اسلام آباد: (ویب ڈیسک) پاکستان تحریک انصاف (پی ٹی آئی) کے رہنما شہباز گل نے اداروں کو بغاوت پر اکسانے کے کیس میں ٹرائل کورٹ سے درخواست بریت مسترد ہونے کا فیصلہ اسلام آباد ہائی کورٹ میں چیلنج کردیا۔
شہباز گل نے اسلام آباد ہائی کورٹ میں دائر درخواست میں ٹرائل کورٹ میں کارروائی روکنے کی استدعا بھی کردی۔
درخواست میں موقف اختیارکیا گیا ہے کہ پراسیکیوشن کی جانب سے ایسا کوئی مواد نہیں دیا گیا جس پر فرد جرم لگ سکے، ٹرائل کورٹ کا آرڈر آئین کے آرٹیکل 10 اے کی خلاف ورزی ہے۔
شہباز گل نے عدالت سے استدعا کی ہے کہ درخواست منظورکرتے ہوئے کیس سے بری کیا جائے اور درخواست بریت پر حتمی فیصلے تک ٹرائل کورٹ کی کارروائی روکی جائے۔
خیال رہے کہ ڈسٹرکٹ اینڈ سیشن کورٹ اسلام آباد نے پی ٹی آئی رہنما شہباز گل کی بریت کی درخواست مسترد کردی تھی۔
اسلام آباد کے ایڈیشنل سیشن جج طاہر عباس سپرا نے شہباز گل کی درخواست مسترد کرتے ہوئے ان پر فرد جرم عائد کرنے کا فیصلہ کیا، عدالت نے کہا کہ شہباز گل پر فرد جرم 27 فروری کو عائد کی جائے گی۔
یاد رہے کہ شہباز گل پر اداروں کے سربراہان کے خلاف اکسانے کے متعدد مقدمات درج ہیں اور وہ ضمانت پر رہا ہیں۔

اسلام آباد: (ویب ڈیسک) اسلام آباد ہائی کورٹ نے متنازع ٹوئٹ کیس میں رہنما تحریک انصاف اعظم سواتی کے ٹرائل سے متعلق سپیشل پراسیکیوٹر رضوان عباسی کی مہلت کی استدعا منظور کر لی۔
چیف جسٹس اسلام آباد ہائی کورٹ جسٹس عامر فاروق نے اداروں کے خلاف متنازع ٹویٹ کیس میں اعظم سواتی کی ضمانت منسوخی کی ایف آئی اے کی درخواست پر سماعت کی، دورانِ سماعت اعظم سواتی عدالتِ عالیہ میں پیش ہوئے۔
سپیشل پراسیکیوٹر رضوان عباسی نے دوران سماعت موقف اختیار کیا کہ اعظم سواتی ضمانت کا غلط استعمال کر رہے ہيں، انہوں نے دوبارہ اداروں سے متعلق متنازعہ گفتگو کی، اس کے ساتھ ہی انہوں نے متنازع گفتگو کا متن پڑھ کر سنا دیا۔
فاضل جج کے استفسار پر سپیشل پراسیکیوٹر نے بتایا کہ اعظم سواتی پر فرد جرم عائد ہونی ہے، عدالت نے رضوان عباسی کو ہدایت کی کہ آپ اس طرف ابھی نہ جائیں ٹرائل جلد مکمل کرانے پر توجہ دیں۔
سپیشل پراسیکیوٹر رضوان عباسی نے استدعا کی کہ مختصر سی تاریخ دے دیں، ٹرائل سے متعلق عدالت کو آگاہ کروں گا، عدالت نے اعظم سواتی کے ٹرائل سے متعلق سپیشل پراسیکیوٹر رضوان عباسی کی مہلت کی استدعا منظور کر لی، کیس کی مزید سماعت غیر معینہ مدت کے لیے ملتوی کر دی گئی۔
واضح رہے کہ ٹرائل کورٹ نے 21 دسمبر کو اعظم سواتی کی درخواست ضمانت مسترد کر دی تھی تاہم اسلام آباد ہائی کورٹ نے 2 لاکھ روپے کے مچلکوں کے عوض پی ٹی آئی سینیٹر کی درخواست ضمانت بعد ازگرفتاری منظور کی تھی۔

