اسلام آباد: (ویب ڈیسک) مراد سعید نے کہا ہے کہ تحریک عدم اعتماد پر اپوزیشن کو عبرتناک شکست ہوگی، اپوزیشن والے پھر قوم کے سامنے بے نقاب ہوں گے۔
وفاقی وزیر مراد سعید نے ملکی سیاسی صورت حال پر گفتگو کرتے ہوئے کہا کہ عمران خان نے کہا دوستی سب سے، غلامی کسی کی نہیں کریں گے، وزیراعظم نے گستاخانہ خاکوں کا معاملہ اقوام متحدہ میں اٹھایا، انہون نے دنیا کو بتایا کہ ڈرون حملوں سے دہشتگردی میں اضافہ ہوا، عمران خان نے اسلامو فوبیا کے بارے میں بات کی، آج دنیا کے بڑے لیڈر اسلامو فوبیا کے بارے میں بات کرتے ہیں۔
مراد سعید کا کہنا تھا کہ نواز شریف ذاتی کاروبار کیلئے بھارت گئے تو حریت رہنماؤں سے ملاقات نہیں کی، آزاد کشمیر الیکشن میں اپوزیشن کو شکست ہوئی، پی ٹی آئی نے گلگت بلتستان الیکشن میں دو تہائی اکثریت حاصل کی، اپوزیشن کو ہر بار شکست کا سامنا کرنا پڑا، ان کی ناقص پالیسیوں سے ہم گرے لسٹ میں چلے گئے، عدم اعتماد کی تحریک میں اپوزیشن کو عبرتناک شکست ہوگی، چوروں کا ٹولہ، ڈاکوؤں کا گلدستہ پھر ایک ساتھ ہوگئے ہیں، اپوزیشن والے ٹی وی، ٹی وی کھیل رہے ہیں۔
وفاقی وزیر نے مزید کہا کہ عمران خان نے کہا تھا یہ سارے چور اکٹھے ہو جائیں گے، پرچی چیئرمین بھی مارچ اور تقاریر کر رہے ہیں، پرچی چیئرمین کو سنجیدہ نہیں لینا چاہیے، ان کے مہنگائی کے بیانیے کو بھی شکست ہوگی، 2028 میں یہ لوگ سر اٹھانے کے قابل بھی نہیں رہیں گے۔

لاہور: (ویب ڈیسک) شہباز شریف نے کہا ہے کہ وزیراعظم کو اپنا انجام نظر آ رہا ہے، اس لیے وہ دھمکیوں اور بازاری زبان پر اتر آیا، چور چور کے بیانات وہ دے رہا ہے، جس کا ذہن ماؤف ہو چکا ہے، عمران خان سامنے آئیں اور مقابلہ کریں، اوچھے ہتھکنڈے استعمال کرنا بند کریں۔
اپوزیشن لیڈر شہباز شریف نے میڈیا سے گفتگو کرتے ہوئے کہا کہ عمران خان جہاں جا رہے غلاظت کے ڈھیرجمع کر کے جا رہے ہیں، ان کے غلاظت کے ڈھیر کون صاف کرے گا ؟ عمران خان گھٹیا سیاست کر رہے ہیں، نازک معاملات پر غیر محتاط بیانات سے کشمیر کاز کو نقصان ہوگا، نہیں چھوڑوں گا اور چور ڈاکو ایسا شخص کہہ رہا ہے جو خوفزدہ ہے، ایک مہذب شخص ایسی گفتگو نہیں کرتا جو عمران خان کر رہے ہیں۔
دوسری جانب حمزہ شہباز کا کہنا تھا کہ عمران نیازی نے تقاریر میں اخلاقی اقدار کی دھجیاں اڑائیں، چور اور ڈاکو سن سن کر کان پک گئے ہیں، عمران نیازی خارجہ معاملات پر بھی غیر ذمہ دارانہ گفتگو کرتے ہیں، کیا پاکستان کے تجارتی مفادات دوسرے ممالک سے جڑے ہوئے نہیں ؟ وزیراعظم کے بیان پر وزیر خزانہ کو کہنا پڑا ایسی بات نہیں کرنی چاہیے تھی، وزیراعظم کے منہ پر ٹیپ لگا دینی چاہیے، یہ ملکی مفادات کا نقصان کرتے ہیں۔

