لاہور: (ویب ڈیسک) حسان خاور نے کہا ہے کہ اتحادیوں نے وعدوں کا پاس رکھا، وہ ہمارے ساتھ ہیں، اپوزیشن کی سیریز کا آخری سیزن ہے، اس کے بعد یہ ڈرامہ ختم ہو جائے گا۔
ترجمان پنجاب حکومت حسان خاور نے میڈیا سے گفتگو کرتے ہوئے کہا کہ 2 بڑی اپوزیشن جماعتوں نے نہ صرف فضائی آلودگی پھیلائی بلکہ سیاسی آلودگی بھی پھیلائی، اپوزیشن جماعتوں کی جانب سے سیاسی آلودگی کا انڈیکس بہت اوپر جا رہا ہے، وزیراعظم کے ایجنڈےمیں فضائی آلودگی کیساتھ ساتھ سیاسی آلودگی ختم کرنا بھی ہے۔
حسان خاور کا کہنا تھا کہ بلاول نے وزیراعظم کو 5 دن کی مہلت دی، انہوں نے کہا 5 دن میں نمبر پورے کریں گے، فضل الرحمان کہتے ہیں وہ سفر میں ہیں کچھ کہہ نہیں سکتے، اس فلم کے پروڈیوسر زرداری صاحب ہیں اور ہیرو کیلئے کشمکش چل رہی ہے، آصف زرداری نے اپنی انتخابی مہم چلا دی ہے، ن لیگ سارا ملبہ شہباز شریف پر ڈلے گا، ہوسکتا ہے چھوٹے بھائی کی بڑے بھائی سے سرزنش بھی ہو۔

بدین: (ویب ڈیسک) بدین شاہ محمود قریشی نے کہا ہے کہ بلاول نے سرکاری وسائل استعمال کر کے بدین میں جلسہ کیا، سندھ کے لوگ کسی مسیحا کی تلاش میں ہیں، اشارے واضح ہیں کہ سندھ کی ہوا کس جانب چل رہی ہے۔
وزیر خارجہ شاہ محمود قریشی نے بدین میں میڈیا سے گفتگو کرتے ہوئے کہا کہ اپوزیشن جماعتوں کے آپس میں دل صاف نہیں، پیپلزپارٹی اور ن لیگ ایک دوسرے کیساتھ بھی مخلص نہیں، عمران خان نے کہا تھا تمام جماعتیں میرے خوف سے ایک ہو جائیں گی، تمام اپوزیشن جماعتیں عمران خان کے خوف سے آج ایک ہوگئیں۔ انہوں نے کہا کہ سندھ مسلسل 15 سال سے پیپلزپارٹی کے ہاتھوں میں گروی ہے، سندھ کا نوجوان پڑھا لکھا طبقہ پیپلزپارٹی سے بددل اور مایوس ہوچکا، سندھ کا نوجوان پیپلزپارٹی سے متعلق سوچتا ہے، اب ان تلوں میں تیل نہیں۔
شاہ محمود قریشی کا کہنا تھا کہ تحریک انصاف کو حکومت سنبھالتے ہی 20 ارب ڈالر کا خسارہ ملا جسے دور کیا، تحریک انصاف حکومت کو دوست ممالک سے ملک کو دیوالیہ ہونے سے بچانے کیلئے پیسے لینے پڑے، کورونا میں دنیا کی معاشی گروتھ کم ہوئی، ہماری بڑھی، ان 3 سالوں میں فصلوں کی ریکارڈ پیداوار ہوئی، موٹر سائکلیں ٹریکٹروں کی سیل میں اضافہ ہوا۔

اسلام آباد: (ویب ڈیسک) پیپلزپارٹی نے حکومت سے پیکا قانون واپس لینے کا مطالبہ کر دیا۔ شیری رحمان نے کہا کہ فیک نیوز کے نام پر تنقید کرنے والوں کو انتقام کا نشانہ بنانے کی سازش کی جا رہی ہے۔
پیپلزپارٹی کی مرکزی نائب صدر و سینیٹر شیری رحمان نے سماجی رابطے کی ویب سائٹ پر ٹویٹ کرتے ہوئے کہا کہ پیکا قانون فیک نیوز کی آڑ میں ایک ہتھیار ہے، تمام سیاسی جماعتوں نے پیکا قانون پر سوالات اٹھائے ہیں، ‏قانون میں فیک نیوز کی تشریح کئے بنا تنقید کرنے والوں کو انتقام کا نشانہ بنانے کی سازش کی جا رہی ہے۔
شیری رحمان نے کہا کہ یہ قانون غلط خبروں کی روک تھام کے لئے ہوتا تو پارلیمان میں بل پیش کیا جاتا، آزادی اظہار پر قدغنیں لگانا کی اجازت نہیں دی جائے گی، حکومت پیکا آرڈیننس واپس لے۔

