اسلام آباد:(ویب ڈیسک) وفاقی وزیر مواصلات مراد سعید نے اپوزیشن کو سخت تنقید کا نشانہ بناتے ہوئے کہا ہے کہ ہارا ہوا لشکر اس دفعہ بھی ہارے گا۔
پاکستان تحریک انصاف سے تعلق رکھنے والے وفاقی وزیر مراد سعید نے کہا کہ ہارا ہوا لشکر اس دفعہ بھی ہارے گا۔ انہوں نے کہا کہ یہ لوگ میڈیا پر ہی حکومت گراتے ہیں۔
وفاقی وزیر مراد سعید نے ماضی کا حوالہ دیتے ہوئے کہا کہ گلگت بلتستان اور آزاد کشمیر میں بھی ان کے دعوے ناکام ہوئے ہیں۔
پی ٹی آئی سے تعلق رکھنے والے وفاقی وزیرمراد سعید نے کہا کہ ووٹنگ میں ان کے اپنے ہی اراکین کم ہو جاتے ہیں۔ ان کا کہنا تھا کہ میں ان کو چیلنج کرتا ہوں کہ ان کے اپنے اراکین بھی کم ہو جائیں گے۔
کچھ دیر قبل وفاقی وزیر داخلہ اور عوامی مسلم لیگ کے سربراہ شیخ رشید احمد نے کہا ہے کہ وزیراعظم نے کارڈ چھاتی سے لگا کر رکھے ہیں۔ ان کا کہنا تھا کہ یہ میچ عمران خان ہی جیتیں گے۔

اسلام آباد: (ویب ڈیسک) متحدہ اپوزیشن کی جانب سے وزیراعظم عمران خان کے خلاف تحریک عدم اعتماد کے لیے ریکوزیشن قومی اسمبلی میں جمع کروا دی ہے، اس قرار داد کے بعد 14 دن کے اندر قومی اسمبلی کا اجلاس بلانا ہوگا۔
یاد رہے کہ وزیراعظم کے خلاف تحریک عدم اعتماد کامیاب بنانے کے لیے 172 ارکان کی حمایت ضروری ہے، اپوزیشن کے پاس 162 ارکان موجود ہیں اور اسے مزید 10 ارکان کی حمایت درکار ہے۔
متحدہ اپوزیشن کی طرف سے قومی اسمبلی اجلاس بلانے کے لیے ریکوزیشن بھی جمع کرادی گئی ہے جس کے مطابق ریکوزیشن جمع کرانے کے بعد 14 دن کے اندر قومی اسمبلی اجلاس بلانا لازمی ہوگا۔
لیگل برانچ قومی اسمبلی کا کہنا ہے کہ اپوزیشن ریکوزیشن کے مطابق سپیکر اب کسی بھی وقت اجلاس بلا سکتے ہیں، اجلاس بلانے کی حد 14 روز یعنی 22 مارچ بنتی ہے۔ قومی اسمبلی کے رکن کی وفات پر پہلے دن کا اجلاس بغیر کارروائی ملتوی کیا جا سکتا ہے۔
آرٹیکل 95 کے تحت وزیراعظم کے خلاف عدم اعتماد کی کارروائی 7 دن کے اندر مکمل کرنا لازمی ہو گی، آئین کے تحت قومی اسمبلی میں تحریک عدم اعتماد پر ووٹنگ اوپن بیلٹ کے ذریعے ہو گی۔
وزیر اعظم عمران خان كے خلاف تحریک عدم اعتماد كی كامیابی یا ناكامی كے امكانات جاننے كے لیے قومی اسمبلی میں سیاسی جماعتوں كے اراكین یا حكومتی اور حزب اختلاف كی نشستوں كی تعداد معلوم ہونا بہت ضروری ہے۔
2018 كے انتخابات كے نتیجے میں وجود میں آنے والی قومی اسمبلی میں پاكستان تحریک انصاف عددی اعتبار سے سب سے بڑی قوت ہے، جس نے دوسری جماعتوں كی حمایت سے وفاقی حكومت بنا ركھی ہے۔
پاكستان میں وفاقی حكومت كو قومی اسمبلی میں تحریک انصاف كے 155 اراكین كے علاوہ مسلم لیگ ق 5، متحدہ قومی موومنٹ پاكستان 7، گرینڈ ڈیموکریٹک الائنس 3، عوامی مسلم لیگ 1، بلوچستان عوامی پارٹی 5، جمہوری وطن پارٹی 1 كی حمایت حاصل ہے۔
حكومتی اتحاد كے برعكس اپوزیشن كی نشستوں پر براجمان اراكین اسمبلی میں مسلم لیگ ن 84، پیپلز پارٹی 56، متحدہ مجلس عمل پاكستان 15، عوامی نیشنل پارٹی 1 ، بلوچستان نیشنل پارٹی کے 4 امیدوار ہیں۔
قومی اسمبلی میں چار آزاد امیدوار ہیں۔ آزاد امیدواروں میں این اے 48 شمالی وزیرستان سے رکن قومی اسمبلی محسن داوڑ، این 50 سے علی وزیر، این اے 218 میر پور خاص سے علی نواز شاہ، این اے 272 گوادر سے آزاد امیدوار میر محمد اسلم بھوتانی شامل ہیں۔
دو آزاد امیدوار اپوزیشن کے حمایت یافتہ ہیں جبکہ دو آزاد امیدواروں کے بارے میں دعویٰ کیا جاتا ہے کہ وہ حکومت کے حمایت یافتہ ہیں۔
جماعت اسلامی کا ایک رکن قومی اسمبلی ہے جس کے بارے میں بتایا جا رہا ہے کہ انہوں نے ابھی تک فیصلہ نہیں کیا کہ تحریک عدم اعتماد کے حق میں ووٹ دینا ہے یا نہیں۔
یوں 341 اراكین پر مشتمل قومی اسمبلی میں حكومتی جماعتوں سے تعلق ركھنے والے ایم این ایز كی تعداد 179 ہے، جبكہ 162 اراكین قومی اسمبلی اپوزیشن بینچز كا حصہ ہیں۔
خیال رہے کہ ہنگو سے پاکستان تحریک انصاف (پی ٹی آئی) کے رکن قومی اسمبلی خیال زمان اورکزئی گزشتہ ماہ انتقال کر گئے تھے جس پر الیکشن آئندہ ماہ 10 اپریل کو ہو گا۔
وزیراعظم کے خلاف تحریک عدم اعتماد کی کامیابی کی صورت میں وہ اپنے عہدے سے فارغ تصور ہوں گے جس کے بعد سپیکر فوری طور پر صدر کو تحریری طور پر تحریک عدم اعتماد کے نتیجے سے آگاہ کرنے کے پابند ہوں گے۔

