لاہور: (ویب ڈیسک) جماعت اسلامی کے امیر سراج الحق کا کہنا ہے کہ ان کی پارٹی ملک بھر میں تمام الیکشنز میں بھرپور طریقے سے حصہ لے گی، تمام حلقوں میں قابل، ایماندار اور اہل افراد کو ٹکٹس دیے جائیں گے۔ جماعت اسلامی نے 45فیصد امیدواروں پر حتمی مشاورت مکمل کر لی ہے، بقیہ امیدواروں پر مشاورت کے لیے مرکزی پارلیمانی بورڈ کا اجلاس جلد طلب کیا جائے گا۔ان خیالات کا اظہار انھوں نےمرکزی مجلس شوریٰ کے منصورہ میں شروع ہونے والے اجلاس سے افتتاحی خطاب کرتے ہوئے کیا۔
تین روزہ اجلاس کے اختتام پر امیر جماعت اسلامی آئندہ کا لائحہ عمل دیں گے۔ شوریٰ کے اجلاس میں ملک کی مجموعی سیاسی صورت حال، مسئلہ کشمیر و فلسطین، معاشی حالات، اپوزیشن کی تجویز کردہ تحریک عدم اعتماد، جماعت اسلامی کے تنظیمی امور اور آئندہ جنرل اور بلدیاتی الیکشن سے متعلق تیاریوں کے امور زیربحث آئیں گے۔ اجلاس میں مختلف قراردادیں اور جماعت اسلامی کی سالانہ رپورٹس پیش ہوں گی۔ جماعت اسلامی کی قائمہ کمیٹیاں کارکردگی رپورٹس پیش کریں گی۔
اجلاس سے خطاب کرتے ہوئے سراج الحق کا مزید کہنا تھا کہ جماعت اسلامی اپنے جھنڈے، انتخابی منشور اور ترازو کے نشان پر الیکشن میں جائے گی۔ کارکنان بھرپور تیاری کریں اور جماعت اسلامی کا پیغام گھر گھر پہنچائیں۔ انہوں نے کہا کہ ملک پر جاگیرداروں، وڈیروں اورکرپٹ سرمایہ داروں نے اجارہ داری قائم کر رکھی ہے۔ عوام کو اپنے حقوق کے لیے پرامن جدوجہد کرنا ہو گی۔ ہمیں اپنی آئندہ نسلوں کو پرامن، خوشحال اور اسلامی پاکستان دینا ہے۔ جماعت اسلامی فرد کے ساتھ ساتھ معاشرہ کی اصلاح کے لیے بھرپور محنت کر رہی ہے۔ جماعت اسلامی کے قائدین اور کارکنان امید اور روشنی کا پیغام نوجوان نسل کو پہنچائیں۔ وہ وقت دور نہیں جب ملک میں اسلامی انقلاب کی صبح طلوع ہو گی۔

