کوئٹہ: (ویب ڈیسک) چیف آف سراوان اور سابق وزیراعلیٰ بلوچستان نواب اسلم رئیسانی نے ساتھیوں کے ہمراہ جمعیت علمائے اسلام میں شمولیت کا اعلان کردیا۔
کوئٹہ میں ہونے والی شمولیتی تقریب میں جمعیت علمائے اسلام کے سربراہ مولانا فضل الرحمان نے بھی شرکت کی۔
تقریب سےخطاب میں مولانا فضل الرحمان کا کہنا تھاکہ اسلم رئیسانی کو کئی بار جے یو آئی میں شامل ہونے کی دعوت دی لیکن آج اپنے مقصدمیں کامیاب ہوگئے۔
انہوں نے کہا کہ بلوچستان میں مسائل کا انبارہے، وسائل کچھ نہیں، صوبے کےعوام کو یہاں کے وسائل کا مالک سمجھتے ہیں۔

اسلام آباد: (ویب ڈیسک) نیب ترامیم کیس کی سماعت کے دوران سپریم کورٹ کے جسٹس منصور علی شاہ نے ریمارکس دے کہ آپ کے دلائل کے مطابق تو نیب ترامیم منظور کرنے والی پارلیمان نے عوامی اعتماد توڑا ہے اس طرح تو نیب ترامیم منظور کرنے والے تمام اراکین کو آرٹیکل 62 ون ای کے تحت نااہل ہو جانا چاہئے۔
سپریم کورٹ میں نیب ترامیم کے خلاف چیئرمین پی ٹی آئی عمران خان کی درخواست پر سماعت چیف جسٹس پاکستان کی سربراہی میں تین رکنی خصوصی بینچ نےکی۔
عمران خان کے وکیل خواجہ حارث نے دلائل دیتے ہوئے کہا حکمران عوامی اعتماد لے کر بنتے ہیں، شریعت کے مطابق عوامی اعتماد برقرار رکھنے کیلئے احتساب ضروری ہے۔
انہوں نے مزید کہا کہ جب حکمران اپنے عمل پر پردہ ڈالتے ہیں تو عوامی اعتماد ٹوٹتا ہے، نیب ترامیم کے تحت کسی تھرڈ پارٹی کو اربوں کا فائدہ پہنچانا اب جرم نہیں ہے، پبلک آفس ہولڈرز کی پراپرٹی عوامی ملکیت ہوتی ہے۔
خواجہ حارث نے کہا کہ پبلک پراپرٹی میں کرپشن سے عوام کے بنیادی حقوق براہ راست متاثر ہوتے ہیں۔ بعدازاں چیف جسٹس پاکستان نے عمران خان کے وکیل خواجہ حارث کو 8 دسمبر تک دلائل مکمل کرنے کی ہدایت کرتے ہوئے سماعت ملتوی کردی۔

جدہ: (ویب ڈیسک)وزیراعظم شہباز شریف کے صاحبزادے سلیمان شہباز نے کہا کہ لندن میں 4 سال سے زائد جلا وطنی کے بعد پاکستان واپس آ رہا ہوں۔
سلیمان شہباز، اہلیہ اوربچوں کے ہمراہ عمرہ کی ادائیگی کے لئے سعودی عرب پہنچ گئے ،11 دسمبر کوپاکستان پہنچیں گے۔
سلیمان شہباز نے کہا کہ عمران خان کے کہنے پر شہزاد اکبر نے جھوٹے مقدمات قائم کئے، ہم سیاسی مخالفین کے خاندان کے خلاف کوئی جھوٹی کارروائی نہیں کریں گے۔
سلیمان شہباز کا کہنا تھاکہ نئے سیاسی نظام کیلئے جعلی مقدمات بنا کر مجھے پاکستان چھوڑنے پر مجبور کیا گیا تھا، کوئی بھی جلاوطن نہیں ہوناچاہتا، انصاف ملنے کی بھی توقع نہیں تھی، مجھ پر بنائے گئے جھوٹے مقدمات سیاسی مخالفت کی بدترین مثال تھے۔
انہوں نے کہا کہ نیب کے بنائے مقدمات میں حقیقت نہیں تھی، سابق چئیرمین نیب جاوید اقبال کو بلیک میل کرکے ہمارےخلاف مقدمات بنوائےگئے، ہمارے خلاف پاکستان اور برطانیہ میں مقدمات بنوانے کیلئے پاکستانی وسائل کا بےدریغ استعمال کیا گیا۔
دوسری جانب اسلام آباد ہائی کورٹ نے وزیراعظم کے صاحبزادے سلیمان شہباز کی حفاظتی ضمانت کی درخواست سماعت کے لئے مقرر کرلی، چیف جسٹس عامر فاروق اور جسٹس اعجاز اسحاق خان جمعرات کو سماعت کریں گے
یاد رہے کہ سابق مشیر احتساب شہزاد اکبر کی طرف سے سلیمان شہباز پر منی لانڈرنگ اور پبلک آفس کے غلط استعمال کے الزامات عائد کیے گئے تھے لیکن برطانیہ کی نیشنل کرائم ایجنسی نے سلیمان شہباز کے خلاف تحقیقات کے بعد انھیں کلین چٹ دی تھی۔

