لندن: (ویب ڈیسک) وزیرداخلہ رانا ثنا اللہ کا کہنا ہے کہ مریم نواز کا پاکستان واپسی کا پروگرام کچھ تبدیل ہوا ہے۔
رانا ثنا اللہ نے کہا کہ مریم نواز 27 جنوری کو لندن سے دبئی جائیں گی، دبئی سے 28 جنوری کو پاکستان پہنچیں گی۔
خیال رہے کہ مریم نواز گزشتہ کچھ عرصے سے لندن میں مقیم ہیں۔
تحریک انصاف میں شامل ہونے والے پیر امین الحسنات کے حوالے سے رانا ثنا نے کہا کہ پارٹی ٹکٹ نہ ملنے کے بعد وہ غیر فعال ہوگئے تھے۔
لاہور: (ویب ڈیسک) پاکستان کے سابق فاسٹ بولر شعیب اختر نے اعلان کیا ہے کہ وہ اپنی زندگی پر بننے والی فلم ’راولپنڈی ایکسپریس‘ سے خود کو علیحدہ کر رہے ہیں۔
انسٹاگرام پر جاری پیغام میں شعیب اختر نے کہا کہ ’انتہائی دکھ کے ساتھ، میں آپ سب کو آگاہ کرنا چاہتا ہوں کہ کئی ماہ غور و خوض کے بعد میں نے فلم راولپنڈی ایکسپریس اور اس کے میکرز سے خود کو الگ کر نے کا فیصلہ کیا ہے اور اپنی منیجمنٹ اور قانونی ٹیم کے ذریعے میں نے معاہدہ ختم کردیا ہے۔‘
شعیب اختر نے مزید لکھا : ’یقیناً یہ ایک ڈریم پروجیکٹ تھا اور میں نے اس میں شامل رہنے کیلئے کافی کوشش کی لیکن بدقسمتی سے چیزیں بہتر نہ ہوسکیں۔‘
انہوں نے کہا کہ ’احسن طریقے سے اختلافات حل کرنے میں ناکامی اور معاہدے کی بار بار خلاف ورزیوں کے باعث بالآخر مجھے ان کے ساتھ تعلقات منقطع کرنے پڑے۔‘
راولپنڈی ایکسپریس کے نام سے مشہور فاسٹ بولر نے کہا کہ ’یہی وجہ ہے کہ میں نے پروجیکٹ چھوڑ دیا، اس معاملے پر میں نے تمام قانونی ضابطے پورے کیے اور اپنی زندگی کی کہانی استعمال کرنے کے حوالے سے دیے گئے حقوق منسوخ کردیے ہیں۔‘
شعیب اختر نے خبردار کیا کہ ’اگر فلم میکرز نے بائیوگرافی فلم پر کام جاری رکھا اور میرا نام یا میری زندگی کی کہانی کسی بھی طرح استعمال کی تو سخت قانونی کارروائی کی جائے گی۔ ‘
خیال رہے کہ گزشتہ برس جولائی میں شعیب اختر نے تصدیق کی تھی کہ ان کی زندگی پر فلم بنائی جائے گی جس کی شوٹنگ کا آغاز کردیا گیا ہے۔
پاکستان کے سابق فاسٹ بولر شعیب اختر کی زندگی پر بننے والی فلم ‘راولپنڈی ایکسپریس’ میں مرکزی کردار نبھانے والے اداکار کا نام بھی سامنے آیا تھا۔
شعیب اختر کے کردار کیلئے عمیر جسوال کو منتخب کیا گیا تھا جنہوں نے سوشل میڈیا اکاؤنٹس پر فلم کے کردار کی جھلک شیئر کی تھی۔
عمیر نے اپنی پوسٹ میں لکھا ’آپ سب کے ساتھ یہ اعلان کرتے ہوئے بہت پرجوش اور خوش ہوں کہ راولپنڈی ایکسپریس میں، میں شعیب اختر کا کردار نبھاؤں گا، بڑے پردے پر لیجنڈ شعیب اختر کا کردار ادا کرنے پر مجھے فخر ہے۔
