اسلام آباد: (ویب ڈیسک) تحریک عدم سے نمٹنے کیلئے وزیراعظم ایکٹو ہوگئے۔ عمران خان نے سینئر رہنماؤں سے مشاورت کی اور سیاسی صورتحال پر تبادلہ خیال کیا۔
وزیراعظم عمران خان سے گورنر سندھ عمران اسماعیل، وفاقی وزیر اسد عمر، وزیر تعلیم شفقت محمود، علی امین گنڈاپور اور فہمیدہ مرزا نے ملاقاتیں کیں، جس میں سیاسی صورتحال پر بات چیت کی گئی۔
ادھر وزیراعظم سے وزیراعلی پنجاب عثمان بزدار نے بھی ملاقات کی، جس پنجاب کی سیاسی صورتحال کا جائزہ لیا گیا۔ وزیراعلیٰ پنجاب عثمان بزدار نے وزیراعظم عمران خان کو اراکین اسمبلی سے ملاقاتوں پر بریفنگ دی۔

لاہور: (ویب ڈیسک) پاکستان پیپلزپارٹی کے مرکزی رہنما سید خورشید شاہ نے کہا ہے کہ عمران خان ملک کو خانہ جنگی کی طرف لے جانا چاہتے ہیں مگر ہم ان کی یہ کوشش ہرگز کامیاب نہیں ہونے دیں گے ۔
احتساب عدالت کے باہر میڈیا سے گفتگو کرتے ہوئے ان کا کہنا تھا کہ عمران خان ملک کے ناکام ترین وزیر اعظم ہیں جس نے پارلیمنٹ کی عزت اور توقیر تک ختم کردی ہے، اب وہ گھبراہٹ میں گالیاں بھی دے رہےہیں اور مسخروں جیسی حرکتیں بھی کررہےہیں۔ میں بتانا چاہتا ہوں کہ عمران خان کی کوششوں کے باوجود ملک میں مارشل لا نہیں لگے گا ۔
ان کا کہنا تھا کہ ہم خانہ جنگی کی طرف نہیں جارہے ، ہم تو نظر انداز کررہے ہیں مگر عمران خان خانہ جنگی چاہتا ہے۔ عدم اعتماد پر ووٹنگ ہورہی ہے۔ اس سے ایک دن پہلے لوگ اکٹھے کرکے خوف پھیلانے کی وجہ کیا ہے۔ اگر وہ خانہ جنگی کی طرف جارہاہے تو ہم اپنے کارکنوں کو خانہ جنگی روکنے کے لیے بلا رہے ہیں۔
خورشید شاہ کا کہنا تھا کہ اگر تحریک عدم اعتماد پر ووٹنگ نہ ہوئی تو ملک می انارکی پھیلے گی، کوئی اندھیر نگری چوپٹ راج نہیں ، دنیا دیکھ رہی ہے۔ عمران خان تو پارلیمنٹ پر اثر انداز ہونے کی ہر ممکن کوشش کرے گا مگر جب کوئی آئین کی خلاف ورزی کرے گا تو وہ آئین کے آرٹیکل 6 کے زمرے میں آئے گا، چاہے وہ خورشید شاہ ہو یا اسمبلی کا سپیکر ہو۔
پیپلزپارٹی رہنما نے کہا کہ فارن فنڈنگ کیس بھی باہر آئے گا اور لوگوں کو پتہ چلے گا کہ یہ تو چندے کے پیسے بھی کھاگیا ہے، پیپلزپارٹی اور ایم کیو ایم میں اتفاق رائے کے حوالے سے پوچھے گئے سوال کے جواب میں خورشید شاہ نے کہا کہ سیاست میں نہ تو کوئی آخری دوست ہوتا ہے اور نہ ہی آخری دشمن۔ ان کا کہنا تھا کہ ریس کا میدان لگ چکا ہے، وہ بھی گھوڑے پر بیٹھا ہے ہم بھی بیٹھے ہیں اب بعد کی باتیں بعد میں ہونگی۔

