اسلام آباد: (ویب ڈیسک) پاکستان مسلم لیگ ن کی سینئر نائب صدر و چیف آرگنائزر مریم نواز کے زیر صدارت اجلاس میں کارکنوں نے احتجاج کیا اور ورکرز کو عزت دو کے نعرے لگائے۔
ذرائع کے مطابق مریم نواز کے زیر صدارت راولپنڈی ن لیگی تنظیمی عہدیداروں کا اجلاس ہوا، اجلاس میں مقامی قیادت کی جانب سے نظر انداز کرنے پر کارکنوں نے احتجاج کیا، مریم نواز کے باہر نکلنے پر کارکنوں نے نعرے بازی بھی کی۔
کارکنوں نے ورکر کو عزت دو کے نعرے لگائے، مریم نواز کارکنوں کے نعروں کو نظر انداز کرتے ہوئے گاڑی میں بیٹھ گئیں، مریم نواز نے راولپنڈی کے ایک شادی ہال میں تنظیمی اجلاس کی صدارت کی۔
ذرائع کے مطابق مریم نواز نے راولپنڈی میں تنظیمی سطح پر گروپ بندی پر اظہار برہمی کیا، انہوں نے کہا کہ آپ لوگ آپس کے اختلافات بھلا کر نوازشریف کو مضبوط کریں۔

اسلام آباد: (ویب ڈیسک) صدر مملکت ڈاکٹر عارف علوی نے پنجاب اور خیبرپختونخوا میں انتخابات کی تاریخ دے دی۔
صدر مملکت نے الیکشن ایکٹ 2017 ء کے سیکشن 57 ایک کے تحت 9 اپریل بروز اتوار کو پنجاب اور خیبر پختونخوا کی صوبائی اسمبلیوں کیلئے انتخابات کا اعلان کر دیا۔
صدر مملکت عارف علوی نے اپنے موقف میں کہا کہ کسی بھی عدالتی فورم کی جانب سے کوئی حکم امتناع نہیں، سیکشن 57 ایک کے تحت صدر اختیار کے استعمال میں کوئی رکاوٹ نہیں۔
انہوں نے کہا کہ آئین اور قانون 90 دن سے زائد کی تاخیر کی اجازت نہیں دیتا، الیکشن کمیشن ایکٹ کے سیکشن 57 دو کے تحت الیکشن کا پروگرام جاری کرے ، آئین کے تحت آئین کے تحفظ اور دفاع کا حلف لیا۔

اسلام آباد: (ویب ڈیسک) پاکستان مسلم لیگ ن کی سینئر نائب صدر و چیف آرگنائزر مریم نواز کے زیر صدارت اجلاس میں کارکنوں نے احتجاج کیا اور ورکرز کو عزت دو کے نعرے لگائے۔
ذرائع کے مطابق مریم نواز کے زیر صدارت راولپنڈی ن لیگی تنظیمی عہدیداروں کا اجلاس ہوا، اجلاس میں مقامی قیادت کی جانب سے نظر انداز کرنے پر کارکنوں نے احتجاج کیا، مریم نواز کے باہر نکلنے پر کارکنوں نے نعرے بازی بھی کی۔
کارکنوں نے ورکر کو عزت دو کے نعرے لگائے، مریم نواز کارکنوں کے نعروں کو نظر انداز کرتے ہوئے گاڑی میں بیٹھ گئیں، مریم نواز نے راولپنڈی کے ایک شادی ہال میں تنظیمی اجلاس کی صدارت کی۔
ذرائع کے مطابق مریم نواز نے راولپنڈی میں تنظیمی سطح پر گروپ بندی پر اظہار برہمی کیا، انہوں نے کہا کہ آپ لوگ آپس کے اختلافات بھلا کر نوازشریف کو مضبوط کریں۔

