آزاد کشمیر: (ویب ڈیسک) سماہنی کے جنگلات میں گزشتہ روز لگنے والی آگ پر تاحال مکمل طور پر قابو نہ پایا جاسکا جب کہ آگ پر قابو پانےکی کوشش کے دوران 7 اہلکار جھلس کر زخمی ہوگئے۔
محکمہ جنگلات کے حکام کا کہنا ہے کہ وادی سماہنی کے باغسر سدھیڑی بلاک کے میں لگنے والی آگ پر تاحال مکمل طور پر قابو نہیں پایا جاسکا ہے۔آگ پرقابو پانے کی کوشش کے دوران زخمی ہونے والے تین اہلکاروں کو فوری طبی امداد کے بعد گھر بھیج دیا گیا تاہم 4 شدید زخمیوں کو سی ایم ایچ کھاریاں منتقل کیا گیا ہے ۔
حکام کا کہنا ہے کہ جنگل کے بیشتر حصے پر لگی آگ پر قابو پالیا گیا تھا تاہم آندھی کے باعث آگ دوبارہ بھڑک اٹھی۔

قصور : (ویب ڈیسک) قصور کے علاقے منڈی عثمان والا میں 14 سالہ لڑکی کو مبینہ زیادتی کا نشانہ بنا دیا گیا۔
پولیس کے مطابق ملزم انتظار نے 14 سالہ لڑکی کو گھر میں گھس کر مبینہ طور پر زیادتی کا نشانہ بنایا، مقدمہ درج کر کے جیو فینسنگ کی مدد سے ملزم کو 7 گھنٹے کے اندر اندر گرفتار کر لیا گیا۔
پولیس کا کہنا ہے کہ متاثرہ لڑکی کو طبی معائنے کے لیے ڈی ایچ کیو اسپتال منتقل کر دیا گیا ہے اور واقعے کی ہر پہلو سے تحقیقات بھی شروع کر دی گئی ہے۔

لاہور: (ویب ڈیسک) اسپیکر پنجاب اسمبلی پرویز الہیٰ نے کہا ہے کہ عمران خان کو نہیں بھولنا چاہیے ہمارے 11 ووٹ ہیں۔
مسلم لیگ ق کے رہنما اور اسپیکر پنجاب اسمبلی پرویز الہیٰ نے اپنے ایک انٹرویو میں کہا کہ سیاست ہماری جماعت کے گرد گھوم رہی ہے اور شہباز شریف کی حکومت صرف 2 ووٹوں سے قائم ہے جو طارق بشیر چیمہ اور چودھری سالک کا ووٹ ہے۔
انہوں نے کہا کہ حکمران باہر نکل کے لوگوں کو کیا بتائیں گے؟ ڈیزل کی قیمتیں بڑھنے کی وجہ سے کسان رل گئے ہیں۔ پی ٹی آئی سے پرانا تعلق ہے اور شریف خاندان کو 20 سال سے دیکھ چکے ہیں۔ ق لیگ نے تمام حلقوں میں کام کیا اور مونس الہٰی کے پاس وزارت بھی تھی جبکہ چودھری سالک پہلی دفعہ سیاست میں آئے ہیں ان کو لانے میں تعاون کیا تھا۔
پرویز الہیٰ نے کہا کہ موجودہ صورتحال پر چودھری شجاعت حسین سے بات ہوئی ہے اور چودھری شجاعت حسین نے کہا کوئی ایسا وعدہ نہیں کیا جس سے شرمندگی ہو۔ مسلم لیگ ق متحد ہے۔
انہوں نے کہا کہ شہباز شریف کہتے تھے آصف علی زرداری کو گھسیٹوں گا لیکن اب آصف زرداری وزیر اعظم کو گھسیٹ رہے ہیں اور آصف زرداری نے شہباز شریف کو لاوارث کر دیا۔ عمران خان کو اچھا لگے یا برا، کہہ دیتا ہوں کی یہ غلط ہوا اس کو ٹھیک کریں اور 2018 سے پہلے عمران خان کا کوئی وجود نہیں تھا بس ان کا شوق تھا۔
اسپیکر پنجاب اسمبلی نے کہا کہ عمران خان نے حکومت بنائی تو 7 ووٹوں کا مارجن تھا اور ہمارے 11 ووٹ تھے اس لیے عمران خان کو یہ نہیں بھولنا چاہیے۔ اس میں کوئی شک نہیں کہ عمران خان پھر کامیاب ہوں گے۔
انہوں نے کہا کہ ضمنی انتخابات میں مسلم لیگ ن کہاں سے ووٹ لے گی؟ اور عمران خان ضمنی انتخابات کے سلسلے میں حلقوں میں خود جائیں گے۔ بجٹ اجلاس میں یہ لوگ اپنے بندے تو پورے کریں۔
رہنما ق لیگ نے کہا کہ پاکستان کا نظام ،معاشی، سیاسی اور اخلاقی طور پر کمزور ہوا ہے۔

