اسلام آباد: (ویب ڈیسک) وفاقی وزیر برائے ماحولیاتی و تبدیلی اور پیپلزپارٹی کی سینیٹر شیری رحمان نے بارکھان واقعے پر ردّ عمل کا اظہار کیا ہے۔
سماجی رابطے کی ویب سائٹ ٹوئٹر پرشیری رحمان نے اس واقعے پر مذمتی بیان جاری کرتے ہوئے کہا کہ ‏بارکھان واقعہ ہمارے معاشرے کے مجموعی شعور پر سوالیہ نشان ہے، بہیمانہ تشدد، قتل اور نعشوں کی بے حرمتی نے سب کا سر شرم سے جھکا دیا ہے۔
رہنما پیپلزپارٹی نے کہا کہ ہم کون سی صدی میں رہتے ہیں جہاں طاقتوروں نے نجی جیل بنائے ہوئے ہیں، عورتوں اور بچوں پر تشدد کر کے نعشیں کنویں میں پھینک دی جاتی ہیں۔
وفاقی وزیر کا مزید کہنا تھا کہ پوسٹ مارٹم میں دل دہلا دینے والے انکشافات سامنے آ رہے ہیں جو متاثرین اور ان کے خاندان پر گزری ہے اس کا کوئی ازالہ نہیں کرسکتا، اس واقعے کی جلد از جلد تحقیقات کر کے مجرموں کو کڑی سزا دی جائے۔

اسلام آباد: (ویب ڈیسک) پاک فوج کی 33 رکنی سرچ و ریسکیو ٹیم ترکیہ میں 17 روزہ ریسکیو آپریشن مکمل کرنے کے بعد وطن واپس پہنچ گئی۔
ترجمان این ڈی ایم اے کے مطابق وزیراعظم کی ہدایت پر این ڈی ایم اے نے پاک فوج کی منظم ٹیم 6 فروری کو ترکیہ بھجوانے کا انتظام کیا تھا، ریسکیو 1122 کی 53 رکنی ٹیم ترکیہ بھجوائی گئی۔
ریسکیو ٹیم کی وطن واپسی پر وفاقی وزیر تعلیم رانا تنویر، پاکستان میں ترکی کے سفیر اور این ڈی ایم اے حکام نے استقبال کیا، اس مناسبت سے تقریب میں ترکیہ ایمبیسی اور وزرات خارجہ کے افسران بھی شامل تھے۔
اس موقع پر ترکی کے سفیر نے پاک فوج کی ٹیم کو خراج تحسین پیش کیا، ترکیہ کے سفارتخانہ کی جانب سے پاک فوج کی ٹیم کو گلدستہ بھی پیش کیا گیا۔
ترجمان کے مطابق این ڈی ایم اے ترکیہ کی ڈیزاسٹر مینجمنٹ تنظیم آفاد کیساتھ مکمل رابطے میں ہے، ترکیہ کو این ڈی ایم اے کی جانب سے ریلیف و بحالی کی سرگرمیوں میں تعاون فراہم کیا جائے گا۔
قبل ازیں استنبول ایئرپورٹ پر ڈپٹی گورنر استنبول اور مختلف سرکاری اہلکاروں نے پاک فوج کی ریسکیو ٹیم کو رخصت کیا۔
35 رکنی ٹیم نے 91 مقامات کو سرچ کیا، 39 مقامات پر ریسکیو آپریشن کیا جبکہ 8 افراد کو زندہ بچایا۔
پاک فوج کے دستے نے ملبے سے 138میتیں نکال کر انتظامیہ کے حوالے کیں اور 2 سائٹس خیمہ بستی کے لیے کلیئر کیں۔
پاک فوج کی اربن اور ریسکیو ٹیم کو بین الاقوامی اور ترکیہ کے مقامی چینلز نے بھی پذیرائی دی، ریسکیو ٹیم کا آپریشن مسلسل کئی روز تک جاری رہا، ترکیہ عوام کے دل جیت کر پاک فوج نے وطن عزیز کے نام کو سرخرو کیا۔
واضح رہے کہ پاک فوج کا 35 رکنی دستہ زلزلہ زدگان کی مدد کے لیے سب سے پہلے ترکیہ پہنچا تھا۔