اسلام آباد : (ویب ڈیسک) وفاقی حکومت کی جانب سے اسلام آباد انٹرنیشنل ایئر پورٹ کی آؤٹ سورسنگ پر کام تیزکردیا گیا ہے ۔
ڈی جی سی اے اے کے مطابق انٹرنیشنل فنانشل انسٹیٹیوشن، سی اے اے سے مل کر آؤٹ سورسنگ کا پلان تیار کرے گا ، آؤٹ سورسنگ کے لیے انٹرنیشنل فنانشل انسٹیٹیوشن کی خدمات حاصل کرنے کا فیصلہ کیا گیا ہے۔
ایئرپورٹ کی آؤٹ سورسنگ کے عمل میں انٹرنیشنل آپریٹرز کو مدعو کیا جائے گا، پبلک پرائیوٹ پارٹنرشپ ایکٹ کو مدنظر رکھ کر پلان تیار کیا جائے گا، آؤٹ سورسنگ کے تحت اسلام آباد ایئرپورٹ کے ٹرمینل، بلڈنگ اور کار پارکنگ حوالے کی جائے گی۔
ڈی جی سی اے اے کے مطابق زیادہ بولی لگانے والی کمپنی کو اسلام آباد انٹرنیشنل ایئر پورٹ آؤٹ سورسنگ پر دیا جائے گا۔

نارووال: (ویب ڈیسک) پاکستان مسلم لیگ (ن) کے سینئر رہنما اور وفاقی وزیر برائے منصوبہ بندی و ترقی احسن اقبال نے کہا ہے کہ جتنی بھی ٹیمیں پاکستان سپر لیگ کھیل رہی ہیں وہ ہماری ہیں، جو ٹیم اچھا کھیلے گی وہ جیتے گی، اگلے پی ایس ایل کا ایک میچ سپورٹس سٹی نارووال میں بھی کھیلا جائے گا۔
میڈیا سے گفتگو کرتے ہوئے لیگی رہنما احسن اقبال نے کہا کہ پی ایس ایل سابقہ حکومت کا بہترین تحفہ تھا، پی ایس ایل نے پاکستانی کرکٹ ٹیم کو نیا خون دیا ہے، پی ایس ایل سے کرکٹ کے میدان میں نئے کھلاڑی سامنے آئے ہیں۔
ان کا کہنا تھا کہ نارووال میں ہم نے پاکستان کا جدید ترین سپورٹس سٹی بنایا تھا، بدقسمتی سے 4 سالوں سے یہ منصوبہ سیاست کی نظر ہو رہا ہے، نوجوانوں کیلئے بنائے جانے والے سپورٹس سٹی کی خاطر مجھے بھی جیل جانا پڑا، سپورٹس کمپلیکس 4 سالوں میں بھوت بنگلے کا منظر پیش کر رہا ہے۔

کراچی: (ویب ڈیسک) متحدہ قومی موومنٹ (ایم کیو ایم) کے رہنما فاروق ستار نے کہا ہے کہ مردم شماری کسی ایک سیاسی جماعت کا مسئلہ نہیں، کراچی میں رہنے والے ہر شہری کو گنا جائے، ہمارا پیپلز پارٹی پر کوئی اعتماد نہیں، ہم پاکستان کے مقتدر اداروں اور اہل اقتدار طبقوں کی طرف دیکھ رہے ہیں۔
کراچی میں میڈیا سے گفتگو کرتے ہوئے رہنما ایم کیو ایم فاروق ستار نے کہا کہ مردم شماری کا انعقاد ہر 10 سال بعد ہوتا ہے، گزشتہ مردم شماری 17 سال بعد ہوئی، موجودہ مردم شماری 5 سال بعد ہو رہی ہے، اس مردم شماری کا کریڈٹ ایم کیو ایم پاکستان کا حق ہے۔
انہوں نے کہا کہ ہمارا پیپلز پارٹی پر کوئی اعتماد نہیں، ہم سمجھتے ہیں مردم شماری بھی سیاست کی نظر ہونے جا رہی ہے، کراچی میں رہنے والوں کی آبادی کو پھر کم کرکے دکھایا جائے گا، مردم شماری میں ہر گھر اور ہر شہری کو گنا جائے۔
فاروق ستار کا مزید کہنا تھا کہ ایک بلڈنگ میں ایک گھر نہیں ہوتا، بلڈنگ میں موجود ہر اپارٹمنٹ کو علیحدہ علیحدہ گنا جائے، ہمارے ساتھ حلقہ بندیوں میں ہاتھ ہوا، ہماری 70 یوسیز کو کم کیا گیا۔