اسلام آباد: (ویب ڈیسک) وزیرِ اعظم شہباز شریف کا بلوچستان بالخصوص گوادر میں بجلی کے مسائل کے حل کیلئے بڑا اقدام، وزیرِ اعظم نے گوادر میں گھریلو صارفین کو سولر پینل فراہم کرنے کا اعلان کیا ہے۔
وزیرِ اعظم کا کہنا تھا کہ گھریلو صارفین کو سولر پینلز کی فراہمی وفاقی حکومت کا گوادر کے لوگوں کو تحفہ ہوگا، اس حوالے سے 10 دن کے اندر لائحہ عمل پیش کیا جائے۔
وزیرِ اعظم نے ہدایت کی کہ گوادر میں بجلی کی فراہمی کیلئے فوری طور پر آف گرڈ نظام کا بھی جامع لائحہ عمل بنایا جائے، گوادر میں آف شور اور آن شور ونڈ پاور منصوبوں کیلئے بھی حکمتِ عملی بنائی جائے، اور جنوبی بلوچستان میں ٹرانسمیشن لائنز کے کام میں تیزی لا کے اسے رواں سال دسمبر میں مکمل کیا جائے.
شہباز شریف نے کہا کہ منصوبوں کی تکمیل میں دیر کسی قدر قابلِ قبول نہیں، متعلقہ محکمے یقینی بنائیں کہ طویل مدتی منصوبوں میں بھی وقت اور لاگت میں جس قدر ہو سکے کمی لائی جائے، حکومت کی ذمہ داری ہوتی ہے کہ وہ عوام کے پیسے کی بچت کرے اور اسکا صحیح استعمال یقینی بنائے، گوادر بندرگاہ کو دنیا کی جدید ترین بندرگاہ بنانے کیلئے بلا تعطل بجلی کی فراہمی یقینی بنائی جائے گی، گوادر کے لوگوں کو بنیادی سہولیات کی فراہمی تک چین سے نہیں بیٹھیں گے.
وزیرِ اعظم شہباز شریف کی زیرِ صدارت بلوچستان میں بجلی کی ٹرانسمیشن لائنز پر پیش رفت کا جائزہ اجلاس ہوا، اجلاس میں وفاقی وزراء احسن اقبال، انجنئیر خرم دستگیر، ڈی جی ایف ڈبلیو او میجر جنرل کمال اظفر اور متعلقہ اعلی حکام نے شرکت کی۔
اجلاس کو جیوانی، گوادر، پسنی، اورماڑا، پنجگور اور اور ایران کے درمیان بجلی کی ٹرانسمیشن لائنز کی تعمیر پر تفصیلی بریفنگ دی گئی. اجلاس کو بتایا گیا کہ ٹرانسمیشن لائنز کے حوالے سے قلیل مدتی اور طویل مدتی منصوبوں کا اجراء کیا جا رہا ہے، چھ ماہ کے اندر حکومت گوادر کو ایران سے مزید 100 میگاواٹ بجلی فراہم کر سکے گی، اس سے بجلی کی مجموعی فراہمی 260 میگاواٹ جبکہ کھپت 236 میگاواٹ ہوگی.
مزید یہ کہ خضدار پنجگور ٹرانسمیشن لائن کی دسمبر 2022 میں تکمیل کے بعد 90 میگاواٹ کا سسٹم میں مزید اضافہ ہوگا. اس منصوبے پر بھی کام تیزی سے جاری ہے. اسکے علاوہ حب اورماڑا ٹرانسمیشن لائن کی فیضیبلٹی تیاری کے مراحل میں ہے. اس ٹرامیشن لائن کی تکمیل کے بعد مزید 200 میگاواٹ سسٹم کو فراہم کر دیا جائے گا.
وزیرِ اعظم نے تمام منصوبوں میں شفافیت لانے کی بھی ہدایت کی۔