راولپنڈی: (ویب ڈیسک) آرمی چیف جنرل سید عاصم منیر نے کراچی کا دورہ کیا جہاں انہوں نے بانی پاکستان قائد اعظم محمد علی جناح کے مزار پر حاضری دی، پھولوں کی چادر چڑھائی اور فاتحہ خوانی بھی کی۔
پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق سپہ سالار نے کور ہیڈ کوارٹرز کراچی کا دورہ کیا، آرمی چیف کا کراچی پہنچنے پر کور کمانڈر کراچی لیفٹیننٹ جنرل محمد سعید نے استقبال کیا۔
آئی ایس پی آر کے مطابق آرمی چیف کو سکیورٹی اور فارمیشن کے دیگر امور پر بریفنگ دی گئی، سپہ سالار نے ملک میں حالیہ غیر معمولی سیلاب کے دوران آپریشنل تیاریوں اور سندھ کے لوگوں تک پہنچنے پر فوج اور رینجر کے دستوں کو سراہا۔
اس حوالے سے آئی ایس پی آر کی جانب سے مزید کہا گیا کہ آرمی چیف نے کراچی میں امن و امان کی صورتحال میں بہتری پر قانون نافذ کرنے والے اداروں کی تعریف کی۔

اسلام آباد: (ویب ڈیسک) وزیر مملکت برائے خزانہ ڈاکٹر عائشہ غوث پاشا نے کہا ہے کہ آئی ایم ایف نے 800 ارب روپے کے ٹیکس لگانے کا مطالبہ نہیں کیا، ملک میں معاشی ایمرجنسی لگانے کا کوئی ارادہ نہیں ہے۔
میڈیا سے گفتگو کرتےہ وئے عائشہ غوث پاشا کا کہنا تھا کہ آئی ایم ایف کے ساتھ آن لائن ڈیٹا کا تبادلہ جاری ہے، معاشی ایمرجنسی کی کوئی ضرورت نہیں ہے، ہم اپنے قرضے وقت پر ادا کریں گے۔
انہوں نے مزید کہا کہ فیول کی کھپت کو کم کرنے کا معاملہ ضرور زیر غور ہے، کچھ دیگر ممالک بھی فیول کی کھپت کو کم کرنے پر کام کر رہے ہیں۔

پشاور: (ویب ڈیسک) سی ٹی ڈی ، سیکیورٹی فورسز اور حساس اداروں نے مشترکہ کارروائی کر کے عتیق الرحمن عرف ٹیپوگل گروپ کے چار دہشت گردوں کو گرفتار کر لیا۔
گرفتار دہشت گردوں سے اسلحہ اور گولہ بارود برآمد کر لیا گیا، گرفتار ہونے والے دہشتگرد پولیس کی ٹارگٹ کلنگ ،بھتہ خوری، پولیس تھانوں اور چوکیوں پر حملوں میں پولیس کو مطلوب تھے۔
سکیورٹی اداروں کی جانب سے ایک اور کارروائی کے دوران جانی گروپ کا انتہائی مطلوب دہشتگرد لوکل کمانڈر زاہد اللہ بھی پکڑا گیا۔ زاہد اللہ کا تعلق اختر محمد عرف خلیل جانی گروپ سے تھا جبکہ اس کے سر کی قیمت 20 لکھ روپے مقرر تھی۔