اسلام آباد: (ویب ڈیسک) بھارہ کہو بائی پاس منصوبے کے بڑے پلر کی شٹرنگ ٹوٹ گئی جس کے نتیجے میں ایک مزدور جاں بحق ہوگیا ۔
ذرائع کے مطابق حادثہ اسلام آباد کے علاقے بھارہ کہو میں پیش آیا جہاں زیر تعمیر پل کے بڑے پلر کی شٹرنگ ٹوٹنے سے ایک مزدور جاں بحق ہوگیا جبکہ متعدد زخمی ہوئے ہیں ۔
پولیس اور امدادی ٹیموں کی جانب سے دیگر مزدوروں کو ملبے سے نکالنے کے لیے ریسکیو آپریشن جاری ہے ۔
ترجمان وفاقی پولیس کے مطابق ابھی تک تین مزدوروں کو زخمی حالت میں ہسپتال منتقل کردیا گیا ہے ، پولیس نے عوام سے درخواست کی ہے کہ بھارہ کہو کی طرف نہ جائیں اور امدادی کارروائیوں میں رکاوٹ پیدا کرنے سے اجتناب کریں ۔

لاہور: (ویب ڈیسک) پاکستان تحریک انصاف کے رہنما اور سابق وفاقی وزیر فواد چودھری نے کہا ہے کہ فسطائی حکمرانوں سے آزادی ہماری منزل ہے۔
سماجی رابطے کی ویب سائٹ ٹوئٹر پر فواد چودھری نے لکھا کہ جیل بھرو__زندان بھرو تحریک کا مقصد عوام کے سیاسی اور معاشی حقوق کیلئے جدوجہد کا شعور ہے۔
سابق وزیر کا کہنا تھا کہ تحریک انصاف کے 200 سے زیادہ سیاسی کارکنان مختلف جیلوں میں قید و بند کی صعوبت میں ہیں جن میں شاہ محمود قریشی، اسد عمر اور صف اوّل کی دیگر قیادت شامل ہے۔

پشاور: (ویب ڈیسک) طور خم سرحدی گزرگاہ کو 6 روز بعد کارگو گاڑیوں کے لیے کھول دیا گیا۔
بارڈر کلئیرنس حکام کے مطابق سرحدی گزرگاہ پر دو طرفہ تجارت کی معطلی سے ملکی خزانے کو ٹیکس کی مد میں 270 ملین روپے کا نقصان پہنچا۔
سیکورٹی حکام کا کہنا ہے کہ سرحدی گزرگاہ بند ہونے سے ہزاروں کارگو گاڑیاں پھنس گئی تھیں۔
یاد رہے کہ افغان سیکورٹی اہلکاروں نے 6 روز قبل سرحدی گزرگاہ کو ہر قسم کی آمد و رفت کے لیے بند کردیا تھا۔

اسلام آباد: (ویب ڈیسک) بینکنگ کورٹ اسلام آباد نے ممنوعہ فنڈنگ کیس میں چیئرمین پاکستان تحریک انصاف عمران خان کو 28 فروری کوپیش ہونےکا حکم دے دیا۔
بینکنگ کورٹ اسلام آباد میں عمران خان اور دیگر کے خلاف فارن ایکسچینج ایکٹ کے تحت ممنوعہ فنڈنگ کیس کی سماعت جج رخشندہ شاہین نے کی ، عمران خان کے وکیل نعیم پنجوتھہ عدالت میں پیش ہوئے۔
عمران خان کے وکیل نے عدالت کو بتایا کہ اسلام آباد ہائی کورٹ نے فیصلہ دیا تھا کہ عمران خان 28 فروری کوبینکنگ کورٹ میں پیش ہوں، عمران خان کی جانب سے اسلام آباد ہائی کورٹ کے فیصلے کی کاپی بھی بینکنگ کورٹ میں جمع کرادی گئی۔
عدالت نے ہائیکورٹ کے حکم کی روشنی میں عمران خان کو 28 فروری کو پیش ہونے کا حکم دے دیا ، عدالت نے کیس کی سماعت 28 فروری تک ملتوی کردی ۔
یاد رہے کہ اسلام آباد ہائیکورٹ نے عمران خان کی ویڈیو لنک کے ذریعے بینکنگ کورٹ میں پیشی کی درخواست مسترد کر دی تھی اور 28 فروری کو بینکنگ کورٹ میں پیش ہونے کا حکم دے رکھا ہے۔

راولپنڈی: (ویب ڈیسک) پاکستان تحریک انصاف (پی ٹی آئی) کی جیل بھرو تحریک میں راولپنڈی سے گرفتاری دینے والے 6 رہنماؤں کو اڈیالہ سے شاہ پور جیل منتقل کر دیا گیا۔
ذرائع کے مطابق پی ٹی آئی کی ملک گیر جیل بھرو تحریک کے سلسلے میں گرفتار رہنماؤں میں فیاض الحسن چوہان، زلفی بخاری ، صداقت عباسی ، اعجاز خان جازی، لطافت عباسی، چودھری ساجد کو اڈیالہ سے ڈسٹرکٹ شاہ پور جیل منتقل کردیا گیا ہے ۔
ذرائع کا بتانا ہے کہ پی ٹی آئی کے دیگر 41 کارکنان کو اڈیالہ جیل سے حافظ آباد جیل منتقل کردیا گیا۔
راولپنڈی میں جیل بھرو تحریک کے سلسلے میں پی ٹی آئی کے رہنماؤں فیاض الحسن چوہان ،زلفی بخاری، صداقت عباسی ، وحید قاسم اور اعجاز خان جازی سمیت 100 سے زائد کارکنوں نے گرفتاری دی تھی ۔
خیال رہے کہ چیئرمین پاکستان تحریک انصاف عمران خان نے بدھ 22 فروری سے جیل بھرو تحریک لاہور سے شروع کرنے کا اعلان کیا تھا۔

