اسلام آباد: (ویب ڈیسک) پیپلز پارٹی نےتحریک طالبان افغانستان اور کالعدم تحریک طالبان پاکستان سے مذاکرات میں پیش رفت کا معاملہ پارلیمان میں اٹھانے کے لیے کمیٹی قائم کردی۔
تحریک طالبان افغانستان اور کالعدم تحریک طالبان پاکستان سے مذاکرات میں حالیہ پیشرفت کے معاملے پرپاکستان پیپلزپارٹی کے چیئرمین اوروزیرخارجہ بلاول بھٹو زرداری نے سیاسی جماعتوں سے رابطوں اور پارلیمان میں معاملے کو اٹھانے کے لئے تین رکنی کمیٹی بنادی۔
تین رکنی کمیٹی میں شیری رحمان، فرحت اللہ بابر اور قمر زمان کائرہ شامل ہیں۔گزشتہ روز زرداری ہاؤس میں ہونے والے اجلاس میں تحریک طالبان افغانستان اور کالعدم تحریک طالبان پاکستان سے متعلق حالیہ پیشرفت کے معاملے پر تبادلہ خیال ہوا۔
گزشتہ روز زرداری ہاؤس میں ہونے والے اعلی سطح کے اجلاس میں پارلیمان کو وہ پہلا اور واحد فورم قرار دینے کے اپنے عزم کا اعادہ کیا گیا جہاں ایسے موضوعات پر بحث کی جاسکتی ہے۔

اسلام آباد: (ویب ڈیسک) چیئرمین پاکستان تحریک انصاف (پی ٹی آئی) عمران خان نے کہا ہے کہ موجودہ حکومت نے قبائل کے ترقیاتی فنڈز میں کمی کر دی ہے۔
سابق وزیر اعظم اور پی ٹی آئی کے چیئرمین عمران خان نے کہا ہے کہ قبائل کی خصوصی ضروریات کے پیش نظر ہماری حکومت نے قبائل کی فنڈنگ 3 گنا کر کے 131 ارب روپے کر دی تھی۔
انہوں نے کہا کہ موجودہ حکومت نے قبائل کے لیے صرف 110 ارب روپے کا بجٹ رکھا ہے اور قبائل کے ترقیاتی فنڈز میں کمی کر دی ہے۔
عمران خان نے کہا کہ موجودہ حکومت نے آئی ڈی پیز کے لیے کوئی فنڈنگ نہیں رکھی۔ اس سے مجرموں کی سرکاری نااہلی اور بدنیتی عیاں ہے۔

لاہور : (ویب ڈیسک) اسپیکر پنجاب اسمبلی پرویز الہیٰ کا کہنا ہے کہ مسلم لیگ ن کے پاس اکثریت تو ہے نہیں بجٹ کیسے پیش کریں گے۔
اسپیکر پنجاب اسمبلی چودھری پرویز الہی نے لاہور میں میڈیا سے گفتگو میں کہا ہے کہ کل کے بجٹ اجلاس ہونے یا نہ ہونے کا انحصار مسلم لیگ نون کے رویے پر ہے۔کل کے اجلاس میں گڑبر کا معاملہ سوالیہ نشان ہے۔
ان کا کہنا ہے کہ ن لیگ کے پاس اکثریت نہیں، انہوں نے بجٹ کیا پیش کرنا ہے۔اسمبلی کے جن لوگوں نے بجٹ انتظام چلانا ہے اگر انہیں کو اٹھا لیں تو کیسے کام چلے گا
انہوں نے کہا ہے کہ صوبے کو حمزہ شہباز نہیں،پولیس چلا رہی ہے۔پنجاب کو پولیس ریاست بنا دیا گیا ہے۔حمزہ کے اسپیکرشپ بچانے کے الزام پر خواجہ آصف کا فقرہ کافی ہے۔”کوئی شرم ہوتی ہے کوئی حیا ہوتی ہے”۔
ان کا کہنا ہے کہ چوہدری شجاعت حیسن سے کوئی مسئلہ نہیں سب ٹھیک ہوجائے گا۔حکومت والے اپنی اوقات میں رہیں اور اپنے گریبان میں جھانکیں۔