کراچی: (ویب ڈیسک) پاکستان انٹرنیشنل ایئرلائن (پی آئی اے) نے یوکرین میں پھنسے پاکستانیوں کو واپس لانے کے لیے آپریشن کا آغاز کردیا۔
یوکرین جنگ میں پھنسے پاکستانیوں کے انخلا کے معاملے پر سی ای او پی آئی اے ایئرمارشل ارشد ملک اور یوکرین میں تعینات پاکستانی سفیر میجر جنرل(ر) نوئل کھوکھر کے درمیان رابطہ ہوا، جس میں پاکستانی شہریوں اور طالب علموں کے محفوظ انخلا پر بات چیت کی گئی۔
سی ای او پی آئی اے کی پیشکش پر یوکرین میں موجود 2 ہزار پاکستانی طالب علموں کی وطن واپسی کیلئے آپریشن تیار کرلیا گیا، جس پر یوکرین میں تعینات پاکستانی سفیر نے تمام پاکستانی طالب علموں کو یوکرین کے شہر ٹرنوپل میں جمع ہونے کی ہدایت کردی ہے۔
پاکستانی سفارت خانے کے ترجمان کے مطابق تمام پاکستانی طالب علم یوکرین کے شہر ٹرنوپل میں یکجا ہوں گے، پی آئی اے کا بوئنگ 777 طیارہ پولینڈ سے طالب علموں کو وطن واپس پہنچائے گا۔
سی ای او پی آئی اے ایئرمارشل ارشد ملک نے بتایا کہ یوکرین سے پاکستانیوں کی واپسی کے لیے پرواز تیار کی جارہی ہے، طالب علموں کے پولینڈ پہنچتے ہی طیارے کو روانہ کردیا جائے گا۔
انہوں نے کہا کہ ہم وطنوں کو ان کے گھروں تک واپس پہنچانے کیلئے ہر ممکن اقدامات کریں گے، پی آئی اے کی یہ ہی روایت رہی کہ جب ملک کو ضرورت پڑتی ہے وہ قدم بڑھاتی ہے۔
واضح رہے کہ روس کی جانب سے یوکرین پر ہونے والے حملے کے بعد دو ہزار سے زائد پاکستانی طالب علم اور شہری یوکرین میں محصور ہیں، جنہوں نے اپنی باحفاظت وطن واپسی کے لیے حکومت سے درخواست بھی کی تھی۔

مری: (ویب ڈیسک) مری ایکسپریس وے پر شدید برف باری کے باعث ٹریفک کا داخلہ بند کر دیا گیا ہے۔
ترجمان موٹروے پولیس کے مطابق پھلگران ٹال پلازہ سے مری جانے والی ٹریفک کا داخلہ بند کیا گیا ہے تاہم مقامی آبادی اور ایمرجنسی ٹریفک کے لیے این 75 کھلی رہی گی۔
ترجمان کے مطابق سی ٹی او راولپنڈی نوید ارشاد کی طرف سے انچارج ٹریفک سرکل مری کو خود فیلڈ میں رہنے کے احکامات دی گئی ہے۔
انہوں نے بتایا کہ روڈ سے برف ہٹانے کے لیے ٹریفک پولیس کے اہلکار ہائی وے مشینری کے ساتھ موجود ہیں۔
اس سے قبل ان کا کہنا تھا کہ مکینکلی فٹ گاڑی اور لائسنس ہولڈر ڈرائیور ز کو ہی مری جانے کی اجازت دی جائے گی۔

اسلام آباد: (ویب ڈیسک) وزیراعظم عمران خان نے تحریک عدم اعتماد کا جائزہ لینے کے لیے اہم اجلاس طلب کر لیا۔
ذرائع کے مطابق وزیراعظم عمران خان نے پارٹی کی مرکزی قیادت کا اجلاس طلب کیا ہے، اجلاس بنی گالہ میں ہو گا، ملکی سیاست اور اپوزیشن کی حکومت مخالف بیانیہ کا جائزہ لیا جائے گا۔ اپوزیشن کی ممکنہ تحریک عدم اعتماد اور لانگ مارچ کا جائزہ لیا جائے گا۔
ذرائع کے مطابق وزیراعظم اتحادیوں سے معاملات پر پارٹی قیادت سے مشاورت کریں گے، وزیراعظم عمران خان کی عوامی رابطہ مہم اور نئے جلسوں کو فائنل کیا جائے گا۔
ذرائع کے مطابق مارچ میں وہاڑی اور مظفر گڑھ جلسوں کی حتمی تاریخ کا تعین بھی کیا جائے گا، وزیر اعظم پارٹی قیادت کو دورہ روس، ممکنہ معاہدوں اور پوٹن سے ملاقات بارے اعتماد میں لیں گے۔

