کراچی: (ویب ڈیسک) شہر قائد کے علاقے ناظم آباد میں ماں بیٹی کا لرزہ خیز قتل، دونوں کو گھر میں گولی مار کر موت کے گھاٹ اتارا گیا۔
تفصیلات کے مطابق کراچی کے علاقے ناظم آباد نمبر چار میں گھر سے ماں بیٹی کی لاشیں ملیں، دونوں کو سر پر گولی مار کر قتل کیا گیا ہے۔
ڈی ایس پی ناظم آباد نے کہا کہ محلے میں کسی نے گولی چلنے کی آواز نہیں سنی، گھر کام کرنے والی آئی تو لاشیں دیکھ کر پولیس کو اطلاع دی گئی جبکہ مقتولین ماں بیٹی کی جانب سے مزاحمت کے کوئی شواہد نہیں ملے ہیں۔
ڈی ایس پی کی جانب سے مزید بتایا گیا کہ مقتولہ کے شوہر شمعون نے دو شادیاں کی ہوئی تھیں اور وہ کبھی کبھار ہی پہلی اہلیہ اور سوتیلی بیٹی سے ملنے آیا کرتا تھا۔
پولیس نے جائے وقوعہ سے دو خول برآمد کر کے اطراف کی سی سی ٹی وی فوٹیجز حاصل کر کے واقعے کی تحقیقات شروع کردی ہیں جبکہ پولیس کو شبہ ہے کہ واردات کسی ذاتی رنجش کا شاخسانہ ہے۔

لاہور: (ویب ڈیسک) پاکستان مسلم لیگ ن کی نائب صدر مریم نواز نے وزیراعظم عمران خان پر تنقید کرتے ہوئے کہا ہے کہ ریاستی طاقت استعمال کر کے دوسری جماعتوں کو توڑنے کی کوشش کرنے والے کا ایک ایک لمحہ اراکین کی منتیں کرنے میں گزر رہا ہے۔
سماجی رابطے کی ویب سائٹ ٹویٹر پر اپنے سلسلہ وار ٹویٹ کرتے ہوئے مسلم لیگ ن کی نائب صدر نے کہا کہ کل کیا ہو گا یہ صرف اللہ تعالیٰ کی ذات جانتی ہے مگر عمران خان کے ساتھ جو بھی ہو رہا ہے وہ مکافات عمل کے سوا کچھ نہیں۔ کرسی، طاقت کا غلط استعمال اور اس کو دائمی سمجھ لینے والے کا انجام ایسا ہی ہوتا ہے۔
انہوں نے کہا کہ سیاست میں اتار چڑھاؤ آتے رہتے ہیں اور حکومت بھی آنی جانی چیز ہے مگر تکبر اور ظلم انسان کے آگے آتا ہے۔ نواز شریف صاحب پر یہ انکی ذاتی و سیاسی زندگی کا شاید مشکل ترین وقت تھا مگر بدترین حالات کے باوجود انکا کوئی ساتھی انھیں چھوڑ کر نہیں گیا۔ کیونکہ انہوں نے ہر کسی کو عزت دی۔ اپنے مخالف اور دشمن کو بھی۔ صبر اور تہذیب کا دامن نہیں چھوڑا۔ طاقت کا رعب نہیں جمایا، دھمکیاں نہیں دیں، تمسخر نہیں اڑایا۔ کرسی جاتی دیکھ کر میں چھوڑوں گا نہیں جیسی بازاری زبان استعمال نہیں کی۔ عمران خان کو دیکھ کر عبرت ہوتی ہے۔
مریم نواز نے کہا کہ تکبر اور گھمنڈ کا پہاڑ آج جب ان لوگوں کے در پر حاضری دے رہا ہے جن سے ہاتھ ملانے کو وہ اپنی توہین سمجھتا تھا تو زندگی اور سیاست کے طالبعلم سوچنے پر مجبور ہو جاتے ہیں۔
ن لیگ کی نائب صدر نے کہا کہ 4 سال عوام کی طرف سے مجرمانہ بے حسی اور غفلت برتنے والے مہنگائی اور نااہلی سے انکی زندگیاں تباہ کرنے والے کو آج اچانک جلسوں میں روتا دھوتا دیکھ کر جھرجھری آتی ہے۔
انہوں نے کہا کہ ریاستی طاقت استعمال کر کے دوسری جماعتوں کو توڑنے کی کوششش کرنے والے کا ایک ایک لمحہ اب اراکین کی منتیں کرنے میں گزر رہا ہے اور انھی حکومت بھی اسکی ہے! یہ سب مکافات عمل نہیں تو اور کیا ہے؟ انسان کو انسان نا سمجھنے والے کا یہی انجام ہے، مجھ سمیت سیاست اور زندگی کے طالب علم ضرور غور کریں۔
مریم نواز نے ٹویٹر پر لکھا کہ خان صاحب نے صرف مخالفین کو ہی نہیں بلکہ دوسرے ممالک کو گالیاں اور دھمکیاں دیں۔ اپنی سیاسی مخالفت میں پاکستان کا نقصان کرنے کا اختیار انکو کس نے دیا؟

