اسلام آباد: (ویب ڈیسک) وزیر داخلہ شیخ رشید احمد نے کہا ہے کہ پشاور دھماکے میں ملوث تینوں ملزمان کی شناخت ہو گئی۔
وزیر داخلہ شیخ رشید احمد نے کہا کہ پشاو دھماکے کے تینوں ملزمان تک خیبر پختونخوا پولیس اور تحقیقاتی ادارے پہنچ چکے ہیں اور تینوں ملزمان کی شناخت ہو چکی ہے۔ پولیس اور تحقیقاتی اداروں نے بہترین کام کیا۔
انہوں نے کہا کہ پولیس آئندہ ایک 2 روز میں ملزمان تک پہنچ جائے گی۔
نواز شریف کے حوالے سے بات کرتے ہوئے شیخ رشید احمد نے کہا کہ وزارت داخلہ میں نوازشریف کی طرف سے پاسپورٹ کی کوئی درخواست نہیں آئی اور حزب اختلاف کی جانب سے تحریک عدم اعتماد کا شور مچایا جا رہا ہے لیکن اجلاس کی ریکوزیشن کی درخواست بھی ابھی موصول نہیں ہوئی۔
انہوں نے کہا کہ اجلاس کی ریکوزیشن اور عدم اعتماد کی تحریک دو مختلف چیزیں ہیں جبکہ عدم اعتماد کی تحریک پر بھی 2 سے 3 دن اسپیکر کے پاس ہوتے ہیں اور پھر 7 دن تقریریں اور ووٹنگ ہوتی ہے۔
وزیر داخلہ نے کہا کہ حزب اختلاف عوام میں غلط فہمیاں پیدا نہ کرے۔ ملک سیلاب، زلزلوں یا بیماریوں سے تباہ وبرباد نہیں ہوتے بلکہ ملک کو افواہوں، تخریب کاری اور انتشار کی باتوں سے نقصان پہنچتا ہے۔
انہوں نے کہا کہ وزیر اعظم عمران خان 5 سال پورے کریں گے اور جو مرضی تحریک لے آئیں۔ انہیں پہلے بھی شکست ہوئی تھی اور اب بھی ہو گی۔ پاکستان آگے بڑھنے کی طرف جا رہا ہے اور بعض لوگ انتشار کو ہوا دے رہے ہیں۔

پشاور: (ویب ڈیسک) خیبر پختونخوا کے مرکزی شہر پشاور میں خودکش دھماکے کا مقدمہ سی ٹی ڈی تھانے میں درج کر لیا گیا۔
پشاور دھماکے کا مقدمہ ایس ایچ او تھانہ خان رازق کی مدعیت میں درج کیا گیا۔ مقدمہ میں قتل، اقدام قتل اور دہشت گردی کی دفعات شامل کی گئی ہیں۔
مقدمے کے متن کے مطابق خودکش حملہ آور نے مسجد میں گھس کر پہلے فائرنگ کی اور پھر فائرنگ کے بعد خود کش حملہ آور نے خود کو دھماکے سے اڑا دیا۔
اس سے قبل پشاور خود کش دھماکے کا مقدمہ درج کرنے کے لیے پولیس نے مراسلہ سی ٹی ڈی کو ارسال کیا تھا۔ مراسلہ ایس ایچ او خان رازق وارث خان کی مدعیت میں ارسال کیا گیا تھا۔
ارسال کردہ مراسلے میں کہا گیا کہ حملہ آور نے کالا لباس پہنا ہوا تھا اور حملہ آور نے حملے سے پہلے فائرنگ کر کے پولیس اہلکار کو نشانہ بنایا۔ مراسلہ میں قتل، اقدام قتل اور دہشت گردی دفعات شامل کی گئی تھیں۔
پولیس اسٹیشن سے ارسال مراسلے کی بنیاد پر ہی سی ٹی ڈی میں مقدمہ درج کیا گیا۔

ساہیوال: (ویب ڈیسک) چیئرمین پیپلز پارٹی بلاول بھٹو زرداری نے کہا ہے کہ کارکنان فرعون کے خلاف کھڑے ہیں۔
چیئرمین پیپلز پارٹی بلاول بھٹو زرداری نے ساہیوال پہنچنے کے بعد شرکا سے خطاب کرتے ہوئے کہا کہ جس جس شہر سے گزرے کارکن قافلے کا حصہ بنے اور ساہیوال کے عوام نے ہمارا بھرپور استقبال کیا۔
انہوں نے کہا کہ قافلے میں شریک کارکنوں کا بہت مشکور ہوں کیونکہ کارکن اپنے معاشی حقوق کے لیے قافلے کا حصہ بنے ہیں۔ کارکن تاریخ کا حصہ بن رہے ہیں اور فرعون کے خلاف کھڑے ہیں۔
بلاول بھٹو زرداری نے کہا کہ قافلہ آگے چلے گا اور مشکلات بڑھیں گی لیکن ہم نے ساتھ چلنا ہے اور بکھرنا نہیں ہے۔ کارکنوں نے راستے میں اپنی سیکیورٹی کا خیال کرنا ہے۔
انہوں نے کہا کہ کارکنوں نے ون وے کی خلاف ورزی نہیں کرنی اور ایک ہفتے کا سفر کوئی مذاق نہیں ہے بلکہ یہ جیالوں کا پرامن لشکر ہے۔

