چیئرمین تحریک انصاف عمران خان نے کل رات سماجی میڈیا پر قوم سے براہِ راست گفتگو کرنے کا فیصلہ کیا ہے۔
ایکسپریس نیوز کے مطابق چیئرمین پاکستان تحریک انصاف عمران خان کے زیرِ صدارت سیاسی کمیٹی کا اہم اجلاس منعقد ہوا۔ اجلاس میں ملکی مجموعی سیاسی صورتحال اور آئندہ کے لائحہ عمل پر تفصیلی تبادلہ خیال کیا گیا۔ اجلاس میں 21 اپریل کو مینارِ پاکستان میں ہونے والے جلسے کی تیاریوں پر تفصیلی بریفنگ دی گئی۔
اجلاس میں فیصلہ کیا گیا کہ عمران خان کل رات سوشل میڈیا کے ذریعے قوم سے براہ راست گفتگو کریں گے۔ اس فیصلے کے بعد تحریک انصاف کی آفیشل سوشل میڈیا ٹیم کو تیاریوں کی باضابطہ ہدایت کردی گئی۔
چیئرمین پی ٹی آئی عمران خان نے مینار پاکستان جلسے کے لیے ذمہ داران کو قافلوں کے ہمراہ بروقت جلسہ گاہ پہنچنے کی خصوصی ہدایات دیں اور کہا کہ صاف شفاف انتخابات کے ذریعے عوام کو اپنے مستقبل کا موقع دینے کے سوا کوئی چارہ نہیں، کسی ملک کی خودمختاری اور جمہوریت کا تحفظ عوام کرتے ہیں۔
انہوں نے کہا کہ سازش کے ذریعے حکومت کی تبدیلی کو قبول کیا گیا تو آئندہ کوئی سربراہِ حکومت بیرونی دباؤ کا سامنا کرنے کی جسارت نہیں کرے گا، پوری قوم اپنی آزادی و خود مختاری کے لیے یکجا اور متحرک ہے، 21 اپریل کو مینار پاکستان کے تاریخی مقام سے پاکستان کی حقیقی آزادی و خودمختاری کا اعلان کریں گی۔

عالمی بینک نے موجودہ حالات میں پاکستانی معیشت کو بڑے خطرات کا سامنا ہونے کا اندیشہ ظاہر کردیا۔
تفصیلات کے مطابق عالمی بینک نے عالمی منڈی میں تیل اور اجناس کی قیمتوں میں مزید اضافے کا امکان ظاہر کرتے ہوئے کہا ہے کہ پاکستانی معیشت کو بڑے خطرات کا سامنا ہے جب کہ کورونا کی نئی لہر سے نقل و حمل پر پابندی بھی لگ سکتی ہے۔
عالمی بینک نے پاکستان کی معاشی صورت حال پر تازہ رپورٹ جاری کردی، جس میں کہا گیا ہے کہ قرضے کی ادئیگی کو یقینی بنانے کے لئے حکومت کو مالیاتی خسارے کو کم کرنے پر توجہ دینا ہوگی۔
رپورٹ میں کہا گیا ہے کہ سیاسی غیر یقینی میکرو اکنامک عدم توازن پیدا کر سکتی ہے عالمی بینک نے اسٹرکچرل چیلنجز کو پاکستان کی پائیدار معاشی ترقی کے لیے بڑے خطرات قرار دیا ہے جب کہ کم سرمایہ کاری، برآمدات اور پیداوار میں کمی معاشی بحالی کے لیے خطرہ قرار دی گئی ہے۔
رپورٹ کے مطابق سیاسی ہلچل اور اصلاحات کا عمل متاثر ہونے سے معیشت کو خطرہ ہے۔
عالمی بینک کے مطابق جولائی سے دسمبر 2021 کے دوران معاشی سرگرمیوں کا تسلسل جاری رہا، عالمی منڈی میں اجناس کی زائد قیمتیں اور طلب میں اضافے سے مہنگائی بڑھی جس کے باعث درآمدی بل میں اضافہ اور روپے کی قدر میں کمی واقع ہوئی۔
عالمی بینک کے مطابق اشیا کی عالمی قیمتوں میں اضافے اور درآمدات بڑھنے سے مہنگائی میں اضافہ ہوا موجودہ مالی سال شرح نمو 4.3 فیصد اور اگلے سال 4 فیصد رہنے کا امکان ہے، سال 2024 میں معاشی ترقی کی رفتار 4.2 فیصد ہو جائے گی۔
رپورٹ میں بتایا گیا ہےکہ پاکستان میں غربت کی شرح میں نسبتاً کمی آئی ہے، سال 2020 میں غربت 37 فیصد جب کہ 2021 میں 34 فیصد ریکارڈ کی گئی، خوراک اور توانائی کی بڑھتی قیمتوں کے باعث عوام کی قوت خرید میں کمی متوقع ہے۔
عالمی بینک کا کہنا ہے کہ کورونا سے بحالی پاکستان کی چیلنجز سے نمٹنے کی صلاحیت کو ظاہر کرتا ہے۔
عالمی بینک نے مالی خسارے پر قابو پانے پر زور دیتے ہوئے حکومت کو لچک دار ایکسچینج ریٹ کی پالیسی برقرار رکھنے کی بھی تجویز دی ہے۔

معروف فٹبالر کرسٹیانو رونالڈو کا نومولود بیٹا انتقال کرگیا۔
معروف فٹبالر کرسٹیانو رونالڈو کے جڑواں بچوں میں سے ایک نومولود بیٹا انتقال کرگیا جبکہ ان کی بیٹی صحت یاب ہے۔
سوشل میڈیا پر رونالڈو اور ان کی اہلیہ نے دکھ کا اظہار کرتے ہوئے لکھا کہ یہ سب سے بڑا درد ہے جسے کوئی بھی والدین محسوس کرسکتے ہیں۔
انہوں نے لکھا کہ صرف ہماری بچی کی پیدائش ہی نے ہمیں اس لمحے کچھ امید اور خوشی کے ساتھ جینے کی طاقت دے رہی ہے۔
بیٹے کے انتقال کے سبب رونالڈو انگلش پریمیئر لیگ میں آج ہونے والے مانچسٹر یونائیٹڈ کے اہم میچ میں دستیاب نہیں ہوں گے۔