اسلام آباد: (ویب ڈیسک) وزیراعظم محمد شہباز شریف نے کہا ہے کہ بلوچستان کی ترقی وفاقی حکومت کی اولین ترجیح ہے۔
وزیراعظم سے وزیر مملکت پاور ڈویژن ہاشم نوتیزئی نے ملاقات کی، ملاقات میں پاور ڈویژن کے امور پر بات چیت اور ملک کی مجموعی سیاسی صورتحال پر تبادلہ خیال کیا گیا۔
ملاقات میں وزیراعظم نے کہا کہ بلوچستان کی ترقی وفاقی حکومت کی اولین ترجیح ہے، صوبے کی ترقی اور خوشحالی کیلئے ہم ممکن اقدامات اٹھائے جائیں گے۔
اس موقع پر بلوچستان نیشنل پارٹی سے تعلق رکھنے والے ملک عبدالولی کاکڑ بھی موجود تھے۔

اسلام آباد: (ویب ڈیسک) وزیردفاع خواجہ آصف نے کہا ہے کہ جب ججز ہماری حدود میں داخل ہونگے تو ہم بھی سوال اٹھائیں گے۔
قومی اسمبلی میں پالیسی بیان پر اظہار خیال کرتے ہوئے وزیر دفاع خواجہ آصف نے کہا کہ سپریم کورٹ کی جانب سے سوموٹو کیس سے متعلق کچھ سوالات اٹھائے گئے ہیں، اس کے اثرات موجودہ حالات کے ساتھ مستقبل پر بھی منفی پڑ سکتے ہیں، پوری سپریم کورٹ بیٹھ کر اس مسئلے کا حل تلاش کرے، مختلف فریق سے پوچھے اور ایسا حل دے جو آنے والے وقت میں آب حیات ہو۔
انہوں نے کہا کہ نواز شریف کی حکومت ختم کر کے زیادتی کی گئی، میں اپنی حدود کراس کرنا نہیں چاہتا، میں تنقید نہیں کرنا چاہتا، اچھی بات یہ ہے کہ 9 رکنی بینچ بنایا گیا ہے، یہ فیصلہ 9 ججز نہیں بلکہ فل کورٹ کو سننا چاہیے، پوری کورٹ فریقین کو سن کر فیصلہ کرے، پوری قوم عدالتی فیصلوں سے متاثر ہوتی ہے۔
خواجہ آصف نے کہا کہ پوچھنا چاہتا ہوں کہ ایک شکایت رہتی ہے کہ پارلیمنٹیرینز ججز کا نام لے کر تنقید کرتے رہتے ہیں، کچھ ججز پر تنقید کی جاتی ہے تو کچھ پر کیوں نہیں ہوتی؟ جسٹس ثاقب اور جسٹس کھوسہ پرتنقید ہوتی ہے تو جسٹس ناصرالملک پرکیوں نہیں ہوتی؟ یہ سوال عدلیہ کے لیے ہے کہ آخر ایسا کیوں ہے؟ جب ججز ہماری حدود میں داخل ہونگے تو ہم بھی سوال اٹھائیں گے۔
انہوں نے مزید کہا کہ ایک سوال یہ بھی اٹھایا گیا ہے کہ دو اسمبلیوں کی تحلیل درست ہوئی ہے یا نہیں؟ آئین کو ری رائٹ کرنا عدلیہ کا کام نہیں ہے، جس طرح آرٹیکل 63 کو ری رائٹ کیا گیا ہے یہ اس کے اثرات ہیں۔

راولپنڈی: (ویب ڈیسک) لاہور ہائی کورٹ راولپنڈی بینچ نے مری ضلع بحال کرتے ہوئے نگراں حکومت کا نوٹیفکیشن معطل کر دیا۔
ہائی کورٹ راولپنڈی بینچ کے جج جسٹس تنویر سلطان نے فیصلہ سنایا۔
مری ضلع کا درجہ کیوں ختم کیا اس متعلق نگراں وزیر اعلیٰ اور حکومت کو نوٹس جاری کر کے جواب طلب کر لیا گیا۔
پیپلز پارٹی رہنما شوکت ستی، سابق ایم این اے صداقت عباسی، سابق ناظم شکیل عباسی اور صدر انجمن تاجران مری اخلاق عباسی نے چیلنج کیا تھا۔