کراچی : (ویب ڈیسک) سندھ ہائی کورٹ نے بھی سینئر صحافی محسن بیگ کی ایک اور مقدمے میں ضمانت منظور کر لی۔
سندھ ہائی کورٹ میں اسلام آباد سے گرفتار سینئر صحافی و تجزیہ کار محسن بیگ کے خلاف کراچی میں درج مقدمہ کو ختم کرنے کی درخواست کی سماعت ہوئی۔
عدالت نے گرفتار صحافی محسن بیگ کی ضمانت منظور کرتے ہوئے ایک لاکھ روپے کے ضمانتی مچلکے جمع کرانے کا حکم دے دیا۔
عدالت نے ریمارکس دیتے ہوئے کہا کہ ملزم جیل میں ہے تو آپ نے اسی دن کراچی میں مقدمہ کیسے درج کر لیا ؟
محسن بیگ کے وکیل لطیف کھوسہ نے کہا کہ مقدمے میں کہیں بھی محسن بیگ کا نام نہیں ہے۔ وکیل صفائی نے کہا کہ محسن بیگ کے خلاف مقدمہ عمران خان اور مراد سعید کی ایما پر بنایا گیا۔
ایف آئی اے نے تحریری جواب سندھ ہائی کورٹ میں جمع کروایا اور محسن بیگ کی منی لانڈرنگ کے الزامات میں گرفتاری ڈال دی۔
اسسٹنٹ اٹارنی جنرل نے عدالت کو بتایا کہ محسن بیگ کو کراچی میں درج مقدمے میں بھی گرفتار کیا گیا۔ ان کے خلاف سیشن عدالت میں عبوری چالان بھی جمع کرا دیا۔
عدالت نے آئندہ سماعت پر اٹارنی جنرل پاکستان کو ذاتی حیثیت میں طلب کرتے ہوئے کہا کہ ابھی ہم مقدمہ ختم نہیں کر رہے لیکن اگر بدنیتی ثابت ہوئی تو کارروائی کریں گے۔
سندھ ہائیکورٹ کے جسٹس محمد اقبال کلہوڑو نے ریمارکس دیتے ہوئے کہا کہ صحافی کے خلاف مقدمہ درج کرنے پر عدالت کو بھی تحفظات ہیں اور مقدمہ درج کرنے والوں کو جیل بھی جانا پڑ سکتا ہے۔
عدالت نے سوالات کے تسلی بخش جواب نہ دینے پر ایف آئی اے اور اسسٹنٹ اٹارنی جنرل پر شدید برہمی کا اظہار کیا۔
واضح رہے کہ سینئر صحافی محسن بیگ کو پولیس نے گھر سے گرفتار کیا تھا اور محسن بیگ اسوقت جوڈیشل ریمانڈ پر ہیں۔ محسن بیگ کے خلاف تھانہ آبپارہ میں مقدمہ درج ہے جس میں دہشت گردی کی دفعات بھی شامل کی گئی تھیں اور بعد ازاں گرفتاری کے بعد ناجائز اسلحہ کا مقدمہ بھی درج کیا گیا تاہم اس مقدمے میں محسن بیگ کی ضمانت پہلے ہی منظور ہو چکی ہے۔

