لاہور: (ویب ڈیسک) حکومت مخالف اتحاد پاکستان ڈیمو کریٹک موومنٹ (پی ڈی ایم) کے سربراہ اور امیر جمعیت علمائے اسلام (ف) مولانا فضل الرحمان اور پاکستان مسلم لیگ ن کے قائد میاں محمد نواز شریف کے درمیان ٹیلیفونک رابطہ ہوا ہے۔
ذرائع کے مطابق دونوں رہنماؤں کے درمیان وزیراعظم عمران خان کے خلاف تحریک عدم اعتماد کے معاملے پر مشاورت، باہمی دلچسپی کے امور پر گفتگو کی گئی۔
دونوں رہنماؤں کے درمیان ملاقات میں عدم اعتماد کی تحریک سے متعلق نمبر گیم پر اطمینان کا اظہار کیا اور ملکی سیاسی صورتحال پر تبادلہ خیال کیا گیا۔
ذرائع کے مطابق مولانا فضل الرحمان اور میاں نواز شریف نے موجودہ حکومت سے جلد از جلد قوم کو نجات دلانے پر اتفاق کیا۔
ذرائع کے مطابق دونوں رہنماؤں کے مابین وزیراعظم عمران خان کے خلاف تحریک عدم اعتماد کے پلان کو عملی جامع پہنانے کے علاوہ ملکی، قومی امور پربھی مشاورت کی گئی۔
ذرائع کے مطابق حکومت مخالف اتحاد کے سربراہ نے سابق وزیراعظم کو اپوزیشن کی پیش قدمی کے بارے میں تفصیلات سے آگاہ کیا۔

لاہور: (ویب ڈیسک) لاہور ہائیکورٹ میں مسلم لیگ ن کے رہنما اسحق ڈار کی ویڈیو لنک کے ذریعے سینیٹ میں حلف لینے کی درخواست سماعت کے لیے مقرر کر دی گئی۔
لیگی رہنما نے اپنے وکیل کے زریعے لاہور ہائیکورٹ میں درخواست دائر کی تھی، جس پر سماعت 7مارچ کو ہو گی، درخواست میں الیکشن کمیشن اور وفاقی حکومت کو فریق بنایا ہے۔
درخواست میں استدعا کی گئی ہے کہ چیئر مین سینیٹ کو ویڈیو لنک کے ذریعے حلف کی درخواست دی جسے مسترد کر دیا گیا، صادق سنجرانی کا فیصلہ کالعدم قرار دیا جائے، عدالت ویڈیو لنک کے ذریعے حلف لینے کی اجازت دے۔

اسلام آباد: (ویب ڈیسک) پاکستان پیپلزپارٹی کے چیئرمین بلاول بھٹو زرداری کی ہدایت پر سید خورشید شاہ اہم مشن پر وفاقی دارالحکومت اسلام آباد پہنچ گئے۔
پاکستان پیپلزپارٹی کی جانب سے عوامی لانگ مارچ جاری ہے اور ایسے میں بلاول بھٹو زرداری کی ہدایت پر سید خورشید شاہ اہم مشن پر وفاقی دارالحکومت اسلام آباد پہنچ گئے ہیں۔
خورشید شاہ کا کہنا ہے کہ پیپلز پارٹی لانگ مارچ کے اختتام پرپہلے قومی اسمبلی اجلاس کی ریکوزیشن اور اس کے بعد وزیر اعظم کے خلاف تحریک عدم اعتماد جمع کرائے گی۔
ان کا کہنا تھاکہ حکومت کے 12 سے 13 ایم این ایز اپنا فیصلہ کر چکے ہیں، وہ عمران خان کی ناکامیوں کا بوجھ اٹھانے کو تیارنہیں۔
خورشید شاہ کا کہنا تھاکہ یقین سے کہہ سکتا ہوں عمران خان اپنی پارٹی چوہدریوں کی جھولی میں کبھی نہیں ڈالیں گے ، وہ وزارت اعلیٰ پرویز الہٰی کو نہیں دے رہے تھے تو پارٹی کیسے دیں گے؟
خیال رہے کہ اپوزیشن کی جانب سے حکومت کے خلاف تحریک عدم اعتماد لانے کا اعلان کیا گیا ہے۔

