عباس پور: (ویب ڈیسک) بلدیاتی انتخابات کا آخری مرحلہ مکمل ہو گیا جس میں پی ٹی آئی نے میدان مار لیا۔
ریٹرننگ آفیسر ابصار افتخار کی جانب سے چاروں یونین کونسلز سے کامیاب ہونے والے چئیرمین اور وائس چیئرمین کے غیر سرکاری نتائج کا اعلان کر دیا گیا، جس کے مطابق ٹاؤن کمیٹی عباسپور کے چئیرمین شیراز احمد چودھری اور آزاد امیدوار سردار محمد شبیر عرف لالہ کامیاب ہو گئے۔
یونین کونسل چھاترہ سے ملک اسد چیئرمین اور صوبیدار (ر) راجہ رفیق بھٹی وائس چیئرمین، یونین کونسل چفاڑ سے حاجی راجہ محمد رفیق کیانی چیئرمین، محمد امین چودھری وائس چیئرمین، یونین کونسل کھلی درمن سے سردار جنید کبیر احمد ایڈووکیٹ چیئرمین جبکہ راجہ ابراہیم خان وائس چیئرمین منتخب ہوئے۔
یونین کونسل ٹنگیڑاں سے سید نصیر حسین شاہ چیئرمین، محمد تیمور وائس چیئرمین، ٹاؤن کمیٹی عباسپور میں اپ سیٹ ہوا جہاں پی ٹی آئی کے ٹکٹ ہولڈر کو شکست ہوئی، پی ٹی آئی کے ہی دوسرے امیدوار چودھری شیراز پی پی پی اور آزاد ممبر سردار شبیر لالہ کے ساتھ ملکر چیئرمین منتخب ہوگئے۔

اسلام آباد: (ویب ڈیسک) سابق وفاقی وزیر حماد اظہر نے کہا ہے کہ پی ڈی ایم نے 11 ماہ میں سب کچھ کر کے دیکھ لیا، آپ کے سامنے ہاتھ جوڑ کر کہتے ہیں استعفیٰ دیں اور گھر جائیں۔
میڈیا سے گفتگو کرتے ہوئے حماد اظہر نے کہا کہ ایکسپورٹ تباہ ہو چکی ہے، موجودہ حکومت عوام کو ریلیف فراہم کرنے میں ناکام رہی، تحریک انصاف نے اپنے دور میں عوام کو ریلیف فراہم کیا، 5500 ارب روپے قرضوں پر سود ادا کرنا ہے، معیشت کی صورتحال انتہائی خطرناک ہے، ہم بار بار وارننگ دیتے رہے کہ ان سے معیشت نہیں سنبھل رہی، اس سے پہلے بھی یہ معیشت کو 2 مرتبہ تباہ کر چکے۔
سابق وفاقی وزیر حماد اظہر نے مزید کہا کہ اپنے ہی لوگوں کو غیر قانونی طور پر اٹھا کر ہراساں کیا گیا، آج الیکشن کمیشن پوری قوم کے سامنے مذاق بن گیا ہے، عدلیہ کے اندر تفریق پیدا کرنے کی کوشش کی جا رہی ہے، کل ہم نے ملک کے ساتھ مذاق دیکھا، وزیر قانون اور اٹارنی جنرل نے غیر ذمہ دارانہ گفتگو کی، ہم عالمی دنیا میں مذاق بن کر رہ گئے ہیں۔
انہوں نے کہا آج ملک دیوالیہ ہونے سے بھی آگے کھڑا ہے، پی ٹی آئی کو کچھ کہنے کی ضرورت نہیں سروے کروا کر دیکھ لیا جائے، اسحاق ڈار 4 ماہ آئی ایم ایف کو آنکھیں دیکھاتے رہے، کبھی کہتے ہیں قطر سے پیسے آنے ہیں، کہیں سے کوئی پیسے نہیں آئے، اس وقت ملک کو صاف شفاف مینڈیٹ کی ضرورت ہے، یہ گیمز کھیلنے اور ہراساں کرنے سے استحکام نہیں آئے گا۔