شمالی وزیرستان: (ویب ڈیسک) شمالی وزیرستان میں کاؤنٹر ٹیررازم ڈیپارٹمنٹ (سی ٹی ڈی) کی ٹیم پر دہشت گردوں کے حملے میں زیر حراست 3 ملزمان ہلاک ہوگئے، سی ٹی ڈی کی جوابی فائرنگ سے کالعدم تنظیم کے 4 دہشت گرد بھی مارے گئے۔
ترجمان سی ٹی ڈی کے مطابق دہشت گردوں نے شمالی وزیرستان کے علاقے میران شاہ سے بنوں ملزمان منتقل کرنے والے سکواڈ پر حملہ کیا، دہشت گردوں کی فائرنگ سے زیرحراست تینوں ملزمان ہلاک ہوگئے جبکہ فائرنگ کے تبادلے میں کالعدم تنظیم کے 4 دہشت گرد ہلاک ہوگئے۔
ترجمان کے مطابق دہشت گردوں کے کچھ ساتھی رات کی تاریکی میں فرار ہوگئے، یہ واقعہ گزشتہ رات میر علی بائی پاس پر پیش آیا۔
ترجمان کا کہنا ہے کہ ہلاک دہشت گرد سکیورٹی فورسز اور پولیس پر دستی بم حملوں اور ٹارگٹ کلنگ میں ملوث تھے، دہشت گردوں سے 4 شارٹ مشین گنز،کارتوس اور دیگر سامان برآمد کرلیا گیا۔
سی ٹی ڈی کے ترجمان کے مطابق دہشت گرد اپنے ساتھیوں کو چھڑانا چاہتے تھے، ہلاک دہشت گرد تھانہ کینٹ پر دستی بم حملے اورکانسٹیبل افتخار کی ٹارگٹ کلنگ میں بھی ملوث تھے، سکیورٹی فورسز اور پولیس کی بھاری نفری نے علاقے میں سرچ آپریشن شروع کردیا ہے۔

لاہور: (ویب ڈیسک) نگران وزیراعلیٰ پنجاب محسن نقوی کا سیف سٹیز اتھارٹی کا اچانک دورہ، پاکستان سپر لیگ کے انعقاد کے لیے کئے گئے سکیورٹی انتظامات کا جائزہ لیا۔
نگران وزیراعلیٰ محسن نقوی نے سیف سٹیز اتھارٹی کا اچانک دورہ کیا، پی ایس ایل کے انعقاد کیلئے کیے گئے سکیورٹی انتظامات کا جائزہ لیا، انہوں نے ڈیجیٹل کیمروں کے ذریعے لاہور میں سکیورٹی انتظامات کی مانیٹرنگ نظام کا بھی معائنہ کیا، انسپکٹر جنرل پنجاب پولیس ڈاکٹر عثمان انور بھی وزیراعلیٰ کے ہمراہ تھے۔
منیجنگ ڈائریکٹر پنجاب سیف سٹیز اتھارٹی محمد کامران خان نے وزیراعلیٰ پنجاب کو پی ایس ایل سکیورٹی و سرویلنس کے بارے میں تفصیلی بریفنگ دی۔
وزیراعلیٰ کو دوران بریفنگ بتایا گیا کہ سیف سٹیز اتھارٹی لاہور میں 550 خصوصی کیمروں سے پی ایس ایل کی نگرانی کر رہی ہے، کھلاڑیوں اور شائقین کرکٹ کے روٹس، ہوٹل اور سٹیڈیم کی مانیٹرنگ کے تمام انتظامات مکمل ہیں، سیف سٹیز ٹیکنیکل ٹیمیں پی ایس ایل کے دوران 24 گھنٹے فیلڈ میں ڈیوٹی سرانجام دیں گی۔
اس موقع پر محسن نقوی نے ڈیجیٹل وال پر مختلف علاقوں خصوصاً پی ایس ایل روٹس کا مشاہدہ کیا، سیف سٹیز اتھارٹی کے عملے سے ملاقات بھی کی اور عملے کو جانفشانی اور جذبے سے کام کرنے کی ہدایت کی۔
نگران وزیراعلیٰ پنجاب کا کہنا تھا کہ پی ایس ایل کی مانیٹرنگ کیلئے راولپنڈی اور ملتان میں لگائے گئے کیمروں کو سیف سٹی لاہور سے منسلک کیا جائے، انٹیلیجنٹ ٹریفک مینجمنٹ سسٹم کے درست استعمال سے شہریوں کو بہترین ٹریفک پلان دیا جائے، پی ایس ایل ڈیوٹی پر مامور پولیس و دیگر عملے کے لئے کھانے پینے و چائے کے انتظامات بھی کئے جائیں۔

