بہاولپور : (ویب ڈیسک) بہاولپور میں انتہائی دل دہلا دینے والا واقعہ پیش آیا ہے جہاں بھتیجے نے تین پھوپھیوں کے گلے تیز دھارآلے سے کاٹ کر موت کے گھاٹ اتار دیا ۔
صوبہ پنجاب کے ضلع بہاولپور کے علاقے کرناں بستی میں بھتیجے نے اپنی تین پھوپھیوں کے گلے کاٹ دیے، ملزم وسیم شاہ نجی کمپنی کا سیکورٹی گارڈ ہے ۔
ابتدائی تحقیقات کے مطابق مقتول خواتین کی شناخت شمیم مائی، پروین مائی اور شاہین بی بی کے نام سے ہوئی ہے ، تینوں خواتین سگی بہنیں ہیں جو بھتیجے کے ہاتھوں قتل ہوئیں۔
واقعے کی اطلاع ملتے ہی پولیس جائے وقوعہ پر پہنچ گئی اور ملزم وسیم کو آلہ قتل سمیت گرفتار کرلیا ، پولیس نے نعشوں کو تحویل میں لے کر پوسٹمارٹم کیلئے ہسپتال منتقل کردیا ۔
واقعہ کی وجوہات جاننے کیلئے پولیس کی جانب سے تفتیش کی جارہی ہے ۔

راولپنڈی: (ویب ڈیسک) سابق وزیر داخلہ چوہدری نثار علی خان کا کہنا ہے عمران نے کسی کو پارٹی میں شامل کرنےکی اتنی کوشش نہیں کی جتنی میرے لیے کی۔
راولپنڈی کے علاقے چاکرہ میں چوہدری نثار کا جلسے سے خطاب کرتے ہوئے کہنا تھا ہم نعرے بہت لگاتے ہیں مگر عمل نہیں کرتے، ملک انتہائی نازک موڑ پر ہے اور ہم ایک دوسرے کے گریبان پکڑ رہے ہیں، سیاست میں گالم گلوچ عام ہو گئی ہے۔
ان کا کہنا تھا آج ہم کھائی کے بالکل کنارے پر پہنچ گئے ہیں، میں سچ کا علم بلند کرتا رہوں گا، میں عوام کی اور پاکستان کی نمائندگی کرتا رہوں گا، لوگ پوچھتے ہیں کہ کسی پارٹی میں شامل کیوں نہیں ہوتے؟ میں کہتا ہوں کہ میں اس گالم گلوچ کا حصہ نہیں بننا چاہتا۔
انہوں نے کہا کہ عمران خان میرا 50 سال سے دوست ہے، عمران خان آج بھی دوست ہے، عمران نے کسی کو پارٹی میں شامل کرنےکی اتنی کوشش نہیں کی جتنی میرے لیے کی۔
سابق وزیر داخلہ کا کہنا تھا میں میدان میں آچکا ہوں، عزت عہدوں سے نہیں آتی، مجھے غریب اور مزدور کی مدد درکار ہے، الیکشن آج ہوں کل ہوں 2 سال بعد یا 10 سال بعد، میں میدان میں ہوں، بطور ایم این اے ہی خدمت نہیں کی بلکہ بطور کونسلر بھی عوام کی خدمت کی، میرے مقابلے میں وہ لوگ ہیں جنہوں نے ککھ نہیں کیا.
ان کا کہنا تھا مجھے عمران خان کہتا کہ یار تم نہیں آتے تو میرا ان لوگوں سے گزارا ہے، جو لوگ عمران خان کا جھنڈا لیکر پھرتے ہیں یہ بے نظیر کا نعرہ لگاتے تھے، بعد میں یہ مشرف کے ساتھ ہوگئے اور اب عمران کے ساتھ ہیں، انہیں پیٹرولیم کی وزارت کا شوق تھا، انہیں وہاں سے نکال دیا گیا، میں نے بڑے بڑے عہدوں کا انکار کیا ہے۔
چوہدری نثار کا کہنا تھا 2018 کے انتخابات میں کیا ہوا اس کی وجہ کچھ اور تھی، پھر کبھی بتاؤں گا، چاہتا ہوں میں الیکشن کے بعد کسی جماعت میں عزت کے ساتھ جاؤں، وزیر تو میں جنرل ضیاء، جونیجو اور غلام اسحاق خان کا بھی تھا، عمران نے مجھ سے دوستی نبھائی ہے اور آج بھی نبھا رہا ہے۔

