اسلام آباد: (ویب ڈیسک) سابق صدر پاکستان آصف زرداری نے کہا ہے کہ سلیکٹڈ کو نکالنے کا وقت آگیا۔ انہوں ںے کہا کہ اس کو میں بہت جلد نکالوں گا۔
ڈی چوک اسلام آباد پہ پیپلزپارٹی کے عوامی مارچ کے شرکا سے خطاب کرتے ہوئے انہوں نے کہا کہ آج بلاول کے ساتھ آپ کا پیار اور محبت دیکھی، میرا دل بہت خوش ہوا۔
انہوں ںے کہا کہ وقت آگیا ہے کہ سلیکٹڈ کو باہر نکالیں۔ انہوں نے کہا کہ جمہوری قوتوں کو مل کر ملک کو آگے لے جانا پڑے گا۔
آصف زرداری نے کہا کہ مائنس سلیکٹڈ ، اس کو باہر نکالیں گے اور آپ کی حکومت لائیں گے۔ ان کا کہنا تھا کہ اس کو میں بہت جلد نکالوں گا۔
سابق صدر پاکستان نے کہا کہ اگر اس کو رہنے دیا تو نہ آنے والی نسلیں معاف کریں گی نہ ہماری قبریں۔

اسلام آباد: (ویب ڈیسک) وزیر خارجہ شاہ محمود قریشی نے کہا ہے کہ تحریک عدم اعتماد لانا اپوزیشن کا آئینی حق ہے، آئینی، قانونی اور سیاسی انداز میں ان کا مقابلہ کریں گے۔
اپنے بیان میں شاہ محمود قریشی نے کہا کہ اپوزیشن کو شکست دیں گے، عمران خان منتخب وزیراعظم ہیں ، عمران خان سے استعفیٰ مانگنے والے یہ لوگ کون ہوتے ہیں؟
وزیر خارجہ نے کہا کہ وزیر اعظم سے بات ہوئی، وہ بھرپور طریقے سے مقابلہ کریں گے، اپوزیشن والے ایک دوسرے پر بھی اعتماد نہیں کرتے، ان کے کسی الٹی میٹم سے ہرگز خوف زدہ نہیں۔
شاہ محمود قریشی نے کہا کہ عمران خان نے ناراض ارکان سے رابطہ کیا ہے اور انہیں سمجھایا بھی ہے کہ چوہدری برادران کمٹمنٹ نبھانے والے ہیں۔

