کراچی: (ویب ڈیسک) پاکستان اسٹاک ایکسچینج میں کاروبار کا منفی دن رہا اور 100 انڈیکس 126 پوائنٹس کم ہوکر 40150 پر بند ہوا۔
کاروباری دن میں 100 انڈیکس 394 پوائنٹس کے بینڈ میں رہا، 100 انڈیکس کی کم ترین سطح 40027 رہی۔
مارکیٹ میں آج 17 کروڑ شیئرز کے سودے 6.30 ارب روپے میں طے ہوئے، مارکیٹ کیپٹلائزیشن 17 ارب روپے کم ہو کر 6771 ارب روپے ہے۔
راولپنڈی: (ویب ڈیسک) آرمی چیف جنرل قمر جاوید باجوہ سے چین کے سفیر نونگ رونگ نے ملاقات کی ہے۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے امور اور دفاعی تعاون پر تبادلہ خیال کیا گیا جبکہ ملاقات میں خطے میں سکیورٹی کی صورتحال اور سی پیک پربھی گفتگو کی گئی۔
اس موقع پر آرمی چیف کا کہنا تھاکہ پاکستان عالمی اورعلاقائی معاملات میں چین کے کردار کو قدر کی نگاہ سے دیکھتا ہے اور ہم اپنی اسٹریٹیجک شراکت داری کو چین کے ساتھ بڑھانے کے خواہاں ہیں۔
انہوں نے کہا کہ پاکستان خطے میں امن واستحکام کیلئے بین الاقوامی شراکت داروں کے ساتھ تعاون کیلئے پرعزم ہے۔
آئی ایس پی آر کے مطابق چینی سفیرنے پاکستان میں مختلف منصوبوں پرکام کرنے والے چینی اہلکاروں کے تحفظ پر آرمی چیف کا شکریہ ادا کیا اور پاکستان کے ساتھ ہر سطح پرسفارتی تعاون میں مزید بہتری کیلئے اپنا کردار ادا کرنے کی یقین دہانی کرائی۔
اسلام آباد: (ویب ڈیسک) وزیر مملکت برائے پٹرولیم ڈاکٹر مصدق ملک نے کہا ہے کہ برطانوی جریدے نے عمران خان کی منی لانڈرنگ کا انکشاف کیا، تحریک انصاف کو فنڈنگ کے نام پر کالا دھن فراہم کیا گیا، آئین کے مطابق کوئی پارٹی غیر ملکی فنڈ حاصل نہیں کرسکتی، چیئرمین پی ٹی آئی کو صرف سیاستدانوں سے بات کرنے میں مسئلہ ہے۔
اسلام آباد میں نیوز کانفرنس کرتے ہوئے مصدق ملک نے کہا کہ عمران خان نے کہا کہ دہشت گردوں سے بات کرسکتا ہوں سیاست دانوں سے نہیں کروں گا، عمران خان ہمارے بچوں کو بموں سے اڑانے والوں سے بات کرنے کے لیے تیار ہیں، سابق وزیراعظم نے کہا وہ علیحدگی پسندوں سے بھی بات کرنے کے لیے تیار ہیں۔
انہوں نے مزید کہا کہ برطانوی جریدے نے عمران خان کی منی لانڈرنگ کا انکشاف کیا، جریدنے نے انکشاف کیا کہ کالادھن فنڈنگ کے نام پر پی ٹی آئی کو فراہم کیا گیا، ابراج کمپنی کے عارف نقوی عمران خان کے فنڈ منیجر تھے، آئین کے مطابق کوئی سیاسی جماعت بیرونی کمپنی یا غیر ملکیوں سے فنڈ نہیں لے سکتی، اگر پاکستان میں سیاست کرنی ہے تو غیر ملکی کمپنی سے پیسے نہیں لے سکتے، عارف نقوی جعل سازی اور کالا دھن کے کیسز میں پکڑا گیا۔
تاشقند: (ویب ڈیسک) روس کی جانب سے تائیوان معاملے پر چین کی “ون چائنا پالیسی” کے حمایت کا اعادہ کیا گیا ہے۔
خبرایجنسی کےمطابق روسی وزیرخارجہ سرگئی لاروف کا کہنا ہے کہ چین کی ون چائنا پالیسی پر روسی موقف میں کوئی تبدیلی نہیں آئی ہے، ہم چین کی ون چائنا پالیسی کی حمایت کرتے ہیں۔
