وارسا: (ویب ڈیسک) پولینڈ کے دارالحکومت میں یوکرین جنگ کے مخالف مظاہرین نے روسی سفیر سارگے اندریو کے منہ پر لال رنگ پھینک دیا۔
عالمی خبر رساں ادارے کے مطابق پولینڈ میں روسی سفیر سارگے اندریو ایک قبرستان میں دوسری جنگ عظیم میں مرنے والے روسی فوجیوں کی قبروں پر پھول چڑھانے اور خراج تحسین پیش کرنے پہنچے تھے تاہم وہاں یوکرین جنگ کے مخالف مظاہرین کی بڑی تعداد بھی جمع ہوگئی۔
مظاہرین نے روسی سفیر کو دیکھ کو یوکرین پر جنگ مسلط کرنے کے خلاف شدید نعرے بازی کی اور اس دوران مظاہرین نے روسی سفیر کے چہرے پر لال رنگ بھی پھینک دیا۔ مظاہرین نے فاشسٹ فاشسٹ کے نعرے بھی لگائے۔
اس دوران روسی سفیر سارگے اندریو پُرسکون رہے، اپنے چہرے سے رنگ صاف کرتے رہے اور کسی قسم کی مزاحمت یا تلخ کلامی نہیں۔ روسی فوجیوں کی قبر پر پھول رکھنے اور چند منٹ خاموشی سے کھڑے رہنے کے بعد سارگے اندریو واپس چلے گئے۔
واضح رہے کہ روسی فوج نے 26 فروری کو یوکرین میں داخل ہوکر کئی علاقوں پر قبضہ کرلیا تھا اور تاحال بیلا روس کی سرحد سے یوکرین پر حملے جاری رکھے ہوئے ہے۔

کولمبو: (ویب ڈیسک) سری لنکا کے وزیر اعظم مہندا راجا پاکسے نے شدید مالی بحران کے بعد ملک گیر ہونے والے عوامی احتجاج، مظاہروں اور امن و امان کی شدید بگڑتی ہوئی صورت حال سے مجبور ہوکر اپنے عہدے سے استعفیٰ دیدیا۔
عالمی خبر رساں ادارے کے مطابق سری لنکا میں شدید مالی اور سیاسی بحران کے بعد عوامی دباؤ پر وزیر اعظم مہندا راجا پاکسے نے استعفیٰ دے دیا ہے۔ توقع ہے صدر گوتبیا راجا پاکسے پارلیمان میں موجود تمام سیاسی جماعتوں پر مشتمل مشترکہ کابینہ تشکیل دینے کے لیے مدعو کریں گے۔
صدر گوتبیا راجا پاکسے وزیراعظم مہندا راجا پاکسے کے چھوٹے بھائی ہیں اور اسی وجہ سے وہ ملک میں شدید مالی بحران اور پٹرولیم مصنوعات سمیت اشیائے ضرورت کی بے پناہ قلت اور عوامی دباؤ کے باوجود اپنے بھائی سے استعفیٰ نہیں لے رہے تھے۔
سری لنکا کی میڈیا نے دعویٰ کیا ہے وزیراعظم مہندا راجا پاکسے کا استعفیٰ اُس وقت سامنے آیا ہے جب صدر گوتبیا راجا پاکسے نے جمعے کے روز ہونے والے ایک خصوصی اجلاس میں حالات سے مجبور ہو کر وزیراعظم سے ملک میں جاری سیاسی بحران کے خاتمے کے لیے مستعفی ہونے کی درخواست کی تھی۔
صدر گوتبیا راجا پاکسے نے اپنے بھائی اور وزیر اعظم مہندا راجا پاکسے کی سیٹ بچانے کے لیے مظاہروں سے نمٹنے کے لیے ملک میں کرفیو بھی نافذ کیا تھا اور طاقت کا بے دریغ استعمال کیا تھا تاہم مظاہرے تھم نہ سکے تھے۔

فلپائن: (ویب ڈیسک) فلپائن ميں نئے صدر کے لیے سابق آمر کے بیٹے اور موجودہ نائب صدر کے درمیان کانٹے کا مقابلہ جاری ہے جس کے دوران پولنگ اسٹیشن کے باہر ووٹرز کی بڑی تعداد اپنے پسندیدہ امیدوار کو ووٹ دینے کے منتظر ہیں۔
عالمی خبر رساں ادارے کے مطابق فلپائن میں صدارتی الیکشن میں آج ووٹنگ کا عمل جاری ہے، عوام کا جوش و خروش عروج پر ہے اور پولنگ اسٹینشنز کے باہر لمبی لمبی قطاروں میں ووٹرز کی موجودگی اس بات کا پتہ دیتی ہے کہ اس بار ٹرن آؤٹ بہت زیادہ ہوگا۔
صدارتی انتخاب میں ملک کے آنجہانی آمر کے بیٹے فرڈیناڈ مارکوس جونیئر بھی امیدوار ہیں۔ فرڈیناڈ مارکوس جونیئر سینیٹر بھی ہیں اس کے علاوہ ممبر اسمبلی بھی رہے اور بطور گورنز بھی خدمات انجام دیتے رہے اور عوام میں بونگ بونگ کے نام سے شہرت رکھتے ہیں۔
فرڈیناڈ مارکوس جونیئر کی مضبوط ترین مخالف امیدوار موجودہ نائب صدر لینی روبریڈو ہیں جو نا صرف انسانی حقوق کی ايک چيمپئن ہيں بلکہ ایک معروف وکیل بھی ہیں۔ لینی روبریڈو عوام میں کافی مقبول ہیں۔ ان کے علاوہ دیگر 8 اميدوار بھی دوڑ ميں شامل ہيں۔
صدر کے انتخاب کے ساتھ ساتھ 24 رکنی سينيٹ کے نصف ارکان، ايوان نمائندگان کی 300 نشستوں اور ہزاروں سرکاری پوسٹوں کے ليے بھی ووٹنگ جاری ہے۔ 67 ملين فلپائنی شہری اپنا حق رائے دہی استعمال کریں گے۔