اسلام آباد: (ویب ڈیسک) پاکستان پیپلز پارٹی کے چیئر مین بلاول بھٹو زرداری نے کہا ہے کہ اب میں عمران خان کو ایک دن بھی چین سے نہیں بیٹھنے دوں گا، عدم اعتماد اس لشکر کا جمہوری ہتھیار ہے۔
وفاقی دارالحکومت کے ڈی چوک میں عوامی مارچ کے شرکاء سے خطاب کرتے ہوئے پاکستان پیپلز پارٹی کا کہنا تھا کہ پیپلزپارٹی کے جیالوں کو سلام پیش کرتا ہوں، یہ بہادر اور وفادار لوگ 10 دن سے سلیکٹڈ سرکار کے خلاف سراپا احتجاج ہیں، کراچی سے 27 فروری کو نکلے اور پھر تعداد میں اضافہ ہوتا رہا، آج ہم ڈی چوک بھی پہنچ گئے، جیالے جو کہتے ہیں وہ کر کے دکھاتے ہیں۔
اپنی بات کو جاری رکھتے ہوئے بلاول کا کہنا تھا کہ آپ 3 سال سے اس کٹھ پتلی سے ٹکرا رہے ہو، ہم نے اسے پہلے دن ہی بے نقاب کر دیا تھا، یہ الیکٹڈ نہیں سلیکٹڈ ہے، اب میں عمران خان کو ایک دن بھی چین سے نہیں بیٹھنے دوں گا، عدم اعتماد اس لشکر کا جمہوری ہتھیار ہے، کٹھ پتلی کو اس قوم پر مسلط کیا گیا۔
انہوں نے کہا کہ ہمیں غیر جمہوری طریقے سے مسلط ہونے والے کٹھ پتلی کو گھر بھیجنا ہے، عمران خان سے پورے پاکستان کا اعتماد اٹھ چکا ہے، اب وقت آ چکا ہے پارلیمان کا اعتماد بھی اس سے اٹھ جائے، پہلے بھی یوسف رضا گیلانی کو اسمبلی سے جتوا کر تاریخ رقم کی تھی، وزیراعظم کے پسینے چھوٹ رہے ہیں، گالیاں دینے پر مجبور ہو گیا، عوام کو کہتا تھا کہ مہنگائی ہے مگر گھبرانا نہیں، اب تو عدم اعتماد کی تحریک پیش ہو گئی، ہم نے جمہوری حملہ کر دیا ہے، وزیراعظم صاحب گھبرانے کا وقت آ گیا ہے، ہماری عمران خان سے کوئی ذاتی دشمنی نہیں، انہوں نے جمہوریت کا جنازہ نکال دیا ہے۔ پی ٹی آئی ایم ایف ڈیل عوام دشمن اور غریب دشمن ڈیل ہے، ہماری بات نہیں مانی گئی اور پھر بوجھ عام آدمی پر آگیا، تم سب صوبوں کے حقوق پر ڈاکے مارنے کی کوشش کررہے ہو، ہم جمہوریت پر ڈاکہ برداشت نہیں کر سکتے،
بلاول بھٹو نے کہا کہ اس شخص نے پاکستان کے عوام کا معاشی قتل کیا، اس کی معاشی پالیسی عام آدمی کو تکلیف اور امیر کو ریلیف پہنچانا ہے، قائد عوام نے روٹی، کپڑا اور مکان کا نعرہ دیا تھا۔
انہوں نے کہا کہ اس شخص نے ملک کی خارجہ پالیسی کو نقصان پہنچایا، اس شخص نے پاکستان کو دنیا میں تنہا کر دیا، اس شخص نے سی پیک کو بھی سبوتاژ کرنے کی کوشش کی، قائد عوام نے اس پارٹی کی بنیاد کشمیر کاز پر رکھی تھی، کشمیر کے مسئلے پر قومی اتفاق رائے بنانا اس کا کام تھا جو نہیں ہوا، ہم دہشت گردوں اور انتہا پسندوں کو برداشت نہیں کریں گے، اس نے رات کے اندھیرے میں دہشت گردوں سے ڈیل کرنی شروع کر دی، ہم یہ برداشت نہیں کر سکتے، اب نوجوانوں کا وقت ہے، پوری قوم ایک پیج پر آ چکی ہے، ہم قائد عوام کا جمہوری پاکستان بنانے نکلے ہیں، ہم شہید محترمہ بے نظیر بھٹو کے نامکمل مشن کو مکمل کرنے نکلے ہیں، ہم سارے صوبوں کو اپنے وسائل کا مالک بنانا چاہتے ہیں۔
اس موقع پر سابق صدر آصف علی زرداری نے کہاکہ جیالے کی خاص پہچان ہے، آپ کی محبت دیکھ کر میرا دل بہت خوش ہوا، آج بلاول کے ساتھ آپ کا پیار اور محبت دیکھی، وقت آگیا ہے سلیکٹڈ کو باہر نکالیں گے، جمہوری قوتوں کو مل کر ملک کو آگے لے جانا پڑیگا، مائنس سلیکٹڈ ، اس کو باہر نکالیں گے اور آپ کی حکومت لائیں گے، عمران خان کو بہت جلد میں باہر نکال دوں گا، اگر اس کو رہنے دیا تو نہ آنے والی نسلیں معاف کریں گی، نہ ہماری قبریں، جمہوری قوتوں کو مل کر ملک کو آگے لے جانا پڑےگا، لانگ مارچ کر لیا، عدم اعتماد بھی کر لیا، اب یہ بھی کر کے دکھائیں گے۔

لاہور: (ویب ڈیسک) پاکستان مسلم لیگ (ن) کی نائب مریم نواز نے حکومتی پارٹی کے مختلف گروپس سامنے آنے پر طنز کے نشتر برساتے ہوئے کہا کہ تحریک انصاف نہ ہوگئی واٹس ایپ ہوگیا۔
واضح رہے کہ پاکستان تحریک انصاف میں بننے والے جہانگیر ترین گروپ نے باضابطہ فیصلہ کیا ہے کہ عثمان بزدار قبول نہیں اور مائنس بزدار سے ہی بات آگے بڑھے گی۔
جہانگیر ترین گروپ کا ہنگامی اجلاس ہوا، جس میں نعمان لنگڑیال، عون چودھری اور اجمل چیمہ سمیت دیگر اراکین نے شرکت کی۔
اجلاس کے بعد میڈیا سے گفتگو کرتے ہوئے ترین گروپ کے رکن نعمان لنگڑیال نے کہا کہ ہم نے تمام فیصلوں کا اختیار جہانگیر ترین کو دیا ہے، مختلف پارٹیوں کے ساتھ ہمارے روابط جاری ہیں، کل بھی ہمارا بڑا اہم اجلاس ہوگا اور موجودہ حالات کے حوالے سے لائحہ عمل بنائیں گے۔
نعمان لنگڑیال نے مزید کہا کہ جہانگیر ترین گروپ ایک بے لوث گروپ ہے، یہ ایک بہت مضبوط اتحاد ہے، تمام ممبران جہانگیر ترین کے فیصلوں پرآمین کہیں گے۔
انہوں نے کہا کہ علیم خان نے کل ہمارے گروپ کوجوائن کیا ہے اور ہم نے ان کو بھی بتایا ہے کہ وہ بھی ترین کے فیصلوں کے پابند ہونگے، وزیراعلیٰ کے نام بارے بتانا قبل از وقت ہوگا، جہانگیر ترین کے منہ سے جو بھی نام نکلے گا اس پر کوئی اختلاف نہیں ہوگا، ہم لوگ کوئی بغاوت نہیں کر رہے بلکہ پی ٹی آئی اور صوبے کے لیے اچھا سوچ رہے ہیں۔
اسی حوالے سے سابق وزیراعظم میاں نواز شریف کی صاحبزادی مریم نواز نے طنزیہ ٹوئٹ کرتے ہوئے ایک پوسٹ شیئر کی جس میں کہا کہ تحریک انصاف نہ ہوگئی واٹس ایپ ہوگیا، ہر تھوڑی دیر بعد ناراض لوگ الگ گروپ بنارہے ہیں۔