تاشقند میں میڈیا سے بات کرتے ہوئے انہوں نے کہا کہ ہمیں چین کی خودمختاری کے اصول برقرار رکھنے میں کوئی مسئلہ نہیں ہے۔
روسی وزیر خارجہ کی جانب سے یہ بیان چینی صدر کے امریکی صدر کو تائیوان معاملے میں مداخلت کے حوالے سے خبردار کرنے کے بعد آیا ہے۔
خیال رہے کہ چین تائیوان کو اپنا حصہ تصور کرتا ہے جبکہ تائیوان خود کو ایک علیحدہ ریاست مانتا ہے اور اس معاملے پر دونوں ممالک کے درمیان طویل عرصے سے تنازع چلا آ رہا ہے۔
لاہور: (ویب ڈیسک) پنجاب اسمبلی کے نئے اسپیکر کے انتخاب کے لیے اجلاس جاری ہے۔
پینل آف چیئرمین کے سینیئر ممبر نوابزادہ وسیم خان بادوزئی کی زیر صدارت پنجاب اسمبلی کا اجلاس جاری ہے، جس میں اسپیکر کے انتخابات کا عمل شروع ہو گیا ہے۔
اسپیکر کا انتخاب خفیہ رائے شماری سے ہوگا۔ پی ٹی آئی کی اتحادی حکومت کی جانب سے سبطین خان اور ن لیگ کے اپوزیشن اتحاد کی جانب سے سیف الملوک کھوکھر امیدوار ہیں۔
اسلام آباد : (ویب ڈیسک) وزیر خزانہ مفتاح اسماعیل نے امریکی سفیر ڈونلڈ بلوم کو معاشی ایجنڈا اور حکومتی پالیسی سے آگاہ کرتے ہوئے کہا پاکستان میں امریکی سرمایہ کاری کو بڑھانا حکومتی اولین ترجیح ہے۔
تفصیلات کے مطابق وزیر خزانہ مفتاح اسماعیل سے امریکی سفیر ڈونلڈ بلوم کی ملاقات ہوئی ، اس موقع پر امریکی اکنامک کونسلر ،امریکی سفارتخانے کی ٹریژری اتاشی امریکی سفیرکے ہمراہ تھے۔
ملاقات میں وزیر مملکت برائے خزانہ عائشہ غوث و سینئر حکام بھی شریک ہوئے، وزیر خزانہ نے امریکی سفیر ڈونلڈ بلوم کو سفیر کی ذمہ داری سنبھالنے پرمبارکباد دی۔
وزیر خزانہ نے امریکی سفیر کو معاشی ایجنڈا اور حکومتی پالیسی سےآگاہ کیا۔
وزیر خزانہ نے کہا کہ پاکستان میں امریکی سرمایہ کاری کو بڑھانا حکومتی اولین ترجیح ہے، حکومت غیرملکی سرمایہ کاروں کو دوستانہ بزنس ماحول دینےکیلئےکوشاں ہے۔
امریکی سفیر نے حکومتی پالیسیوں پر اعتماد کا اظہار اور باہمی تعلقات کو سراہتے ہوئے دونوں ملکوں کو معاشی تعلقات،سرمایہ کاری ،تجارت بڑھانے پر زور دیا۔
وزیر خزانہ نے کہا کہ پاکستان اور امریکاکے درمیان تجارت، سرمایہ کا دی کو فروغ دیا جائے گا۔
اسلام آباد: (ویب ڈیسک) کے ٹو چوٹی سر کرنے کی کوشش کے دوران علی سدپارہ اور جوان پابلو کے ہمراہ اپنی جان سے ہاتھ دھو نےوالے آئس لینڈ کے کوہ پیما جان اسنوری کی فیملی نے ریسکیو آپریشن پرپاکستانی فوج ، حکومت اورقوم کا شکریہ ادا کیا ۔
اسلام آباد: کے ٹو چوٹی سر کرنے کی کوشش کے دوران علی سدپارہ اور جوان پابلو کے ہمراہ اپنی جان سے ہاتھ دھو نےوالے آئس لینڈ کے کوہ پیما جان اسنوری کی فیملی نے ریسکیو آپریشن پرپاکستانی فوج ، حکومت اورقوم کا شکریہ ادا کیا ۔
