کوئٹہ: (ویب ڈیسک) الیکشن کمشنر بلوچستان فیاض حسین مراد کا کہنا ہے کہ صوبے کے 34 میں سے 32 اضلاع میں بلدیاتی انتخابات 29 مئی کو ہوں گے جس کے لئے تمام تر تیاریاں مکمل ہیں۔
کوئٹہ میں الیکشن کمیشن کے صوبائی دفتر میں میڈیا کو بریفنگ دیتے ہوئے انھوں نے کہا کہ بلدیاتی انتخابات کے لئے آج سے 18 اپریل تک امیدوار کاغذات نامزدگی جمع کئے جا سکیں گے۔ 20 سے 22 اپریل تک کاغذات نامزدگی کی جانچ پڑتال کی جائے گی۔ 2 مئی کو امیدوار دستبردار ہو سکیں گے، بلوچستان ہائیکورٹ نے بھی بلدیاتی انتخابات کے انعقاد کے حوالے سے واضح ہدایات دی ہیں، تمام 32 اضلاع کے ڈپٹی کمشنرز ڈسٹرکٹ ریٹرننگ افسر کےفرائض سرانجام دیں گے۔ کاغذات نامزدگی کی حمتی فہرست سات مئی کو آویزاں ہوگی۔
فیاض حسین مراد نے بتایا کہ صوبے کے 32 اضلاع میں 838 یونین کونسلز ہیں جبکہ دیہی وارڈز کی تعداد 5345 ہے۔ حلقہ بندیوں سے متعلق چند اعتراضات سامنے آئے تھے جنہیں دور کر دیا گیا ہے۔ انھوں نے کہا کہ چیف سیکرٹری نے سکیورٹی کے بھرپور انتظامات کرنے کی یقین دہانی کرائی ہے۔

اسلام آباد: (ویب ڈیسک) چیف جسٹس اسلام آباد ہائیکورٹ کا کہنا ہے کہ پارلیمنٹ کی بے توقیری بہت ہوچکی، اب مزید بے توقیری برداشت نہیں کی جائیگی۔ ڈپٹی اسپیکر قاسم سوری کی جانب سے اجلاس 16 کے بجائے 22 اپریل کو بلائے جانے پر شک نہیں کیا جاسکتا، 22 اپریل کو قومی اسمبلی کا اجلاس ہونے دیں پھر دیکھا جائے گا۔
چیف جسٹس اسلام آباد ہائیکورٹ کی سربراہی میں تین رکنی بینچ نے ڈپٹی اسپیکر قاسم سوری کا قومی اسمبلی کا اجلاس تاخیر سے بلانے کے خلاف کیس کی سماعت کی۔
درخواست گزار کے وکیل منصور اعوان نے دلائل دیتے ہوئے کہا کہ قومی اسمبلی کا اجلاس 16اپریل کے لیے شیڈول تھا جو 22 تک ملتوی کیا گیا۔ جسٹس عامر فارق کی جانب سے سولہ اپریل کے اجلاس کے ایجنڈے بارے سوال کرنے پر ایڈوکیٹ منصور اعوان نے بتایا کہ اجلاس کے ایجنڈے میں اسپیکر قومی اسمبلی کا انتخاب تھا۔
چیف جسٹس اطہر من اللہ نے پوچھا کہ کیا ڈپٹی سپیکر کا اجلاس ملتوی کرنا پارلیمنٹ کا اندرونی معاملہ نہیں؟ درخواستگزار کے وکیل نے جواب دیا کہ یہ پارلیمنٹ کا اندرونی معاملہ نہیں ہے ڈپٹی اسپیکر نے اجلاس متوی کرنے کی کوئی وجہ نہیں بتائی۔ ڈپٹی سپیکر نے اپنے خلاف عدم اعتماد کی ووٹنگ کا معاملہ بطور قائم مقام اسپیکر تاخیر کا شکار کر دیا ہے جو مفادات کا ٹکراو ہے۔
چیف جسٹس اسلام آباد ہائیکورٹ نے کہا کہ آپ کے پاس کوئی گراؤنڈ نہیں ہے اور ہم ایسے کوئی آرڈر تو نہیں دے سکتے۔ 22 اپریل کوبلایا گیا اجلاس ہونے دیں۔ ہمارے پاس کوئی وجہ نہیں کہ ہم اجلاس نہ بلانے پر شک کریں، چیف جسٹس اطہر من اللہ نے ریمارکس دیئے کہ پارلیمنٹ کی بے توقیری بہت ہوگئی، اب مزید بے توقیری نہیں ہونی چاہیے۔
عدالت نے وفاقی، ڈپٹی اسپیکر قاسم سوری اور سیکریٹری قومی اسمبلی کو نوٹسز جاری کرتے ہوئے سماعت 22 اپریل تک ملتوی کر دی۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین عمران خان نے کہا ہے کہ اللہ کے سامنے جھکنے والوں کو غلام بنانے کی کوششیں کی جا رہی ہیں۔
چیئرمین پی ٹی آئی عمران خان سے مولانا خان محمد شیرانی نے ملاقات کی جس میں ملکی سیاسی صورتحال اور باہمی دلچسپی کے امور پر تبادلہ خیال کیا گیا۔
اس موقع پر وزیر اعظم عمران خان نے کہا کہ اللہ کے سامنے جھکنے والوں کو غلام بنانے کی کوششیں کی جا رہی ہیں جبکہ اقتدار کے بجائے اقدار اور قومی آزادی و خودمختاری کا تحفظ اہم ہے۔
انہوں نے کہا کہ کٹھ پتلیوں کو قوم کے مستقبل پر غلامی کی تاریکیاں طاری کرنے کی اجازت نہیں دیں گے۔ اہلِ دانش آگے بڑھیں اور قومی حمیت و اثاثۂ مِلّی کے تحفظ کا فریضہ انجام دیں۔
جمعیت علمائے اسلام شیرانی گروپ کے سربراہ مولانا خان محمد شیرانی نے اسلامو فوبیا کے خلاف عمران خان کی کوششوں کو خراج تحسین پیش کیا اور پاکستان کی آزادی و خودمختاری کے تحفظ کے لیے بھی عمران خان کی کوششوں کی تعریف کی۔
مولانا خان محمد شیرانی نے کہا کہ عمران خان کا تصور ریاستِ مدینہ اور اس کے قیام کے لیے کوششوں کو قدر کی نگاہ سے دیکھتے ہیں اور عمران خان امت مسلمہ کو درپیش مسائل کا قابل عمل حل تجویز کرنے والے پہلے مسلم رہنما ہیں۔
انہوں نے کہا کہ آزادی و خودداری کا علم بلند کرنے والوں کے خلاف سامراج نے ہمیشہ سازش رچائی جبکہ ملک و ملت کی سربلندی کے لیے پی ٹی آئی کے ساتھ مل کر اپنا حصہ ڈالیں گے۔