راولپنڈی: (ویب ڈیسک) سابق وزیر داخلہ اور عوامی مسلم لیگ کے سربراہ شیخ رشید احمد نے کہا ہے کہ امپورٹڈ حکومت مہنگائی کرنے کے باوجود آئی ایم ایف کو خوش نہیں کرسکی۔
سابق وزیر داخلہ شیخ رشید احمد نے سماجی رابطے کی ویب سائٹ ٹوئٹر پر لکھا کہ شہباز شریف کی امپورٹڈ حکومت ملک میں مہنگائی کا سیلاب لانے کے باوجود عالمی مالیاتی ادارے (آئی ایم ایف) کو خوش نہیں کرسکی اور یہ لوگ ملکی معیشت کو تباہ کرنے آئے ہیں۔
انہوں نے کہا کہ موجودہ حکومت کی 10 گھنٹے کی لوڈشیڈنگ سے لوگ مر رہے ہیں۔
شیخ رشید احمد نے کہا کہ مہنگائی کے خلاف جماعت اسلامی اور عوامی تحریک کے احتجاج کی میں حمایت کرتا ہوں اور منگل کو میں الیکشن کمیشن بھی جاؤں گا۔
انہوں نے کہا کہ غیر ملکی ترسیلات اور زرمبادلہ میں کمی موجودہ حکومت کا ہی دیا ہوا ہے۔
گزشتہ روز شیخ رشید احمد نے حکومت پر تنقید کرتے ہوئے کہا تھا کہ بجٹ سے پہلے ہی پیٹرول، گیس، بجلی اور گھی کی قیمتوں میں اضافہ ہو گیا ہے اور اب تاریخی خسارے کے ساتھ کھاد اور قدرتی گیس پر بھی پیسے بڑھا دیئے گئے ہیں۔

راولپنڈی: (ویب ڈیسک) پاکستان اور چین کی اعلی فوجی قیادت کی ملاقات ہوئی ہے۔ آئی ایس پی آر کے مطابق پاکستان کے اعلی سطح کے ٹرائی سروس ملٹری وفد نے چین کا دورہ کیا ۔ ملٹری وفد کا دورہ 9سے 12جون کے درمیان ہوا۔
وفد کی چینی فوج اور دیگر سرکاری اداروں کے حکام سے بات چیت ہوئی ۔ دونوں ممالک کے فوجی وفود کے مابین اپیکس اجلاس بھی ہوا۔ پاکستانی وفد کی قیادت آرمی چیف جنرل قمر جاوید باجوہ نے کی۔
فوجی قیادت نے بین الاقوامی اور علاقائی سلامتی کی صورتحال پر تبادلہ خیال کیا۔ پاکستان اور چین نے مشکل وقت میں اپنی تزویراتی شراکت داری کا اعادہ کیا ۔ دونوں ممالک کی فوجی قیادت نے تربیت، ٹیکنالوجی اور انسداد دہشت گردی تعاون کو بڑھانے کے عزم کا اظہار کیا۔
آرمی چیف جنرل قمر جاوید باجوہ نے چین کا ایک روزہ دورہ کیا۔ ۔یہ دورہ پاک چین جوائنٹ ملٹری کوآپریشن کمیٹی کا حصہ ہے۔آرمی چیف واحد فوجی رہنما ہیں جنہوں نے چینی صدر کی دعوت پر چین کا دورہ کیا۔
پاک چین سٹریٹجک پارٹنرشپ پہاڑوں سے اونچی اور شہد سے میٹھی ہے۔ پاکستان اور چین کے مابین ملٹری ڈپلومیسی اور ملٹری ٹو ملٹری تعاون ہمیشہ بلندیوں کو چھوتا رہا ہے۔