انہوں نے کہا کہ فروری 2021 ءمیں رونما ہونے والے واقعات ہمارے لیے بطور خاندان اور علی سدپارہ اور جوان پابلو کے خاندانوں کے لیےبہت مشکل تھے۔ جان کے کھونے کے بعد سے میں اور بچے جس دکھ کے سفر پر تھے اس کی وضاحت کرنا آسان نہیں ہے۔
نیشنل پریس کلب اسلام آباد میں جان اسنوری کی بہنوں کیرن، کرسٹین ، بیٹی ہللا کیرن کے ہمراہ پریس کانفرنس کرتے ہوئے اہلیہ لینا موٹ کا کہنا تھا کہ جان اسنوری اور پاکستان کے کوہ پیمائی کے ہیرو اور لیجنڈ علی سدپارہ کے درمیان دوستی اتنی مخلص اور مضبوط تھی کہ ہم نے بطور خاندان پاکستان کا دورہ کرنے کا فیصلہ کیا ہے تاکہ ذاتی طور پر ان لوگوں کا شکریہ ادا کریں جنہوں نے پیشہ ورانہ اور ذاتی طور پر ہمارا ساتھ دیا۔
لینا موٹ نے کہا کہ پاکستان کے حصوں کا دورہ کرنا جان اسنوری کو اتنا ہی پیار اتھا جتنا کہ آئس لینڈ میں اپنے خاص مقامات سے۔ ہم نے یہاں اس امید پر سفر کیا کہ جان کو K2 کی چوٹی کی طرف جانے والے راستے سے اس کے دوست اور کوہ پیمائی کے ساتھی علی اور ان کے کوہ پیمائی ساتھی جوآن پابلو کے قریب ایک آرام گاہ پر لے جانے کا موقع ملے گا۔
لینا موٹ نے کہا کہ اس طرح کی کارروائی میں حصہ لینے والوں کی حفاظت ہمیشہ ہمارے لیے انتہائی اہمیت کی حامل رہی ہے۔ تاہم آج ہمیں خبر ملی کہ منگما جی کی قیادت میں چار کوہ پیماؤں کی ایک ٹیم K2 کی چوٹی پر دو گھنٹے گزارنے کے بعد اپنی کوشش میں ناکام رہی ہے۔ ہمارے پاس موجود معلومات کی بنیاد پر پہاڑ پر کچھ نئی برف پڑنے سے برفانی تودے کا خطرہ پیدا ہو گیا ہے۔
لینا موٹ نے بتایا کہ ہم بطور خاندان اس بات کو اجاگر کرنا چاہیں گے کہ جان کو صرف اس انداز میں منتقل کیا جانا چاہیے جو اس میں شامل افراد اور پہاڑ پر دیگر کوہ پیماؤں کے لیے محفوظ ہو۔ کوہ پیماؤں کے طور پر ان کی زندگیاں اور کارنامے منفرد اور ایسے ہیں کہ دونوں قومیں، پاکستان اور آئس لینڈ دونوں ممالک کی کوہ پیما تاریخ کے ذریعے انہیں یاد رکھیں گے۔
لینا موٹ کا کہنا تھا کہ ہم ایک خاندان کے طور پر بہت سے لوگوں کی طرف سے زبردست حمایت اور گرمجوشی کے اظہار کے لیے شکر گزار ہیں۔ ہم حکومت پاکستان، پاک فوج کے سربراہ اور 10 کور کے کمانڈر، پاکستان کے دفتر خارجہ، صوبہ گلگت بلتستان کی مقامی حکومت، خالد خورشید وزیر اعلیٰ، راجہ ناصر وزیر سیاحت کا شکریہ ادا کرنا چاہتے ہیں، مسٹر اصغر، علی سدپارہ کے اہل خانہ اور دوست، پاکستان کے اچھے لوگ، مقامی اور بین الاقوامی میڈیا ان کی مسلسل حمایت کے لیے ہم شکر گزار ہیں۔
انہوں نے مزید کہا کہ ہم اسکردو کے مقامی فوجی کمانڈروں اور پائلٹوں کا بھی شکریہ ادا کرنا چاہتے ہیں جنہوں نے تلاشی مشن کی قیادت کی،پاکستان ہمیشہ میرے دل میں اور ہمارے بچوں کے دلوں میں رہے گا اور اس طرح ہم چند سالوں میں واپس آنے کا ارادہ رکھتے ہیں جب بچے بڑے ہو جائیں گے اور K2 بیس کیمپ تک ایک خاندان کے طور پر ساتھ چلیں گے۔