لاہور: (ویب ڈیسک) انسداد دہشت گردی عدالت نے پولیس پر حملے اور دہشت گردی کی دفعات کے تحت درج مقدمے کے معاملہ میں پی ٹی آئی کے سابق ایم پی اے شبیر گجر سمیت 4 ملزمان کی عبوری ضمانت خارج کر دی۔
انسداد دہشتگردی عدالت کی ایڈمن جج عبہر گل خان نے شبیر گجر و دیگر کی جانب سے پولیس پر حملے کے مقدمہ میں عبوری ضمانت کی درخواستوں پر سماعت کی۔
ملزمان کی جانب سے سلیم لادی اور چودھری نعمان عتیق ایڈووکیٹ عدالت پیش ہوئے، فریقین وکلا کی جرح مکمل ہونے پر عدالت نے ملزمان کی ضمانتوں پر فیصلہ محفوظ کر لیا۔
بعدازاں عدالت نے محفوظ فیصلہ سناتے ہوئے ملزمان کی عبوری ضمانتیں خارج کرنے کا حکم دے دیا۔
پی ٹی آئی کے سابق ایم پی اے شبیر گجر سمیت چار ملزمان کی عبوری ضمانتیں خارج ہونے پر ہنگامہ آرائی ہوئی، ہنگامہ آرائی کے دوران شبیر گجر سمیت دیگر ملزمان فرار ہونے میں کامیاب ہو گئے۔