کراچی : (ویب ڈیسک) صحافی اطہر متین قتل کیس میں جوڈیشل مجسٹریٹ وسطی کی عدالت میں گرفتار ملزم اشرف کی شناخت پریڈ ہوئی۔
رپورٹ کے مطابق مقدمے کے تین عینی شاہدین نے ملزم کو شناخت کرلیا ہے، پولیس نے شناخت پریڈ میں ملزم کے ہمراہ دس ڈمی ملزمان کو پیش کیا تھا، واقعے کے تینوں عینی شاہدین نے ملزم کو ڈمی ملزمان کے درمیان شناخت کیا۔
پولیس کی گواہان کے مجسٹریٹ کے روبرو بیان کی درخواست عدالت نے نمٹا دی، عدالت کا کہنا ہے کہ شناخت پریڈ ہوجانے کے بعد 164 کے بیانات کی درخواست غیر موثر ہوگئی ہے، تفتیشی افسر نے کہا کہ ملزم اشرف سینیئر صحافی اطہر متین کے قتل میں ملوث ہے، ملزم کا ساتھی انور قمبر شہداد کوٹ میں پولیس مقابلے میں مارا جاچکا ہے جبکہ ملزم نے دوران تفتیش سینکڑوں وارداتوں کا اعتراف کیا ہے۔
یاد رہے دو ہفتے قبل کراچی کے علاقے ناظم آباد میں فائرنگ سے نجی چینل سما کے سینئر پروڈیوسر اطہرمتین جاں بحق ہوگئے تھے، ایس ایس پی سنٹرل رانا معروف عثمان کے مطابق ملزمان شہری کو لوٹ رہے تھے۔ صحافی اطہر متین نے واردات ناکام بنانے کے لیے اپنی گاڑی سے ملزمان کی موٹرسائیکل کوٹکرماری جس سے ملزمان نیچے گرے اورغصے میں اطہرمتین کی کار پرفائرنگ کردی۔

اسلام آباد: (ویب ڈیسک) صدر مملکت ڈاکٹر عارف علوی استثیٰ کے باوجود انسداد دہشت گردی کی عدالت میں پیش ہو گئے۔
صدر مملکت ڈاکٹر عارف علوی استثنیٰ کے باوجود انسداد دہشت گردی اسلام آباد کی عدالت میں پی ٹی وی اور پارلیمنٹ حملہ کیس میں پیش ہو گئے۔ صدر مملکت نے پی ٹی وی اور پارلیمنٹ حملہ کیس میں استثنیٰ ختم کرنے کی درخواست دائر کر دی۔
صدر مملکت ڈاکٹر عارف علوی نے کہا کہ ہمارے یہاں امیر غریب کے لیے انصاف کا معیار یکساں نہیں ہے۔ میں کیس میں استثنیٰ نہیں لینا چاہتا اور اسی لیے عام آدمی کی طرح عدالت آیا ہوں۔
انہوں نے کہا کہ پاکستان کا قانون مجھے استثنیٰ دیتا ہے جس کو میں ختم کرتا ہوں اور یہاں کسی کے درمیان کوئی فرق نہیں ہونا چاہیے۔ مجھے پتہ چلا کہ عدالت فیصلہ لکھنے لگی ہے تو میں عدالت میں پیش ہو گیا۔
ڈاکٹر عارف علوی نے کہا کہ میرے اوپر صدر بننے کے بعد سیالکوٹ میں مقدمہ بنا اور اس میں بھی میں نے استثنٰی نہیں لیا بلکہ اپنا وکیل پیش کیا اور مقدمہ جیت گیا۔ عدالت میں جب تک سب برابر نہیں ہوں گے انصاف دیر سے ملے گا۔
انہوں نے کہا کہ پوری عدلیہ سے درخواست ہے کہ فیصلے جلدی ہوں کیونکہ فیصلے جلدی نہ ہوں تو نسلیں مقدمے لڑتی رہتی ہیں۔ مجھے معلوم ہے کہ عدالت کے اوپر بوجھ بہت ہے۔
اس موقع پر بابر اعوان نے میڈیا سے گفتگو کرتے ہوئے کہا کہ آئین کے آرٹیکل 348 کے تحت ڈاکٹر عارف علوی کو صدارتی استثنٰی حاصل ہے تاہم عارف علوی نے فیصلہ کیا کہ وہ شہری کے طور پرعدالت میں پیش ہوں گے۔
انہوں نے کہا کہ عارف علوی نے فیصلہ کیا کہ وہ صدارتی استثنیٰ نہیں لیں گے اور انہوں نے صدارتی استثنیٰ نہ لینے کی درخواست دائر کی ہے۔ صدر نے کہا کہ پاکستان کی تاریخ بدلنا چاہتا ہوں۔