لاہور : (ویب ڈیسک) نگران وزیراعلیٰ پنجاب محسن نقوی نے کہا ہے کہ سی ٹی ڈی پنجاب کی آپریشنل اور انٹیلیجنس استعداد کار بڑھانے کے لئے جدید ترین ہتھیار اور ٹیکنالوجی فراہم کی جائے گی۔
نگران وزیراعلیٰ پنجاب محسن نقوی نے سی ٹی ڈی ہیڈکوارٹرزکا دورہ کیا جہاں انہیں دہشت گردوں کے خلاف کامیاب انٹیلی جنس آپریشنز کے بارے بریفنگ دی گئی، نگران وزیراعلیٰ نے سی ٹی ڈی کے مختلف شعبوں کا معائنہ کیا اور سٹاف سے ملاقات کی ۔
اس موقع پر محسن نقوی نے عملے کی پیشہ وارانہ صلاحیتوں کی تعریف کرتے ہوئے کہا کہ دہشتگردی کی سرکوبی میں سی ٹی ڈی پنجاب کا کردار قابل تعریف ہے، سی ٹی ڈی فورس دہشت گردی کے خاتمے کیلئے ہمارا ہراول دستہ ہے، انسداد دہشت گردی فورس نے صوبے میں قیام امن کیلئے شاندار کارہائے نمایاں سرانجام دیئے، دہشت گردوں اور ان کے سہولت کاروں کے نیٹ ورک کے خاتمے کیلئے سی ٹی ڈی کی خدمات لائق تحسین ہیں۔
ان کا کہنا تھا کہ دہشت گرد عناصر کے مذموم عزائم کو ناکام بنانے میں سی ٹی ڈی کے افسروں اور جوانوں کے جذبے اور بہادری کو سراہتے ہیں، قیام امن کیلئے سی ٹی ڈی کے دلیر افسروں نے اپنی جانیں بھی قربان کی ہیں ، قوم کو پاک دھرتی کے بہادر سپوتوں پر ناز ہے۔
محسن نقوی نے سی ٹی ڈی ہیڈکوارٹر کے لان میں موسم بہار کی شجرکاری کا پودا بھی لگایا، انسپکٹر جنرل پولیس، سی سی پی او، سیکرٹری خزانہ، سیکرٹری اطلاعات، ایڈیشنل آئی جی سی ٹی ڈی سپیشل سیکرٹری داخلہ اور متعلقہ حکام بھی اس موقع پر موجود تھے۔

لاہور : (ویب ڈیسک) لاہور ہائیکورٹ نے عمران خان کو پیش ہونے کیلیے آخری موقع دے دیا۔
لاہور ہائیکورٹ نے عمران خان کو پانچ بجے تک پیش کرنے کا حکم دیتے ہوئے پیشی کے لیے آخری موقع دے دیا۔ عدالت نے کہا اگر عمران خان کو پیش نہ کیا تو توہین عدالت کی کارروائی شروع کر یں گے
لاہور ہائیکورٹ میں عمران خان کی حفاظتی ضمانت کیس کی سماعت ہوئی۔ چیئرمین پی ٹی آئی عمران خان لاہور ہائیکورٹ میں پیش نہ ہوئے۔ وکیل نے عدالے میں موقف اپنایا کہ مال روڈ پر ٹریفک بہت زیادہ جام ہے۔آئی جی پنجاب ایک گھنٹہ دے دیں ہم مال روڈ کلیئر کر دیں گے۔
انہوں نے عدالت میں بتایا کہ عمران خان اپنی حفاظتی ضمانت کی درخواست واپس لینا چاہتے ہیں۔ جسٹس طارق سلیم سے استفسار کیا کہ عمران خان کی درخواست کس نے کس کے کہنے ہر فائل کی؟
وکیل نے بتایا کہ عمران خان کے دستخطوں سے یہ درخواست فائل نہیں ہوئی۔ میں نے کوئی درخواست فائل نہیں کی۔ وکیل خواجہ طارق رحیم نے کہامیں عدالت سے حفاظتی ضمانت مانگ ہی نہیں رہا۔عمران خان کی درخواست ضمانت پر دستخط جعلی ہے۔
جسٹس طارق سلیم شیخ نے اظہار برہمی کرتے ہوئے کہا آپ کو چاہیے تھا معافی مانگتے۔اب میں شوکاز نوٹس جاری کروں گا۔ آپ تسلی سے جواب تیار کیجیے گا۔
وکیل نے عدالت سے استدعا کی کہ عدالت اگر کل تک کا وقت دے تو عمران خان پیش ہوجائیں گے۔رجسٹرار نے گاڑی مسجد گیٹ سے داخل ہونے کی درخواست بھی مسترد کی۔ہمیں کہا گیا تھا کہ مال روڈ ٹریفک کے لیے فری ہوگا۔
وکیل نے کہا کہ ہم نے سیکیورٹی کے معاملے پر پولیس حکام سے ملاقاتیں بھی کیں۔عدالت نے حکم دیا تھا کہ عمران خان کی پیشی پر سیکیورٹی انتظامات کیے جائیں۔میں عمران خان کو کل ہی پیش کر دوں گا۔
وکیل نے عدالت میں کہا کہ ہم آنا چاہتے ہیں لیکن آنے نہیں دیا جا رہا۔آپ کسی کو بھی ساتھ بھیج دیں بیشک چیک کرلیں۔آپ 4یا5 بجے کےلیے رکھ دیں ہم ابھی پیش کر دیتے ہیں۔
جسٹس طارق سلیم شیخ نے ریمارکس دیے کہ عمران خان لیڈر اور رول ماڈل ہیں ۔ہم نے آپکو بار بار موقع دیا۔جس طرح آپکو سہولت دی ایسی کسی نے نہیں دی ہوگی۔
وکیل نے عدالت میں عمران خان کو پانچ بجے تک پیش کرنے کی یقین دہانی کرادی۔لاہورہائیکورٹ نے عمران خان کو 5بجے تک پیش کرنے کی مہلت دے دی۔ کہا اگر عمران خان کو پیش نہ کیا تو توہین عدالت کی کارروائی شروع کر یں گے۔

