جنیوا: (ویب ڈیسک) اقوام متحدہ کے انسانی حقوق کونسل کے اعلیٰ سطح کے تفتیش کاروں نے اپنی رپورٹ میں انکشاف کیا ہے کہ فلسطین کے مسائل کی جڑ دہائیوں سے جاری اسرائیل کا جبری قبضہ اور شہریوں پر بہیمانہ تشدد ہے۔
عالمی خبر رساں ادارے کے مطابق اقوام متحدہ کے انسانی حقوق کونسل کے تفتیش کاروں نے فلسطین میں اسرائیلی مظالم سے متعلق اپنی 18 صفحات پر مشتمل رپورٹ جمع کرادی جس میں انکشاف کیا گیا ہے کہ امن کے لیے فلسطینی زمینوں پر اسرائیلی قبضہ ختم کرنا ضروری ہے۔
تفتیشی ٹیم کے سربراہ ناوی پیلے نے بتایا کہ اس رپورٹ کے لیے ماضی کی تحقیقات کا بھی جائزہ لیا گیا۔ اسرائیل کی جانب سے عالمی قوانین کی خلاف ورزیوں کا احتساب ہونا چاہیے تھا لیکن ماضی میں بھی ہماری سفارشات پر عمل نہیں کیا گیا۔
ناوی پیلے نے مزید کہا کہ ماضی کی سفارشات پر عمل نہ کرنے سے ثابت ہوگیا کہ اسرائیل اپنا غاصبانہ قبضہ ختم کرنے کا ارادہ نہیں رکھتا اور اس بار بھی اسرائیل نے انسانی حقوق کمیشن کی تحقیقات میں تعاون نہیں کیا۔
اقوام متحدہ کی تفتیشی ٹیم کی رپورٹ میں یہ بھی کہا گیا ہے کہ اسرائیلی مظالم کے خلاف فلسطینیوں میں شدید غصہ پایا جاتا ہے اور کئی شہروں میں مسلسل مظاہرے کیے جا رہے ہیں۔
یاد رہے کہ گزشتہ برس مئی میں اقوام متحدہ نے اسرائیل فلسطین جنگ کے بعد یہ انکوائری کمیشن تشکیل دیا تھا۔

تہران: (ویب ڈیسک) ایران میں مسافر بردار ٹرین پٹڑی سے اتر گئی جس کے نتیجے میں 21 افراد ہلاک اور 50 سے زائد زخمی ہوگئے۔
عالمی خبر رساں ادارے کے مطابق ایران میں تباس سے 50 کلومیٹر دور نواحی علاقے میں ایک تیز رفتار مسافر بردار ٹرین پٹری سے اتر گئی۔ بوگیاں ایک دوسرے پر چڑھ گئیں اور مسافر اندر پھنس گئے۔ ٹرین شہر مشہد سے یزد جا رہی تھی۔
امدادی کاموں کے دوران 60 سے زائد مسافروں کو بوگیاں کاٹ کر نکالا اور قریبی اسپتال منتقل کیا گیا جہاں 21 افراد کے ہلاک ہونے کی تصدیق کردی گئی جب کہ 50 سے زائد زخمی ہیں جن میں سے اکثریت کی حالت تشویشناک ہے۔
امدادی کاموں میں 3 ہیلی کاپٹرز نے بھی حصہ لیا۔ ٹرین حادثہ دور دراز علاقے میں پیش آیا جہاں مواصلات کی انتہائی ناقص سہولیات ہیں جس کی وجہ سے ریسکیو کے کام میں مشکلات کا سامنا رہا ہے۔
حادثے کی وجوہات کے تعین کے لیے انکوائری کمیٹی تشکیل دیدی گئی ہے۔ ایران میں ٹرین کے حادثے معمول کی بات تو نہیں تاہم دور دراز علاقوں میں ایسے حادثات کے باعث ہلاکتوں میں اضافہ ہوجاتا ہے۔

بیجنگ: (ویب ڈیسک) چین نے دعویٰ کیا ہے کہ شمالی کوریا سے آنے والی ہواؤں کے ذریعے کورونا وائرس ہمارے ملک میں داخل ہورہا ہے۔
عالمی خبر رساں ادارے کے مطابق شمالی کوریا کی سرحد کے نزدیک چین کے 21 لاکھ والی آبادی شہر ڈین ڈونگ میں اپریل سے کورونا وبا کے پھیلاؤ کے باعث لاک ڈاؤن نافذ کیا گیا تھا تاہم ہفتوں پر مشتمل لاک ڈاؤن کے باوجود وبا پر مکمل طور پر قابو نہیں پایا جا سکا۔
جس پر شہری انتظامیہ نے ایک انوکھا دعویٰ کیا ہے کہ ایسے افراد میں کورونا کی تشخیص ہوئی ہے جو چار دن سے گھر سے باہر ہی نہیں نکلے اور چار روز قبل کا ٹیسٹ بھی منفی آیا تھا۔ اس لیے ممکنہ طور پر وائرس شمالی کوریا سے ہوا کے ذریعے آیا ہوگا۔
شہری انتظامیہ کے اس انکشاف کے بعد صوبائی اور وفاقی حکومت نے شہریوں کو دن کے وقت گھروں کی کھڑکیاں بند رکھنے کی ہدایت کی ہے تاہم چین کے اس فیصلے پر عالمی سطح پر مذاق بن گیا ہے۔
شمالی کوریا اور چین کے درمیان 1300 کلومیٹر کی ملحقہ سرحد ہے جو دریائے یالو کی وجہ سے کچھ مقامات پر ایک دوسرے علیحدہ بھی ہوتی ہے۔
خیال رہے کہ کورونا سے متعلق سائنس دانوں کی تحقیق کے مطابق ہوا کے ذریعے وائرس اتنی دور تک نہیں پہنچ سکتے۔
تاہم یہ بات بھی قابل توجہ ہے کہ شمالی کوریا میں کورونا کی صورت حال دن بدن بدتر ہوتی جا رہی ہے اور سرکاری نیوز ایجنسی کے مطابق رواں برس اپریل سے تاحال 40 لاکھ نئے کیسز ریکارڈ ہوئے ہیں۔

کراچی: (ویب ڈیسک) قومی کرکٹ ٹیم کے سابق کپتان یونس خان نے جو روٹ کو 10 ہزار ٹیسٹ رنز مکمل کرنے پر مبارکباد دی ہے۔
سماجی رابطے کی سائٹ ٹوئٹر پر قومی کرکٹ ٹیم کے سابق کپتان یونس خان نے نیوزی لینڈ کے خلاف جو روٹ کو 10 ہزار رنز مکمل کرنے پر مبارکباد دی، انگلش ٹیم نے کیویز کے خلاف 5 وکٹوں سے فتح سمیٹی۔
یونس خان نے لکھا کہ ایک قابل ذکر کھلاڑی کی طرف سے ایک شاندار کامیابی، اتنے کم وقت اور کم عمری میں اتنا بڑا سنگ میل حاصل کرنا واقعی حیران کن ہے۔
جو روٹ نے نیوزی لینڈ کے خلاف 170 گیندوں پر 115 رنز بناکر ایلسٹر کک کے بعد یہ کارنامہ انجام دینے والے دوسرے انگلش کرکٹر ہیں۔
واضح رہے کہ یونس خان واحد پاکستانی بلے باز ہیں جنہوں نے کھیل کے طویل ترین فارمیٹ میں 118 میچز میں 52.05 کی اوسط سے 10 ہزار رنز کا ہندسہ عبور کیا۔