راولپنڈی: (ویب ڈیسک) راولپنڈی میں جیل بھرو تحریک کے سلسلے میں پی ٹی آئی کے رہنماؤں فیاض الحسن چوہان ،زلفی بخاری، صداقت عباسی ، وحید قاسم اور اعجاز خان جازی سمیت 80 سے زائد کارکنوں نے گرفتاری دے دی۔
فیاض الحسن چوہان ریلی کی صورت میں کمیٹی چوک پہنچے، جیل بھرو تحریک کے سلسلے میں پی ٹی آئی کے رہنما ازخود قیدیوں کی وین میں جا کر بیٹھ گئے۔
فیاض الحسن چوہان نے قیدی وین میں میڈیا سے گفتگو کرتے ہوئے کہا کہ میں نے گھر والوں کو کہا ہے کہ میری ضمانت نہ کرانا، نہ ہم ضمانتیں کرائیں گے نہ ہی درخواستیں دیں گے۔
فیاض چوہان کے آنے کے بعد کمیٹی چوک پر پی ٹی آئی کارکنان بھی قیدی وین میں بیٹھنے لگے، فیاض الحسن چوہان کے ساتھ دیگر 10 پی ٹی آئی کارکنان نے بھی گرفتاری دی۔
پولیس فیاض الحسن چوہان اور پی ٹی آئی کارکنوں کو کمیٹی چوک سے پہلی قیدی وین میں لے کر روانہ ہوگئی۔
فیاض چوہان کی گرفتاری کے بعد سابق وزیرِ داخلہ شیخ رشید، پی ٹی آئی رہنما زلفی بخاری اور عامر کیانی بھی کمیٹی چوک پہنچ گئے، پی ٹی آئی رہنما زلفی بخاری نے گرفتاری دے دی جبکہ شیخ رشید گرفتاری دینے کے بجائے کمیٹی چوک سے گاڑی میں روانہ ہو گئے۔
پی ٹی آئی آزاد کشمیر کے جنرل سیکرٹری راجہ منصور بھی اور مجلس وحدت مسلمین کے سربراہ علامہ ناصر عباس بھی گرفتاری دینے کمیٹی چوک پہنچ گئے۔
پولیس ذرائع کے مطابق 3 قیدی وینوں میں زیادہ سے زیادہ 90 افراد کی گنجائش موجود تھی، پولیس کا کہنا ہے کہ اب تک فیاض الحسن چوہان، زلفی بخاری، صداقت عباسی، اعجاز خان جازی اور وحید قاسم نے گرفتاری دی ہے۔

راولپنڈی: (ویب ڈیسک) راولپنڈی میں جیل بھرو تحریک کے سلسلے میں پی ٹی آئی کے رہنما فیاض الحسن چوہان نے رضاکارانہ طور پر گرفتاری دے دی۔
فیاض الحسن چوہان ریلی کی صورت میں کمیٹی چوک پہنچے، جیل بھرو تحریک کے سلسلے میں پی ٹی آئی کے رہنما ازخود قیدیوں کی وین میں جا کر بیٹھ گئے۔
اس موقع پر فیاض الحسن چوہان نے قیدی وین میں میڈیا سے گفتگو کرتے ہوئے کہا ہے کہ میں نے گھر والوں کو کہا ہے کہ میری ضمانت نہ کرانا، نہ ہم ضمانتیں کرائیں گے نہ درخواستیں دیں گے۔
فیاض چوہان کے آنے کے بعد کمیٹی چوک پر پی ٹی آئی کارکنان بھی قیدی وین میں بیٹھنے لگے، فیاض الحسن چوہان کے ساتھ دیگر 10 پی ٹی آئی کارکنان نے بھی گرفتاری دی۔
پولیس فیاض الحسن چوہان اور پی ٹی آئی کارکنوں کو کمیٹی چوک سے پہلی قیدی وین میں لے کر روانہ ہوگئی۔
فیاض چوہان کی گرفتاری کے بعد سابق وزیرِ داخلہ شیخ رشید، پی ٹی آئی رہنما زلفی بخاری اور عامر کیانی بھی کمیٹی چوک پہنچ گئے۔

