سرگودھا: (ویب ڈیسک) پاکستان مسلم لیگ ن کے سینئر رہنما اور وفاقی وزیر داخلہ رانا ثنا اللہ نے کہا ہے کہ ہم انتخابات سے خوفزدہ نہیں، ملک میں قومی اور تمام صوبائی اسمبلیوں کے الیکشن اکٹھے ہونے چاہئیں۔
سرگودھا میں مسلم لیگ ن کے ورکرز کنونشن سے خطاب کرتے ہوئے رانا ثنا اللہ نے کہا کہ ن لیگ مریم نواز کی قیادت میں انتخابی مہم کا آغاز کر چکی ہے، ہم الیکشن میں اس فتنے کو شکست دیں گے، الیکشن سے خوفزدہ ہیں نہ پیچھے ہٹے ہیں، ن لیگ پنجاب میں حکومت بنائے گی، ن لیگ کی قیادت عوام میں جانے سےنہیں گھبراتی۔
انہوں نے کہا کہ ملک میں صاف و شفاف انتخابات کی ضرورت ہے، ہم چاہتے ہیں انصاف ہوتا نظر آنا چاہیے، ہم عدلیہ کا احترام کرتے ہیں، ن لیگ نےعدلیہ کی آزادی کے لیے تحریک چلائی، لانگ مارچ کیا، عدلیہ کو آزادی ن لیگ کے لانگ مارچ کے نتیجے میں ملی، ہم نےعدلیہ کی بحالی کیلئے جدوجہد کی۔
رانا ثنا اللہ کا کہنا تھا کہ انتخابات میں مخالفین کا ڈٹ کر مقابلہ کریں گے، ایسے الیکشن ہونے چاہئیں کہ نتائج پوری قوم تسلیم کرے، ملک میں مشکلات کی وجہ فتنہ خان کی پالیسی ہے، ملک معاشی طور پر پیچھے جا رہا ہے، ملک میں آئین وقانون کی بالادستی پر یقین رکھتےہیں۔
وفاقی وزیر داخلہ نے کہا کہ نواز شریف جلد پاکستان آئیں گے اور سرگودھا کے تاریخی جلسہ میں خطاب کریں گے، پاکستان نوازشریف کی قیادت میں ایشین ٹائیگر بننے جا رہا تھا، انہوں نے کہا کہ ملکی مشکلات کا حل صرف نواز شریف ہے، نواز شریف کے بغیر ملک کے حالات ٹھیک نہیں ہو سکتے۔
رانا ثنا اللہ نے کہا کہ فتنہ خان کا ایجنڈا ملک میں عدم استحکام اور انتشار کے سوا کچھ نہیں۔

اسلام آباد: (ویب ڈیسک) وزیر اعظم شہباز شریف نے کہا ہے کہ پاکستان کی تاریخ میں بلاجواز کئی سو ارب روپے کے قرضے معاف کئے جا چکے، سرمایہ کار قرضے معاف کرواتے ہیں۔
اسلام آباد میں یوتھ لون سکیم کے چیک تقسیم کرنے کی تقریب سے خطاب کرتے ہوئے وزیر اعظم شہباز شریف نے کہا کہ نواز شریف نے 2013 میں نوجوانوں کیلئے قرضوں کی سکیم کا اجراء کیا، سکیم کے تحت ملک بھر کے نوجوانوں کو اربوں کے قرضے دیئے گئے، اس سے ملک اور نوجوانوں کو بے پناہ فائدہ ہوا۔
وزیر اعظم شہباز شریف نے مزید کہا کہ پی ایم یوتھ لون سکیم کا آغاز پنجاب سے کیا گیا تھا، نوجوان قرض لے کر دیانتداری سے کماتے ہیں اور واپس بھی کرتے ہیں، کسان سکیم اور تمام دوسرے ایسے پروگرامز کی ریکوری بھی 99 فیصد رہی ہے
انہوں نے کہا کہ پاکستان کا مستقبل نوجوان نسل کے ہاتھ میں ہے، نوجوانوں نے قرضے لے کراس سے کاروبار کرکے بتایا کہ یہ کسی سے کم نہیں، ملکی معیشت مشکلات سے گزر رہی ہے، ایک لاکھ لیپ ٹاپ سندھ، خیبر پختونخوا، پنجاب، بلوچستان اورآزاد کشمیرکے نوجوانوں کو دیں گے۔