اسلام آباد: (ویب ڈیسک) پاکستان ڈیموکریٹک موومنٹ (پی ڈی ایم) نے پنجاب اور کے پی کے انتخابات پر ازخود نوٹس کیس میں 9 رکنی لارجر بینچ میں شامل جسٹس اعجاز الاحسن اور جسٹس مظاہر نقوی پر اعتراض اٹھاتے ہوئے انہیں بینچ سے الگ کرنے کی استدعا کردی۔
سپریم کورٹ میں چیف جسٹس پاکستان عمر عطا بندیال کی سربراہی میں 9 رکنی لارجر بینچ نے پنجاب اور خیبرپختونخوا میں انتخابات سے متعلق ازخود نوٹس پر سماعت کی۔
لارجر بینچ میں جسٹس اعجاز الاحسن، جسٹس منصور علی شاہ، جسٹس منیب اختر، جسٹس یحییٰ آفریدی، جسٹس مظاہر علی اکبر نقوی، جسٹس جمال خان مندوخیل، جسٹس محمد علی مظہر اور جسٹس اطہر من اللہ شامل ہیں۔
دورانِ سماعت اٹارنی جنرل روسٹرم پر آ گئے جنہوں نے عدالتِ عظمیٰ کو بتایا کہ سپریم کورٹ کے حکم کی کاپی نہیں ملی، تمام فریقین کو نوٹس نہیں مل سکے۔
چیف جسٹس نے کہا کہ آج کی سماعت کا مقصد تمام متعلقہ حکام کو ازخود نوٹس کے متعلق اطلاع دینا تھا، فاروق ایچ نائیک اور تمام ایڈووکیٹ جنرلز یہاں ہیں، گزشتہ روز جن فریقین کو نوٹس کیا ان کے وکلاء آج موجود ہیں۔
فاروق ایچ نائیک نے کہا کہ میں پیپلز پارٹی کی نمائندگی کر رہا ہوں۔
فاروق ایچ نائیک نے جسٹس اعجاز الاحسن اور جسٹس مظاہر علی اکبر نقوی پر اعتراض اٹھا دیا اور کہا کہ ہدایات ہیں کہ جسٹس اعجاز الاحسن اور جسٹس مظاہر نقوی بینچ سے الگ ہو جائیں۔
فاروق ایچ نائیک نے پی ڈی ایم جماعتوں کا مشترکہ تحریری بیان عدالت میں پڑھ کر سنایا۔
انہوں نے پاکستان پیپلز پارٹی، ن لیگ اور جے یو آئی کا مشترکہ تحریری بیان عدالت میں پیش کیا اور پڑھ کر سنایا۔
مشترکہ تحریری نوٹ میں کہا گیا ہے کہ جسٹس مظاہرنقوی اور جسٹس اعجاز الاحسن پہلے ہی غلام محمود ڈوگر کیس میں اس معاملے کو سن چکے ہیں، استدعا ہے کہ جسٹس اعجاز الاحسن اور جسٹس مظاہر نقوی خود کو ازخود نوٹس سے الگ کر لیں۔
فاروق ایچ نائیک نے کہا کہ مشترکہ نوٹ میں کہا گیا ہے کہ فیئر ٹرائل کے حق کے تحت جسٹس اعجاز اور جسٹس مظاہرکو بینچ سے الگ ہوجانا چاہیے، دونوں ججز کے کہنے پر ازخود نوٹس لیا گیا، اس لیے مذکورہ ججز بینچ سے الگ ہو جائیں۔
فاروق ایچ نائیک نے غلام محمود ڈوگر کیس میں دونوں ججز کا فیصلہ پڑھ کر سناتے ہوئے کہا کہ دونوں ججز نے ازخود نوٹس کے لیے معاملہ چیف جسٹس کو بھجوایا، جسٹس مندوخیل کے نوٹ کے بعد جسٹس اعجاز اور جسٹس مظاہر خود کو بینچ سے الگ کر دیں، دونوں ججز ن لیگ اور جے یو آئی کے کسی بھی مقدمے کی سماعت نہ کریں، ڈوگر کے سروس میٹر میں ایسا فیصلہ آنا تشویش ناک ہے۔
اس کے ساتھ ہی فاروق ایچ نائیک نے جسٹس جمال مندوخیل کا نوٹ بھی پڑھ دیا۔
فاروق ایچ نائیک نے کہا کہ ججز سے کوئی ذاتی خلفشار نہیں، جو ہدایات ملیں وہ سامنے رکھ رہا ہوں۔
چیف جسٹس نے فاروق ایچ نائیک سے کہا کہ ججز کے معاملے پر پیر کو آپ کو سنیں گے۔
فاروق ایچ نائیک نے کہا کہ واضح کر دوں کہ ججز سے کوئی ذاتی عناد نہیں، دونوں ججز اپنی رائے کا اظہار ڈوگر کیس میں پہلے ہی کر چکے ہیں۔
جسٹس اطہر من اللہ نے کہا کہ مسٹر نائیک آپ کو نہیں لگتا کہ یہ مفادِ عامہ کا معاملہ فل کورٹ کو سننا چاہیے؟
جس پر فاروق ایچ نائیک نے انتخابات میں تاخیر کے ازخود نوٹس پر فل کورٹ بنانے کی استدعا کر دی اور کہا کہ انتخابات کا معاملہ عوامی ہے، اس پر فل کورٹ ہی ہونا چاہیے۔
اس موقع پر شیخ رشید کے وکیل نے عدالت میں کہا کہ کل سے میڈیا پر عدلیہ کی تضحیک کی جا رہی ہے، میرے مؤکل شیخ رشید نے استدعا کی ہے کہ عدالت میڈیا پر عدلیہ کی تضحیک کا معاملہ دیکھے۔
چیف جسٹس عمر عطاء بندیال نے کہا کہ اس معاملے کو بعد میں دیکھیں گے، اٹارنی جنرل صاحب آپ کیس کی تیاری کریں۔
فاروق ایچ نائیک نے کہا کہ پہلے بینچ کی تشکیل اور اس پر اعتراضات کا معاملہ حل ہونا ضروری ہے، بینچ کی تشکیل کا مسئلہ حل ہونے کے بعد کیس کے قابلِ سماعت ہونے کا معاملہ آئے گا۔
جسٹس جمال خان مندوخیل نے کہا کہ سیاسی معاملات کو پارلیمنٹ میں حل ہونا چاہیے، اپنی جماعتوں سے کہیں کہ یہ معاملہ عدالت کیوں سنے؟
فاروق ایچ نائیک نے کہا کہ عدالت کی آبزرویشنز نوٹ کر لی ہیں، اپنی جماعت سے اس معاملے پر ہدایت لوں گا۔
بعدازاں سپریم کورٹ آف پاکستان نے پنجاب اور کے پی میں انتخابات سے متعلق از خود نوٹس پر سماعت پیرساڑھے 11 بجے تک ملتوی کر دی۔