اسلام آباد: (ویب ڈیسک) پیکا آرڈیننس سے متعلق کیس میں اٹارنی جنرل نے کہا کہ پیکا آرڈیننس آیا تو پتہ چلا اس قانون کا غلط استعمال ہو سکتا ہے، اگر میری باتوں پر عمل نہ ہوا تو میں اس کیس کا دفاع نہیں کروں گا۔
اسلام آباد ہائی کورٹ میں پیکا آرڈیننس سے متعلق کیس کی سماعت ہوئی۔ اٹارنی جنرل خالد جاوید خان نے عدالت کو بتایا کہ میں پیکا آرڈیننس پر وزیراعظم سے ملا ہوں، جب پیکا آرڈی نینس آیا تو پتہ چلا کہ اس قانون کا غلط استعمال ہو سکتا ہے، کسی سیاسی جماعت کی نہیں وفاق کی نمائندگی کر رہا ہوں، میرے خیال سے یہ ترمیم برقرار نہیں رہ سکتی۔
اٹارنی جنرل نے کہا کہ ایک کمیشن بنے گا جس کی سفارش کے بغیر کارروائی نہیں چل سکے گی، وزیراعظم کو بتایا کہ ترمیمی آرڈی نینس سے کچھ چیزیں تو واپس ہوں گی، ہم پی ایف یو جے، سی پی این ای اور تمام سٹیک ہولڈرز کو بھی آن بورڈ لیں گے، عدالت کا حکم موجود ہے، ترمیمی آرڈی نینس کے تحت کوئی کیس پراسیس نہیں ہوگا، اگر میری کی گئی باتوں پر عمل نہ ہوا تو میں اس کیس کا دفاع نہیں کروں گا۔ چیف جسٹس نے کہا کہ اگر ہتک عزت کو فوجداری قانون میں بھی رکھیں تو اس کا اطلاق پبلک آفس ہولڈرز پر نہیں ہوتا۔

اسلام آباد: (ویب ڈیسک) سپریم کورٹ نے 2013 کے انتخابات میں دھاندلی کے الزامات پر ایاز صادق کی درخواست پر عمران خان، نادرا اور الیکشن کمیشن کو نوٹسز جاری کر دئیے۔
سپریم کورٹ میں 2013 کے عام انتخابات میں این اے 122 میں دھاندلی کے الزامات کے معاملے پر سابق سپیکر ایاز صادق کی درخواست پر سماعت ہوئی۔ ایاز صادق نے موقف اپنایا کہ دھاندلی کے الزامات سے میری کردار کشی کی گئی، مجھے جھوٹا کہا گیا، بطور سپیکر مجھے بہت زیادہ باتیں سننا پڑی، میرے بارے میں دھاندلی کرنے کا تاثر بنایا گیا۔
چیف جسٹس عمر عطا بندیال نے ایاز صادق سے استفسار کیا کہ کیا اس کے بعد آپ الیکشن ہار گئے، جس پر ایاز صادق نے کہا کہ نہیں، میں اس کے بعد بھی الیکشن جیتتا رہا، کبھی الیکشن نہیں ہارا۔ چیف جسٹس نے ریمارکس دیئے کہ ایاز صادق صاحب آپ بہت حساس ہیں۔ جسٹس محمد علی مظہر نے کہا کہ ہتک عزت کا قانون بڑا واضح ہے، اگر آپ کی کردار کشی ہوئی تو ہتک عزت کا دعویٰ دائر کر دیں۔ چیف جسٹس نے کہا کہ فریقین کو نوٹس کر دیئے ہیں، جلد اس معاملے کو سنیں گے۔