کوئٹہ: (ویب ڈیسک) وزیراعلیٰ بلوچستان میر عبدالقدوس بزنجو نے ایسٹر کے موقع پر مسیحی برادری کو مبارک باددیتے ہوئے کہا ہے کہ ایسٹر کا تہوار حضرت عیسی علیہ السلام کے یوم ولادت ہونے کی وجہ سے مسلمانوں کے لیے بھی خوشی کا باعث ہے۔
وزیراعلیٰ بلوچستان میر عبدالقدوس بزنجو نے تہنیتی پیغام میں کہا کہ مسیحی برادری ملک و قوم کی ترقی میں اپنی بھرپور خدمات سرانجام دے رہی ہے، تعلیم اور صحت کے شعبوں میں مسیحی برادری کا کردار قابل ستائش ہے ہمارے صوبے میں بھی مسیحی برادری کی بہت بڑی نمائندگی ہے۔
انہوں نے کہا کہ صوبائی حکومت مسیحی برادری سمیت تمام اقلیتوں کو مکمل طور پر مذہبی آزادی اور تحفظ کی ضمانت فراہم کرتی ہے، وزیراعلیٰ نے کہا کہ وزارت اقلیتی امور صوبے میں نہ صرف مکمل طور پر فعال ہےبلکہ صوبہ بھر کے طول و عرض میں اقلیتوں کے حقوق کی بہتر فراہمی میں بھی اپنا احسن کردار ادا کر رہی ہے۔
وزیراعلی نے کہا کہ صوبائی حکومت اقلیتوں کے لیے مختص کوٹے پر پوری طرح سے عمل کر رہی ہے اور اس بات کو یقینی بنا رہی ہے کہ مسیحی برادری سمیت تمام دیگر اقلیتوں کو ملک اور صوبے کی تعمیر و ترقی کے عمل میں شامل کیا جائے۔
عبدالقدوس بزنجو نے کہا کہ مسیحی برادری اپنی خوشیوں میں ان نادار اور مستحق لوگوں کو بھی شریک رکھے جو اس کی استطاعت نہیں رکھتے، انہوں نے اس موقع پر تمام مسیحی برادری سے اپیل کی کہ اپنی عبادات میں ملک کی سلامتی تحفظ اور امن و امان کے لئے خصوصی دعاؤں کا اہتمام کیا جائے اور بین المذاہب ہم آہنگی کو فروغ دینے اور رواداری کو پروان چڑھانے کے پیغام کو عام کیا جائے تاکہ ہمارا معاشرہ دائمی امن اور رواداری کی جانب گامزن ہو سکے۔

اسلام آباد: (ویب ڈیسک) پاکستان نے پاک افغان سرحد پرگزشتہ چند روز میں دہشت گردی کے بڑھتے واقعات کی شدید مذمت کرتے ہوئے افغان ناظم الامور کو دفتر خارجہ طلب کر کے مطالبہ کیا ہے کہ سرحدی علاقوں کی سکیورٹی کو مزید مضبوط بنایا جائے تاکہ یہ علاقے پاکستان کے خلاف استعمال نہ ہو سکیں۔
ترجمان دفتر خارجہ کی جانب سے ایک بیان میں کہا گیا ہے کہ افغان سرزمین سے پاکستان کی سکیورٹی فورسز کو نشانہ بنایا جارہا ہے، افغان حکومت سے پاک افغان سرحدی علاقہ محفوظ بنانے کی کئی بار درخواست کی ، دہشتگرد افغان سرزمین کو پاکستان میں کارروائیوں کیلئے استعمال کررہے ہیں، کالعدم دہشتگرد جتھے پاکستان کی سرحدی حفاظتی چوکیوں پر حملے کررہے ہیں، 14 اپریل کو شمالی وزیرستان میں دہشتگردوں نے پاک فوج کے 7 جوان شہید کیے، افغان سرزمین سے پاکستان میں دہشتگرد کارروائیوں کی مذمت کرتے ہیں،یہ پاک افغان سرحد پر امن برقرار رکھنے کی کوششوں کیلئے نقصان دہ ہے۔
ترجمان نے کہا کہ افغان حکومت پاک افغان سرحدی علاقے کو محفوظ بنائے، افغان ناظم الامور کو دو واقعات پر احتجاجی مراسلہ تھمایا گیا، افغان نظام الامور کو ۔14 اپریل کے واقعہ پراحتجاجی مراسلہ دیا گیا، افغان سرزمین کے پاکستان کے خلاف استعمال ہونے پر بھی احتجاجی مراسلہ دیا گیا۔

اسلام آباد: (ویب ڈیسک) سابق وزیراعظم عمران خان کے مشیر احتساب شہزاد اکبر اسلام آباد سے دبئی روانہ ہو گئے۔
ذرائع کے مطابق سابق مشیر احتساب شہزاد اکبر ایمریٹس ایئرلائین کی پرواز ای کے 615 کے ذریعے دبئی روانہ ہوئے، شہزاد اکبر نام چند دن پہلے ایف آئی اے نے سٹاپ لسٹ میں شامل کیا تھا
شہزاد اکبر کا نام اسلام آباد ہائیکورٹ کے احکامات پر سٹاپ لسٹ سے نکالا گیا۔

ہنگو: (ویب ڈیسک) قومی اسمبلی کے حلقہ تینتیس ہنگو میں ضمنی الیکشن کے دوران پولنگ کا عمل جاری ہے، پولنگ سٹیشنز پر سکیورٹی کے سخت انتظامات کئے گئے ہیں۔
پولنگ کا عمل شام پانچ بجے تک بغیر کسی وقفے کے جاری رہے گا جس کے دوران تین لاکھ سے زائد ووٹر اپنا حق رائے دہی استعمال کر سکیں گے۔ اے این پی ، جے یو آئی اور پی ٹی آئی کے امیدواروں میں کانٹے کا مقابلہ متوقع ہے۔
کسی بھی ناخوشگوار واقعے سے بچنے کیلئے پولیس اور قانون نافذ کرنے والے اداروں کی بھاری نفری تعینات کی گئی ہے۔