واضح رہے کہ راولپنڈی ایکسپریس کے نام سے مشہور شعیب اختر نے دسمبر 1997 میں ویسٹ انڈیز کے خلاف اپنے کیریئر کا آغاز کیا تھا۔
لاہور: (ویب ڈیسک) قومی کرکٹر شان مسعود اپنی دلہن نیشے خان کو پشاور سے بیاہ لائے ہیں۔
شان مسعود کی شادی کی تقریب میں کپتان بابر اعظم سمیت دیگر سٹار کرکٹرز نے شرکت کی، تقریب میں لیجنڈری سابق کرکٹر انضمام الحق، محمد یوسف، شاہد آفریدی سمیت دیگر سابق کھلاڑی بھی شریک تھے۔
اس سے پہلے قومی اوپنر کے نکاح کی تقریب میں نوبیاہتا جوڑے نے ایک دوسرے کو انگوٹھیاں پہنائیں جس کی ویڈیو اور تصاویر سوشل میڈیا پر وائرل ہو گئیں۔
لاہور: (ویب ڈیسک) وزیر اعظم شہبا زشریف نے کہا ہے کہ جب بھی الیکشن ہوئے بھاری اکثریت سے جیتیں گے، ن لیگ مضبوط اور بڑی جماعت ہے، کوئی بھی اسے ختم نہیں کر سکا۔
وزیر اعظم کے زیر سربراہی اجلاس میں موجودہ سیاسی اور معاشی صورتحال پر تبادلہ خیال کیا گیا، اجلاس میں پارٹی کارکنوں کو متحرک کرنے کے لیے پارٹی عہدیداروں کو ٹاسک دیئے گئے۔
شہباز شریف نے کہا کہ عمران خان نے ملک کو خطرناک صورتحال پر پہنچایا، ہم نے آنے کے بعد ملک کو سنبھالا دیا، ن لیگ ایک مضبوط اور بڑی جماعت ہے اس کو کوئی بھی ختم نہ کر سکا، جب بھی الیکشن ہوں گے مسلم لیگ ن بھاری اکثریت سے کامیاب ہو گی۔
شہباز شریف نے کہا کہ ہم نہیں چاہتے کہ عوام پر مہنگائی کا بوجھ ڈالیں، ہمیں غریب عوام کا احساس ہے، ہماری کوشش ہے کہ ایسے قدم اٹھائیں جس سے غریب آدمی کو نقصان نہ ہو۔
وزیر اعظم کا کہنا تھا کہ آئی ایم ایف سے معاملات جلد حل ہو جائیں گے، معاشی معاملات سےنمٹنے کے لئے تمام پلان موجود ہیں، ہم عنقریب معاشی بحرانی کیفیت سےنکل جائیں گے، مہنگائی پر بہت جلد قابو پالیا جائے گا۔
شہباز شریف نے کہا کہ سابق حکمران جماعت کی خرابی کو درست کرنے میں وقت لگتا ہے، ہم نے پاکستان اور معیشت کو سنبھال لیا ہے، ہر طرح سے معاملات کنٹرول میں ہیں، فکر کی کوئی بات نہیں۔
کوئٹہ: (ویب ڈیسک) ترجمان بلوچستان حکومت نے کہا ہے کہ ریکوڈک صوبے میں بڑی سرمایہ کاری اور روزگار کے مواقع لائے گا، اس کے خلاف کوئی پروپیگنڈا برداشت نہیں کیا جائے گا۔
اپنے ایک بیان میں ترجمان بلوچستان حکومت نے کہا کہ ریکوڈک معاہدے کے خلاف بھارتی میڈیا پر کیے جانے والے پروپیگنڈے کی مذمت کرتے ہیں، اندرونی اور بیرونی ملک دشمن قوتیں پاکستان کو ترقی کی منزل پر گامزن نہیں دیکھنا چاہتی، یہ منصوبہ نہ صرف بہتر انداز سے جاری رہے گا بلکہ مستقبل میں مزید سرمایہ کاری کا باعث بھی بنے گا۔
