لاہور: (ویب ڈیسک) کیلی فورنیا میں ڈاکٹر آصف محمود امریکی کانگریس کے وسط مدتی انتخابات کیلئے پرائمری انتخابات جیتنے والے پہلے پاکستانی بن گئے۔
رکن کانگریس بننے کے لیے پہلا مرحلہ جیتنے کے بعد اب وہ نومبر کے وسط مدتی انتخابات میں بھی حصہ لے سکیں گے۔ ڈاکٹرآصف نے ری پبلکن حریف اور موجودہ رکن کانگریس یونگ کم سے گیارہ ووٹوں کی برتری حاصل کی۔
کیلیفورنیا کے ریاستی قوانین کے مطابق کانگریس کے لیے پرائمری الیکشن ہوتا ہے جس میں کسی بھی پارٹی کے امیدوار حصہ لے سکتے ہیں۔

کراچی : (ویب ڈیسک) سندھ ہائیکورٹ میں دعا زہرہ اور والدین کی ملاقات ہوئی جس میں 10 منٹ کی ملاقات میں دعا زہرہ نے ایک لفظ بھی نہیں بولا۔
عدالتی ذرائع کے مطابق دعا نے دوران ملاقات ماں باپ، بہن یا خالہ کسی کو نہیں دیکھا، دعازہرہ تمام وقت کرسی پر سر جھکائے بیٹھی رہی، ماں نے دعا کو گلے لگایا لیکن دعا نے ماں سے کوئی بات نہیں کی۔
ماں نے دوران ملاقات دعا کو پیشکش کرتے ہوئے کہا کہ بیٹا آپ ہمارے ساتھ چلو ہم تمہاری عزت سے شادی کرینگے، بیٹا آپ جیسے کہو گے ہم کریں گے ہمارے ساتھ چلو، ہم آپ کی دو یا چھ ماہ میں شادی کرادیں گے ہماری بات مان لو۔
ملاقات کے بعد کمرہ عدالت سے باہر آکر والدہ نے دعوی کیا کہ میری بچی نے کہا ممی میں گھر چلنا چاہتی ہوں، میری بچی کو زبردستی یہاں سے لے گئے ہیں اس دوران دعا زہرا کی والدہ روتے ہوئے بیہوش ہوگئیں۔

اسلام آباد: (ویب ڈیسک) وزیراعظم شہباز شریف سے امریکی بزنس کونسل کے وفد نے ملاقات کی، شہباز شریف نے سرمایہ کاروں کو مسائل جلد حل کرانے کی یقین دہانی کرواتے ہوئے سیکرٹری کامرس و سرمایہ کاری بورڈ کو رپورٹ ایک ہفتے میں پیش کرنے کا حکم دیا۔
وزیرِ اعظم شہباز شریف سے امریکن بزنس کونسل کے وفد کی ملاقات میں فارما، فوڈ پراسیسنگ، آئی ٹی سیکٹر، ای کامرس، ریٹیل سیکٹر، ٹیکسٹائل، سپورٹس اور لاجسٹکس کے شعبوں کے نمائندوں نے شرکت کی جبکہ وفاقی وزراء سید نوید قمر، مخدوم مرتضی محمود، مریم اورنگزیب اور متعلقہ اعلی افسران بھی اس موقع پر موجود تھے۔
شرکا نے حکومت کی تعریف کرتے ہوئے کہا کہ موجودہ پالیسیوں کی بدولت سرمایہ کاروں کا اعتماد بحال ہوا ہے، بجٹ سے پہلے حکومت کی تمام سٹیک ہولڈرز سے مشاورت خوش آئند ہے۔ وزیرِ اعظم نے سیکرٹری کامرس اور سیکرٹری سرمایہ کاری بورڈ کو سرمایہ کاروں کے مسائل فوری حل کرنے کی ہدایت کی اور ایک ہفتے کے اندر رپورٹ پیش کرنے کا حکم دیا۔

پشاور: (ویب ڈیسک) پشاور ہائیکورٹ نے این ایچ اے کی کارکردگی پر برہمی کا اظہار کر دیا۔
پشاورہائیکورٹ میں چترال روڈ سے متعلق کیس کی سماعت ہوئی، ممبر این ایچ اے، چیف پلاننگ کمشنر، ایڈیشنل ایڈوکیٹ جنرل عدالت میں پیش ہوئے، چیف پلاننگ کمشنرنے عدالت کو بتایا کہ این ایچ اے کو فنڈز دیئے گئے ہیں لیکن ابھی تک انھوں نے کچھ کام نہیں کیا، عدالت نے این ایچ اے کی کارکردگی پر برہمی کا اظہار کیا۔
چیف جسٹس نے ریمارکس دیئے کہ کیوں نہ ہم ایف آئی اے سے اس کی انکوائری کا حکم دیں،کیوں نہ ان کے خلاف ایف آئی آر اندارج کا حکم دیں،این ایچ اے کی کارکردگی صفر ہے۔
چیف پلاننگ کمشنر نے عدالت کو بتایا کہ کیلاش روڈ پر اگلے مالی سال میں کام شروع ہوجائیگا، کیلاش روڈ کے لئے 20 کروڑ روپے رکھے گئے ہیں، عدالت نے فریقین سے 21 جون تک جواب طلب کرتے ہوئے سماعت ملتوی کر دی۔