کراچی: (ویب ڈیسک) بہاؤالدین زکریا ایکسپریس میں خاتون سے مبینہ زیادتی کے مقدمے کی سماعت کے دوران تفتیشی افسر نے عدالت کے روبرو انکشاف کیا کہ ملزمان نے متاثرہ خاتون کے ساتھ گینگ ریپ کی ویڈیو بھی بنائی تھی۔
کراچی سٹی کورٹ میں جوڈیشل مجسٹریٹ کی عدالت کے روبرو ملتان سے کراچی آنے والی بہاؤ الدین زکریا ایکسپریس میں خاتون سے مبینہ زیادتی کے مقدمے کی سماعت ہوئی۔ جوڈیشل مجسٹریٹ جنوبی نے ملتان سے کراچی آنے والے بہاؤ الدین زکریا ایکسپریس میں خاتون سے مبینہ زیادتی کے مقدمے میں ملزمان کے ریمانڈ میں توسیع کردی۔
تفتیشی افسر نے عدالت کے روبرو انکشاف کیا کہ ملزمان نے متاثرہ خاتون کے ساتھ گینگ ریپ کی ویڈیو بھی بنائی تھی۔ تفتیشی افسر نے بتایا کہ ملزمان کے موبائل فون اور ویڈیو برآمد کرنی ہیں۔ ملزمان کی یونیفارم بھی برآمد کرنے ہیں۔ استدعا ہے کہ ملزمان کے ریمانڈ میں توسیع کی جائے جس پر عدالت نے گرفتار 5 ملزمان کے جسمانی ریمانڈ میں 2 دن کی توسیع کردی۔
گرفتار ملزمان میں محمد زاہد، عاقب منیر، ذوہیب، عامر رضا اور عبد الحفیظ شامل ہیں۔ پولیس کے مطابق ملزمان نے 28 مئی کو ملتان سے کراچی واپس خاتون سے اجتماعی زیادتی کی تھی۔ ملزمان کیخلاف سٹی ریلوے تھانے میں مقدمہ درج ہے۔ متاثرہ خاتون عدالت میں 2 ملزمان کو شناخت بھی کرچکی ہے۔

کراچی: (ویب ڈیسک) پیپلزپارٹی کے اعلی سطح کے اجلاس میں اتفاق رائے کے لئے تمام سیاسی جماعتوں کے پاس جانے کا فیصلہ کیا گیا ہے۔ اجلاس میں اتفاق کیا گیا کہ تمام فیصلے پارلیمان میں اور پارلیمان کو اعتماد میں لے کر ہونے چاہئے
سابق صدر آصف علی زرداری اور بلاول بھٹو کی سربراہی میں پی پی پی کا اعلی سطح کا ہائبرڈ اجلاس ہوا جس میں دہشت گردی بالخصوص کابل میں تحریک طالبان افغانستان اور کالعدم تحریک طالبان پاکستان (ٹی ٹی پی) سے متعلق حالیہ پیش رفت سے متعلق تبادلہ خیال کیا گیا۔
اجلاس میں اتفاق کیا گیا کہ تمام فیصلے پارلیمان میں اور پارلیمان کو اعتماد میں لے کر ہونے چاہئیں۔ پیپلزپارٹی کے اعلی سطح کے اجلاس میں اتفاق رائے کے لئے تمام سیاسی جماعتوں کے پاس جانے کا فیصلہ بھی کیا۔
بلاول بھٹو نے قرنطینیہ میں ہونے کی وجہ سے کورکمیٹی اجلاس میں بذریعہ ویڈیو لنک شرکت کی جبکہ فریال تالپور اور وزیراعلی سندھ سید مراد علی شاہ نے بھی کورکمیٹی اجلاس میں بذریعہ ویڈیو لنک شرکت کی۔
اجلاس میں سید یوسف رضا گیلانی، راجہ پرویز اشرف، شیری رحمان، فرحت اللہ بابر، خورشید شاہ اور فیصل کریم کنڈی، شریک ہوئے۔

