اسلام آباد: (ویب ڈیسک) عازمینِ حج کیلئے سعودی عرب کی جانب سے منظور شدہ کورونا ویکسین لازمی قرار دے دی گئی ہے۔
ترجمان مذہبی امور کے مطابق سعودی منظور شدہ کورونا ویکسین کی مکمل ڈوز کے بغیر سعودی عرب میں داخلہ منع ہو گا، تمام عازمینِ حج روانگی سے قبل سعودی منظور شدہ ویکسین کا سرٹیفکیٹ اپنے ہمراہ رکھیں۔
مذہبی امور کے ترجمان کے مطابق منظور شدہ ویکسین کا ثبوت نہ ہونے کی صورت میں جہاز سے آف لوڈ کر دیا جائے گا۔
ریاض: (ویب ڈیسک) سعودی عرب کے جید علما کی کونسل نے بھارتی حکمراں جماعت کے رہنماؤں کی جانب سے نبی آخر الزماں صلی اللہ علیہ وسلم کی شان میں گستاخانہ بیانات کی شدید مذمت کی ہے۔
کونسل آف سینئر اسکالرز کے جنرل سیکرٹریٹ کی جانب سے جاری بیان میں کہا گیا ہے کہ بی جے پی ترجمان کی جانب سے پیغمبر اسلام کی شان میں توہین آمیز بیانات قابل مذمت ہیں۔ علما کی جانب سے مسلمانوں پر زور دیا گیا ہے کہ وہ دنیا میں اپنے قول و عمل سے اس بات کو پھیلائیں کہ نبی صلی اللہ علیہ وسلم کو پوری انسانیت کے لیے رحمت بنا کر بھیجا گیا۔
سعودی کونسل نے بیان میں اس بات کا اعادہ کیا کہ کسی کو بھی پیغمبر اسلام سے متعلق توہین آمیز کلمات ادا کرنے کی اجازت نہیں دی جا سکتی۔ اس سلسلے میں قرآن پاک کی آیات کا حوالہ بھی دیا گیا جن میں نبی اکرم صلی اللہ علیہ وسلم کےبلند مقام اور عظیم کردار کو بیان کیا گیا ہے۔
سرینگر: (ویب ڈیسک) مقبوضہ کشمیرمیں بھارتی فورسزنے مزید3 کشمیری نوجوانوں کو شہید کردیا۔
کشمیری میڈیا کے مطابق قابض بھارتی فورسزنے 2 مختلف علاقوں میں نام نہاد سیکورٹی آپریشن کی آڑ میں 3 کشمیری نوجوانوں کوشہید کردیا۔
ضلع کپواڑہ میں بھارتی فوجیوں کی فائرنگ سے 2 کشمیری نوجوان شہید ہوگئے۔ علاقے کی ناکہ بندی کرکے لوگوں کو گھروں میں رہنے کی ہدایت کی گئی ہے۔قابض بھارتی فورسز نے بارہ مولا کے علاقے میں جعلی مقابلے میں ایک نوجوان کو شہید کردیا۔ بھارتی فوجیوں نے گھروں میں گھس کر توڑ پھوڑ کی اورمکینوں کو ہراساں کیا۔ متعدد نوجوانوں کو گرفتارکرلیا گیا۔
بارہ مولا، سو پور، کپواڑہ سمیت مختلف علاقوں میں بھارتی فوجیوں نے سڑکیں بند کردی ہیں جس کی وجہ سے لوگ گھروں میں محصورہوگئے ہیں۔ انٹرنیٹ اورموبائل سروس بھی معطل ہے۔ شہید کشمیری نوجوانوں کی لاشیں لواحقین کے حوالے کرنے کے بجائے بھارتی فوجیوں نے اپنی تحویل میں لے لی ہیں۔
بھارتی فورسز گزشتہ چند روز میں 15 سے زائد کشمیری نوجوانوں کو شہید کرچکی ہیں۔
فلوریڈا: (ویب ڈیسک) امریکا میں 2 سالہ بچے نے کھلونا سمجھ کر والد پر پستول چلا دی جس کے نتیجے میں 24 سالہ والد موقع پر ہی ہلاک ہوگئے جب کہ غفلت برتنے پر ماں کو حراست میں لے لیا گیا۔
عالمی خبر رساں ادارے کے مطابق امریکی ریاست فلوریڈا میں 2 سالہ بچے نے فرش پر پڑے بستے سے پستول نکال کر کمپیوٹر پر گیم کھیلنے والے والد کی طرف کرکے چلا دی۔ گولی والد کی پیٹھ پر لگی۔