لاہور: (ویب ڈیسک) سپریم کورٹ کی جانب سے تحریری حکم نامہ جاری ہونے کے بعد وفاقی حکومت نے سی سی پی او لاہور غلام محمود ڈوگر کی معطلی کا نوٹیفکیشن واپس لے لیا۔
معطلی کا نوٹیفکیشن واپس لینے کے بعد وفاق کی جانب سے غلام محمود ڈوگر کی خدمات پنجاب حکومت کے سپرد واپس کر دی گئیں، وہ سی سی پی او لاہور تعینات نہیں ہوئے، غلام محمود ڈوگر کو سی سی پی او لاہور تعینات کرنے کیلئے پنجاب حکومت نوٹیفکیشن جاری کرے گی۔
واضح رہے تحریک انصاف کی صوبائی حکومت نے لاہور میں جرائم پر قابو نہ پانے کی وجہ سے جنوری 2021 میں عمر شیخ کی جگہ غلام محمود ڈوگر کو سی سی پی او لاہور تعینات کیا تھا، پنجاب میں مسلم لیگ (ن) کی مختصر حکومت آنے کے بعد وفاق نے انہیں عہدے سے ہٹا دیا۔
بعد ازاں چودھری پرویز الہٰی نے دوبارہ وزیر اعلیٰ بننے کے بعد غلام محمود ڈوگر کو سی سی پی او لاہور تعینات کر دیا، غلام محمود ڈوگر چیئرمین پی ٹی آئی عمران خان پر قاتلانہ حملے کی تحقیقات کیلئے بننے والی جے آئی ٹی کے کنویئنر تھے۔

اسلام آباد: (ویب ڈیسک) وزیر اعظم شہباز شریف سے امریکی سینیٹ کے 9 رکنی وفد نے ملاقات کی۔
سینیٹ میں اکثریتی رہنما سینیٹر چارلس شومر وفد کی قیادت کر رہے تھے، ملاقات میں پاک امریکا تعلقات پر تبادلہ خیال کیا گیا۔
وزیر اعظم شہباز شریف نے کہا کہ پاکستان امریکا کے ساتھ تعلقات کو اہمیت دیتا ہے، ملاقات میں تجارت، سرمایہ کاری اور خطے کی مجموعی صورتحال پر بھی بات چیت کی گئی۔

اسلام آباد: (ویب ڈیسک) ترجمان دفتر خارجہ نے کہا ہے کہ افغانستان میں ہونے والے مذاکرات سکیورٹی اور انسداد دہشت گردی سے متعلق تھے، دونوں ممالک نے دہشت گردی سے مل کر نمٹنے پر اتفاق کیا۔
ہفتہ وار بریفنگ میں دفتر خارجہ کی ترجمان ممتاز زہرا بلوچ نے کہا کہ پاکستان بھارت کی طرف سے مقبوضہ کشمیر میں انسانی حقوق کی مسلسل خلاف ورزیوں پر بدستور تشویش کا اظہار کرتا ہے۔
ترجمان کا کہنا ہے کہ گزشتہ روز وزیر دفاع کی سربراہی میں وفد نے افغانستان کا دورہ کیا جس میں دہشت گردی کے تدارک اور بالخصوص ٹی ٹی پی کے حوالے سے بات چیت ہوئی۔
انہوں نے کہا کہ افغانستان میں ہونے والے مذاکرات سکیورٹی اور انسداد دہشت گردی سے متعلق تھے، دونوں ممالک نے دہشت گردی سے مل کر نمٹنے پر اتفاق کیا۔
ممتاز زہرا بلوچ کا کہنا ہے کہ پاکستان او ائی سی وزرائے خارجہ کونسل کے تحت خواتین اور اسلام کے موضوع پر 8 مارچ کو کانفرنس کر رہا ہے۔
دفتر خارجہ کی ترجمان نے کہا کہ وزیر اعظم شہباز شریف اور کینیا کے صدر کے درمیان فون پر گفتگو ہوئی، وزیرِ اعظم نے شہید صحافی ارشد شریف کے معاملے پر بھی بات کی، شہباز شریف نے کینیا کے صدر سے پاکستانی صحافی کے قتل سے متعلق تحقیقاتی ٹیم سے تعاون پر شکریہ ادا کیا، وزیر اعظم نے اس تحقیقات میں مزید تعاون کی درخواست بھی کی۔
ان کا مزید کہنا ہے کہ وزیر خارجہ بلاول بھٹو نے ہنگری کا دو روزہ دورہ حال ہی میں مکمل کیا ہے، دورے میں مفاہمت کی تین یادداشتوں پر دستخط ہوئے، مفاہمت کی ایک یادداشت دونوں ملکوں کی فارن سروس اکیڈمیز کے باہمی تعاون کے بارے میں ہے۔
ممتاز زہرا بلوچ نے یہ بھی کہا کہ ہنگری کی یونیورسٹیوں میں پاکستان کے طلبہ کی تعداد میں سو فیصد اضافہ ہو گا۔