لاہور : (ویب ڈیسک) پاکستان کی پہلی مخنث نیوز اینکر مارویہ ملک لاہور کنٹونمنٹ کے علاقے میں اپنی رہائش گاہ کے باہر ایک قاتلانہ حملے میں بال بال بچ گئیں۔
مخنث نیوز اینکر مارویہ ملک پر قاتلانہ حملے کا مقدمہ درج کرلیا گیا ہے ، پولیس کو دیے گئے بیان میں مارویہ ملک نے بتایا ہے کہ وہ فارمیسی سے کینٹ کے علاقے میں اپنے گھر واپس آرہی تھیں جس دوران ان پر فائرنگ کی گئی۔
مارویہ ملک نے بتایا کہ انہیں فون پر دھمکیاں موصول ہورہی تھیں خوف کے باعث انہوں نے گھر چھوڑ دیا اور لاہور سے باہر منتقل ہوگئی ہیں۔
ان کاکہنا تھا کہ اپنی زندگی کے خوف سے وہ لاہور چھوڑ کر ملتان اور اسلام آباد منتقل ہوگئی تھیں ، تاہم چند ہی روز قبل وہ ایک سرجری کے لیے لاہور واپس آئی تھیں۔
واضح رہے کہ مارویہ ملک نے پانچ سال قبل نجی نیوز چینل پر یوم پاکستان کے موقع پر بطور نیوز اینکر اپنے کیرئیر کا آغاز کیا تھا ، ٹوئٹر پر صحافیوں و دیگر افراد نے چینل کے اس اقدام کو سراہتے ہوئے مارویہ کو مبارک باد دی تھی۔

پشاور: (ویب ڈیسک) خیبر پختونخوا حکومت نے دہشت گردوں کی مالی معاونت کرنے والوں کے خلاف گھیرا تنگ کرنے کا فیصلہ کیا ہے جس کے لیے کاؤنٹر ٹیرازم ڈپارٹمنٹ (سی ٹی ڈی) کے وسائل میں اضافہ کردیا گیا ہے۔
تفصیلات کے مطابق آئی جی کے پی نے سی ٹی ڈی کے ریجن کی تعداد 14 کردی اور افسران کی تعداد میں بھی اضافہ کردیا، سی پی او سی ٹی ڈی خیبرپختونخوا میں ٹیررازم فنانس سیل قائم کردیا گیا۔
سی پی او حکام کے مطابق ٹیررازم فنانسنگ سیل صوبے میں بھتہ خوری، دہشت گردوں کو جاری روپے کی سپلائی لائن اور افغان سم سے آنے والی کالز پر کام کرے گا، سپیشل سیل بھتہ اور دہشت گردوں کی مالی معاونت کرنے والوں افراد اور نیٹ ورک میں کام کرنے والوں کی فہرست پر بھی کام کرے گا۔

اسلام آباد: (ویب ڈیسک) قومی اسمبلی نے انٹر بورڈ کوآرڈینیشن کمیشن بل متفقہ طور پر منظور کر لیا۔
قومی اسمبلی میں انٹر بورڈ کوآرڈینیشن کمیشن بل پیش کیا گیا جسے متفقہ طور پر منظور کر لیا گیا۔
نیشنل اسمبلی میں زکوٰۃ و عشر ترمیمی بل 2023ء، گیس چوری کی روک تھام اور بازیابی کا ترمیمی بل 2023ء بھی پیش کیا گیا۔
انٹر بورڈ کوآرڈینیشن کمیشن بل متفقہ طور پر منظور کیے جانے کے بعد قومی اسمبلی کا اجلاس پیر کی شام 5 بجے تک ملتوی کر دیا گیا۔