حماد اظہر نے مزید کہا کہ آج سارا ملک مایوس بیٹھا ہے، لوگوں کی مایوسی غصے میں تبدیل ہو رہی ہے، ابھی بھی ان کا خیال ہے ڈرانے دھمکانے سے کچھ ہو جائے گا، جو لوگ بیٹھے ہوئے ہیں وہ غیر سنجیدہ ہیں، سننے میں آ رہا ہے کہ الیکشن ہوئے تو آئی ایم ایف معاہدہ نہیں کریں گے، ملکی معیشت کو خطرے میں ڈال رہے ہیں اور کیسز عمران خان اور شوکت ترین پر بنا رہے ہیں۔
سابق وفاقی وزیر نے کہا کہ یہ ملک اپنا فیصلہ کر چکا ہے، عوام کو حکمران چننے کا موقع دیا جائے، یہ گیمز ہی ہمیں یہاں تک لے آئی ہیں، ہم وارننگ دیتے رہے ہیں کہ صورتحال یہاں تک آ جائے گی، اس ملک کو کس سمت لے جایا جا رہا ہے؟، صورتحال سنگین ہے، ہر پاکستانی آج پریشان ہے اور غصے میں ہے، ان کے پاس عوام کا اعتماد نہیں، انتخاب کا نام سن کو ان کو رات نیند نہیں آتی۔
انہوں نے مزید کہا کہ یہ اتفاق فاؤنڈری کا ترازو نہیں جو ایک جیسا وزن کرے گا، ہم اس ملک کو الیکشن کی طرف لے جانا چاہتے ہیں، ساری دنیا کو معلوم ہے پی ڈی ایم حکومت منتخب حکومت نہیں ہے، بیساکھیوں پر کھڑی ہے، اعظم نذیر تارڑ جیسے لوگوں کی بڑھکوں پر مت جائیں یہ تو کونسلر کا الیکشن نہیں جیت سکتے۔

اسلام آباد: (ویب ڈیسک) جویریہ ظفر کے زیر صدارت قومی اسمبلی کی قائمہ کمیٹی برائے اطلاعات و نشریات کا اجلاس ہوا، جس میں کمیٹی نے صحافی ارشد شریف قتل کے حوالے سے تفصیلی بریفنگ طلب کر لی۔
اجلاس کے دوران جویریہ ظفر نے کہا کہ ابھی تک ارشد شریف قتل کے حوالے سے کمیٹی کو کوئی بریفنگ نہیں دی گئی، آئندہ اجلاس میں صحافیوں کے تحفظ کے حوالے سے بل پر بھی غور کیا جائے گا، کمیٹی نے اسلام آباد ہائیکورٹ میں صحافیوں پر تشدد کی مذمت کی اور کہا کہ پولیس کی جانب سے صحافیوں کو ذمہ داریوں کی ادائیگی سے روکا گیا۔
اس موقع پر وزیر اطلاعات مریم اورنگزیب نے کہا کہ صحافیوں پر تشدد کے معاملے پر وزارت داخلہ کے ساتھ میٹنگ ہوئی ہے، اسلام آباد ہائیکورٹ جانے سے صحافیوں کو روکا گیا، صحافیوں پر تشدد کے واقعہ کی رپورٹ وزیر داخلہ نے طلب کر لی ہے۔
اجلاس میں ناز بلوچ نے کہا کہ صحافیوں کے حوالے سے قانون سازی ہونی چاہئے تاکہ صحافی خود کو غیر محفوظ تصور نہ کریں، خواتین صحافیوں کے خلاف بھی مہم چلائی جاتی ہے، اس پر بھی بات ہونی چاہئے۔
ڈراموں اور ٹی وی اشتہارات میں معاشرتی اقدار کے منافی مواد پر اراکین کمیٹی نے تشویش کا اظہار کیا جس پر سیکرٹری اطلاعات نے کہا کہ ہر صوبے میں کونسل آف کمپلینٹ ہے، شکایت آئے تو کونسل آف کمپلینٹ سننے کی مجاز ہے، ڈرامے سنسر کرنے کا کوئی بورڈ موجود نہیں صرف فلم سنسر بورڈ ہے۔