26 سالہ باپ کو شدید زخمی حالت میں اسپتال پہنچایا گیا جہاں دوران علاج وہ جانبر نہ ہوسکا۔ بچے کی ماں نے اس وقت پولیس کو بتایا کہ ان کے شوہر کو خود کو گولی مار کر خودکشی کی ہے۔
تاہم پیٹھ پر گولی لگنے کی وجہ سے پولیس کو شک ہوا اور تفتیش کے دوران بڑے بیٹے نے اعتراف کرلیا کہ چھوٹے بھائی نے غلطی سے گولی ماری۔ جس وقت گولی چلی اس وقت ان کا ایک سال کا بھائی بھی قریب ہی موجود تھا۔
تفتیش کاروں نے بتایا کہ بچے سے گولی چلنے سے ہلاک ہونے والا نوجوان اور اہلیہ بچوں کو نظرانداز کرنے اور منشیات کے استعمال کے متعدد جرائم کے بعد پیرول پر تھے۔ اور اس کیس میں بھی پستول کو محفوظ جگہ پر رکھنے میں شدید غفلت کا مظاہرہ کیا۔
پولیس نے غفلت برتنے پر ماں کو حراست میں لے لیا۔ والد کی ہلاکت اور ماں کے جیل میں ہونے کے باعث بچوں کو شیلٹر ہاؤس بھیج دیا گیا۔ امریکا میں بچوں سے غلطی سے گولی چلنے کے واقعات نئے نہیں۔
ابوظہبی: (ویب ڈیسک) امارات کرکٹ بورڈ نے اپنی ٹی20 لیگ (آئی ایل ٹی) کے افتتاحی مرحلے کی تاریخوں کا اعلان کردیا۔
امارات کی انٹرنیشنل لیگ ٹی20 اگلے سال 6 جنوری سے 12 فروری تک منعقد ہوگی، یہ لیگ ” بین الاقوامی لیگ ٹی20″ یا “آئی ٹی ایل 20″ کہلائے گی۔
امارات کرکٹ بورڈ کے چیئرمین شیخ نھیان بن مبارک نے کہا ہے کہ امارات کرکٹ بورڈ کو متحدہ عرب امارات کی نئی قائم کردہ ٹی ٹوئنٹی لیگ میں ریلائنس انڈسٹریز، کولکتہ نائٹ رائیڈرز، کیپری گلوبل، جی ایم آر، لانسر کیپیٹل، اڈانی اسپورٹس لائن، براڈ کاسٹر زی اور دیگر تمام شراکت داروں کا خیرمقدم کرتے ہوئے خوشی محسوس ہورہی ہے۔
متحدہ عرب امارات کی ٹی 20 لیگ کے لئے شراکت دار کے طور پر اس طرح کے نامور، تجربہ کار نام ایک اچھا اشارہ ہے۔ ان شراکت داروں کے ذریعے امارات کرکٹ بورڈ اعتماد کا مظاہرہ کرتے ہوئے کھیل کو کامیابی کی جانب لے جائے گا۔
انہوں نے کہا کہ جیسا کہ ہم اس طویل سفرکا آغاز کررہے ہیں تو مجھے یقین ہے کہ ہم مل کر نئی بلندیاں کو چھوئیں گے اور دنیا بھر کے لاکھوں شائقین کو تفریح اورجوش و خروش فراہم کریں گے جو یو اے ای ٹی 20 لیگ کی پہلی گیند پھینکے جانے کے منتظر ہیں۔
انہوں نے کہا کہ بورڈ کی جانب سے سب کو یہ یقین دلاتا ہوں کہ میدان میں کرکٹ کے ساتھ تفریح میں آپ متحدہ عرب امارات کی روایتی مہمان نوازی سے بھی لطف اندوز ہوں گے۔
ممبئی: (ویب ڈیسک) بالی ووڈ کے اداکارظہیر اقبال نے اپنے انسٹاگرام ہینڈل پر سوناکشی سنہا کی سالگرہ کی تاخیر سے پوسٹ شیئر کی جہاں انہوں نے ’دبنگ‘ اداکارہ سے اپنی محبت کا اعتراف کیا ہے جس کے بعد سناکشی سنہا کا نام ٹرئٹر پر ٹاپ ٹرینڈ بنا ہوا ہے۔
بھارتی میڈیا رپورٹ کے مطابق بالی ووڈ ہیروظہیر اقبال نے اپنے آفیشل انسٹاگرام اکاؤنٹ سے ایک ویڈیو شیئر کی ہےجس میں وہ سوناکشی کے ساتھ فلائٹ میں موجود ہیں۔
