کراچی: (ویب ڈیسک) ملیر میں پولیس اور رینجرز نے خفیہ معلومات کی بنیاد پر کارروائی کرتے ہوئے کالعدم تنظیم سے تعلق رکھنے والے 3 ملزمان کو گرفتار کر کے ہینڈگرنیڈزاور اسلحہ و ایمونیشن بھی برآمد کرلیا۔
ترجمان رینجرز کے مطابق گرفتار ہونے والے ملزمان میں گہرام عرف مقبول سومرو،فدا سبزوئی اوروقار شامل ہیں، ابتدائی تفتیش کے دوران ملزمان نے رینجرز اور پاک آرمی پر ہینڈ گرنیڈحملوں کا اعتراف کیا ہے، ملزمان غیر قانونی اسلحہ و ایمونیشن کی ترسیل اور دیگرجرائم میں ملوث ہیں، گرفتار ملزمان کو مزید کاروائی کے لیے پولیس کے حوالے کردیا گیا۔
دوسری جانب بن قاسم پولیس نے اندھے قتل کا سراغ لگا کر ملوث ملزمان کو گرفتار کر لیا، دو ملزمان نے 14 فروری کو محمد سلطان کو سر پر سریا مار کر قتل کر دیا تھا، اور لاش جنگل میں چھپا دی تھی، گرفتار ملزمان میں حبدار سھاگ اور نصیر شامل ہیں، ملزمان قتل کی واردات کے بعد سندھ فرار ہو گئے تھے۔

ملتان: (ویب ڈیسک) پاکستان پیپلزپارٹی کی مرکزی رہنما شازیہ عطا مری نے کہا ہے کہ حکومت عوام کا اعتماد کھو چکی ہے اورمائیں و بہنیں حکومت کو گالیاں دی رہی ہیں۔ انہوں نے کہا کہ بس! اب حکومت نے پارلیمنٹ کا اعتماد کھونا ہے۔
پریس کانفرنس سے خطاب کرتے ہوئے شازیہ عطا مری نے کہا کہ ہم اقتدار کے نہیں جمہویت کے بھوکے ہیں۔ ان کا کہنا تھا کہ لوگوں کی پکار نے ہمیں باہر نکلنے پر مجبور کیا ہے۔
انہوں ںے کہا کہ عوام نے ہمیں باہر نکلنے کا اشارہ دیا ہے وگرنہ یہ دس دن کا سفر ہمارا آسان نہیں ہے۔ انہوں نے کہا کہ بلاول بھٹو نے ساڑھے تین سال بعد عوامی مارچ کا اعلان کیا ہے۔
رکن قومی اسمبلی شازیہ عطا مری نے کہا کہ اس وقت صورتحال یہ ہے کہ ادویات 700 فیصد تک مہنگی ہو چکی ہیں جب کہ غربت و مہنگائی نے عوام کا جینا دوبھر کردیا ہے۔
انہوں نے کہا کہ ہم نے ماضی میں بھی ہمیشہ یہی کہا تھا کہ استعفے دینے سے حکومت گرنے والی نہیں ہے لیکن اس حوالے سے پیپلزپارٹی پر الزامات لگائے گئے۔
پریس کانفرنس سے خطاب کرتے ہوئے شازیہ عطا مری نے کہا کہ جنہوں نے استعفوں کی بات کی تھی انہوں نے بھی استعفے نہیں دیے۔

اسلام آباد: (ویب ڈیسک)کابینہ کی اقتصادی رابطہ کمیٹی(ای سی سی) نے یوٹیلیٹی اسٹورز پر 5 اشیائے ضروریہ کی قیمتوں پر سبسڈی جاری رکھنے کی منظوری دے دی ہے جس کے تحت یوٹیلٹی اسٹورز پر آٹا، گھی، چینی، چاول اور دالوں پر سبسڈی 24 فروری سے 31 مارچ تک برقرار رہے گی۔
وفاقی وزیر خزانہ شوکت ترین کی زیر صدارت کابینہ کی اقتصادی رابطہ کمیٹی کا اجلاس ہوا جس میں افغانستان اور ایران کے ساتھ بارٹر ٹریڈ معاہدے کے ضوابط کی اجازت دیدی گئی جبکہ چینی کی قیمتوں میں اضافہ روکنے کے لیے چینی کے ذخائر قائم کیے جائیں گے۔
ای سی سی کے مطابق افغانستان کو 50 ہزار میٹرک ٹن گندم کی فراہمی کی سمری واپس لے لی گئی جبکہ پاسکو کو 65 ارب کی کریڈٹ لمٹ پر 12 لاکھ ٹن گندم کی خریداری کا ہدف دیدیا گیا۔
اعلامیے کے مطابق پاسکو 1950 روپے فی 40 کلوگرام کی شرح سے گندم خریدے گا، وزارت اقتصادی امور کے لیے 68.40 کروڑ کی پہلی قسط کی منظوری بھی دی گئی۔
ای سی سی کے مطابق سندھ میں اقتصادی ترقی کے پلان کے لیے دو کروڑ روپے کی گرانٹ اور وزارت ہاوٴسنگ اینڈ ورکس کے لیے پی ایس ڈی پی سے 20 کروڑ روپے کی گرانٹ اور نیشنل انسٹیٹیوٹ آف ہیلتھ کے لیے 45 کروڑ کی سپلیمنٹری گرانٹ کی منظوری دی گئی۔

