اسلام آباد: (ویب ڈیسک) وزیراعظم شہباز شریف نے ورلڈ پریس فریڈم انڈیکس میں پاکستان کی درجہ بندی میں تنزلی پر ردعمل ظاہر کرتے ہوئے عمران خان کو آڑے ہاتھوں لے لیا۔
اپنی ٹویٹ میں وزیراعظم شہباز شریف کا کہنا تھا کہ پاکستان عمران حکومت کے آخری سال پریس فریڈم انڈیکس میں 12 پوائنٹس گر گیا جبکہ پورے دور حکومت میں 18 پوائنٹس گرا۔
وزیراعظم کا کہنا تھا کہ آزادی صحافت کی درجہ بندی میں تنزلی پر نہ صرف عمران خان کو ’’آزادی صحافت کے شکاری‘‘ کا شرمناک خطاب ملا بلکہ ہماری جمہوریت بھی بدنام ہوئی۔ شہباز شریف نے عزم کیا کہ ہم آزادی اظہار رائے اور صحافت کو یقینی بنانے کے لیے پوری طرح پرعزم ہیں۔
عالمی صحافتی تنظیم رپورٹرز ود آؤٹ بارڈرز (آر ایس ایف) کی حال ہی میں جاری ہونے والی رپورٹ کے مطابق ورلڈ پریس فریڈم انڈیکس میں پاکستان 12 درجے تنزلی کے ساتھ اس برس 157ویں نمبر پر چلا گیا ہے۔
اس کے ساتھ، بھارت 8 درجے تنزلی کے ساتھ 150 جب کہ سری لنکا 146، بنگلہ دیش 162 اور میانمار 176 کی درجہ بندی پر ہے۔

اسلام آباد: (ویب ڈیسک) سابق وزیراعظم و چیئرمین تحریک انصاف عمران خان نے کہا ہے کہ اندازہ نہ تھا ادارے شہباز شریف کو وزیراعظم بنانے کی اجازت دیں گے۔
نجی ٹی وی کو دیے گئے خصوصی انٹرویو میں عمران خان نے کہا کہ زرداری اور نواز شریف کامقصد صرف پیسے بنانا ہے، جب بھی ان چوروں اور دو ڈاکو فیملیز کا دور آیا تو پاکستان بہت نیچے چلا گیا، اگر ہم نے ان کو رہنے دیا تو یہ ملک کی بدقسمتی ہوگی۔
سازش کی کامیابی سے متعلق غلط اندازہ لگانے کے سوال کے جواب میں انہوں نے کہا کہ رپورٹس مل رہی تھیں مگر یقین نہیں تھا کہ یہ سازش کامیاب ہوگی، مجھے نہیں پتہ تھا اس معاملے میں مختلف فریق شامل ہوجائیں گے، شہباز شریف پر مقدمات ہیں، میں نہیں سوچ رہا تھا کہ ہمارے انصاف کے ادارے اس طرح کے آدمی کو وزیراعظم بنانے کی اجازت دیں گے، کیونکہ اگر کسی کو ہٹاکر دوسرے شخص کو لانا ہو تو ایسے شخص کو لایا جائے جو بہتری لے کر آئے۔
عمران خان نے کہا کہ اب نیب اور ایف آئی اے ان کے کنٹرول میں ہیں، آتے ہی انہوں نے ایف آئی اے کے سارے لوگ تبدیل کردیے، میں حیران ہوں کہ ہماری عدالتیں یہ تماشا دیکھ رہی ہیں لیکن اس پر کوئی از خود نوٹس نہیں لیا جاتا، نیب نے فرح پر کیس کردیا، مہینہ بھی نہیں گزرا انتقامی کارروائیں شروع ہوگئیں، فرح کا صرف یہ قصور ہے کہ وہ بشریٰ بیگم کے قریب ہے۔
فرح بہانہ اصل نشانہ میں ہوں
چیرمین پی ٹی آئی کا کہنا تھا کہ میرے خلاف یہ کچھ کر نہیں سکتے، آمدن سے زائد اثاثہ جات کا کیس سرکاری عہدے دار پر ہوتا ہے، فرح تو سرکاری عہدے دار ہی نہیں ہے، آپ اس سے یہ سوال کیسے پوچھ سکتے ہیں، وہ 20 سال سے رئیل اسٹیٹ کا کام کررہی ہے، تین سال میں اس کام میں بہت پیسہ کمایا گیا ہے، اس کے خلاف ایف بی آر میں ٹیکس کا کیس ہوسکتا ہے لیکن نیب میں نہیں ہوسکتا، فرح بہانہ اصل نشانہ میں ہوں، بشریٰ کی دوست کے ذریعے ٹارگٹ کیا جارہا ہے، جس کا مقصد صرف کردار کشی ہے، انہوں نے عید کے بعد بھی میری کردار کشی کرنی ہے۔
گرفتاری سے متعلق سوال کے جواب میں انہوں نے کہا کہ چوروں کے خلاف جہاد میں جیل جانا چھوٹی چیز ہے، جان کی قربانی دینے کےلیے تیار ہوں، ان لوگوں کو کبھی تسلیم نہیں کروں گا، جب تک زندہ ہوں ان کے خلاف لڑوں گا، کوئی فکر نہیں مجھ پر آرٹیکل 6 لگائیں، غداری کا مقدمہ یا جو چاہے کریں۔