اسلام آباد: (ویب ڈیسک) وزیراعظم عمران خان اور آرمی چیف جنرل قمر جاوید باجوہ کی ملاقات ہوئی۔
ذرائع کے مطابق وزیراعظم اور سپہ سالار کی ملاقات میں ملکی اندرونی و بیرونی سکیورٹی صورتحال سے متعلق امور کا جائزہ لیا گیا۔
ذرائع نے مزید بتایا کہ دونوں کی ملاقات میں پاک فوج کے پیشہ وارانہ امور سے متعلق بھی تبادلہ خیال کیا گیا۔

لاہور: (ویب ڈیسک) مسلم لیگ (ق) کے صدر اور اسپیکر پنجاب اسمبلی پرویز الہیٰ نے کہا ہے کہ حالات تیزی سے حکومت کے ہاتھ سے نکل رہے ہیں۔
مسلم لیگ (ق) کے صدر اور اسپیکر پنجاب اسمبلی چوہدری پرویز الہٰی سے حکومت پنجاب کے وزرا نے ملاقات کی، جس کی اندرونی کہانی سامنے آگئی ہے۔
ذرائع کے مطابق مسلم لیگ (ق) کی قیادت نے تحریک انصاف کو بڑے سیاسی فیصلے لینے کا مشورہ دے دیا ہے، اور پرویز الٰہی نے کہا ہے کہ حالات تیزی سے حکومت کے ہاتھ سے نکل رہے ہیں، اس وقت جو سیاسی حالات ہیں اس کا تقاضا ہے کہ حکومت آگے بڑھ کر پہلے فیصلہ لے لے، کیوں کہ جو پہلے فیصلہ لیتا ہے سیاست میں اس کو برتری حاصل ہوجاتی ہے۔
چوہدری پرویز الٰہی کا کہنا تھا کہ لمحہ بہ لمحہ صورت حال تبدیل ہورہی ہے، اس صورتحال پر مشورہ بھی ہورہا ہے اور رابطے بھی ہورہےہیں۔