انہوں نے مزید کہا کہ ریکوڈک پراجیکٹ حکومت بلوچستان اور بیرک گولڈ کا مشترکہ اور ایک تاریخی معاہدہ ہے، منصوبے سے بلوچستان کو خاص طور پر اور پاکستان کو بالعموم متعدد محاذوں پر فائدہ ہوگا، معاہدے سے پاکستان میں 8 ارب ڈالر کی سرمایہ کاری آئے گی، مقامی لوگوں کیلئے 8 ہزار سے زائد ملازمتیں پیدا ہوں گی اور مقامی طور پر سماجی و اقتصادی ترقی اور شراکت داری کے مواقع بھی پیدا ہوں گے۔
ترجمان بلوچستان حکومت نے کہا ریکوڈک ڈیل کو قانونی طور پر سپریم کورٹ آف پاکستان سے تحفظ حاصل ہے اور ریاستی اداروں، سیاسی قوتوں سمیت تمام اسٹیک ہولڈرز کا اتفاق ہے، منصوبہ بلوچستان اور پاکستان کا معاشی مستقبل ہے اور ملک کو کامیابی سے ہمکنار کرنے تک جاری رہے گا، صوبے کے محب وطن بلوچ، پشتون عوام امن پسند ہیں، یہاں کے عوام ایسے منصوبوں کا خیر مقدم کرتے ہیں جن کا مقصد سب کا اجتماعی فائدہ ہو۔
اسلام آباد: (ویب ڈیسک) پاکستان کی جانب سے سویڈن میں قرآن پاک کی بے حرمتی کرنے کے گھناؤنے فعل کی شدید مذمت کی گئی ہے۔
ترجمان دفتر خارجہ نے اپنے مذمتی بیان میں کہا ہے کہ قرآن پاک کی بے حرمتی دنیا بھر کے ڈیڑھ ارب مسلمانوں کے مذہبی جذبات کو ٹھیس پہنچاتا ہے، پاکستان سویڈن کو اپنے تحفظات سے آگاہ کر رہا ہے، سویڈن پاکستانی عوام اور دنیا بھر کے مسلمانوں کے جذبات کا خیال رکھے اور اسلامو فوبک کارروائیوں کو روکنے کیلئے اقدامات کرے۔
ترجمان دفتر خارجہ نے مزید کہا کہ مسلمانوں کے مذہبی جذبات کو ٹھیس پہنچانا اظہار رائے کی آزادی میں کسی صورت نہیں آتا، انسانی حقوق کے علمبردار نفرت انگیز عمل نہ کرنے اور لوگوں کو تشدد پر نہ اکسانے کی ذمہ داری نبھائیں، اسلام امن کا مذہب ہے، دنیا بھر کے مسلمان تمام مذاہب کے احترام پر یقین رکھتے ہیں۔
دفتر خارجہ نے مزید کہا کہ عالمی برادری کو اسلامو فوبیا، زینو فوبیا، عدم برداشت اور مذہب یا عقیدے کی بنیاد پر تشدد پر اکسانے کے خلاف مشترکہ عزم ظاہر کرنے اور بین المذاہب ہم آہنگی، پرامن بقائے باہمی کے فروغ کیلئے مل کر کام کرنے کی ضرورت ہے۔
اسلام آباد: (ویب ڈیسک) وفاقی وزیر خزانہ و ریونیو سینیٹر اسحاق ڈار نے گیس سیکٹر میں گردشی قرضے کے حل کیلئے قائم کمیٹی کو ہدایت کی ہے کہ وہ گیس سیکٹر میں گردشی قرضوں کے جلد از جلد حل کیلئے اپنی رپورٹ اور ایکشن پلان کو حتمی شکل دے۔
وفاقی وزیر خزانہ کے زیر صدارت توانائی کے شعبہ میں اصلاحات کے حوالہ سے اجلاس منعقد ہوا، جس میں وزیرمملکت برائے خزانہ و محصولات ڈاکٹر عائشہ غوث پاشا، وزیرمملکت برائے پٹرولیم مصدق ملک، وزیراعظم کے معاون خصوصی برائے خزانہ طارق باجوہ، معاون خصوصی برائے ریونیو طارق محمود پاشا، کمیٹی کے چیئرمین اشفاق یوسف تولہ، ایس ای سی پی کے چیئرمین، کنٹرولر جنرل پاکستان، اکاؤنٹنٹ جنرل پاکستان کے علاوہ خزانہ اور پٹرولیم ڈویژن کے اعلیٰ حکام نے شرکت کی۔
