لاہور: (ویب ڈیسک) جیل بھرو تحریک کے دوران گرفتاری دینے والے تحریک انصاف کے رہنما شاہ محمود قریشی کو اٹک جیل جبکہ اسد عمر کو راجن پور کی جیل میں منتقل کر دیا گیا۔
پولیس کی جانب سے وائس چئیرمین تحریک انصاف شاہ محمود قریشی کو اٹک جیل پہنچا دیا گیا جہاں جیل کے باہر موجود کارکنوں کی بڑی تعداد نے ان کی گاڑی پر پھولوں کی پتیاں نچاور کیں، اس موقع پر حکومت مخالف نعرے بازی بھی کی گئی، شاہ محمود کی آمد پر جیل کے باہر ہنگامی صورتحال رہی، جیل کے راستوں پر پولیس سمیت قانون نافذ کرنے والے اہلکاروں کی بڑی تعداد موجود تھی۔
تحریک انصاف کے مرکزی سیکرٹری جنرل اسد عمر سمیت 25 کارکنوں کو 2 قیدی وینز میں راجن پور کی جیل میں پہنچا دیا گیا جبکہ پی ٹی آئی کے سابق صوبائی وزیر مراد راس کو ڈیرہ غازیخان جیل منتقل کر دیا گیا ہے، جیل سپرنٹنڈنٹ کا کہنا ہے کہ جیل بھرو تحریک کے قیدیوں کے ساتھ جیل مینوئل کے مطابق سلوک کیا جائے گا کسی قیدی کو کوئی اضافی سہولت نہیں دی جائے گی۔
سابق گورنر پنجاب عمر سرفراز چیمہ، فواد بھلر سمیت تحریک انصاف کے 24 کارکنوں کو بھکر کی ڈسٹرکٹ جیل میں منتقل کر دیا گیا، سینیٹر ولید اقبال کو لیہ اور سینیٹر اعظم سواتی کو رحیم یار خان کی جیل، محمد خان مدنی کو بہاولپور کی جیل پہنچا دیا گیا۔

لاہور: (ویب ڈیسک) لاہور ہائی کورٹ نے گجرات سے ممبر پنجاب اسمبلی طارق محمود کو نااہل کرنے کے حوالے سے الیکشن کمیشن کا فیصلہ کالعدم قرار دے دیا۔
جسٹس شاہد کریم نے فیصلہ جاری کرتے ہوئے کہا کہ پرائیویٹ شکایت پر رکن اسمبلی کو آئین کے آرٹیکل 62 ایف ون اور 63 کے تحت الیکشن کمیشن کو رکن اسمبلی کو نااہل کرنے کا اختیار نہیں ہے، الیکشن کمیشن نے اپنے اختیارات سے تجاوز کرتے ہوئے درخواست گزار کو نااہل کیا۔
لاہور ہائی کورٹ کے فیصلے میں مزید کہا گیا کہ الیکشن ایکٹ 2017 کے سیکشن 137 میں ممبران کے اثاثوں کی تفصیلات ظاہر کرنے کی بات کی گئی ہے، سیکشن 137 کے تحت تمام ممبران کو اپنے اثاثوں، بچوں، بیویوں سمیت دیگر تفصیلات الیکشن کمیشن میں جمع کرانا ہوتی ہیں، الیکشن کے پاس تفصیلات جمع نہ کرانے والے ممبران کی رکنیت معطل کرنے کے اختیارات ہیں۔
فیصلے میں مزید کہا گیا ہے کہ سیکشن 137 کے سب سیکشن 4 کے تحت اگر کوئی ممبرغلط تفصیلات فراہم کرے تو کمیشن فوج داری کارروائی کرسکتا ہے، ممبران کو نااہل قرار دینے کے اختیارات الیکشن کمیشن کے پاس نہیں ہیں، الیکشن کمیشن نے آئین کے آرٹیکل 218 کا سہارا لیتے ہوئے ممبران کو نااہل کیا، آرٹیکل 218 پارلیمنٹ اور صوبائی اسمبلیوں کے الیکشن کیلئے بنایا گیا ہے۔
فیصلے کے مطابق آرٹیکل 218 الیکشن کمیشن کو الیکشن کرانے، انتظامات کرنے کے حوالے سے اختیار دیتا ہے، الیکشن کمیشن کو یہ تصور نہیں کرنا چاہیے کہ آرٹیکل 218 کسی ممبر کو نااہل قرار دینے کا اختیار دیتا ہے، قانون کے تحت کسی بھی الیکشن پر سوال نہیں اٹھایا جاسکتا ہے سوائے اس کے کہ امیدوار خود کوئی درخواست دائر کرے۔
لاہور ہائی کورٹ نے اپنے فیصلہ میں کہا ہے کہ الیکشن کمیشن کو اختیار نہیں ہے کہ وہ کسی پرائیویٹ کمپلینٹ پر ممبر اسمبلی کو نااہل کر دے، الیکشن کمیشن کی جانب سے طارق محمود کو بطور رکن اسمبلی نااہل کرنے کے فیصلے کو کالعدم قرار دیا جاتا ہے، واضح رہے الیکشن کمیشن نے درخواست گزار کو کاغذات نامزدگی میں حقائق چھپانے پر نااہل قرار دیا تھا۔