فیصل آباد: (ویب ڈیسک) بسنت پر پابندی کے باوجود پتنگ بازی کا سلسلہ جاری ہے، ڈور پھرنے سے شہری زندگی کی بازی ہار گیا۔
فیصل آباد میں شہریوں نے پابندی کا بو کاٹا کر دیا، جہاں پر پتنگ بازی جاری ہے، 60 سالہ اکرام باری گلے پر ڈور پھرنے سے جاں بحق ہو گیا۔ ڈور پھرنے سے 5 شہری زخمی ہو گئے۔
منان اکرام عبد اللہ پور میں ڈور پھرنے سے زخمی ہوا، حاجی آبادمیں 25 سالہ عثمان گلے پر ڈور پھرنے سے زخمی ہوا، پتنگ پکڑنے کی کوشش میں 5 سالہ موسیٰ تیسری منزل سے گرکر زخمی ہوا۔
منصور آباد میں 22 سالہ بلال گولی لگنے سے زخمی ہوا، ڈور پھرنے سے زخمی ہونے والے شہری مختلف ہسپتالوں میں زیر علاج ہیں۔
پولیس نے کہا ہے کہ 135 پتنگ باز گرفتار کر لیا ہے، کائیٹ فلائنگ ایکٹ کے تحت 133 مقدمات درج کر لیے ۔
دوسری طرف فیصل آباد: پیپلز کالونی کے علاقے میں ڈور پھرنے سے شہری کے جاں بحق ہونے کے معاملے پر وزیر اعلی پنجاب عثمان بزدار نے نوٹس لیتے ہوئے آر پی او فیصل آباد سے رپورٹ طلب کر لی۔

ملتان: (ویب ڈیسک) سینٹ میں قائد حزب اختلاف سید یوسف رضا گیلانی نے کہا ہے کہ ہم عدم اعتماد کریں گے جس کی ابتداء لانگ مارچ سے کر رہے ہیں، عدم اعتماد میں ایسی قوتیں ساتھ دیں گی کہ یہ پریشان ہو جائیں گے۔
ملتان میں میڈیا سے گفتگو کرتے ہوئے انہوں نے کہا کہ حکومت کی بوکھلاہٹ سے ہم کامیاب ہو گئے ہیں۔ سندھ میں گورنر راج کی کوئی ضرورت نہیں، یہ سندھ میں مارچ کی بات کر رہے ہیں جبکہ ہم کسی ایک صوبے تک محدود نہیں، ہم ملک گیر مارچ کے ذریعے عوام کی جنگ لڑ رہے ہیں اور ہمارے ایجنڈے پر اپوزیشن ایک ہے۔
انہوں نے کہا کہ حکومت اپنا کوئی وعدہ پورا نہیں کر سکی، عوام مہنگائی کی چکی میں پس رہے ہیں اور حکومت کے خلاف لانگ مارچ چاہتے ہیں۔ جو حکومت اپنے منشور پر عملدرامد نہ کرا سکے اس کی گیم ختم ہو جاتی ہے۔ اسی لئے ہم نے ملک گیر کال دی ہے۔
انہوں نے کہا کہ ہم 27 فروری کو عوامی مارچ کر رہے ہیں، 2 مارچ کو عوامی مارچ صادق آباد جبکہ 3 مارچ کو ملتان پہنچے گا۔ پیکا ایکٹ کے خلاف ہم نے سینٹ میں آواز اٹھائی، آرڈیننس کے ذریعے اس قسم کے کالے قوانین کو مسترد کرتے ہیں۔ ہمارے تمام سیاسی جماعتوں سے مذاکرات جاری ہیں، پیپلزپارٹی کے سیلاب کے سامنے کوئی کھڑا نہیں ہو سکے گا۔ بلاول بھٹو زرداری کا ملتان میں فقید المثال استقبال کریں گے، ملتان کی عوام ثابت کرے گی کہ ملتان کس کا ہے۔
انہوں نے کہا کہ روس اور یوکرائن تنازعے میں ہمیں بیلنس پالیسی اختیار کرنی چاہئے۔