ویڈیو کے کیپشن میں اداکار نے سناکشی سے محبت کا اظہار کرتے ہوئے لکھا کہ ’’سالگرہ مبارک ہو سونزز شکریہ مجھے قتل نہ کرنے کے لیے آئی لو یو یہاں بہت زیادہ کھانے، پروازیں، پیار اور ہنسی یہ ویڈیو اس پورے وقت کا خلاصہ کرتا ہے جب سے ہم ایک دوسرے کو جانتے ہیں‘‘۔
ویڈیو میں دیکھا جا سکتا ہے کہ سناکشی برگر کھا رہے ہیں اور ظہیر انہیں تنگ کرنے کے لئے برگر کھاتے ہوئے ان کی ویڈیو بنا رہے ہیں جس پر اداکارہ ہنستے ہوئے اپنا چہرہ چھپا رہی ہیں۔
ظہیر اقبال کی یہ پوسٹ سوشل میڈیا پر وائرل ہوئی تو صارفین نے اس پر تبصرے شروع کر دیئے علاوہ ازیں ساتھی اداکاروں نے بھی اس پوسٹ پر کمنٹ کر کے اپنا ردِ وعمل دیا تو سناکشی نے بھی کمنٹ میں اپنے قریبی دوست ظہیر کو شکریہ ادا کرتے ہوئے لکھا کہ ’’ شکریہ ، آئی لو یو ٹو ، اب میں آرہی ہوں تمہارا قتل کرنے‘‘۔
یہ پہلی مرتبہ ہے کہ سناکشی سنہا اور ظہیر اقبال کی جانب سے اپنے قریبی تعلق اور محبت کا کھل کا اعلان کیا گیا ہے تاہم اس سے قبل اداکارہ نے اپنے انسٹاگرام اکاؤنٹ پر ایک تصویر شیئر کی تھی جس میں انہوں نے ایک ہیرے کی انگوٹھی پہن رکھی تھی اور ان کے ساتھ کوئی شخص موجود تھا جس کا چہرہ واضح نہیں کیا گیا تھا۔
جس کے بعد یہ قیاس آرائیاں کی جا رہی تھیں کہ اداکارہ جلد شادی یا منگنی کی خوشخبری سنانے والی ہیں تاہم بعدِ ازاں اداکارہ نے بتایا کہ انہوں نے اپنا نیل آرٹ برانڈ لانچ کیا ہے اور اسی کی تشہیر کے لئے انہوں نے اپنے ہاتھوں کی تصاویر شیئر کیں جس میں انہوں نے نیل آرٹ کروایا تھا ۔
بگوٹا: (ویب ڈیسک) کولمبیا میں سونے کے سکوں سے بھرے ہوئے صدیوں پرانے دو جہاز دریافت کرلیے گئے۔
حکام کے مطابق سترہ سو آٹھ میں ڈوبے جہاز کی نگرانی کے دوران انہیں مزید دو جہازوں کا ملبہ ملا۔ ان میں سے ایک ہسپانوی نوآبادیاتی دور کی کشتی ہو سکتی ہے جبکہ دوسرے جہاز کے بارے میں خیال کیا جارہا ہے کہ وہ دو سو سال قبل سپین سے کولمبیا کی آزادی کی جنگ کے دوران پانی میں غرق ہوا تھا۔
بحری جہازوں کےملبے میں سونے کے سکے اور توپوں کے ساتھ گلدان اور دیگرکراکری جیسی اشیاء بھی ملی ہیں۔
لندن: (ویب ڈیسک) سرکاری ملازمین ہوں یا نجی اداروں کے کارکن، ایک ہفتے میں 4 دن کام اور 3 دن چھٹی کی پیش کش ہو تو کون لینا نہیں چاہے گا۔ ایسا ہی ایک تجربہ برطانیہ میں شروع کیا گیا ہے۔
منصوبے کے مطابق 70 برطانوی کمپنیوں کے 3 ہزار 300 کارکن 6 ماہ تک ہفتے میں 3 دن چھٹی اور 4 دن کام کریں گے جب کہ ان کی تنخواہ میں کسی قسم کی کٹوتی نہیں کی جائے گی۔ 4 ڈے ویک گلوبل کا یہ تجربہ آٹونومی تھنک ٹینک کے اشتراک سے جاری رہے گا۔
اس منصوبے کے نتائج اخذ کرنے میں کیمبرج، آکسفورڈ اور بوسٹن یونیورسٹی کے محققین شامل ہوں گے۔ماہرین کا کہنا ہے کہ 3 دن کی چھٹی سے پیداواری صلاحیت متاثر نہیں ہوگی بلکہ اس میں اضافہ متوقع ہے۔ ساتھ ہی اس کے نتائج سے ماحول میں بہتری کے علاوہ کارکنوں کی ذہنی صحت اور شخصیت پر مثبت اثرات مرتب ہوں گے.