کراچی: (ویب ڈیسک) عالمی مارکیٹ میں سونے کی قیمت بڑھنے کے باوجود ملکی سطح پر سونے کے نرخ میں 4200 روپے کی کمی واقع ہوئی ہے۔
ڈالر کی اڑان رکنے سے سونے کی مقامی قیمتوں میں بھی کمی واقع ہوئی ہے۔ بین الاقوامی بلین مارکیٹ میں فی اونس سونے کی قیمت 12 ڈالر کے اضافے سے 1762 ڈالر کی سطح پر پہنچنے کے باوجود مقامی صرافہ مارکیٹوں میں جمعہ کو فی تولہ اور دس گرام سونے کی قیمتوں میں بالترتیب 4200 روپے اور 3601 روپے کی کمی واقع ہوئی۔
نتیجے میں ملکی سطح پر فی تولہ سونے کی قیمت گھٹ کر ایک لاکھ 58 ہزار 300 روپے اور فی دس گرام قیمت ایک لاکھ 35 ہزار 717 روپے کی سطح پر آگئی۔
اس کے برعکس فی تولہ چاندی کی قیمت بغیر کسی تبدیلی کے 1630 روپے کی سطح پر مستحکم رہی۔
لاہور: (ویب ڈیسک) قومی کرکٹ ٹیم کے کپتان بابراعظم نے کہا ہے کہ دورہ سری لنکا میں کھلاڑیوں کی کارکردگی کافی اچھی رہی۔
میڈیا سے گفتگو میں انہوں نے کہا کہ سری لنکا کے دورے کے لیے ہماری تیاریاں اچھی تھیں، دورہ سے قبل کیمپ لگایا گیا۔ پریکٹس میچ سے بھی کافی فائدہ ہوا۔
بابر اعظم نے کہا کہ دوسرا میچ گال میں شفٹ ہوا،جہاں کنڈیشنر بھی مشکل تھیں۔ ہماری بڑی پارٹنرشپ نہیں لگ سکی جس کی وجہ سے نقصان ہوا، ٹیسٹ میچ میں صبرو تحمل سے کھیلنا معنی رکھتا ہے۔
انہوں نے کہا کہ محنت کرنے سے ہی اچھے نتائج آتے ہیں۔ بیک ٹو بیک کرکٹ میں مائنڈ سیٹ تبدیل کرنا پڑتا ہے۔ وائٹ بال کرکٹ تھوڑی سے مختلف ہے، کوشش کریں گے اچھا کھیلیں۔
ان کا کہنا تھا کہ دبئی میں بھی ہمارا ریکارڈ اچھا رہا ہے۔
فرینکفرٹ: (ویب ڈیسک) امریکی ریاست کینٹیکی میں مسلسل طوفانی بارشوں کے باعث سیلابی کیفیت پیدا ہوگئی جس کے دوران مختلف واقعات میں 8 افراد ہلاک اور متعدد زخمی ہوگئے۔
عالمی خبر رساں ادارے کے مطابق امریکی ریاست کینٹیکی میں طوفانی ہواؤں کے ساتھ ہونے والی مسلسل بارش کے بعد سیلابی ریلہ رہائشی علاقے میں داخل ہوگیا اور راستے میں آنے والی ہر چیز کو تہس نہس کرکے رکھ دیا۔
اس دوران مختلف واقعات میں 8 افراد ہلاک اور متعدد زخمی ہوگئے جب کہ 3 افراد لاپتہ ہیں۔ متاثرہ علاقوں سے شہریوں کو محفوظ مقام پر منتقل کیا جا رہا ہے۔ عارضی ریلیف کیمپ بھی قائم کیے گئے ہیں۔
کینٹیکی کے گورنر نے ریاست میں ایمرجنسی نافذ کردی ہے۔ اسپتالوں، میونسپل اداروں اور فائر بریگیڈ کو ریڈ الرٹ کردیا گیا ہے۔ سیکڑوں لوگ نقل مکانی پر مجبور ہوگئے ہیں۔ گھر اور کاریں کئی کئی فٹ پانی میں ڈوب گئی ہیں۔
محکمہ موسمیات کے مطابق موسمیاتی تبدیلیوں کے باعث غیر متوقع اور عام طور سے زیادہ بارشیں ہونے کا امکان ہے۔ شہری بلاضروت گھر سے باہر نہ نکلیں۔