کراچی: (ویب ڈیسک) وزیر خارجہ بلاول بھٹو زرداری نے آزادی صحافت کے عالمی دن پر دنیا بھر کے صحافیوں کو مبارکباد پیش کی ہے۔ کہتے ہیں میڈیا سے وابستہ کارکنان کے تحفظ کو یقینی بنانے کی ضرورت ہے۔
بلاول بھٹو زرداری نے کہا کہ پاکستان کا آٸین آزادی صحافت اور شہریوں کی درست اطلاع تک رساٸی کے حق کی ضمانت دیتا ہے۔ پیپلز پارٹی نے آزادی تحریر و تقریر پر کبھی بھول کر بھی سمجھوتہ نہیں کیا۔ شہید محترمہ بینظیر بھٹو نے 1988میں میڈیا کے خلاف کالے قوانین کا خاتمہ کیا۔ دنیا بھر میں میڈیا سے منسلک کارکنان کو مشکل حالات کا سامنا ہے۔
ان کا کہنا تھا کہ فیک نیوز اور نفرت انگیز پروپیگنڈہ میں بھی اضافہ ہو رہا ہے۔ دنیا بھر میں میڈیا سے وابستہ کارکنان کے تحفظ کو یقینی بنانے کی ضرورت ہے۔

اسلام آباد: (ویب ڈیسک) کشمیر سمیت ملک کےمختلف علاقوں میں کہیں ہلکی اور کہیں تیز بارش کا سلسلہ جاری ہے۔
اسلام آباد کے مختلف علاقوں میں ہلکی بارش ہوئی جب کہ چترال شہر اور گردونواح میں موسلادھار بارش اور پہاڑوں پر برفباری ہوئی۔
اس کے علاوہ پاراچنار ،لوئر دیر ،بنوں ،ٹانک، جیکب آباد، بہاولنگر، وہاڑی اور کوہلو میں بھی بادل جم کر برسے۔
مظفرآباد سمیت آزاد کشمیر کے مختلف علاقوں میں بھی بارش ہوئی۔
محکمہ موسمیات کے مطابق آج اسلام آباد، بالائی اور وسطی پنجاب،خیبر پختونخوا، شمالی بلوچستان، گلگت بلتستان اور کشمیر میں بارش کا امکان ہے۔