اوکاڑہ : (ویب ڈیسک) پنجاب کے شہر اوکاڑہ کے نواحی گاؤں 23/1RB میں واقع گھر کی خستہ حال چھت گرنے سے 3 افراد ملبے تلے دب گئے جس کے نتیجے میں ایک خاتون جاں بحق ہوگئی ۔
ریسکیو زرائع کے مطابق مقامی افراد نے چھت کے نیچے سے دبنے والے افراد کو فوری نکال لیا ، واقعے کی اطلاع ملنے پر اوکاڑہ سے 2 ایمبولینسںز اور ریسکیو وہیکل فوری جائے حادثہ کی طرف روانہ کی گئیں ۔
ریسکیو ذرائع کے مطابق حادثے میں ایک خاتون جاں بحق جبکہ خاتون اور مَرد سمیت دو افراد زخمی ہو گئے، ریسکیو ٹیموں نے زخمیوں کو ابتدائی طبی امداد فراہم کرنے کے بعد ڈی ایچ کیو سٹی ہسپتال منتقل کردیا جبکہ نعش کو ضروری کارروائی کرنےکے بعد لواحقین کے حوالے کر دیا گیا ۔
ریسکیو ذرائع کا بتانا ہے کہ جاں بحق ہونے والی خاتون کی شناخت عابدہ زوجہ ندیم (35سال تقریباً) سکنہ 23/1RB کے نام سے ہوئی ہے ، زخمیوں میں ارشد ولد اصغر (28 سال تقریباً) اور نجمہ زوجہ ریاض (40 سال تقریباً) سکنہ 23/1RB کے نام سے ہوئی ہے۔

اسلام آباد: (ویب ڈیسک) پاکستان تحریکِ انصاف کے وکیل فیصل چودھری نے کہا ہے کہ سائفر کے معاملے پر جج صاحب نے فیصلہ دیا، جس کو اعتراض ہے وہ چیلنج کر دے۔
یہ بات پی ٹی آئی کے وکیل فیصل چودھری نے سپریم کورٹ پہنچنے پر میڈیا سے گفتگو کے دوران کہی ہے۔
انہوں نے کہا ہے کہ وکیلوں کا کام کورٹ جانا ہے اور جانا چاہیے، بھوٹان بھی جانا پڑے تو جانا چاہیے، ججز پر جو الزامات لگائے گئے ہیں وہ ثابت بھی کرنا ہوں گے۔
فیصل چودھری کا مزید کہنا ہے کہ فل بینچ بنتا ہے تو ضرور بننا چاہیے، اعتراض اٹھانا حق ہے مگر ججز اور عدالت کا احترام ضروری ہے۔

لیاقت پور: (ویب ڈیسک) تھانہ ترنڈہ محمد پناہ کی حدود میں اوباش کی 11 سالہ بچے سے مبینہ بدفعلی کا واقعہ پیش آیا ہے ۔
افسوس ناک واقعہ پنجاب کے شہر لیاقت پور میں تھانہ ترنڈہ محمد پناہ کے علاقے موضع سانگلہ میں پیش آیا جہاں 11 سالہ بچے کوجنسی زیادتی کا نشانہ بنایا گیا، بچے کی والدہ کا کہنا ہے کہ بیٹا حسن گھر کےباہر کھیلنے گیا، ملزم نے بچے کو ورغلا کر گھر لیجاکر زیادتی کا نشانہ بنا ڈالا ۔
والدہ کے مطابق بچے کی تلاش پر ہمیں آتا دیکھ کر ملزم چھری سے حملہ کرنے کی دھمکی دیتے ہوئے موقع سے فرار ہوگیا۔
پولیس کے مطابق درخواست پر متاثرہ لڑکے کی والدہ کی مدعیت میں مقدمہ درج کرکے کارروائی کا آغاز کر دیا گیا ہے اور ملزم کی تلاش کیلئے چھاپے مارے جارہے ہیں۔