اسلام آباد: (ویب ڈیسک) اسلام آباد ہائیکورٹ نے نواز شریف کو ڈپلومیٹک پاسپورٹ جاری کرنے سے روکنے کی دائر درخواست پیر کو سماعت کے لیے مقرر کردی۔
اسلام آباد ہائی کورٹ کے چیف جسٹس اطہر من اللہ سماعت کریں گے۔ درخواست میں نواز شریف، سیکرٹری داخلہ، سیکرٹری خارجہ کو فریق بنایا گیا۔ درخواست گزار نے نواز شریف کی وطن واپسی پر گرفتاری کی استدعا کر رکھی ہے۔ درخواست میں موقف اپنایا گیا کہ نواز شریف سزا یافتہ اشتہاری مجرم ہیں، پاسپورٹ جاری کرنے سے روکا جائے، نواز شریف کو وطن واپسی پر فوری گرفتار کیا جائے، درخواست پر آج ہی سماعت کر کے نواز شریف کی وطن واپسی پر گرفتاری کا حکم دیا جائے۔

مظفرآباد: (ویب ڈیسک) آزاد کشمیر میں نئے قائد ایوان کے انتخاب کے لئے پیش کی گئی تحریک منظور کرلی گئی۔ وزیراعظم کے انتخاب کیلئے پیش کی گئی تحریک کو حکومتی ارکان نے منظور کیا۔
اپوزیشن نے وزیر اعظم کے انتخاب کے حوالے سے پیش کی گئی تحریک پر اعتراض اٹھا دیا اور کہا کہ آج اجلاس منسوخ کر کے قائد ایوان کے انتخاب کیلئے نیا اجلاس بلایا جائے۔
خیال رہے تحریک انصاف کی جانب سے قائد ایوان کے امیدوار تنویر الیاس ہوں گے۔ قائد ایوان کے لئے ن لیگ اور پیپلز پارٹی امیدوار کا نام پیش کریں گی۔53 کے ایوان میں تحریک انصاف اور اتحادیوں کے 34، پی پی 12 اور ن لیگ کے 7 ارکان ہیں۔ اسمبلی اجلاس کیلئے حکمران جماعت نے 12 اپریل کو ریکوزیشن جمع کرائی تھی۔