اسلام آباد: (ویب ڈیسک) توہین مذہب کیس میں عدالت نے پولیس کو شیخ راشد شفیق کے موبائل فون سے متعلق رپورٹ آج ہی پیش کرنے کا حکم دے دیا۔
سابق وفاقی وزیرِ داخلہ شیخ رشید احمد کے بھتیجے شیخ راشد شفیق کو 2 روزہ ریمانڈ ختم ہونے پر اٹک کے ڈیوٹی جج کی عدالت میں پیش کیا گیا۔
عدالت نے پولیس پر برہمی کا اظہار کرتے ہوئے استفسار کیا کہ شیخ راشد شفیق کا موبائل فون برآمد کیوں نہیں کیا گیا؟
پولیس کی جانب سے جواب دیا گیا کہ شیخ راشد شفیق کا موبائل فون سعودی عرب میں رہ گیا ہے۔
فاضل ڈیوٹی جج نے پولیس کو آج ہی موبائل فون کی ای ایم آئی نمبر رپورٹ پیش کرنے حکم دے دیا۔
پولیس کی جانب سے عدالت سے شیخ راشد شفیق کا مزید ریمانڈ لینے کی استدعا کی گئی۔
عدالت نے پولیس کو حکم دیتے ہوئے کہا کہ مزید ریمانڈ دینے یا نہ دینے کا فیصلہ بعد میں ہو گا، پہلے مال مقدمہ موبائل فون عدالت میں پیش کریں۔
شیخ راشد شفیق کو آج 2 روزہ جسمانی ریمانڈ مکمل ہونے پر اٹک کی ضلعی عدالت میں پیش کیا گیا۔
واضح رہے کہ چند روز قبل شیخ رشید کے بھتیجے راشد شفیق کو عمرے سے واپسی پر اسلام آباد ایئر پورٹ سے گرفتار کر لیا گیا تھا۔
شیخ راشد شفیق کا اٹک کی ضلعی عدالت نے 2 روزہ جسمانی ریمانڈ منظور کرتے ہوئے انہیں عید کے دوسرے دن دوبارہ پیش کرنے کا حکم دیا تھا۔

اسلام آباد: (ویب ڈیسک) سیاسی مخالفین کیخلاف توہین مذہب کے قانون کا استعمال کرنے پر پی ٹی آئی رہنما شیریں مزاری نے اقوام متحدہ کے خصوصی مندوبین کو خطوط لکھ دیئے۔
خطوط میں کہا گیا ہے کہ پاکستان اقوامِ متحدہ کا ایک ذمہ دار رکن ملک ہے، ریاستی سطح پر عوام کے بنیادی جمہوری حقوق کا اہتمام حکومت کے بنیادی فرائض میں سے ایک ہے، امریکی سازش کے نتیجے میں بےضمیر مقامی میرجعفروں کی حکومت عوامی تائید سے مکمل محروم ہے۔ عوام میں ساکھ اور مقبولیت سے محرومی کے باعث امپورٹڈ حکومت فاشسٹ اقدامات سے اقتدار کا دوام چاہتی ہے۔
خطوط میں مزید کہا گیا کہ سانحہ ماڈل ٹاؤن کا نامزد قاتل ریاستی سطح پر سیاسی مخالفین کیخلاف توہین مذہب کا کارڈ استعمال کررہا ہے،اس شرمناک حرکت کا مقصد ملک کو داخلی انتشار کی جانب دھکیلنا ہے۔

لاہور: (ویب ڈیسک) گورنر پنجاب عمر سرفراز چیمہ عید کے دوسرے روز بھی اہم آئینی مشاورت میں مصروف رہے، مشاورت کے بعد اسلام آباد روانہ ہوگئے ۔
گورنر پنجاب عمر سرفراز چیمہ صوبہ پنجاب میں جاری آئینی اور سیاسی بحران کے پیش نظر عید کی چھٹیوں کے باوجود آئینی ماہرین سے مسلسل مشاورتی اجلاس میں مصروف رہے۔
انہوں نے عید کے دوسرے دن بھی آئینی ماہرین سے طویل مشاورتی ملاقات کی، گورنر پنجاب اہم مشاورتی اجلاس کے بعد اسلام آباد روانہ ہو گئے، اسلام آباد میں بھی وہ مختلف آئینی ماہرین سے مشاورت کریں گے۔