لاہور: (ویب ڈیسک) پاکستان تحریک انصاف کے چیئرمین عمران خان نے کہا ہے کہ جیل بھرو تحریک کے تحت گرفتاری دینے والے رہنماؤں اور کارکنان سے دہشت گردوں جیسا سلوک کیا جارہا ہے جو قابلِ مذمت ہے۔
عمران خان نے ویڈیو لنک کے ذریعے خطاب میں کہا کہ پشاور میں بھی لوگ بڑی تعداد میں جیل بھرو تحریک کے لیے نکلے، جیل بھرو تحریک احتجاج کرنے کا پر امن طریقہ ہے، حکومت جس طرح کے ہتھکنڈے استعمال کر رہی ہے سب کے سامنے ہے۔
انہوں نے کہا کہ جیل بھرو تحریک کے تحت گرفتاری دینے والے پی ٹی آئی رہنماؤں اور کارکنان کے ساتھ دہشت گردوں جیسا سلوک کیا جارہا ہے، کسی کو لیہ تو کسی کو ڈیرہ غازی خان جیل منتقل کردیا گیا جبکہ شاہ محمود قریشی کو اٹک جیل بھیجا گیا ہے۔
عمران خان نے کہا کہ اگر حکومت یہ سب کر کے لوگوں کو خوفزدہ کرنا چاہتی ہے تو وہ اس زعم سے باہر نکلے کیونکہ پاکستان کے موجودہ حالات پر قوم سڑکوں پر نکلنے کیلیے تیار ہے، اگر تحریک انصاف نہ ہو تو ملک کا سری لنکا جیسا حال ہوجائے گا۔
چیئرمین پی ٹی آئی نے کہا کہ آئین کہتا ہے عام آدمی کی عزت پامال نہیں کر سکتے،یہ سوشل میڈیا کے لوگوں کو اٹھا کر لے گئے اور بوڑھے کارکنان کے کپڑے اتارے گئے، جو سلوک کیا گیا اُن کے سامنے ہے۔
عمران خان نے مزید کہا کہ نگراں حکومت کا واحد کام الیکشن کا انعقاد ہے مگر پنجاب کی نگراں حکومت انتخابات کے علاوہ باقی سارے کام کررہی ہے، ملکی تاریخ میں کبھی ایسی جانبدار نگراں حکومت نہیں آئی۔ جس نے آتے ہی مجھ پر حملہ کی تحقیقات کرنے والی جے آئی ٹی کو تبدیل کیا۔

اسلام آباد: (ویب ڈیسک) وزیر خارجہ نے کہا کہ ہنگری نے پاکستانی طلباء کیلئے تعلیمی وظائف کی تعداد 200 سے بڑھا کر 400 کر دی۔
سماجی رابطے کی ویب سائٹ ٹوئٹر پر اپنے بیان میں وزیر خارجہ بلاول بھٹو زرداری نے کہا کہ پاکستان اور ہنگری کے مابین تعلیم، کھیل اور سفارتی اکادمیوں کے مابین تعاون کی یادداشتوں پر دستخط ہوئے، پاکستان ہنگیرین وظائف حاصل کرنے والا بڑا ملک بن گیا۔