پشاور: (ویب ڈیسک) وزیراعظم کے معاون خصوصی برائے اطلاعات بیرسٹر سیف نے کہا ہے کہ نادراکی مدد سے خودکش بمبار کی شناخت ہوگئی ساتھ ہی سہولت کاروں کا بھی پتا چل گیا ہے، 48 گھنٹوں میں پورا نیٹ ورک میڈیا کے سامنے پیش کردیں گے۔
معاون خصوصی برائے اطلاعات بیرسٹر محمد علی سیف نے پولیس حکام کے ہمراہ کوچہ رسالدار قصہ خوانی بم دھماکے کے حوالے سے پریس کانفرنس کرتے ہوئے کہا کہ خودکش بمبار کی شناخت کرلی گئی ہے، پشاور بم دھماکا دوپہر ڈیڑھ بجے ہوا، دو پولیس اہلکار مسجد کی سیکیورٹی پر تعینات تھے، پولیس پر انگلیاں اٹھائی جارہی ہیں حالاں کہ پولیس ڈیوٹی پر تھی اور جانوں پر کھیل گئی۔.
بیرسٹر سیف نے کہا کہ پولیو کے حوالے سے بھی صوبے میں مہم جاری ہے اور پولیس اہلکار ڈیوٹی پر موجود ہیں، پشاور ہی میں جمعہ کے روز ہندوؤں کے تہوار کی وجہ سے مندروں کے باہر بھی پولیس اہلکار موجود تھے، انٹیلی جنس میں خامی ہوسکتی ہے الرٹ ضرورتھا۔
انہوں نے کہا کہ خودکش بمبار کی شناخت کرلی گئی ہے اور اس حوالے سے نادرا کی مدد لی گئی ہے، خودکش بمبار نے سیاہ رنگ کا لباس پہن رکھا تھا، تلاشی لینے والے پولیس اہلکار پر فائر کیا گیا، تنگ جگہ ہونے کی وجہ سے دھماکے سے زیادہ نقصانات ہوئے۔
انہوں نے کہا کہ شواہد جمع کرلیے گئے ہیں اب تحقیقات جاری ہیں، خودکش بمبار کو لانے والے سہولت کاروں کی شناخت کی گئی اور کچھ لوگوں کو حراست میں لیا گیا، اصل نیٹ ورک کو ہم 48 گھنٹوں میں میڈیا کے سامنے پیش کریں گے۔
تمام انٹیلی جنس ادارے مل کر کام کر رہے ہیں، کئی واقعات کو انٹیلی جنس ادارے ناکام بھی بناتے ہیں جو منظرعام پر نہیں آتے، ہم کسی پر بھی انگلی نہیں اٹھاتے، سب ہی کام کر رہے ہیں، دہشت گردی کے واقعات ہر ملک میں ہو رہے ہیں، بہتری کی گنجاش موجود رہتی ہے۔
بیرسٹر سیف نے کہا کہ مذکورہ جامع مسجد پر حملے کے حوالے سے کوئی الرٹ نہیں تھا، ہم نے بم دھماکے کے حوالے سے گرفتاریاں کی ہیں۔
سی سی پی او اعجاز خان نے کہا کہ پولیو مہم میں 5500 نفری تعینات تھی، نماز جمعہ اجتماعات پر بھی پولیس اہلکار تعینات تھے، شروع میں دو دہشت گردوں کی آمد کی اطلاع تھی لیکن ایک ہی خودکش بمبارتھا، پولیس نے دہشت گردی کے خلاف جنگ کو سنبھالا اور اب بھی سنبھال لیں گے۔
سی سی سی پی او اعجاز خان نے کہا کہ شہر میں مجموعی طور پر سکیورٹی ہائی الرٹ تھی، پولیو مہم میں 5 ہزار سے زائد سیکیورٹی اہلکار تعینات تھے، شہر کے تمام مذہبی مقامات کو فول پروف سیکیورٹی فراہم کی گئی تھی، اندرون شہر کے مندروں کو بھی سیکیورٹی دی گئی۔
انہوں نے کہا کہ سی ٹی ڈی، پشاور پولیس اور حساس اداروں پر مشتمل ٹیم نے موقع سے اہم شواہد حاصل کیے ہیں، جائے وقوع کے اطراف میں پانچ کلومیٹر تک سی سی ٹی وی فوٹیج حاصل کر کے تجزیہ کیا گیا، جائے وقوع اور اطراف میں جیو فسنگ بھی کی گئی، موقع سے شواہد حاصل کیے گئے جن میں خودکش حملہ آور کے جسمانی اعضا، وقوعہ میں استعمال ہونے والی پستول سے فنگر پرنٹس اور خالی خول وغیرہ شامل ہیں۔
سی سی پی او نے بتایا کہ پستول سے فنگر پرنٹس لے کر نادرا ٹیم کو موقع پر بلا کر خود کش حملہ آور اور سہولت کاروں کی پہچان کی گئی، اسی طرح ہیومن انٹیلی جنس کو بھی بروئے کار لاتے ہوئے رکشا ڈرائیور تک رسائی حاصل کی گئی ہے، شواہد کی روشنی میں تفتیشی ٹیم نے وقوعہ کو 2/3 گھٹوں میں ورک آوٹ کرتے ہوئے ملوث نیٹ ورک کو توڑ دیا ہے۔
سی سی پی او اعجاز خان نے مزید کہا کہ خودکش حملہ آور کے خاندان تک رسائی حاصل کرلی ہے اور 48 گھنٹوں میں بقایا نیٹ ورک تک پہنچ جائیں گے۔