لاہور: (ویب ڈیسک) چودھری برادران نے سیاسی طور پر راہیں جدا کرنے کا فیصلہ کرلیا۔
ذرائع کے مطابق پاکستان مسلم لیگ (ق) سیاسی معاملات پر اختلافات کا شکار ہے اور چودھری برادران نے سیاسی طور پر ایک دوسرے سے اپنے راستے الگ کرنے کا فیصلہ کیا ہے۔
اس حوالے سے ذرائع کا کہنا تھا کہ چودھری شجاعت حسین، چودھری سالک حسین مسلم لیگ (ن) کے ساتھ کھل کر کھڑے ہوگئے، چودھری پرویز الٰہی، مونس الٰہی اور چودھری حسین الٰہی تحریک انصاف کے اتحادی رہیں گے ۔
ذرائع نے مزید بتایا کہ خاندانی اختلافات میں شدت کے باعث سیاسی معاملات پر راہیں جدا کی گئیں، پہلی بار خاندان کے دونوں بڑوں نے الگ الگ سیاسی راستون کا اعتراف کر لیا جبکہ دوریاں بڑھنے کے باعث جلد حتمی فیصلے کا امکان ہے۔
حسین الٰہی بیرون ملک ہیں، وطن واپس آتے ہی بڑا فیصلہ ہوجائے گا، گھر کے تین ایم این ایز میں سے دو تحریک انصاف کے حامی ہیں۔

راولپنڈی: (ویب ڈیسک) آئی ایس پی آر نے سابق وفاقی وزیر خزانہ شوکت ترین کے حوالے سے سوشل میڈیا پر لگائےگئے الزامات کی تردیدکی ہے۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سابق وزیر خزانہ شوکت ترین کے حوالے سے سوشل میڈیا پر شاہین صہبائی اور کچھ دیگر افراد کی جانب سے جو الزامات لگائے گئے ہیں وہ بے بنیاد پروپیگنڈا ہیں۔
آئی ایس پی آر کے مطابق خود شوکت ترین نے بھی اس کی تردید کی ہے، ذاتی مفادات کے لیے ادارے اور اس کی قیادت کے خلاف بدنیتی پر مبنی الزامات اور صریحاً جھوٹ بولنا قابل مذمت ہے، ادارہ ملوث افراد کے خلاف قانونی کارروائی کا حق محفوظ رکھتا ہے۔
دوسری طرف پاکستان تحریک انصاف ( پی ٹی آئی ) کے سینیٹر شوکت ترین نے بھی سماجی رابطے کی ویب سائٹ ٹویٹرپر لکھا کہ میں واضح طور پر اس بات کی تردید کرتا ہوں جو شاہین صہبائی نے مجھ سے منسوب کی ہے۔ مجھے کبھی بھی اسٹیبلشمنٹ نے نہیں کہا کہ میں عمران خان کو چھوڑ کر شہباز شریف کی حکومت میں شامل ہوں۔

اسلام آباد: (ویب ڈیسک) حکومت نے اسلام آباد میں رات دس بجے سے تمام شادی ہالز بند کرنے کا فیصلہ کیا ہے،ون ڈش کی اجازت ہو گی،خلاف ورزی پر کریک ڈاؤن ہوگا۔
ڈپٹی کمشنر اسلام آباد کی شادی ہال، ریسٹورنٹس مالکان کے ساتھ ملاقات میں رات دس بجے سے تمام شادی ہالز بند کرنے کا فیصلہ کیا گیا۔
ملاقات میں فیصلہ کیا گیا کہ مہندی، شادی اور ولیمہ تقریبات رات دس بجے تک ختم کی جائیں، خلاف ورزی کرنے والوں کو قانونی کارروائی کر کے گرفتار کیا جائے گا۔
ڈپٹی کمشنر نے سسٹنٹ کمشنرز اور مجسٹریٹس کو عمل درآمد کرانے کے لئے ہدایات جاری کر دیں۔

اسلام آباد: (ویب ڈیسک) وزیراعظم میاں شہبازشریف نے ق لیگ کے سربراہ چودھری شجاعت حسین سے ان کی رہائش گاہ پر ملاقات کی اور خیریت دریافت کی ہے۔
پاکستان مسلم لیگ (ن) کے سربراہ میاں شہباز شریف سابق وزیراعظم چودھری شجاعت حسین سے ملاقات کے لیے ان کی رہائش گاہ پہنچے تو ان کے ہمراہ خواجہ سعد رفیق اور ملک احمد خان بھی تھے۔
دونوں رہنماؤں کے درمیان ہونے والی ملاقات میں طارق بشیر چیمہ، چودھری سالک حسین، چودھری شافع حسین اور رکن قومی اسمبلی مسز فرخ خان بھی موجود تھیں۔
ذرائع نے بتایا ہے کہ ہونے والی ملاقات میں ملک کی موجودہ سیاسی و معاشی صورتحال سمیت دیگر متعلقہ امور پر تبادلہ خیال کیا گیا۔
ذرائع کا کہنا ہے کہ دونوں رہنما ؤں کے درمیان آئندہ بھی رابطے اور مشاورت جاری رکھنے پہ اتفاق کیا گیا۔