اسلام آباد: (ویب ڈیسک) سپریم کورٹ آف پاکستان میں صوبہ پنجاب اور خیبرپختونخوا میں الیکشن کی تاریخ کے اعلان کیلئے نئی درخواست دائر کر دی گئی۔
دونوں صوبائی اسمبلیوں کے انتخابات کی تاریخ کے حوالے سے سپریم کورٹ میں درخواست پنجاب اور خیبرپختونخوا اسمبلیوں کے سپیکرز نے دائر کی ہے۔
درخواست میں استدعا کی گئی ہے کہ پنجاب اور خیبرپختونخوا کی اسمبلیوں کی تحلیل کو 1 ماہ سے زیادہ وقت گزر چکا ہے، گورنرز آئین کے مطابق انتخابات کی تاریخ کا اعلان نہیں کر رہے، انتخابات کروانا الیکشن کمیشن کی ذمہ داری ہے، سپریم کورٹ دونوں صوبوں کے گورنرز کو انتخابات کی تاریخ کے اعلان کا حکم دے۔
درخواست میں صوبائی گورنرز، الیکشن کمیشن، صدر مملکت کو فریق بنایا گیا ہے، خیبرپختونخوا اور پنجاب حکومتیں بھی فریقین میں شامل ہیں۔

راولپنڈی: (ویب ڈیسک) وفاقی وزیر داخلہ رانا ثناء اللہ نے صدر مملکت ڈاکٹر عارف علوی کو خبردار کر دیا۔
وزیر داخلہ رانا ثناء اللہ نے کہا کہ صدر علوی “آ بیل مجھے مار” والے کام نہ کریں، آئین کی حد میں رہیں، صدر کے دفتر کو بلیک میلنگ کا اڈہ نہ بنائیں، الیکشن کی تاریخ دینے سے صدر کا کوئی لینا دینا نہیں، عارف علوی خوامخواہ ٹانگ نہ اڑائیں۔
ان کا کہنا تھا کہ صدر الیکشن کمیشن کو غیرقانونی اور غیر آئینی احکامات پر مجبور نہیں کر سکتا، الیکشن کمیشن آپ کا غلام نہیں کہ جو آپ کہیں وہ مانے۔
وفاقی وزیر نے مزید کہا کہ عمران خان نے معیشت، خارجہ تعلقات اور قومی مفادات کو نقصان پہنچایا، آپ ریاستی سربراہ کے منصب کو سازش کے لئے استعمال کر رہے ہیں۔