اٹلی : (ویب ڈیسک) آئی ایم ایف نے اعلامیہ جاری کیا ہے کہ پاکستان کو ایک ارب ڈالر فوری جاری ہوں گے، جبکہ مزید ایک ارب کے اجرا سے قرض پروگرام کی جاری رقم 3 ارب ڈالرہوگی۔
اعلامیہ میں کہا گیا ہے کہ پاکستان نے کورونا سےمتاثرمعیشت کوسنبھالا ہے، پاکستان کا کرنٹ اکائونٹ خسارہ بڑھا جس کےباعث ڈالرمہنگا ہوا ہے۔
آئی ایم ایف اعلامیے میں مزید کہا گیا ہے کہ پاکستان نے معاشی اصلاحات کیلئے بروقت اقدامات کیے۔ اسٹیٹ بینک کی خودمختاری مالیاتی استحکام لائےگی۔ پاکستان میں معاشی ترقی روزگارکےفروغ کا ذریعہ بنےگی۔ پاکستان میں سرکاری اداروں کے نقصانات کم کرنا بڑاچیلنج ہے اور توانائی کےگردشی قرض پرقابوپانا بھی ایک چیلنج ہے۔
اعلامیے کے مطابق پاکستان میں رواں مالی سال معاشی ترقی کی شرح 4 فیصد ہوسکتی ہے۔ پاکستان میں مہنگائی بڑھنےکی شرح 10.2 فیصد ہے۔رواں سال مالیاتی خسارہ معیشت کا 6.9 فیصد ہوسکتا ہے۔ پاکستان کی معیشت کے لحاظ سے قرضوں کا بوجھ 86.7 فیصد ہے۔

راولپنڈی : (ویب ڈیسک) راولپنڈی میں ٹرک نے گاڑی کو روند ڈالا، حادثے میں کارسوار 4 نوجوان شدید زخمی ہوگئے۔
3 کی حالت تشویشناک بتائی جارہی ہے، مری روڈ پر ناز سینما کے قریب تیزرفتار مہران کار اور ٹرک ٹکرا گئے۔ ریسکیو1122 کے عملے نے زخمیوں کو بینظیربھٹوشہید اسپتال منتقل کردیا۔زخمیوں میں سے ایک کی حالت خطرے سے باہربتائی جارہی ہے۔

ملتان: (ویب ڈیسک) وزیرداخلہ شیخ رشید کا کہنا ہے کہ نوشکی اور پنجگور میں پاک فوج نے حملہ ناکام بنا دیا، نوشکی میں 9 دہشتگرد مارے گئے جبکہ چار جوان شہید ہوئے، پنجگور میں 6 دہشتگرد مارے گئے۔
وزیر داخلہ شیخ رشید نے پنجگور اور نوشکی میں سکیورٹی فورسز کے کیمپوں پر حملوں کی مذمت کرتے ہوئے کہا کہ دہشتگردوں کے حملے کو پسپا کرنے پر سکیورٹی فورسز کو خراج تحسین پیش کرتا ہوں، ہماری سیکیورٹی فورسز دہشتگردوں کا مقابلہ کرنے کی مکمل صلاحیت رکھتی ہیں، ہماری فورسز دہشتگردوں کو ان کے مذموم مقاصد میں کامیاب نہیں ہونے دے گی۔
خیال رہے گزشتہ روز پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے بلوچستان میں پنجگور اور نوشکی میں کیمپوں پر حملے کی کوشش کی، جسے ناکام بنا دیا گیا۔ سکیورٹی فورسز کی جوابی کارروائی میں دہشتگرد مارے گئے۔
آئی ایس پی آر کے مطابق جوابی کارروائی میں دہشتگردوں کا بھاری نقصان ہوا جبکہ پنجگور حملے میں ایک جوان وطن پر قربان ہوگیا۔ پنجگور میں دہشتگردوں نے 2 اطراف سے سکیورٹی فورسز کیمپ میں داخلے کی کوشش کی، فورسز کے بروقت ردعمل کی صورت میں دہشتگرد حملہ ناکام بنا دیا گیا۔

ملتان: (ویب ڈیسک) ڈاکٹر یاسمین راشد نے کہا ہے کہ زیر تعمیر نشتر ٹو اسپتال ملتان کو عوام کیلئے اکتوبر میں کھول دیا جائے گا، ماضی میں جنوبی پنجاب کی عوام کو ہمیشہ نظرانداز کیا گیا۔
ڈاکٹر یاسمین راشد نے زیر تعمیر نشتر ٹو ہسپتال ملتان کی سائٹ کا تفصیلی دورہ کیا، جہاں سیکرٹری محکمہ پی اینڈ ڈی مجاہد شیر دل نے وزیر صحت کو زیر تعمیر ہسپتال سے متعلق بریفنگ دی۔ اس موقع پر یاسمین راشد کا کہنا تھا کہ زیر تعمیر نشتر ٹو ہسپتال ملتان پر جاری پیشرفت تسلی بخش ہے۔
وزیر صحت پنجاب کا کہنا تھا کہ نشتر ٹو ہسپتال ملتان اکتوبر میں مکمل فعال کر دیا جائے گا، نشتر ٹو ہسپتال ملتان 500 بستروں پر مشتمل ہوگا، ملتان کی عوام کو 50 سال بعد نشتر ٹو کی شکل میں ایک جنرل ہسپتال نصیب ہوگا۔

اسلام آباد: (ویب ڈیسک) وزیراعظم نے کہا ہے کہ بلوچستان میں دہشتگرد حملے ناکام بنانے پر اپنی بہادر سکیورٹی فورسز کو سلام پیش کرتا ہوں۔
وزیراعظم عمران خان نے سماجی رابطے کی ویب سائٹ پر ٹویٹ کرتے ہوئے کہا کہ سکیورٹی فورسز نے پنجگور، نوشکی، بلوچستان میں دہشتگرد حملے ناکام بنائے، قوم ہماری حفاظت کرنے اور قربانیاں دینے والی سکیورٹی فورسز کیساتھ ہے۔
خیال رہے گزشتہ روز پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے بلوچستان میں پنجگور اور نوشکی میں کیمپوں پر حملے کی کوشش کی، جسے ناکام بنا دیا گیا۔ سکیورٹی فورسز کی جوابی کارروائی میں 4 دہشتگرد مارے گئے۔
آئی ایس پی آر کے مطابق جوابی کارروائی میں دہشتگردوں کا بھاری نقصان ہوا جبکہ پنجگور حملے میں ایک جوان وطن پر قربان ہوگیا۔ پنجگور میں دہشتگردوں نے 2 اطراف سے سکیورٹی فورسز کیمپ میں داخلے کی کوشش کی، فورسز کے بروقت ردعمل کی صورت میں دہشتگرد حملہ ناکام بنا دیا گیا۔