اسلام آباد: (ویب ڈیسک) چیئرمین پی ٹی آئی اور سابق وزیراعظم عمران خان اسلام آباد ہائیکورٹ بار ایسوسی ایشن سے 16 جون کو خطاب کریں گے۔
سابق وزیراعظم 16 جون کو اسلام آباد ہائیکورٹ بار ایسوسی ایشن سے خطاب کریں گے۔ ہائیکورٹ بار ایسوسی ایشن نے عمران خان کو خط کے ذریعے بار سے خطاب کی دعوت دی تھی۔ اسلام آباد ہائیکورٹ بار ایسوسی ایشن نے وکلاء کو شرکت کی دعوت کیلئے نوٹس جاری کر دیا ہے۔
نوٹس میں کہا گیا ہے کہ16 جون دوپہر 11 بجے عمران خان بار سے خطاب کرینگے، وکلاء کو شرکت کی دعوت دی جاتی ہے۔
اسلام آباد ہائیکورٹ میں نائب صدر مسلم لیگ نون مریم نواز کی اپیل پر سماعت بھی 16 جون کو ہو گی۔ مریم نواز ایون فیلڈ ریفرنس میں سزا کے خلاف اپیل میں اسلام آباد ہائیکورٹ کے سامنے پیش ہونگی۔

اسلام آباد: (ویب ڈیسک) پاکستان تحریک انصاف (پی ٹی آئی) کے رہنما اور سابق وفاقی وزیر عمر ایوب نے کہا ہے کہ ہماری حکومت بجلی کی قیمت 16 روپے چھوڑ کر گئی، اگلے ماہ کے اندر بجلی فی یونٹ 40 روپے تک ہو جائے گی، پٹرول کی قیمت 300 سے 310 روپے تک فی لٹرتک جائے گی، اوگرا کے مطابق غریب صارفین کے بلوں میں 400 فیصد اضافہ ہونے جارہا ہے۔ جس کا بل 1350روپے ماہانہ اس کا بل 3400 روپے ہوجائے گا۔
پی ٹی آئی رہنما عمر ایوب اور وزارت خزانہ کے سابق ترجمان مزمل اسلم کے ہمراہ میڈیا سے گفتگو کرتے ہوئے سابق وفاقی وزیر خزانہ نے کہا کہ ایگری کلچرمیں چاراعشاریہ چارگروتھ ہوئی، یہ کس کوبیوقوف بنارہے ہیں اکنامک سروے پڑھ لیں، بجٹ خسارہ2 ۔4 ہزار ارب روپے ہے، نمبرکبھی جھوٹ نہیں بولتے، ان کا منہ چڑھائیں گے، ہماری گروتھ 6 فیصد اور یہ 5 فیصد گروتھ کی بات کررہے ہیں۔ ہم نے سب سے زیادہ 5۔5 ملین افراد کو روزگاردیا، ہم نے تاریخ کا سب سے زیادہ ریونیواکٹھا کیا، حکومت سے کہتا ہوں کس کو بیوقوف بنارہے ہیں۔ بینکوں کے ٹیکس ریٹ انہوں نے بڑھا دیئے ہیں، مہنگائی اس وقت 4۔13 فیصد پر ہے، مفتاح اسماعیل کل سے بجلی، گیس کی قیمتیں بڑھانے کا عندیہ دے چکے ہیں، مہنگائی 25 سے 30 فیصد تک جائے گی۔ یہ 750ارب کی پٹرولیم لیوی لگائیں گے، پٹرولیم لیوی لگنے سے مہنگائی کا ایک اورطوفان آئے گا۔اس بجٹ سے دوکروڑ لوگ غربت کی لکیر سے نیچے چلے جائیں گے، انھوں نے ہمارے سارے پروگرام بند کردئیے ہیں، مزدور کی کم ازکم اجرت کا کہیں ذکر نہیں ہے، ان کا مقصد معیشت ٹھیک کرنا نہیں اپنی چیزیں بہتر کرنی تھی۔