لاہور: (ویب ڈیسک) پاکستان تحریک انصاف میں بننے والے جہانگیر ترین گروپ نے باضابطہ فیصلہ کیا ہے کہ عثمان بزدار قبول نہیں اور مائنس بزدار سے ہی بات آگے بڑھے گی۔
جہانگیر ترین گروپ کا ہنگامی اجلاس ہوا، جس میں نعمان لنگڑیال، عون چودھری اور اجمل چیمہ سمیت دیگر اراکین نے شرکت کی۔
اجلاس کے بعد میڈیا سے گفتگو کرتے ہوئے ترین گروپ کے رکن نعمان لنگڑیال نے کہا کہ ہم نے تمام فیصلوں کا اختیار جہانگیر ترین کو دیا ہے، مختلف پارٹیوں کے ساتھ ہمارے روابط جاری ہیں، کل بھی ہمارا بڑا اہم اجلاس ہوگا اور موجودہ حالات کے حوالے سے لائحہ عمل بنائیں گے۔
نعمان لنگڑیال نے مزید کہا کہ جہانگیر ترین گروپ ایک بے لوث گروپ ہے، یہ ایک بہت مضبوط اتحاد ہے، تمام ممبران جہانگیر ترین کے فیصلوں پرآمین کہیں گے۔
انہوں نے کہا کہ علیم خان نے کل ہمارے گروپ کوجوائن کیا ہے اور ہم نے ان کو بھی بتایا ہے کہ وہ بھی ترین کے فیصلوں کے پابند ہونگے، وزیراعلیٰ کے نام بارے بتانا قبل از وقت ہوگا، جہانگیر ترین کے منہ سے جو بھی نام نکلے گا اس پر کوئی اختلاف نہیں ہوگا،ہم لوگ کوئی بغاوت نہیں کر رہے بلکہ پی ٹی آئی اور صوبے کے لیے اچھا سوچ رہے ہیں۔
یاد رہے کہ اجلاس سے قبل وفاقی وزیر دفاع پرویز خٹک کا جہانگیر ترین گروپ کے رہنما عون چودھری سے رابطہ ہوا تھا ، عون چودھری نے بتایا تھا کہ اجلاس کے بعد صورتحال سے آگاہ کریں گے۔

کوئٹہ: (ویب ڈیسک) پنجاب کے بعد بلوچستان میں بھی سیاسی بھونچال آگیا اور صوبائی وزیر ظہور بلیدی سے محکمہ پلاننگ اینڈ ڈویلیپمنٹ (پی اینڈ ڈی) کا قلمدان واپس لے لیا گیا ہے۔
بلوچستان کابینہ کے صوبائی وزیر ظہور بلیدی سے محکمہ پلاننگ اینڈ ڈویلیپمنٹ کی وزارت واپس لے لی گئی ہے جس کا صوبائی حکومت کی جانب سے قلمدان واپس لینے کا نوٹیفکیشن جاری کر دیا گیا۔
خیال رہے کہ ظہور بلیدی کے کچھ عرصہ سے وزیراعلیٰ بلوچستان عبدالقدوس بزنجو سے اختلافات چل رہے تھے جبکہ صوبائی وزیر کی گزشتہ روز سردار یار محمد رند سے ملاقات بھی ہوئی تھی۔