لاہور : (ویب ڈیسک) لاہور ہائیکورٹ بار کے سالانہ انتخابات کے لیے پولنگ کا عمل شروع ہوگیا ہے ، بائیو میٹرک الیکشن کے لئے پولنگ شام 5 بجے تک جاری رہے گی۔
لاہور ہائیکورٹ بار کے 4 عہدوں کے لیے 14 امیدواروں میں مقابلہ ہے جس میں 26043 وکلاء رائے حق دہی استمال کریں گے، ان میں 24271 مرد اور 1772 خواتین وکلاء شامل ہیں۔
لاہورہائیکورٹ بار کی صدارت کے لئے اشتیاق اے خان اور لہراسب گوندل میں کانٹے کا مقابلہ ہے ، صدارتی امیدوار اشتیاق اے خان کو پروفیشنل گروپ جبکہ لہراسب گوندل کو عاصمہ جہانگیر گروپ کی حمایت حاصل ہے۔
نائب صدر کے عہدے کے لئے 6 امیدواروں میں مقابلہ ہورہاہے جس میں نائب صدر کے عہدے کے امیدواروں میں ربیعہ باجوہ ،وارث علی سرویا ، سردارعلی گہلن ، افتخار احمد بھٹی احمد خان گوندل اور رؤف احمد بھی شامل ہیں۔
سیکرٹری کے تین امیدواروں میں میاں عرفان علی ،مس صباحت علی رضوی ، اور قادربخش چاھل شامل ہیں جبکہ فنانس سیکرٹری کے تین امیدواروں میں شاہ رخ شہباز وڑائچ ، اعجاز احمد بوسال اور عادل نعیم شیخ شامل ہیں ۔
ہائیکورٹ کی جی پی او چوک پارکنگ میں امیدواروں کے ووٹرز کی رہنمائی کے لئے استقبالیہ کیمپ قائم کئے گئے ہیں جبکہ ہائیکورٹ بار کے کیانی ہال ، کراچی شہداء ہال ، ڈاکٹر محمد جاوید اقبال ایڈوٹریم ہال سمیت 6 پولنگ بوتھ قائم کئے گئے ہیں ۔
پولنگ بوتھ نمبر 1 ڈاکٹر جاوید اقبال آڈیٹوریم میں ووٹ نمبر ایک تا 8500 تک ووٹ کاسٹ ہوں گے ، پولنگ بوتھ نمبر 2 سٹڈی روم صرف خواتین ووٹر وکلاء کے لئے مختص ہوگا، پولنگ بوتھ نمبر 3 کیانی ہال میں ووٹ نمبر 8501 تا 11000 تک کے وکلاء ووٹ کاسٹ کرسکیں گے ،پولنگ بوتھ نمبر 4 لیٹیگنٹ سنٹر میں قائم ، ووٹ نمبر 11001 تا 14500 تک ووٹ کاسٹ ہوں گے۔
اسی طرح پولنگ بوتھ نمبر 5 لیٹیگنٹ سنٹر میں قائم ، 140501 تا 18500 تک ووٹ کاسٹ ہونگے ، پولنگ بوتھ نمبر 6 کراچی شہداء ہال میں ووٹ نمبر 18501 تا 23000 تک کے ووٹر وکلاء ووٹ کاسٹ کریں گے ، لاہور ہائیکورٹ بار انتخاب کے باعث آج لاہور ہائیکورٹ بار اور اس کے علاقائی بنچز میں عام تعطیل ہوگی۔

اسلام آباد: (ویب ڈیسک) ظاہر شاہ کو قومی احتساب بیورو (نیب) کا قائم مقام چیئرمین تعینات کر دیا گیا۔
نوٹیفکیشن کے مطابق ظاہر شاہ کو قومی احتساب ایکٹ 1999 کی سیکشن 6، بی کے تحت چیئرمین نیب تعینات کیا گیا ہے، ظاہر شاہ کا تقرر نئے چیئرمین نیب کی تعیناتی تک کیا گیا ہے۔
نوٹیفکیشن میں کہا گیا ہے کہ ظاہر شاہ کی تعیناتی 22 فروری سے کی گئی ہے، ظاہر شاہ اس سے پہلے نیب میں ایڈیشنل ڈائریکٹر کے عہدے پرخدمات انجام دے رہے تھے۔
آفتاب سلطان کے مستعفی ہونے کے بعد سے ظاہر شاہ ہی ادارے کے معاملات سنبھالے ہوئے ہیں، وہ 10 برس سے زائد عرصے سے نیب سے وابستہ ہیں۔
ظاہر شاہ ڈی جی نیب راول پنڈی بھی رہے ہیں جبکہ سن 2021 سے وہ ڈپٹی چیئرمین کے عہدے پر فائز تھے۔
واضح رہے کہ گزشتہ دنوں چیئرمین نیب آفتاب سلطان نے استعفیٰ دیا تھا۔