انہوں نے کہا کہ مفتاح اسماعیل نے کنفیوز بجٹ پیش کیا، ہم نے 30 سال میں سب سے زیادہ گروتھ دکھائی ہے، کمزور اکانومی کی بات کرنا کس کو بیوقوف بنانے کی کوشش ہے، کم ازکم اکانومی پر تو سنجیدہ ہوجاؤ، جتنا قرضہ بڑھا اس حساب سے معیشت بھی بڑھی ہے، 4.2 ٹریلین بجٹ خسارہ ہے، ترسیلات زر اورایکسپورٹس ریکارڈ سطح پر رہیں، ان کی زرعی گروتھ ہم سے کم رہے گی، زرعی شعبے کی ترقی 3.9 فیصد تک نہیں جائے گی، یہ انڈسٹری کی مراعات واپس لے رہے اس سے فیکٹریاں بند ہوں گی، ان کے گروتھ کے فگرز مشکوک ہیں، حکومت پٹرول کی قیمتیں مزید بڑھائے گی۔
حکومت پر تنقید کرتے ہوئے شوکت ترین نے کہا کہ میرے گھرمیں گھس کرانہوں نے مجھے نکالا ہے، اب میں ان کو گھر کے باہر بیٹھ کر بتاؤں گا کہ گھر کو کیسے چلائیں گے، اب گھر کو چلاؤ، ہم تونالائق تھے ہمیں تو نکال دیا۔ انہوں نے الیکشن کے سال میں 800 ارب سرپلس کی بات کی، ان کو 800 ارب روپے کون دے گا، فوری طورپرالیکشن کال کرکے نگران حکومت کولانا چاہیے، اسمبلی کو تو اس صورتحال میں پیک اپ ہونا چاہیے، الیکشن کرانے چاہئیں، ایسی حکومت آنی چاہیے جس کے پاس فیصلے کرنے کا مینڈیٹ ہو۔
ان کا کہنا تھا کہ حکومت نے ہرچیزکی قیمت بڑھا کرعام آدمی کوپیس دیا، عوام کے بوجھ سے اسمبلی والوں کا کوئی تعلق نہیں، اس اسمبلی کو تو پیک اپ کر کے نئے الیکشن کی طرف جانا چاہیے، اکنامک مسئلہ گھمبیر ہے، حکومت کے گروتھ فگرزمشکوک ہیں، ہماری کیپسٹی ادائیگی 850 ارب روپے تھی، یہ سیلزٹیکس اور پٹرولیم لیوی بڑھائیں گے، ان کو پتا ہے دو ماہ بعد انہیں عوام پتھر مار کر باہر پھینک دے گی
اس موقع پر سابق وفاقی وزیر توانائی عمر ایوب نے کہا کہ ہماری حکومت بجلی کی قیمت 16 روپے چھوڑ کر گئی، اگلے ماہ کے اندربجلی فی یونٹ 40 روپے تک ہو جائے گی، جب بجلی 40روپے فی یونٹ ہوگی تو گھریلو صارفین کا کیا حال ہوگا، جب بجلی مہنگی ہو گی تو لوگ انہیں پتھر نہیں ماریں گے تو اور کیا کریں گے، لگتا ہے امپورٹڈ حکومت نے دو ماہ میں خود کشی کر لینی ہے، پٹرول کی قیمت 300سے310روپے تک فی لٹرتک جائے گی، اشیا کی قیمتیں آسمان سے باتیں کررہی ہیں، امپورٹڈ حکومت کوبین الاقوامی سازش کے تحت لایا گیا، ترین کے دورمیں معیشت صیح سمت میں جارہی تھی جسے خراب کردیا گیا۔ اوگرا کے مطابق غریب صارفین کے بلوں میں 400 فیصد اضافہ ہونے جارہا ہے۔ جس کا بل 1350روپے ماہانہ اس کا بل 3400 روپے ہوجائے گا،گرمیوں میں بھی گیس نہیں ہے، بجلی، گیس نہیں انڈسٹری بند ہونے جا رہی ہے۔ امپورٹڈ حکومت نے فاٹا کے بجٹ میں بھی کٹوتی کردی ہے۔