لاہور: (ویب ڈیسک) پاکستان تحریک انصاف (پی ٹی آئی) نے نگران پنجاب حکومت کی جانب سے ڈی جی اینٹی کرپشن سہیل ظفر چٹھہ کی تعیناتی کو لاہور ہائی کورٹ میں چیلنج کردیا۔
درخواست پی ٹی آئی کے سیکرٹری جنرل اسد عمر کی جانب سے دائر کی گئی، درخواست میں الیکشن کمیشن، چیف سیکرٹری سمیت دیگر کو فریق بنایا گیا ہے۔
درخواست میں مؤقف اختیار کیا گیا کہ قانون کے مطابق ڈی جی اینٹی کرپشن کی تعیناتی 3 سال کیلئے ہوتی ہے، ندیم سرور کو مدت ختم ہونے سے قبل ہٹا دیا گیا، نگران پنجاب حکومت نے غیر قانونی طور پر سہیل ظفر چٹھہ کو تعینات کیا ہے۔

لاہور: (ویب ڈیسک) پنجاب اسمبلی کے الیکشن کی تاریخ نہ دینے کے معاملے پر لاہور ہائیکورٹ میں ایک اور درخواست دائر کر دی گئی۔
لاہور ہائی کورٹ میں شہری منیر احمد نے اظہر صدیق ایڈووکیٹ کی وساطت سے درخواست دائر کی، درخواست میں الیکشن کمیشن، وفاقی حکومت، صدر پاکستان، گورنر پنجاب اور نگران وزیر اعلیٰ کو فریق بنایا گیا ہے۔
درخواست گزار کی جانب سے مؤقف اختیار کیا گیا ہے کہ لاہور ہائیکورٹ نے 10 فروری کو پنجاب میں الیکشن کی تاریخ دینے کا حکم دیا، عدالتی احکامات کے باوجود الیکشن کی تاریخ کا اعلان نہیں کیا گیا۔
درخواست میں کہا گیا کہ توہین عدالت کی درخواست بھی دائر کی، الیکشن کمیشن اور گورنر آئینی اختیار استعمال نہیں کرنا چاہتے۔
درخواست میں استدعا کی گئی کہ عدالت آئین کے آرٹیکل 48،58،224 اور سیکشن 57 الیکشن ایکٹ کے تحت ہدایت جاری کرے، عدالت صدر پاکستان کو پنجاب میں انتخابات کی تاریخ دینے کا حکم دے، عدالتی حکم عدولی پر گورنر اور الیکشن کمیشن کیخلاف تادیبی کارروائی کی جائے۔

لاڑکانہ: (ویب ڈیسک) سندھ کے شہر لاڑکانہ میں شوہر نے فائرنگ کرکے اپنی بیوی کو موت کے گھاٹ اتار دیا، فائرنگ سے ملزم کا بھائی بھی زخمی ہوا۔
پولیس کے مطابق یہ واقعہ بھینس کالونی کے علاقے میں پیش آیا جس میں دربان علی لہر نامی ملزم اپنی بیوی کونج اور بھائی عرفان علی پر فائرنگ کر کے فرار ہوگیا۔
پولیس کا کہنا ہے کہ فائرنگ کے نتیجے میں ملزم کی بیوی موقع پر ہی جاں بحق ہوگئی، واقعے کا سبب معلوم نہیں ہوسکا جبکہ مزید تحقیقات جاری ہیں۔

کراچی : (ویب ڈیسک) صوبائی دارالحکومت میں نبی بخش تھانے کی پولیس نے کارروائی کرتے ہوئے 3 موٹر سائیکل چور گرفتار کر لئے۔
پولیس حکام کے مطابق کارروائی کے دوران گرفتار کئے جانے والے ملزمان کے قبضے سے چوری شدہ 2 موٹر سائیکلیں برآمد ہوئی ہیں۔
پولیس نے مزید بتایا کہ ملزمان کے خلاف مقدمات در ج کر کے تفتیش کا آغاز کر دیا گیا ہے۔

کراچی : (ویب ڈیسک) صوبائی دارالحکومت کے علاقے شاہراہ نورجہاں پر فائرنگ کے ایک واقعہ میں ایک شخص جاں بحق ہو گیا۔
کراچی پولیس کے مطابق فائرنگ کے واقعہ میں جاں بحق ہونے والے شخص کی شناخت زاہد کے نام سے ہوئی ہے جس کی لاش کو عباسی شہید ہسپتال منتقل کردیا گیا ہے۔
پولیس نے مزید بتایا کہ واقعہ ذاتی دشمنی کا شاخسانہ معلوم ہوتا ہے اور ملزمان نے نوجوان کو ٹارگٹ کر کے قتل کیا جبکہ مقتول کو تین گولیاں ماری گئی ہیں۔