اشفاق یوسف تولہ نے اجلاس کو گیس سیکٹر میں گردشی قرضہ کی مقدار اور توانائی کے شعبہ میں گردشی قرضہ کے بوجھ کو کم کرنے کیلئے اصلاحات متعارف کرانے کے طریقہ کار اور فریم ورک سے آگاہ کیا، اجلاس میں ملک میں اقتصادی ترقی کے حصول کیلئے توانائی کے شعبہ میں پائیداری کے حوالہ سے قابل عمل تجاویز پر غور کیا گیا۔
اس موقع پر وزیرخزانہ نے اظہار خیال کرتے ہوئے توانائی کے شعبہ کے مسائل بشمول گردشی قرضے کے حل کی حکومتی ترجیحات پر عمل درآمد پر زور دیا تا کہ اس شعبہ کے مالی استحکام اور ملک کی اقتصادی ترقی کویقینی بنایا جاسکے
وزیر خزانہ نے کمیٹی کو ہدایت کی کہ وہ گیس سیکٹر میں گردشی قرضوں کے مسئلہ کے فوری حل کیلئے اپنی رپورٹ اور ایکشن پلان کو حتمی شکل دیں۔
اسلام آباد: (ویب ڈیسک) امریکا میں پاکستان کے سفیر مسعود خان نے کہا کہ پاکستان اور امریکا کے درمیان بزنس ٹو بزنس خاص طور پر ٹیکنالوجی کے شعبے میں تعلقات میں اضافہ ہو رہا ہے۔
میریڈیئن انٹرنیشنل سینٹر کے دورہ کے موقع پر چیف ایگزیکٹو افسر اور سابق امریکی سفیر سٹورٹ ہالیڈے سے گفتگوکرتے ہوئے انہوں نے کہا کہ امریکا پاکستان کے لیے سب سے بڑی برآمدی منڈی ہے اور آنے والے سالوں میں دوطرفہ تجارت مزید بڑھے گی، پاک امریکا تعلقات کا موجودہ مرحلہ اقتصادی تعاون بڑھانے پر مرکوز ہے۔
مسعود خان نے مزید کہا کہ حالیہ اعلیٰ سطح کے دوروں میں ہم نے تجارت، زراعت، کاروبار، ٹیکنالوجی، موسمیاتی تبدیلی، سبز توانائی، آفات سے نمٹنے کی تیاری، ماحولیات، صحت اور عوام کے عوام سے درمیان روابط کے شعبوں کو ترجیح دی ہے۔
میریڈیئن انٹرنیشنل سینٹر کے سربراہ نے یقین دلایا کہ ہمارا سنٹر پاکستان اور امریکا کے درمیان تعلیم، قیادت کے تربیتی پروگرام، موسمیاتی تبدیلی، ثقافت اور کاروبار کے شعبوں میں قریبی تعلقات کو فروغ دینے میں معاونت کرے گا، میریڈیئن انٹرنیشنل سینٹر ایک غیر جانبدار ادارہ ہے جو موثر قیادت اور سفارت کاری کے ذریعے عالمی سلامتی اور خوشحالی کے عمل کو آگے بڑھانا چاہتا ہے
لاہور: (ویب ڈیسک) چیئرمین پاکستان تحریک انصاف عمران خان نے کہا ہے کہ ہم امید کر رہے تھے کہ جنرل (ر) باجوہ کے بعد فوج نیوٹرل ہو گی لیکن بدقسمتی سے ابھی نیوٹرل نہیں، مسٹر ایکس، مسٹر وائے نے ہمارے ایم پی ایز کو دھمکیاں دیں۔
