سکتا ہےظلم کا نہیں، الیکشن کرانا ہمارا حق ہے، امپورٹڈ حکومت الیکشن سے بھاگ رہی ہے۔
انہوں نے مزید کہا کہ آج پورا پاکستان عمران خان کی طرف دیکھ رہا ہے، آج ہم الیکشن کراؤملک بچاؤتحریک کا اعلان کرتے ہیں۔