دبئی: (ویب ڈیسک) متحدہ عرب امارات کی ریاست دبئی کے علاقے دیرا میں قائم پام آئی لینڈ پل کے نیچے ایک سوٹ کیس میں بند لاش ملی، جس کی شناخت 32 سالہ فلپائنی خاتون اینالیزا آر ایل نام سے ہوئی ہے۔
خلیج ٹائمز کے مطابق دبئی پولیس کے سی آئی ڈی افسران نے قتل کے بنیادی ملزم کو ہور الانز کے ایک اپارٹمنٹ سے گرفتار کیا، پولیس نے ملزم کی شناخت کو مخفی رکھا اور نام ایم این اے بتایا ہے جبکہ ملزم قتل کا اعتراف بھی کرچکا ہے۔
غیرمصدقہ اطلاعات کے مطابق ملزم کا تعلق پاکستان سے ہے۔ پولیس کی تحقیقات میں بتایا گیا ہے کہ خاتون کے پاس وزٹ ویزا تھا اور وہ ایک ایسے شخص کے ساتھ فلیٹ میں رہتی تھیں جس کے بارے میں گمان ہے کہ وہ اُن کا بوائے فرینڈ ہے۔
ملزم نے قتل کا اعتراف کرتے ہوئے کہا کہ خاتون اپنے وزٹ ویزا کی تجدید کیلئے مزید پیسوں کا مطالبہ کررہی تھیں جس پر اس نے انکار کردیا تھا۔ اینالیزا نے اس سے قبل بھی اپنے وزٹ ویزا کی تجدید کے لیے 600 درہم ادھار لیے تھے۔ تاہم پیسوں کے انکار پر بحث نے طول پکڑ لیا اور ملزم نے کپڑے کے ٹکڑے سے خاتون کا گلا گھونٹ دیا۔
ملزم نے لاش کو ایک سوٹ کیس میں بند کر کے اسے پام آئی لینڈ کے پُل کے نیچے پھینک دیا۔

تیونس سٹی: (ویب ڈیسک) وزارت خارجہ نے کہا ہے کہ صدر کی جانب سے پارلیمنٹ کو تحلیل کرنے پر ترک صدر طیب اردگان کا مذمتی بیان اندرونی معاملات میں دخل اندازی ہے جو ناقابل قبول ہے۔
عالمی میڈیا کے ماطابق اردگان نے تیونسی صدر قیس سعید کے گزشتہ ہفتے پارلیمنٹ کو تحلیل کرنے کے حکم نامے کو جمہوریت مخالف عمل کہا تھا اور اسے تیونس کے عوام کی خودمختاری پر ’کاری ضرب‘ قرار دیا تھا۔
وزارت خارجہ نے اپنے بیان میں کہا کہ ترک صدر کا یہ تبصرہ ملکی معاملات میں ناقابل قبول مداخلت ہے۔
وزارت خارجہ کا مزید کہنا تھا کہ تیونس اپنے دوست ممالک کے ساتھ قریبی تعلقات کا حامی ہے لیکن ملک سے متعلق اپنے فیصلے کی آزادی پر قائم ہے اور اپنی خودمختاری میں کسی دوسرے ملک کی مداخلت کو مسترد کرتا ہے۔
تیونس کے وزیر خارجہ عثمان جیراندی نے ٹویٹر پر کہا کہ انہوں نے اپنے ترک ہم منصب سے بھی ٹیلی فون پر بات کی ترک سفیر کو طلب کر کے اپنے اردگان کے تبصروں کی مذمت کی۔

جنیوا: (ویب ڈیسک) یوکرین کے صدر وولودیمیر زیلنسکی نے اقوام متحدہ کی سلامتی کونسل سے جذباتی خطاب میں کہا کہ اگر روس کے خلاف فوری کارروائی نہیں کرسکتے تو ادارہ ہی تحلیل کردینا چاہیئے۔
عالمی خبر رساں ادارے کے مطابق یوکرین کے صدر وولودیمیر زیلنسکی نے اقوام متحدہ کی سلامتی کونسل سے ویڈیو لنک پر پُرجوش خطاب کیا۔ سلامتی کونسل کے 15 ارکان ہیں جب کہ روس 5 مستقل ارکان میں شامل ہے۔
یوکرین کے دارالحکومت کیف کے قصبے بُوچہ میں روسی افواج کے قتل عام اور اجتماعی قبر سے 450 لاشوں کی برآمدگی کا تذکرہ کرتے ہوئے صدر زیلنسکی آبدیدہ ہوگئے۔ اور مطالبہ کیا کہ اقوام متحدہ روس کے خلاف فوری کارروائی کرے یا پھر ادارہ ہی تحلیل ہوجانا چاہیئے۔
اس موقع پر صدر زیلنسکی نے بوچہ میں قتل عام کی فوٹیجز بھی دکھائیں۔ لاشیں گلیوں اور سڑکوں پر بکھری پڑی ہیں اور ایک اجتماعی قبر سے 450 لاشیں برآمد ہونے کے شواہد بھی دکھائے۔
یوکرینی صدر نے مزید بتایا کہ بچوں کے سامنے ماؤں کے ساتھ جنسی زیادتی کی گئی اور محفوظ مقام پرجانے والے شہریوں کی گاڑیوں کو ٹینک سے کچل دیا گیا، گھروں پر گرنیڈ پھینکے گئے اور شہریوں کا قتل عام کیا گیا۔
صدر زیلنسکی نے روس کی سلامتی کونسل کی رکنیت معطل کرنے کا مطالبہ بھی کیا تاہم سلامتی کونسل کا مستقل رکن ہونے کی وجہ سے ایسا ممکن نہیں اور اسی حیثیت سے روس قراردادیں اور عالمی سطح پر مذاکرات روکنے کا حق بھی رکھتا ہے۔
واضح رہے کہ یوکرین کے قصبے بُوچہ سے روسی فوج کا قبضہ واگزار کرانے کے بعد یوکرینی فوج کو وہاں قتل عام اور انسانی حقوق کی سنگین خلاف ورزیوں کے شواہد ملے تھے۔

ابوجہ: (ویب ڈیسک) نائیجیریا کی عدالت نے توہین مذہب کے الزام ایک شخص کو 24 قید کی سزا سنائی ہے۔
عالمی خبر رساں ادارے کے مطابق نائیجیریا میں ہیومنسٹ ایسوسی ایشن نامی تنظیم کے سربراہ مبارک بالا کو سوشل میڈیا پر اسلام مخالف اور توہین آمیز پوسٹیں کرنے کے الزام میں مقامی عدالت نے 24 سال قید کی سزا سنائی ہے۔
مبارک بالا کو توہین آمیز پوسٹیں کرنے پر 2020 کو گرفتار کیا گیا تھا اور اُس نے دوران تفتیش اپنے خلاف 18 الزامات کا اعتراف بھی کیا تھا۔ شواہد اور اعترافی بیان کی روشنی میں عدالت نے 24 سال قید کی سزا سنائی۔
توہین اسلام کا مرتکب شخص پہلے مسلمان تھا تاہم بعد میں مذہب کو ترک کردیا تھا اور اپنی تنظیم بھی بنائی تھی۔ ہیومنسٹ ایسوسی ایشن کے عہدیداروں کا کہنا ہے کہ مبارک بالا سے اعترافی بیان تشدد کے ذریعے حاصل کیا گیا ہے۔
سزا کے خلاف نائیجیریا کی انسانی حقوق کی تنظیموں نے احتجاج بھی کیا۔