نیویارک: (ویب ڈیسک) کھانا پکاتے ہوئے دھواں، چکنائی اور تیل دیواروں اور دیگر برتنوں پر جمع ہوتا رہتا ہے۔ اب ایک بہت مؤثر اور دستی آلے سے اس مسئلے کو حل کیا جاسکتا ہے۔
ماہرین نے اسے ’اہیرہُڈ‘ کا نام دیا ہے جسے آسانی سے اٹھا کر کسی بھی جگہ رکھا جاسکتا ہے۔ یہ آلہ بہتر انداز میں پکوان کے دوران دھواں، بو، تیل اور دیگر چکنائیاں جذب کرتا رہتا ہے۔ اس طرح باورچی خانے کی اندرونی فضا کو بہتر بناتا ہے۔
پھر ایشیائی ممالک میں ناقص ایندھن جلانے سے بھی باورچی خانے کا ماحول بہت خطرناک ہوجاتا ہے جسے ایئرہڈ کی بدولت صاف کیا جاسکتا ہے۔ جب اسے کراؤڈ فنڈنگ ویب سائٹ کِک اسٹارٹر پر رکھا گیا تو مطلوبہ رقم صرف 99 منٹ میں ہی جمع ہوگئی۔
اس میں کوئلہ فلٹر، گریس فلٹر، دھواں جذب کرنے والا نظام، اور دیگر خواص موجود ہیں۔ اندر چلنے والے پنکھے کو تین مختلف رفتار پر سیٹ کیا جاسکتا ہے۔ یہی وجہ ہے کہ اسے باورچی خانے کا ہرفن مولا فلٹر کہا جاسکتا ہے۔ اس طرح دیواروں پر چکنائی جمع نہیں ہوتی اور سب سے بڑھ کر خاتونِ خانہ کے لیے کھانا پکانا آسان ہوجاتا ہے۔
ایئرہُڈ فلٹر تار اور تار کے بغیرکام کرتا رہتا ہے اور اسے استعمال کرنا بہت آسان ہوتا ہے۔ اپنی بناوٹ کے لحاظ سے اسے ایئرہُڈ کو مختلف بلندیوں پر رکھا جاسکتا ہے تاکہ پکانے کے دوران دھواں اور آلودگی براہِ راست اس کے اندر جذب ہوسکے۔
اس کی تعارفی قیمت 99 ڈالر رکھی گئ ہے۔
لاہور: (ویب ڈیسک) پنجاب کا ترقیاتی بجٹ سے متعلق پہلا مسودہ تیار کر لیا گیا، بجٹ 640 ارب روپے مختص کرنے کی سفارش کی گئی ہے۔
پنجاب کا آئندہ مالی سال 2022-23 کے ترقیاتی بجٹ کیا ہوگا؟ جنوبی پنجاب کے لئے 35 فیصد تک بجٹ مختص کرنے کی سفارش کی گئی، پنجاب میں 13 میگا ترقیاتی پراجیکٹ شروع کرنے کی تجویز شامل ہے، ن لیگ اور اتحادیوں کے ہر ایم پی اے کو 50 کروڑ روپے کی ترقیاتی اسکیمیں دی جائیں گی، ایم پی ایز سے ان کے ضلعوں کی ترقیاتی اسکیمیں لیکر شامل کر دی گئی ہیں۔
وزیراعلیٰ کے احکامات کی روشنی میں محکمہ ترقیاتی و منصوبہ بندی کی جانب سے پہلا مسودہ تیار کر کے پیش کردیا گیا، غیر ملکی قرضوں کے تحت جاری منصوبوں کے لیے 28 ارب روپے ، ضلع ترقیاتی پروگرام کے جاری اور نئے منصوبوں کے لیے 114 ارب روپے، میگا منصوبوں کی تکمیل کے لیے مجموعی طور پر 237 ارب روپے کا فنڈ، ترجیحی منصوبوں کے 20 ارب روپے کا بلاک ایلوکیشن فنڈ اور پرائیوٹ پارٹنر شپ کے تحت 15 ارب روپے کا فنڈ مختص کرنے کی تجویز ہے۔
Error 403: The request cannot be completed because you have exceeded your quota..
Domain code: youtube.quota
Reason code: quotaExceeded
