اسلام آباد: (ویب ڈیسک) سپریم کورٹ نے مونال ریسٹورنٹ ڈی سیل کرنے کا حکم دیدیا، عدالت نے اسلام آباد ہائیکورٹ کا غیر دستخط شدہ مختصر حکم نامہ معطل کر دیا ہے۔
تین ہفتے قبل سپریم کورٹ نے مونال ریسٹورنٹ کوسیل کرنے کے اسلام آباد ہائیکورٹ کے فیصلے کومعطل کرنے کی استدعا مسترد کردی تھی۔ عدالت نے معاونت کے لیے وفاقی حکومت اورفریقین کونوٹس جاری کردیئے تھے۔ جسٹس اعجازالاحسن نے ریمارکس دیئے تھے کہ جو جو کچھ ہوا اسے فی الحال واپس نہیں کرسکتے۔ ہم ابھی سٹیٹس کو برقرار رکھتے ہیں۔
یاد رہے دو ماہ قبل اسلام آباد ہائی کورٹ نے مونال ریسٹورنٹ کو سیل کرنے کا حکم دیا تھا، جس کے بعد انتظامیہ نے اسی روز مونال ریسٹورنٹ کو سیل کر دیا تھا۔ عدالت نے سی ڈی اے کو نیوی گالف کورس کا قبضہ لینے اورسیکرٹری دفاع ‏کوتجاوزات کرنے والوں کے خلاف کارروائی کرنے کا حکم بھی دیا تھا۔

اسلام آباد: (ویب ڈیسک) گورنر سندھ عمران اسماعیل اور فواد چودھری میں ملاقات ہوئی، جس میں پنجاب میں ترین گروپ کے معاملات پر بات چیت کی گئی جبکہ عمران اسماعیل نے وفاقی وزیر اطلاعات کو علیم خان سے ہونے والی بات چیت سے آگاہ کیا۔
خیال رہے گزشتہ روز وزیراعظم عمران خان کی جانب سے ٹاسک ملنے کے بعد گورنر سندھ عمران اسماعیل نے پاکستان تحریک انصاف کے رکن صوبائی اسمبلی عبدالعلیم خان سے ملاقات کی۔ میڈیا سے گفتگو میں ان کا کہنا تھا کہ ناراض ارکان 24 گھنٹے میں ہمارے ساتھ ایک پیج پر ہونگے، پاکستان تحریک انصاف کے سینئر رہنما جہانگیر ترین اور سابق صوبائی وزیر علیم خان وزیراعظم عمران خان کیخلاف نہیں جائینگے، پہلے علیم خان سے ملاقات کروںگا بعد میں جہانگیر سے بات ہو گی۔
گورنر سندھ نے کہا کہ مذاکراتی ٹیم کا حصہ بن کر علیم خان کے پاس آنے پر انتہائی افسوس ہے، وہ میرے ساتھی اور بھائی ہیں، خوشی ہے کہ علیم خان آج بھی عمران خان کا ساتھی اور سپاہی ہے۔ علیم خان اور جہانگیر ترین نے جتنی محنت اور جدوجہد اس پارٹی کو اقتدار میں لانے اور عمران خان کے پروگرام پر عمل کرنے کیلئے کی تھی وہ آج بھی اس پر عمل پیرا ہیں، جہانگیر ترین کے گروپ کے پنجاب کی حد تک پی ٹی آئی حکومت سے اپنے تحفظات ہیں، جس کا اظہار علیم خان نے آج کی میٹنگ میں کیا۔

ملتان: (ویب ڈیسک) خواتین پر تشدد کے حوالے سے قانون موجود ہے لیکن عملدرآمد نہیں جس کی وجہ سے جنوبی پنجاب میں خواتین پر تشدد کے واقعات میں اضافے کا سلسلہ تا حال جاری ہے۔
ملتان میں مختلف مقامات پر خواتین کے عالمی دن کے حوالے سے تقریبات جاری ہیں لیکن اس کے برعکس جنوبی پنجاب میں خواتین پر تشدد کے واقعات کم ہونے کی بجائے مسلسل بڑھ رہے ہیں، جس کی وجہ سے رواں سال ابتک تین خواتین تیزاب گردی کا شکار ہو چکی ہیں جبکہ 11 خواتین کو جھلسانے کے واقعات رونما ہوئے ہیں، جس کے نتیجے میں 7 خواتین زندگی کی بازی ہار گئیں تاہم 9 خواتین کو اغوا کے بعد مبینہ زیادتی کا بھی نشانہ بنایا گیا ہے۔
سماجی تنظیم کی رہنما نیلو فر بختیار کا موقف ہے کہ خواتین کی اکثریت اپنے حقوق کے حوالے سے آگاہ نہیں جس کی وجہ سے مسائل آ رہے ہیں۔ اسی لیے خواتین کو آگاہی دینے کیلیے کاوشیں شروع کر دی ہیں۔
خاندانی مسائل اور پنچائیتی سسٹم کیساتھ اداروں میں خواتین کیساتھ رویہ بھی متاثرہ خواتین کو انصاف کی فراہمی میں بڑی رکاوٹ بن چکا ہے جس کی وجہ سے خواتین پر تشدد کے واقعات مسلسل بڑھ رہے ہیں۔

اسلام آباد: (ویب ڈیسک) اسلام آباد تھانہ ترنول کی حدود میں گاڑی کھائی میں گرنے سے دو بچوں سمیت 4 افراد جاں بحق ہوگئے۔
پولیس کے مطابق اچانک کار بے قابو ہو کر پول سے ٹکرا کر کھائی میں جاگری، گاڑی کے کھائی میں گرنے سے آگ بھڑک اٹھی، جس سے چار افراد بری طرح جھلس گئے۔ مرنے والوں میں دو بچے، خاتون اور ایک مرد شامل ہے۔ ریسکیو ٹیموں نے موقع پر پہنچ کر لاشیں اسپتال منتقل کر دیں۔ مرنے والوں کی تاحال شناخت نہیں ہوسکی۔

اسلام آباد: (ویب ڈیسک) تھانہ آبپارہ کے علاقے میں ایک ہی خاندان کے 3 افراد قتل جبکہ ایک شخص زخمی ہو گیا۔ پولیس کے مطابق ایک ہی خاندان کے 3 افراد کے قتل کی تحقیقات جاری ہیں۔
سیکٹر جی سکس ون میں ایک ہی خاندان کے 4 افراد قتل اور ایک شخص زخمی ہے، ملزم نے پہلے اہلیہ پر فائرنگ کی اور پھر سسر اور بہنوئی کوقتل کیا، ملزم کے باہر نکلنے پر پڑوس سے ایک شخص نے ملزم کو زخمی کردیا۔
قتل ہونے والی خاتون پولی کلینک اسپتال میں نرس تھی، ملزم نے پہلے اپنی اہلیہ اور اس کے ساتھ کام کرنے والے ملازم کوقتل کیا، ملزم نے دوسرے مقام پرجا کر سسر اور بہنوئی کوفائرنگ کرکے قتل کردیا۔