میرانشاہ:(ویب ڈیسک) سکیورٹی فورسز نے خیبرپختونخوا میں دہشتگردوں کیخلاف کارروائی کرتے ہوئے 6 امن دشمنوں کو مار ڈالا۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سکیورٹی فورسز نے خیبرپختونخوا کے ضلع شمالی وزیرستان کے علاقے ہمزونی میں دہشتگردوں کی موجودگی کی اطلاع پر آپریشن کیا، اسی دوران دہشتگردوں کیساتھ شدید فائرنگ کا تبادلہ ہوا۔
بیان کے مطابق فائرنگ کے تبادلے میں 6 ملک دشمن مارے گئے، مارے جانے والے دہشتگردوں کی شناخت محمد علی، مطیع اللہ، محمد عمر، اختر حسین، شیر اور وسیم کے نام سے ہوئی ہے۔ دہشتگردوں کے پاس اسلحہ، گولہ بارود اور سامان بھی تھا۔
آئی ایس پی آر کے مطابق مارے گئے دہشت گردوں سے سب مشین گنیں، ہینڈ گرنیڈ، بارودی سرنگیں، ہتھکڑیاں اور بڑی مقدار میں متعدد کیلیبر راؤنڈز برآمد ہوئے ہیں۔ مارے جانے والے دہشتگرد سکیورٹی فورسز کیخلاف دہشتگردانہ کارروائیوں، ٹارگٹ کلنگ اور اغواء برائے تاوان کی کارروائیوں میں ملوث تھے۔
بیان کے مطابق علاقے کے مقامی لوگوں نے سکیورٹی فورسز کی طرف سے کیے گئے آپریشن کو سراہا اور علاقے سے دہشت گردی کی لعنت کے خاتمے کے لیے بھرپور تعاون کا اظہار کیا۔

گوجرانوالہ: (ویب ڈیسک) جعلی چیک کے مقدمے پر ضمانت خارج ہونے پراین اے 56 اٹک 2 سے ن لیگی رکن قومی اسمبلی ملک سہیل خان گوجرانوالہ کی سیشن عدالت سے فرار ہوگئے۔
تفصیلات کے مطابق ملک سہیل 6 کروڑ روپے کے جعلی چیک کے مقدمہ میں عبوری ضمانت پر تھے، ایڈیشنل سیشن جج صابر سلطان نے لیگی ایم این اے کی ضمانت خارج کر دی، بحٹ کے دوران ممبر قومی اسمبلی عدالت میں موجود رہے، درخواست ضمانت کے فیصلہ پر ن لیگی ایم این اے عدالت میں پیش نہ ہوئے۔
ایف آئی آر کے مطابق ایم این اے کے خلاف تھانہ ماڈل ٹاؤن میں جعلی چیک کا مقدمہ درج ہے، مقدمہ بوگس چیک کے الزام میں 29 جنوری کو درج کیا گیا، ملزم کے متعدد پیٹرول سٹیشن ہیں۔
مدعی مقدمہ نے موقف اپنایا کہ پیٹرول اسٹیشن پر پیٹرول اور ڈیزل سپلائی کرتا تھا، پیٹرول اور ڈیزل کی مد میں ملزم نے بذریعہ چیک 6 کروڑ روپے ادا کیے، چیک بینک میں جمع کروایا تو کیش نہیں ہوا۔