ایک نجی ٹی وی کو انٹرویو میں سابق وزیر اعظم عمران خان نے کہا کہ ہمارے ایم پی ایز کو کہا گیا عمران پر کانٹا ڈال دیا گیا ہے، نواب اکبر بگٹی پر کانٹا لگایا تھا اور آج تک بلوچستان کے حالات ٹھیک نہیں ہوئے، سیاسی لیڈروں کو کانٹے لگا کر ختم نہیں کیا جا سکتا، ایسے واقعات سے سیاسی لیڈر ختم نہیں ملک کو نقصان ہوتا ہے، نئے آرمی چیف سے میری کوئی بات چیت نہیں ہوئی۔
انہوں نے کہا اسٹیبلشمنٹ ایک حقیقت ہے جو سب سے زیادہ منظم ہے، کورونا، پولیو، سیلاب، ٹڈی دل کے دوران فوج نے بہت زیادہ مدد کی، جنرل باجوہ کو ایکسٹینشن دینا میری سب سے بڑی غلطی تھی، ایکسٹینشن کے بعد جنرل (ر) باجوہ نے ان کو این آر او دیا تھا، این آر او دے کر ظلم کیا گیا، ہمیں پتا ہی نہیں تھا کہ حسین حقانی کو فارن آفس نے ہائر کیا، اس نے امریکا میں میرے خلاف لابی اور باجوہ کو سپورٹ کرنا شروع کر دیا تھا۔
چیئرمین پی ٹی آئی نے کہا یہ لوگ الیکشن نہیں آکشن کے ذریعے آتے ہیں، ان کے ساتھ سابق آرمی چیف ملا ہوا تھا، جنرل (ر) باجوہ کہتے تھے اکانومی پر توجہ دیں احتساب کو بھول جائیں، وہ ایکسٹینشن سے پہلے لوگوں کو ان کی چوری کا بتاتے تھے، انہوں نے کہا یہ لوگ کرپٹ ہیں، جنرل (ر) باجوہ نے یوٹرن لیا پہلے انہیں چور پھر انہی کو اوپر بٹھا دیا، نواز شریف کی رپورٹ دیکھ کر ہم سب گھبرا گئے تھے۔
عمران خان نے کہا آہستہ آہستہ ہمیں پتا چلا نواز شریف کی میڈیکل رپورٹس غلط بنی، انہوں نے شہباز گل کی رپورٹ کو بھی تبدیل کیا، کبھی اتنے برے حالات نہیں تھے جتنے آج ہیں، آج پارلیمنٹ فنکشنل نہیں ہے، جب ہم نے پارلیمنٹ جانے کا اعلان کیا تو یہ ڈر گئے، اپنی چوریاں بچانے کیلئے نیب، ایف آئی اے کو ختم کر دیا، ملک میں اگر صاف اور شفاف الیکشن کا راستہ نہیں اپنائیں گے تو حالات اس طرف جائیں گے پھر سنبھالنا مشکل ہو جائے گا۔
سابق وزیر اعظم نے کہا کہ جو کچھ پی ڈی ایم نے 8 ماہ میں کر دیا کوئی دشمن بھی نہیں کر سکتا تھا، آج معاشی حالات دن بدن خراب ہو رہے ہیں، آٹھ لاکھ پڑھے لکھے نوجوان ملک چھوڑ کر جا چکے ہیں، اس تباہی کو روکنے کیلئے شفاف الیکشن کرایا جائے، میرا خوف ہے کہیں عمران خان اقتدار میں نہ آجائے، میرے خوف کی وجہ سے الیکشن نہیں کرا رہے، مجھے ڈر ہے سری لنکا والے حالات نہ شروع ہو جائیں۔
چیئرمین پاکستان تحریک انصاف نے کہا کہ آج ملک میں بہت زیادہ مایوسی ہے، کراچی پورٹ پر کینٹینرز کھڑے ہیں پاکستان ڈوب رہا ہے، ملک میں شفاف الیکشن سےہی استحکام آسکتا ہے، نئے مینڈیٹ والی حکومت وہ ریفارمز کرے جو پہلے کبھی نہیں ہوئیں، اقتدار میں آئے توسب سے پہلے رول آف لاء قائم کریں گے۔