پشاور: (ویب ڈیسک) پشاور میں گزشتہ روز جامع مسجد میں ہونے والے دھماکے کے مزید 5 زخمی دوران علاج انتقال کر گئے۔ دھماکے میں جاں بحق افراد کی تعداد 62 ہوگئی۔
ترجمان لیڈی ریڈنگ اسپتال کے مطابق دھماکے کے 37 زخمی زیر علاج ہیں، زیر علاج زخمیوں میں سے 5 کی حالت تشویشناک ہے، اسپتال انتظامیہ کے مطابق دھماکے کے مزید 5 زخمی دوران علاج دم توڑ گئے ہیں جس کے بعد اسپتال میں دم توڑنے والے افراد کی تعداد 62 ہو گئی ہے۔
ادھر پشاور کے قصہ خوانی بازار کوچہ رسالدار کی جامع مسجد میں گزشتہ روز ہونے والے خود کش حملہ کی تحقیقات کا سلسلہ جاری ہے۔ پولیس ذرائع کے مطابق خود کش حملہ آور کی شناخت مکمل کرلی گئی جبکہ دو مشتبہ افراد کو حراست میں لیا گیا۔ خود کش حملہ آور اور دو سہولت کاروں کے اسکیچز مکمل کر لیے گئےہیں۔
تفتیشی ٹیم کے مطابق جائے وقوعہ سے ملنے والے اعضاء کا ٹیسٹ کیا جائے گا۔ پولیس ذرائع کے مطابق واقعہ میں ملوث مکمل گروپ کی گرفتاری کے لیے بھی کوششیں جاری ہیں۔ واقعے کا مقدمہ تھانہ سی ٹی ڈی میں درج کر دیا گیا۔ ایف آئی آر میں قتل، اقدام قتل اور دہشتگردی کی دفعات شامل ہیں۔
خود کش دھماکے میں جاں بحق ہونے والے 30 سے زائد افراد کی اجتماعی نماز جنازہ گزشتہ شب جبکہ 10 افراد کی نماز جنازہ آج کوہاٹی میں ادا کی گئی۔ نمازجنازہ کے موقع پر سیکورٹی کے سخت ترین انتظامات کئے گئے۔

راولپنڈی: (ویب ڈیسک) پاکستان اور امریکی فضائیہ کی مشترکہ فضائی مشقیں فیلکن ٹیلن آپریشنل ائیربیس پر اختتام پذیر ہو گئیں۔ مشقوں کا مقصد ایک دوسرے کے تجربات سے فائدہ اٹھانا اور پیچیدہ فضائی آپریشنز میں تعاون کا فروغ تھا۔
پاک امریکا مشترکہ فضائی مشقیں اختتام پذیر ہو گئیں۔ مشقوں میں دونوں فضائی افواج نے بھر پور صلاحیتوں کا مظاہرہ کیا۔ ترجمان پاک فضائیہ ایئر مارشل زاہد محمود نے کہا کہ مشقوں کا مقصد حقیقت پسندانہ عصری منظرناموں میں پیچیدہ فضائی آپریشنز میں انٹر آپریبلٹی کا فروغ تھا۔ دوسری طرف امریکی فضائیہ کے افسروں نے بھی مشقوں کے انعقاد کو سراہا۔
ترجمان پاک فضائیہ کے مطابق ایئر مارشل زاہد محمود اور امریکی سفیر انجیلا ایگلر نے مشترکہ فضائی مشقوں کا معائنہ کیا۔ فضائی مشقوں کا آغاز 26 فروری کو ہوا، مشقوں میں امریکی اور پاک فضائیہ کے پائلٹس اور عملے نے حصہ لیا۔

اسلام آباد: (ویب ڈیسک) فواد چودھری نے کہا ہے کہ دہشت گردی کے پیچھے سب سے بڑی وجہ شدت پسندی ہے، شدت پسندی کو دشمن ہتھیار بنالیتا ہے۔
وفاقی وزیر اطلاعات و نشریات فواد چودھری نے سماجی رابطے کی ویب سائٹ پر ٹویٹ کرتے ہوئے کہا کہ شدت پسندی منبر، اسکول اور تھانہ کے کردار ادا نہ کرنے کا نتیجہ ہے، شدت پسندی کیخلاف بڑے اقدامات کرنے میں پارلیمان اور عدلیہ کا تعاون ناگزیر ہے۔