سیکرٹری اطلاعات نے کہا کہ 1972ء سے فلم کو سنسر کرنے کی فیس 250 ہے، اس کو بڑھا کر ایک ہزار روپے کیا جا رہا ہے، ڈراموں کو سنسر کرنے کے حوالےسے اگر حکومت قانون سازی کرنا چاہے تو کر سکتی ہے۔
جویریہ ظفر نے کہا کہ ڈرامہ کے آن ایئر آنے سے پہلے ڈرامے کے مواد کو دیکھا جانا چاہئے، جس پر مریم اورنگزیب نے کہا کہ ڈراموں کو سنسر کرنے کے حوالے سے قانون سازی کی جائے گی۔
چیئرمین پیمرا سلیم بیگ نے کمیٹی کو بتایا کہ 27 اشتہارات جو معاشرتی اقدار کے خلاف تھے ان پر پابندی عائد کی گئی ہے، میڈیا ہاؤسز کو عدالتوں سے حکم امتناع مل جاتا ہے۔

لاہور: (ویب ڈیسک) نیشنل اکاؤنٹبیلٹی بیورو (نیب) کے دو اہم ڈائریکٹر جنرلز کا تبادلہ کر دیا گیا۔
نیب ہیڈ کوارٹرز نے دونوں افسروں کے تبادلے کا نوٹیفکیشن جاری کر دیا، نوٹیفکیشن کے مطابق ڈی جی نیب ملتان فیاض قریشی کو ڈی جی نیب سکھر تعینات کر دیا گیا۔
ڈائریکٹر جنرل نیب سکھر مسعود عالم خان کو ڈی جی نیب ملتان تعینات کر دیا گیا ہے۔

کراچی: (ویب ڈیسک) پاکستان تحریک انصاف کے رہنما علی زیدی نے کہا ہے کہ شہباز سپیڈ نے راکٹ کی سپیڈ سے معیشت کا بیڑہ غرق کر دیا ہے۔
کراچی میں پریس کانفرنس کرتے ہوئے علی زیدی نے کہا کہ پاکستان میں معاشی تباہی ہو رہی ہے، ہم نے اسمبلی میں استعفیٰ دیا تو کہا گیا سامنے آکر دیں، ہم نے استعفے اس لیے دیئے تھے تاکہ ملک میں الیکشن ہوں، آج پاکستان کی معیشت کیلئے سیاہ دن ہے، رجیم چینج کے بعد پاکستان میں معاشی تباہی جاری ہے، شوکت ترین نے جنرل (ر) باجوہ کو سمجھایا تھا عدم استحکام ہوا تو معیشت سنبھالی نہیں جائے گی۔
سابق وفاقی وزیر علی زیدی نے کہا کہ اس وقت سب کو شہباز شریف کی راکٹ سپیڈ چڑھی ہوئی تھی، اچھی خاصی معیشت چل رہی تھی ان کے اڑتے تیر نے بیڑہ غرق کر دیا، الیکشن میں پی ڈی ایم کا انتخابی نشان ’اڑتا تیر‘ ہوگا، عبدالقادر پٹیل نے ایک کروڑ روپے بیرون ملک دوروں پر خرچ کیے، جونیئر زرداری دنیا میں گھومنے کی ہاف سنچری مکمل کر چکے ہیں۔
علی زیدی نے مزید کہا کہ بلاول نے صرف امریکا کے 11 دورے کیے ہیں، بلاول زرداری ڈھائی ارب روپے بیرون ملک دوروں پر خرچ کر چکے ہیں، بلاول بتائیں بیرون ملک دوروں پر کیسے خرچہ کیا؟، بلاول زرداری ورلڈ ٹور پر نکلے ہوئے ہیں، یہ پلان کے مطابق پاکستان کو ڈیفالٹ کرانا چاہتے ہیں، پھر یہ کہیں گے ہمارے پاس الیکشن کرانے کے پیسے نہیں۔