اسلام آباد: (ویب ڈیسک) وزیراعظم عمران خان نے کہا ہے کہ اپوزیشن عدم اعتماد کی تحریک کا شوق پورا کرکے دیکھ لے، تمام اتحادی ہمارے ساتھ ہیں۔
ذرائع کے مطابق وزیراعظم عمران خان سے تحریک انصاف کے ارکان قومی اسمبلی نے ملاقات کی، ملاقات کرنے والوں میں ریاض فتیانہ اور نصر اللہ دریشک شامل تھے، یہ ملاقات گزشتہ روز ہوئی۔ اس ملاقات میں وفاقی وزراء بھی ہمراہ تھے۔
ملاقات کے دوران وزیراعظم عمران خان نے ارکان سے ملاقات میں ممکنہ تحریک عدم اعتاد پر گفتگو کی۔
ذرائع کے مطابق وزیراعظم نے کہا کہ تحریک عدم اعتماد کے حوالے سے ارکان ارکان پر اعتماد رہیں، سب کچھ ٹھیک ہے، تحریک کے بارے میں ہوم ورک مکمل ہے، ہمارے نمبر گیم پورے ہیں۔
ملاقات کے دوران ارکان اسمبلی نے وزیراعظم کو یقین دلایا کہ کہیں نہیں جار رہے ہیں، ایسا سوچا بھی نہیں، ہمارے بارے مطمئن رہیں، ہم آپ کی ٹیم کا حصہ ہیں۔
اس پر جواب دیتے ہوئے وزیراعظم نے کہا کہ مجھے آپ کی وفاداری پر یقین ہے، تحریک انصاف کے سب ارکان سے متحد ہیں، تمام اتحادی بھی ہمارے ساتھ ہیں، اپوزیشن عدم اعتماد کی تحریک کا شوق پورا کرکے دیکھ لے،اندازہ ہوجائے گا۔

کراچی : (ویب ڈیسک) کمشنر کراچی اقبال میمن نے تمام ڈپٹی کمشنرز کو دودھ کی قیمتیں کنٹرول میں رکھنے کے لیے سنجیدگی اختیار کرنے کے احکامات جاری کردیے۔
ترجمان کمشنر آفس کے مطابق کمشنر کراچی اقبال میمن کی زیر صدارت اجلاس ہوا جس میں گوشت، دال، چاول، سبزی اور دیگر ضروری اشیاء کی قیمتوں کا بھی جائزہ لیا گیا۔اجلاس میں کمشنر کراچی نے آئندہ ہفتے اشیائے خوردونوش کی قیمتوں کا نوٹیفکیشن جاری کرنے کے احکامات دیے جب کہ قیمتوں کے سلسلے ڈی سیز آئندہ پیر کو سفارشات تیار کرکے دیں گے۔
کمشنرکراچی نے کہا کہ ماہ رمضان المبارک قریب ہے،آئندہ ہفتے اشیاء خوردونوش کی قیمتوں کا نوٹیفکیشن جاری کردیاجائے گا، قیمتوں کو ضابطے میں رکھنا کراچی ڈویژن کے ساتوں ضلعی انتظامیہ کی بنیادی ذمہ داری ہے۔

لاہور : (ویب ڈیسک) جیمرز کی مدد سے کمپیوٹر سسٹم کو ہیک کر کے کروڑوں روپے مالیت کی ’کی لیس‘ گاڑیاں چرانے والا اعلیٰ تعلیم یافتہ گروہ لاہور میں دھر لیا گيا۔
لاہور میں اینٹی وہیکلز لفٹنگ اسٹاف نے کار چوروں کا ایک گروہ پکڑا ہے جو چابی کے بغیر اسٹارٹ ہونے والی گاڑیاں چراتا تھا۔
گروہ کا سرغنہ چار سدہ کا رہائشی افنان خان نے بی ایس آنرز کر رکھا ہے اور اعلیٰ تعلیم یافتہ چور کا کہنا ہے کہ اس نے جیمرز، ٹریکر ڈیکیٹرز اور گاڑی کا سافٹ ویئر خود تیار کیا ہے۔
افنان خان کا کہنا ہے کہ ہمارا وارداتیں کرنے کا وقت رات 2 بجے سے صبح 5 بجے تک ہوتا تھا۔
گاڑی چوری کرنے کا طریقہ
چور افنان خان اپنے ساتھی کی مدد سے 7 منٹ میں گاڑی قابو کر کے جاتا تھا، سب سے پہلے جیمرز آن کرتے، جو 300 میٹر کے علاقے میں تمام الیکٹرانک ڈیوائسز جام کر دیتا، پھر گاڑی کا شیشہ توڑ کر اندر داخل ہوتے، گاڑی کا سوئچ نکال کر اپنا لگا دیتے اور آخر میں کمپیوٹر سسٹم ہیک کر کے اپنی چابی بنا کر گاڑی لے جاتے۔
چوروں کے لیے آخری رکاوٹ ہوتی موٹر وے جہاں وہ اگلی گاڑی کے بمپر کے ساتھ گاڑی جوڑتے اور ٹول پلازے پر بغیر اسکین ہوئے نکل جاتے تھے۔
ایس پی انٹی وہیکلز اسٹاف آفتاب پھلروان نے پریس کانفرنس میں بتایا کہ گرفتار ملزمان افنان عادل اور شہزاد مسیح سے 3 کروڑ 36 لاکھ روپے سے زائد مالیت کی 9 گاڑیاں برآمد ہوئیں۔
ایس پی آفتاب پھلروان کا کہنا تھا کہ لاہور سے چوری کی جانے والی گاڑیاں کے پی کے میں فروخت کی جاتی ہیں، چوری شدہ گاڑیوں کے لیے کے پی کے میں ویئر ہاؤس اور باقاعدہ پارکنگ اسٹینڈز موجود ہیں۔