اس موقع پر مزمل اسلم نے پریس کانفرنس کرتے ہوئے کہا کہ اس حکومت نے معیشت کے غلط اعداد و شمار دیئے، ٹیکس کا 57 فیصد سود کی ادائیگی کی مد میں جائے گا، ٹیکس کا ہدف یہ پورا نہیں کر سکیں گے۔ 5 تو دور کی بات یہ ڑھائی فیصد گروتھ تک نہیں جائیں گی، مہنگائی 35 فیصد تک جائے گی، یہ آئی ایم ایف پروگرام مکمل نہیں کرسکیں گے، یہ آئی ایم ایف پروگرام مکمل نہیں کر سکیں گے، انھوں نے ہمارے سارے پروگرام بند کردئیے ہیں۔ ایک ہزار ارب صرف ایک سال میں سود کی ادائیگی بڑھ جائے گی، ہماری ترسیلات بھی کم ہوگئیں ہیں، اس سال کا خسارہ 7 ہزار ارب سے بڑھ جائے گا، اب 35 فیصد سے زائد مہنگائی کی شرح میں اضافہ ہوگا۔ انہوں نے بجٹ سے پہلے پیٹرول کی قیمت بڑھا کر منی بجٹ دے دیا تھا۔

اسلام آباد: (ویب ڈیسک) وزیراعظم شہباز شریف نے افغان شہریوں کو درپیش مسائل اور غیر قانونی امیگریشن کی خامیوں کا نوٹس لیتے ہوئے پاکستان کے راستے بیرون ملک جانے والے افغان شہریوں کے لیے نئی ویزا پالیسی کی منظوری دے دی ہے۔
وزیراعظم کے اسٹریٹجک ریفارمز انیشی ایٹوز کے سربراہ سلمان صوفی نے کہا کہ نئی پالیسی کے تحت حکومت پاکستان کی جانب سے افغان شہریوں کو 24 گھنٹے کے اندر 30 دن کا ٹرانزٹ ویزا جاری کیا جائے گا،وہ ممالک جہاں افغان شہریوں کو امیگریشن مل چکی ہے وہ ان شہریوں کیلئے پاکستان کا راہداری ویزا حاصل کرنے کے لئے درخواست دیں گے۔

لاہور: (ویب ڈیسک) امیر جمعیت علمائے اسلام (ف) کے سربراہ مولانا فضل الرحمان نے پاکستان مسلم لیگ ق کے سربراہ چودھری شجاعت حسین سے ملاقات کی اور ملک کی سلامتی اور ترقی کے لیے مل کر آگے بڑھنے پر اتفاق کیا ہے۔
تفصیلات کے مطابق دونوں رہنماؤں نے ملاقات میں ملکی سیاسی صورت حال پر مشاورت کے علاوہ نئی حکومت کی جانب سے پیش کیے گئے بجٹ 2022-23 پر بھی گفتگو کی۔ اس موقع پر جے یو آئی کے مرکزی سیکرٹری جنرل سینیٹر مولانا عبدالغفور حیدری بھی موجود تھے۔
فضل الرحمن اور چودھری شجاعت نے کہا کہ قومی حکومت عوام کو درپیش مسائل حل کرنے کے لیے تمام وسائل کو بروئے کار لائے گی۔ اس سلسلے میں آئندہ بھی مشاورت کا عمل جاری رکھا جائے گا۔
دونوں رہنماؤں نے اتفاق کیا کہ موجودہ حالات میں تمام اختلافات کو بالائے طاق رکھتے ہوئے مل کر قوم کو معاشی بحران سے نکالنا ترجیح ہے۔
انہوں نے کہا کہ سابق حکمرانوں نے جاتے جاتے ملک کو معاشی بحران میں دھکیل دیا، جسے ختم کرنے کے لیے مشترکہ جدوجہد ضروری ہے۔