لاہور: (ویب ڈیسک) پاکستان مسلم لیگ ن کے صدر اور قومی اسمبلی میں اپوزیشن لیڈر میاں محمد شہباز شریف نے کہا ہے کہ آنے والے دنوں میں عمران نیازی مزید گھبرائیں گے قوم کی گھبراہٹ کم ہوتی جائے گی۔
اپنے ایک بیان میں انہوں نے کہا کہ تحریک عدم اعتماد عوام کا مطالبہ ہے اپوزیشن عوام کے فیصلے پر عمل کررہی ہے ملک کو معاشی دیوالیہ پن سے بچانے کے لئے عدم اعتماد ہی راستہ ہے معیشت کی بحالی عوام کو مہنگائی سے نجات اورریلیف دینے کے لئے اس حکومت کو ہٹانا لازم ہے وہ لینڈ مائینز صاف کرنا پڑیں گی جو موجودہ حکومت نے معیشت اور ملک کی بنیادوں میں بچھائی ہیں مہنگائی عوام کی برداشت سے باہر ہے وہ ظالم حکومت سے نجات چاہتے ہیں۔
اپنی بات کو جاری رکھتے ہوئے انہوں نے کہا کہ گالیاں تحریک عدم اعتماد کا راستہ نہیں روک سکتیں رویہ گھبراہٹ کا ثبوت ہے آنے والے دنوں میں عمران نیازی مزید گھبرائیں گے قوم کی گھبراہٹ کم ہوتی جائے گی۔
لیگی صدر کا کہنا تھا کہ مہنگائی سے نجات دلانے کے لئے موجودہ حکومت سے نجات شرط اول ہے مہنگائی کی ذمہ دار موجودہ حکومت ہےاس کی غلط پالیسیز اور فیصلے ہیں عمران نیازی کی خارجہ امور پر کنٹینر والی ناسمجھ گفتگو ریاست پاکستان کے لئے گھبرانے والی بات ہے ریاست اور عمران نیازی کی سمت مخالف ہیں یہ قومی مفادات کے لئے نیک شگون نہیں۔ ‎
شہباز شریف نےکہا کہ عمران نیازی اپنی سیاست ساکھ خراب کرچکے پاکستان کی عالمی سیاست ساکھ خراب نہ کریں ملک میں سیاست ڈبونے والا پاکستان کی عالمی سیاسی پوزیشن پر نہ بولے تو بہتر ہے جوہری پاکستان کےوزیراعظم کی خارجہ امور پر غیرمحتاط گفتگو قومی مفادات کے لئے خطرناک ہے قیادت کے غلط فیصلوں کی قیمت ممالک اور عوام کو ادا کرنا پڑتی ہے،احساس کریں ‎معیشت خارجہ وداخلہ امور مہنگائی بے روزگاری اور معاشی تباہی کے بعد مزید تجربات سے پرہیز ہی پاکستان کے حق میں بہتر ہے۔

اسلام آباد: (ویب ڈیسک) وفاقی وزیر برائے ریلوے اعظم سواتی نے کہا ہے کہ عدم اعتماد پر اپوزیشن منہ کی کھائے گی۔ یہ کیسی اپوزیشن ہے جس کا سینیٹ میں اپوزیشن لیڈر غائب ہو جاتا ہے۔
اسلام آباد میں نیوز کانفزنس کرتے ہوئے اعظم سواتی نے کہا کہ ریلوے کی بہتری کے لیے جنون کی حد تک کام کیا، ریلوے کے تمام ڈبے اور اسٹیشن پر برینڈنگ کریں گے، اشتہارات لگانے سے اربوں روپے کی آمدن ہوگی۔ جو 50 سال سے ریلوے خسارے میں تھی اسے منافع بخش بنائیں گے، آئندہ حکومت بھی تحریک انصاف بنائے گی، شانگلہ اور بٹ گرام میں لوگ عمران خان کو آئندہ الیکشن میں ووٹ دیں گے، نجی شعبے کو ریلوے کے ساتھ بزنس پارٹنر بنا رہے ہیں، ریلوے میں کرپشن کا خاتمہ کر رہے ہیں۔
اعظم سواتی کا کہنا تھاکہ پاکستان میں سب سے زیادہ کام کسی ادارے میں ہوا تو وہ ریلوے ہے، پوری ریلوے کی ٹیم کے جذبے شاندار ہیں، ریلوے کی ہر کوچ کو اشتہار لگانے کی جگہ دیں گے، ریلوے اسٹیشن کو بھی اشتہار کی جگہ دیں گے ۔
ان کا کہنا تھا کہ آج بھی ریلوے کا سکریپ چوری ہو رہا ہے، ریلوے کے سکرپٹ سے جان چھڑانا پڑے گی ، لاہور میں مصری شاہ کے کباڑ بازار میں ریلوے کا سکریپ بھرا پڑا ہے، ریلوے کی پولیس کو خودمختار بنایا ہے، اپوزیشن وسائل کی چوری اور ڈکیتی میں ملوث رہی ہے۔
انہوں نے کہا کہ عمران خان نے اپوزیشن کی چوری کو روکا ہوا،اپوزیشن کو ہر بل میں تحریک انصاف نے شکست دی، عمران خان عدم اعتماد کے تیار ہیں، عمران خان ہر دھرنے کے لیے تیار ہے۔
اعظم سواتی نے دعویٰ کیا کہ عدم اعتماد پر اپوزیشن منہ کی کھائے گی۔ بلاول بھٹو نہیں ہے، ندیم افضل چن کی پارلیمنٹ میں کوئی حیثیت نہیں، یہ کیسی اپوزیشن ہے جس کا سینیٹ میں اپوزیشن لیڈر غائب ہو جاتا ہے۔

