استنبول: (ویب ڈیسک) ترکیہ کے صدر رجب طیب اردوان نے کہا ہے کہ سرحدوں کو محفوظ بنانے کیلئے پُرعزم ہیں۔
اجلاس سے خطاب کرتے ہوئے طیب اردوان نے کہا کہ ترکیہ کو اپنی سلامتی کیلئے اپنے سرحدی علاقوں میں ہر قسم کی کارروائی کا حق ہے، ہمیں سرحد پار فوجی کارروائی سے بھی کوئی نہیں روک سکتا۔
ترک صدر کا کہنا تھا کہ ترک سرحد کے قریب واقع شمالی عراق میں جاری آپریشن کلاؤ لاک کے آغاز سے اب تک ترکیہ نے 480 دہشت گردوں کو بے اثر کیا ہے۔
عراقی اور شامی سرحدوں کے پار کرد ملیشیا کے غیر قانونی ٹھکانے ہیں جہاں سے وہ ترکیہ کی سر زمین پر حملوں کی منصوبہ بندی کرتے ہیں۔

تہران: (ویب ڈیسک) ایرانی حکومت کو ’قاتل‘ قرار دینے پر انسانی حقوق کی کارکن اور ایران کے سپریم لیڈر آیت اللہ خامنہ ای کی بھانجی فریدہ مراد خانی کو گرفتار کر لیا گیا۔
فریدہ مراد خانی کا تعلق خامنہ ای کے خاندان کی اس شاخ کے ساتھ ہے جو ایران کی مذہبی قیادت کی مخالف رہی ہے، فریدہ کے بھائی نے ہفتے کو ان کے یوٹیوب چینل پر ایک ویڈیو شئیر کی جس میں انہوں نے ایرانی شہریوں کو جبر کا نشانہ بنانے کی مذمت کی اور کوئی قدم نہ اٹھانے پر عالمی برداری پر تنقید کی۔
ان کا کہنا تھا ’آزاد لوگو، ہمارا ساتھ دو۔ اپنی حکومتوں کو بتاؤ کہ وہ اس قاتل اور بچوں کو ہلاک کرنے والی انتظامیہ کی حمایت بند کریں۔
واضح رہے کہ ایران نے مہسا امینی کی ہلاکت کے بعد شروع ہونے والے مظاہروں کے خلاف کریک ڈاؤن تیز کر دیا ہے۔

ٹورنٹو: (ویب ڈیسک) کینیڈا نے انڈوپیسیفک کی حکمت عملی کا آغاز کر دیا، جس کے تحت چین سے نمٹنے کیلئے مزید وسائل فراہم کئے جائیں گے۔
حکمت عملی کے مطابق کینیڈا موسمیاتی تبدیلی اور تجارتی مسائل پر دنیا کی دوسری سب سے بڑی معیشت کے ساتھ کام بھی جاری رکھے گا، حکمت عملی میں 1.9 ارب ڈالر کے اخراجات کا ذکر کیا گیا ہے جس کے تحت خطے میں کینیڈا کی فوجی موجودگی اور سائبر سکیورٹی کو بڑھانا بھی شامل ہے۔
نئی پالیسی کے مطابق چینی سرکاری اداروں کو اہم معدنی سپلائی سے روکنا ہے، پلان کے تحت خطے کے تیزی سے ترقی کرتے 40 ممالک کے ساتھ تعلقات کو وسعت دینی ہے جن کی اقتصادی سرگرمیاں تقریباً 500 کھرب کینیڈین ڈالر ہیں۔

ماسکو: (ویب ڈیسک) روسی وزارت خارجہ کی ترجمان ماریہ زاہرووا نے کہا ہے کہ یورپی یونین ممالک میں روس کی سفارتی موجودگی کو کم ترین درجے پر کر دیا گیا ہے۔
ماریہ زاہرووا نے مغربی ممالک کی طرف سے روس پر عائد پابندیوں کے بعد روس کی اختیار کردہ تدابیر کے بارے میں آگاہ کرتے ہوئے کہا کہ روس، یورپی یونین ممالک میں اپنی موجودگی جاری رکھے ہوئے ہے تاہم یہ موجودگی ایک یا دو ڈپلومیٹ سے زیادہ نہیں ہے۔
ترجمان کا مزید کہنا تھا کہ ان ممالک میں سفارتی موجودگی کا سبب وہاں موجود روسی شہریوں کے مختلف نوعیت کے دستاویزات اور پاسپورٹ سے متعلقہ مسائل کو حل کرنا ہے۔
یاد رہے کہ روسی فوجیوں نے 24 فروری کو یوکرین پر حملے شروع کر دیئے تھے، روس اس تاریخ سے مغربی ممالک میں کشیدگی کا سامنا کر رہا ہے۔