پشاور: (ویب ڈیسک) پاکستان تحریک انصاف کے رہنما پرویز خٹک نے کہا ہے کہ عمران خان کے کہنے پر پشاور میں جاری جیل بھرو تحریک ملتوی کرنا پڑی۔
پشاور سے شاہ فرمان، عاطف خان ، عبد الشکور سمیت دیگر رہنما بغیر گرفتار کے واپس چلے گئے۔
اس موقع پر سابق گورنر کے پی شاہ فرمان نے کہا کہ ہمیں گرفتار نہیں کیا جا رہا، جیل کا دروازہ نہیں کھولا گیا، سب کو گرفتارکریں ، یہ3،4 لیڈرز گرفتار کرتے ہیں باقی چھوڑ دیتے ہیں۔
ان کا کہنا تھا کہ لیڈرشپ کو پکڑ کر یہ جیل بھرو تحریک ناکام بنانا چاہتے ہیں، لیڈرشپ کوتوگرفتارکرتےہیں لیکن عام کارکنوں کوگرفتارنہیں کرتےایسانہیں ہوسکتا۔

کراچی: (ویب ڈیسک) پی آئی اے کے عدم ادائیگی پر منجمد کیے گئے اکاونٹس 50 کروڑروپے کے ادائیگی کی یقین دہانی پر بحال کردیے گئے۔
ذرائع کا کہنا ہے کہ واجبات کے معاملے پرپی آئی اے انتظامیہ اورایف بی آرپھرایک دوسرے کے آمنے سامنے آگئے، ایف بی آر کی جانب سے پی آئی اے کے واجب الادا واجبات کے تناظرمیں ان کے بینک اکاونٹ سے 50کروڑروپے کی ٹیکس ریکوری کی گئی۔
ایف بی آر ذرائع نے بتایا کہ قومی ائرلائن پرفیڈرل ایکسائزڈیوٹی کی مد میں 2ارب 86کروڑروپے واجب الادا تھے،اسی معاملے پرایف بی آرحکام نے پی آئی اے کے تمام اکاونٹس گذشتہ روز منجمد کردیے تھے تاہم پی آئی اے کی جانب سے مداخلت اور فوری طورپر50کروڑروپے ٹیکس ادائیگی کی یقین دہانی پربینک اکاونٹس بحال کردیے گئے۔

سرگودھا: (ویب ڈیسک) مسلم لیگ (ن) کی چیف آرگنائزر مریم نواز نے کہا ہے کہ ملک کے موجودہ حالات کا ذمہ دار عمرانی ٹولہ ہے، فتنہ خان نے ملک کو تباہی کے دہانے پر پہنچانے میں کوئی کسر نہیں چھوڑی۔
سرگودھا میں مسلم لیگ (ن) کے ورکرز کنونشن سے خطاب کرتے ہوئے مریم نواز نے کہا کہ سرگودھا کے عوام کو نواز شریف کا سلام، میری بہنیں بڑی تعداد میں کنونشن میں شریک ہوئیں، مشکل وقت میں بھی سرگودھا کے عوام نے نواز شریف کا ساتھ نہیں چھوڑا، سرگودھا نواز شریف کے چاہنے والوں کا شہر ہے، پاکستان اور نواز شریف کا مقدمہ لے کر آئی تھی۔
مسلم لیگ (ن) کی چیف آرگنائزر نے مزید کہا کہ سازش کا سن سن کر کان تھک گئے، سازش گھڑی چور نہیں نواز شریف کے خلاف ہوئی، نواز شریف عوام کی طاقت سے اقتدار میں آتا ہے، نواز شریف سے اقامہ پر اقتدار چھین لیا گیا، عمرانی ٹولے کوفتنہ خان کی شکل میں کٹھ پتلی چاہیےتھی، 5 کا ٹولہ آج ملکی حالات کا ذمہ دار ہے۔
مریم نواز نے کہا کہ چودھری پرویز الہٰی کی حالیہ ویڈیو حقائق سے پردہ اٹھانے کیلئے کافی ہے، ن لیگ انتخابات کی تیاری کیلئے میدان میں اترچکی ہے، عوام کی حمایت سے انتخابات جیت کر دکھائیں گے، ازخود نوٹس پر سماعت کرنے والے بنچ کے بعض ججز پر تحفظات ہیں، پاکستان بار کونسل نے بھی ان ججز پرتحفظات کا اظہارکیا۔
انہوں نے کہا مسلم لیگ ن الیکشن سے نہیں ڈرتی، آج نیپیاں بدلنے کی ذمہ داری پرویز الہٰی نے اٹھا لی ہے، بزدل 5 ماہ سے ٹانگ ٹانگ پر پلاسٹر لگائے بیٹھا ہے، آئی ایم ایف سے سخت شرائط پر معاہدہ ہم نے نہیں فتنہ خان نے کیا تھا۔