اسلام آباد: (ویب ڈیسک)پاکستان انٹرنیشنل ایئر لائن (پی آئی اے) کے لیے اچھی خبرآگئی اور چائنیز سول ایوی ایشن نے قومی ایئرلائن کو مزید دو چینی شہروں کے لیے پروازیں چلانے کا لائسنس جاری کردیا ہے۔
چائنہ ائیر لائن کے بعد پی آئی اے پہلی غیر ملکی ائیرلائن ہے جسے مختلف شہروں کے لیے لینڈنگ کی اجازت دی گئی اور چائنیز سول ایوی ایشن نے باضاطہ لائسنس کا اجرا کردیا ہے۔
قومی ایئرلائں کے ترجمان کے مطابق پی آئی اے بیجنگ، شایان، شنگھائی کے لیے پروازیں آپریٹ کرے گا، چینی شہر چنڈو کے لیے بھی اجازت نامہ طلب کررکھا ہے، چینی حکام کی جانب سے کنمنگ اور شینزن کے لیے چارٹرڈ کارگو پروازیں چلانے کی بھی منظوری حاصل ہے۔
چین کے مختلف شہروں کے لیے چارٹر اور کارگو پروازیں دونوں ممالک کے درمیان تجارتی سرگرمیوں کو بڑھانے میں معاون ثابت ہوگی۔

اسلام آباد: (ویب ڈیسک) وزیراعظم عمران خان نے کہا ہے کہ دہشت گردی اور نفرت انگیز تقاریر کے لیے زیرو ٹالرنس پالیسی ہے، دہشت گردوں کو نشان عبرت بنانے کیلئے قومی ایکشن پلان کا مکمل نفاذ ضروری ہے۔
وزیراعظم عمران خان کی زیر صدارت نیشنل ایکشن پلان سے متعلق اجلاس ہوا، جس میں آرمی چیف جنرل قمر جاوید باجوہ، ڈی جی آئی ایس آئی، چاروں صوبائی وزرائے اعلی اور وفاقی وزراء بھی شریک ہیں، اور حالیہ پشاور واقعے اور افغانستان کی صورتحال پر بات ہوئی، جبکہ اجلاس میں اقوام متحدہ جنرل اسمبلی میں عدم شرکت کے معاملے پر ممکنہ ردعمل بھی زیر بحث آیا۔
اعلامیے میں بتایا گیا ہے کہ اجلاس میں سیکرٹری داخلہ نے قومی ایکشن پلان کے نفاذ کی صورتحال پر تفصیلی بریفنگ دیتے ہوئے کہا کہ بین الصوبائی مسائل کے لیے صوبائی حکومتوں سے تعاون درکار ہے۔ ایپکس کمیٹی کی جانب سے پشاور دھماکے کی شدید مذمت کی گئی اور ایپکس کمیٹی نے نیکٹا کے کردار کو مضبوط بنانے اور انسداد دہشت گردی کے محکموں کی استعداد کار بڑھانے کی ضرورت پر زور دیتے ہوئے کہا کہ صوبے جدید فرانزک لیبز قائم کرکے موثرتحقیقات کے لیے مزید وسائل مختص کریں۔ کمیٹی نے عدالتوں میں دہشت گردی کے مقدمات کو حتمی شکل دینے کی ضرورت پر زور دیا۔
اس موقع پر وزیراعظم عمران خان کا کہنا تھا کہ دہشت گردی اور نفرت انگیز تقاریر کے لیے زیرو ٹالرنس پالیسی ہے، دہشت گردوں کو نشان عبرت بنانے اور قومی ایکشن پلان کا مکمل اور بھرپور نفاذ ضروری ہے، بدامنی پھیلانے والے عناصر کو شکست دینے کے لیے پوری قوم متحد ہے، ملک کو عدم استحکام سے دوچار کرنے کے مذموم عزائم کبھی کامیاب نہیں ہوں گے۔