انہوں نے مزید کہا انشاء اللہ ٹھیک ہو کر سندھ کے اندر جانا ہے، سب سے زیادہ سندھ کو لوٹا جا رہا ہے، پیپلز پارٹی والے سندھ کو بے شرمی سے لوٹ رہے ہیں، سندھ کی عوام سب سے زیادہ مظلوم ہے، کراچی کے لوگ سب سے زیادہ شعور والے ہیں، ان کی کرپشن نے کراچی کو کھنڈر بنا دیا ہے، کراچی کے لوگ پیپلز پارٹی سے نفرت کرتے ہیں، وہ بے شرمی سے کرپشن، چوری کرتے ہیں۔
عمران خان کا کہنا تھا کہ کراچی میں تین کروڑ روپے ایک بلڈنگ کی منظوری کیلئے لیا جاتا ہے، کراچی والے کیسے پیپلز پارٹی کو ووٹ دے سکتے ہیں، کراچی میں الیکشن نہیں مذاق ہوا ہے، یہ الیکشن ختم کر دینا چاہیے، بلدیاتی الیکشن میں دھاندلی کی گئی اور الیکشن کمیشن سو رہا ہے، پولیس، انتظامیہ، الیکشن کمیشن سب دھاندلی میں ملوث ہیں، کراچی اور سندھ میں تنظیم کو بہتر کریں گے۔
سابق وزیر اعظم نے کہا کہ ڈسکہ میں 25 پولنگ سٹیشن پر مسئلہ ہوا تو الیکشن کمیشن نے پورا الیکشن کرا دیا تھا، تمام جماعتوں نے کہا بلدیاتی الیکشن میں دھاندلی ہوئی، الیکشن کمیشن کنٹرولڈ ہے، اگر اس طرح کے الیکشن کرانے ہیں تو بہتر ہے نہ کرائے جائیں، الیکشن کمیشن نےصرف تحریک انصاف کے خلاف فیصلے دیئے، توشہ خانہ کیس میں عدالت نے جب تمام تفصیلات مانگی تو کہا گیا یہ سیکرٹ ہے۔
چیئرمین پاکستان تحریک انصاف نے کہا کہ میں نے اپنی گھڑی بیچی، حکومت، ہنڈلرز نے اتنا شور مچا دیا، گھڑی کیس میں کھودا پہاڑ نکلا چوہا، تحریک انصاف نے چالیس ہزار ڈونرز کا ڈیٹا دیا، پیپلز پارٹی، مسلم لیگ (ن) کی فنڈنگ کیس کو سنا ہی نہیں جا رہا، لانگ مارچ میں مجھے ان کی سازش کا پہلے ہی پتا تھا، تین لوگوں نے مل کر پلان کیا تھا، میرے خلاف توہین مذہب کے حوالے اشتہار چلائے گئے۔
انہوں نے مزید کہا کہ مجھے پتا چل گیا تھا انہوں نے سلمان تاثیر والا قتل کرانا ہے، ان کے پریشر ڈالنے سے اب یقین ہو گیا یہی لوگ ملوث تھے، جے آئی ٹی کے ممبران نے اپنے بیانات تبدیل کر لیے، اگر مجھے انصاف نہیں مل سکتا تو مطلب ملک میں جنگل کا قانون ہے، ملک میں انصاف کے نظام کو ٹھیک کرنے تک معیشت ٹھیک نہیں ہو سکتی۔
اسلام آباد: (ویب ڈیسک) بین الاقوامی مالیاتی فنڈ (آئی ایم ایف) نے کہا ہے کہ ڈیجیٹل ٹیکنالوجی کے استعمال سے ایشیاء و بحرالکاہل کے خطہ کی پیداوار میں اضافہ اور غربت کی شرح کم کرنے میں مدد ملی ہے۔
آئی ایم ایف نے اپنے ایک بلاگ میں کہا ہے کہ ڈیجیٹل ٹیکنالوجی کے استعمال سے پبلک پرائیویٹ سیکٹرز کی استعداد کار کو فروغ دیا جا سکتا ہے، اسی طرح ٹیکنالوجی کے استعمال مالیات اور تعلیم تک آسان رسائی کے علاوہ نئی منڈیوں کے قیام میں بھی مدد ملتی ہے ۔
ڈیجیٹل ٹیکنالوجیز کے استعمال سے کمپنیاں اپنے دور دراز کے کسٹمرز کی بہتر انداز میں خدمت کر سکتی ہیں۔