اسلام آباد: (ویب ڈیسک) مسلم لیگ ن کے رہنما اور سابق وزیرِ اعظم شاہد خاقان عباسی کا کہنا ہے کہ الیکشن میں تاخیر نہیں ہو گی، انتخابات وقت پر ہوں گے۔
پارلیمنٹ کے باہر میڈیا سے گفتگو کرتے ہوئے شاہد خاقان عباسی نے کہا کہ جس کو کیس میں پارٹی بنایا گیا ہو وہ اعتراض کر سکتا ہے، سپریم کورٹ نے معاملہ اٹھالیا ہے۔
سابق وزیرِ اعظم شاہد خاقان عباسی کا مزید کہنا تھا کہ اگر الیکشن ہوئے اور میں لڑا تو ن لیگ کے ٹکٹ پر لڑوں گا۔

لاہور : (ویب ڈیسک) لاہور ہائیکورٹ میں تحریک انصاف کے گرفتار رہنماؤں اور کارکنان پر فوجداری مقدمات اور دوسرے اضلاع منتقلی کے خلاف درخواست دائر کردی گئی ۔
درخواست تحریک انصاف کے رہنماء فواد چوہدری کی جانب سے دائر کی گئی ہے، درخواست میں وفاقی حکومت،صوبائی حکومت آئی جی پنجاب سمیت دیگر کو فریق بنایا گیا ہے۔
یہ بھی پڑھیں:پی ٹی آئی کے گرفتار رہنماؤں کی بازیابی کیلئے درخواست، سرکاری وکیل سے جواب طلب
درخواست گزار نے درخواست میں موقف اختیار کیا ہے کہ پی ٹی آئی سربراہ عمران خان نے جیل بھرو تحریک کا اعلان کیا ہے، تحریک انصاف کے رہنماؤں اور کارکنان گرفتاری دینے کے لیے چیئرنگ کراس لاہور پہنچے، تمام رہنماوں اور کارکنان نے علامتی گرفتاریاں دی ہیں اور کوئی رہنماء اور کارکن مجرم نہیں ہے۔
درخواست میں استدعا کی گئی ہے کہ عدالت حکومت کو تمام گرفتار رہنماؤں اور کارکنان کے خلاف فوجداری مقدمات قائم کر نے سے روکنے کا حکم دے اور تمام افراد کو دوسرے اضلاع کی جیلوں میں منتقل کرنے سے بھی روکا جائے۔

کراچی: (ویب ڈیسک) کراچی کے علاقے ناگن چورنگی پر گرین لائن بس حادثے کا شکار ہوگئی ، حادثے میں ڈرائیور خواتین سمیت متعدد افراد زخمی ہوگئے۔
کراچی کے علاقے ناگن چورنگی کے پل کے نیچے گرین لائن کے ٹریک پر بچہ آ گیا تھا ، بس بچے کو بچاتے ہوئے جنگلا توڑ کر فٹ پاتھ پرآ گئی ، حادثے کے نتیجے میں ڈرائیور ، خواتین سمیت متعدد افراد زخمی ہوگئے جنہیں ہسپتال منتقل کردیا گیا ۔
حادثے کے بعد ناگن چورنگی پل پر ٹریفک کی روانی بھی متاثر ہوئی ، گرین لائن بس حادثے پر انتظامیہ کی جانب سے جاری بیان میں کہا گیا ہے کہ ٹریک کو کلیئر کرکے سروس بحال کردی گئی ہے ، حادثے کی تحقیقات شروع کردی گئی ہیں، بس کے اندر اور ٹریک پر نصب کیمروں سے مدد لی جائیگی۔
گرین لائن بس منصوبے کا اعلان جولائی 2014 میں ن لیگ کی وفاقی حکومت نے کیا تھا اور 26 فروری 2016 کو اس 17.8 کلومیٹر طویل سرجانی سے گرومندر تک ٹریک کا سنگ بنیاد رکھا گیا۔