کراچی: (ویب ڈیسک) فیصل واوڈا کی نااہلی کے باعث سینیٹ کی خالی ہونے والی نشست پر متحدہ قومی موومنٹ (ایم کیو ایم) نے الیکشن میں پاکستان تحریک انصاف (پی ٹی آئی) کے امیدوار کو ووٹ نہ دینے کا فیصلہ کیا ہے۔
خیال رہے کہ اس سے قبل پاکستان تحریک انصاف (پی ٹی آئی) نے فیصل واوڈا کی نا اہلی کی وجہ سے خالی سینیٹ کی نشست پر انتخاب کے بائیکاٹ کا فیصلہ کیا۔
ایم کیو ایم کے کنوینر خالد مقبول صدیقی کی زیر صدارت رابطہ کمیٹی کے اجلاس میں ملک کی سیاسی صورتحال پر غور کیا گیا۔
اجلاس کے جاری کردہ اعلامیے کے مطابق رابطہ کمیٹی نے شہری سندھ، بالخصوص کراچی کی صورتحال پرتشویش کا اظہار کیا۔
یاد رہے کہ سینیٹ نشست پر 9 مارچ کو سندھ اسمبلی میں پولنگ ہوگی، ارکان اسمبلی سینیٹ نشست کے لیے ووٹ ڈالیں گے جبکہ پیپلزپارٹی کے نثار احمد کھوڑو اور پی ٹی آئی کے آغا ارسلان امیدوار ہیں۔

اسلام آباد: (ویب ڈیسک) وزیراعظم عمران خان کے معاون خصوصی شہباز گل نے کہا ہے کہ اپوزیشن نے اپنے پتے کھیل لیے اب ہماری باری ہے۔
شہباز گل نے یہ بات وزیراعظم عمران خان کے خلاف جمع کرائی جانے والی تحریک عدم اعتماد اور اپوزیشن رہنماؤں کی پریس کانفرنس پر اپنے ردعمل میں کہی ہے۔
انہوں نے کہا کہ ہم نے اپوزیشن کی سازش کو بے نقاب نہ کیا تو یہ عوام سے زیادتی ہے۔ انہوں نے کہا کہ تحریک انصاف ایسا منشور لے کر آئی جو کسی کے پاس نہیں۔ ان کا کہنا تھا کہ سابق حکومت ملکی معیشت تباہ کر کے گئی۔
شہباز گل نے کہا کہ احتساب ہمارے منشور کا حصہ تھا جس پر ہم گامزن ہیں۔ انہوں نے کہا کہ عمران خان نے کہا تھا کہ جس دن میں نے ان پر ہاتھ ڈالا اس دن تمام چور اکٹھے ہو جائیں گے۔
وزیراعظم کے معاون خصوصی نے کہا کہ منعقدہ پریس کانفرنس میں کہا گیا کہ عمران خان نے مغربی تہذیب کو یہاں پھیلایا ہے اور کہا گیا کہ عمران خان مغربی ایجنڈے کو لے کر چلتا ہے مگر اس کے ساتھ ہی کہا گیا کہ عمران خان نے مغربی ممالک کو ناراض کیا۔
شہباز گل نے دعویٰ کیا کہ برطانیہ کا وزیراعظم پاکستان کے وزیراعظم سے ملنے کا خواہاں ہے۔ انہوں نے کہا کہ برطانیہ کے وزیراعظم کہتے ہیں کہ کسی کو فالو کرنا ہے تو عمران خان کو کریں۔ ان کا کہنا تھا کہ ان چوروں کو پاکستان ، ملکی معیشت اورغریب کی نہیں، صرف اپنے کیسز کی فکر ہے۔
پاکستان تحریک انصاف سے تعلق رکھنے والے وفاقی وزیر مملکت برائے اطلاعات و نشریات فرخ حبیب نے اپنے ردعمل میں کہا کہ اپوزیشن پہلے سینیٹ میں ناکام ہوئی، اب قومی اسمبلی میں بھی ناکام ہو گی۔