اسلام آباد: (ویب ڈیسک) اسلام آباد کی انسداد دہشتگردی عدالت نے پارلیمنٹ حملہ کیس کا محفوظ فیصلہ سنا دیا، صدر مملکت عارف علوی، شاہ محمود، اسد عمر، شفقت محمود، پرویز خٹک سمیت دیگر نامزد ملزمان کو بری کر دیا گیا۔
انسداد دہشت گردی کی عدالت کے جج محمد علی وڑائچ نے پارلیمنٹ حملہ کیس کی سماعت کی۔ وزیر خارجہ شاہ محمود قریشی، وزیر تعلیم شفقت محمود اور پی ٹی آئی رہنما سیف اللہ نیازی عدالت میں پیش ہوئے۔ عدالت نے ملزمان کو حاضری لگا کر جانے کی اجازت دی اور فیصلہ محفوظ کر لیا جو بعد ازاں سنا دیا گیا ۔
واضح رہے کہ وزیراعظم پاکستان عمران خان مذکورہ کیس سے پہلے ہی بری کئے جا چکے ہیں۔

لاہور: (ویب ڈیسک) وزیر داخلہ شیخ رشید نے کہا ہے کہ اپوزیشن کے پاس 172 ووٹ موجود نہیں، ان کی بے وقوفیوں کی وجہ سے عمران خان پہلے سے زیادہ مضبوط ہوئے۔
لاہور میں میڈیا نمائندوں سے گفتگو کرتے ہوئے وفاقی وزیر داخلہ شیخ رشید نے کہا کہ کل صبح تک عمران خان کےحق میں اچھا فیصلہ آئے گا۔ اتحادی عمران خان کے ساتھ ہیں، کہیں نہیں جا رہے۔ چودھری برادران کو مشورہ ہے عمران خان کے ساتھ کھڑے ہوں، وہ 4 سال اس پارٹی کے ساتھ رہے ہیں۔ سارے اتحادی لوٹ کر عمران خان کے پاس واپس آئیں گے۔
انہوں نے کہا کہ 4 ماہ سےفضل الرحمان لانگ مارچ کی بات کررہےہیں، اپوزیشن 23 مارچ کو آئے کسی کو نہیں روکیں گے۔ امپائر پاکستان کے ساتھ کھڑا ہے۔ بلاول سےمیراکبھی بھی جھگڑانہیں رہا۔
شیخ رشید کا مزید کہنا تھا کہ اپوزیشن ملک میں انارکی پھیلانے سے گریز کرے، آخری گزارش ہے ملک کو انتشارکی طرف نہ جانے دیں، عدم اعتماد کے بجائے کچھ اور بھی نکل سکتا ہے۔

لاہور: (ویب ڈیسک) وزیراعلیٰ عثمان بزدار نے کہا ہے کہ یوم پاکستان پر لانگ مارچ کا اعلان قومی یکجہتی کو نقصان پہنچانے کے مترادف ہے، پی ڈی ایم کو قومی مفادات کا رتی بھر بھی احساس نہیں۔
وزیراعلیٰ پنجاب عثمان بزدارسے صوبائی وزراء میاں اسلم اقبال، ہاشم جواں بخت اور حامد یار ہراج نے ملاقات کی۔ اس موقع پر عثمان بزدار کا کہنا تھا کہ یہ لوگ اپنی سیاسی دکانداری چمکانے کیلئے قومی مفادات کو داؤ پر لگا رہے ہیں، پی ڈی ایم نے سیاسی ناپختگی اور غیر ذمہ داری کا ثبوت دیا، موجودہ حالات میں منفی سیاست کی ذرا سی بھی گنجائش نہیں۔
عثمان بزدار کا کہنا تھا کہ اپوزیشن کی سیاست کسی اصول یا نظریے کی بنیاد پر نہیں، اپوزیشن کے ہر ہتھکنڈے کا ڈٹ کر مقابلہ کریں گے، قوم وزیراعظم عمران خان کے سا تھ ہے اور ساتھ رہے گی، تحریک انصاف متحد ہے اور حکومت مدت پوری کرے گی۔

اسلام آباد: (ویب ڈیسک) وزیر خارجہ شاہ محمود قریشی اور انڈونیشیائی وزیرخارجہ کے درمیان ٹیلی فون پر رابطہ ہوا، جس میں باہمی دلچسپی کے وسیع موضوعات پر تبادلہ خیال کیا گیا۔
دونوں وزرائے خارجہ نے سیاسی، تجارتی اور اقتصادی معاملات کے ساتھ ساتھ اقوام متحدہ، آسیان، او آئی سی اور دیگر کثیر الجہتی فورمز پر تعاون کو مزید مضبوط بنانے پر اتفاق کیا ہے۔ انڈونیشیا کی وزیر خارجہ نے مخدوم شاہ محمود قریشی کو انڈونیشیا کے دورے کی دعوت دی۔ جو وزیرخارجہ نے قبول کرلی۔