کراچی: (ویب ڈیسک) پاکستان پیپلز پارٹی کی سینیٹر شیری رحمٰن نے وزیراعظم عمران خان کے دورہ روس پر شدید تنقید کرتے ہوئے کہا کہ روس جنگ کا میدان بنا ہوا ہے اور یہ اس وقت وہاں چلے گئے ہیں، مودی کو وزیراعظم ڈیبیٹ کا چیلنج کررہے ہیں، پہلے پاکستان میں تو ڈیبیٹ کرلیں۔
پیپلز پارٹی کی سینیٹر شیری رحمٰن نے کراچی میں واقع کلفٹن میں اپنی رہائش گاہ پر ایڈمنسٹریٹر مرتضٰی وہاب کے ہمراہ پر پریس کانفرنس کی۔
پریس کانفرنس پیپلز پارٹی کے لانگ مارچ کی تیاریوں اور حکمت عملی کے حوالے سے تھی جس میں شیری رحمٰن نے حکومت پر شدید تنقید کرتے ہوئے کہا کہ وزیراعظم کی پالیسی عوام دشمن ہیں جس نے ستر سالہ ریکارڈ توڑ دیا۔

اسلام آباد: (ویب ڈیسک) وفاقی وزیر قانون بیرسٹر فروغ نسیم نے کہا ہے کہ نور مقدم قتل کیس کے فیصلے کا خیر مقدم کرتے ہیں، فیصلے سے انصاف کی حقیقی معنوں میں جیت ہوئی ہے۔
خیال رہے کہ نور مقدم قتل کیس میں عدالت نے ملزم ظاہر جعفر کو سزائے موت سنا دی، مرکزی ملزم کے والدین سمیت نو ملزمان کر بری کر دیا گیا۔
اسلام آباد کی مقامی عدالت نے شریک ملزمان چوکیدار اور مالی کو دس ،دس سال قید کی سزا سنائی جبکہ تھراپی ورکس کے تمام ملزمان کو بری کردیا۔
ایڈیشنل سیشن جج عطا ربانی نے محفوظ فیصلہ سنایا جس میں کہا گیا ہے کہ مالی اور چوکیدار نے واقعہ ہونے پر کسی کو اطلاع دی نہ روکنے کی کوشش کی جو جرم میں معاونت کے زمرے میں آتاہے۔
اس فیصلے پر ردعمل دیتے ہوئے وزیر قانون کا کہنا تھا کہ اسلام آباد پولیس، پراسیکیوشن سروس اور پراسیکیوٹر کا شکریہ ادا کرتے ہیں جنہوں نے بہترین طریقے سے کیس کے شواہد اور دلائل پیش کیے، نور مقدم قتل کیس کو بہترین طریقے سے منتقی انجام تک پہنچایا گیا ہے اور فیصلہ آنے سے نظام عدل مزید مضبوط ہوا ہے۔
فروغ نسیم نے کہا کہ موجودہ حکومت کا مقصد قانون کی حکمرانی، عورتوں اور بچوں کے حقوق کی مکمل حفاظت ہے، عورتوں اور بچوں کے ساتھ زیادتی کے کیسز میں اس طرح کے مضبوط فیصلے ہمارا مقصد ہے، عورتوں اور بچوں کے حقوق پامال کرنے والوں کو کڑی سے کڑی سزا یقینی بنانا ہماری ترجیح ہے، اینٹی ریپ ایکٹ کے نفاذ سے اس قسم کے گھناؤنے جرائم میں یقینی کمی واقع ہوگی۔

راولپنڈی: (ویب ڈیسک) بلوچستان میں امن دشمنوں کیخلاف کارروائی کے دوران سکیورٹی فورسز نے ایک اور دہشتگرد کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق بلوچستان کے علاقے سمبازا میں دہشتگردوں کے ٹھکانے کی موجودگی کی خفیہ اطلاع پر سکیورٹی فورسز نے کالعدم تحریک طالبان (ٹی ٹی پی) کے دہشتگردوں کو پکڑنے کے لیے آپریشن کیا، دہشتگرد ملحقہ قبائلی اضلاع میں دراندازی کی کوشش کر رہے تھے۔
بیان کے مطابق اس دوران سکیورٹی فورسز نے علاقے کو گھیرے میں لے لیا، جبکہ غار میں چھپے دہشتگردوں نے بھاگنے کی کوشش کی اور اندھا دھند فائرنگ کی اسی دوران فورسز کیساتھ شدید فائرنگ کا تبادلہ ہوا۔ جس کے نتیجے میں 1 دہشت گرد مارا گیا۔
آئی ایس پی آر کے مطابق آپریشن کے دوران اسلحہ اور گولہ بارود کا ذخیرہ برآمد کیا گیا، بھاری تعداد میں یہ اسلحہ دہشت گردوں کی جانب سے سیکورٹی فورسز کے خلاف استعمال کرنے کا منصوبہ بنایا گیا تھا۔
بیان کے مطابق پاکستان میں دہشت گردی کی کارروائیوں کے مرتکب افراد کے خاتمے کے لیے کارروائیاں جاری رہیں گی، پاکستان کے امن و استحکام کو سبوتاژ کرنے کی اجازت نہیں دینگے۔