لاہور: (ویب ڈیسک) وزیراعلیٰ پنجاب چودھری پرویزالٰہی اور سابق وفاقی وزیر مونس الٰہی سے وائس چانسلر گورنمنٹ کالج یونیورسٹی لاہور ڈاکٹر اصغر زیدی نے ملاقات کی، ملاقات میں صوبے میں اعلیٰ تعلیم کے فروغ کے حوالے سے تبادلہ خیال کیا گیا۔
ایوان وزیر اعلیٰ میں ہونے والی ملاقات میں وزیر اعلی چودھری پرویزالٰہی نے ہائیر ایجوکیشن کے فروغ کے لئے جامع پلان بنانے کی ہدایت کی۔
چوہدری پرویز الٰہی کا کہنا تھا کہ گورنمنٹ کالج یونیورسٹی لاہورمیں طلبہ کیلئے تعلیمی سہولتوں میں مزید اضافہ کریں گے، ادارے کے مسائل ترجیحی بنیادوں پر حل کریں گے، گورنمنٹ کالج یونیورسٹی لاہور پاکستان کی ممتاز درس گاہ ہے۔

اسلام آباد: (ویب ڈیسک) ملک کے مختلف علاقوں میں ڈینگی نے پر پھیلا دئیے، کراچی میں دو افراد دم توڑ گئے، میر پور خاص میں بھی وائرس ایک شخص کی جان لے گیا، سندھ میں ہلاکتوں کی مجموعی تعداد 37 تک پہنچ گئی.
تفصیلات کے مطابق پنجاب، سندھ اور خیبر پختو نخوا میں ڈینگی کے وار جار ی ہیں، کراچی میں مزید 2 افراد جاں بحق ہو گئے جبکہ لاہور میں بھی ایک مریض زندگی کی بازی ہارگیا۔
محکمہ صحت کے مطابق کراچی میں 2، حیدر آباد اور میر پور خاص میں گزشتہ چوبیس گھنٹے کے دوران مزید ایک ایک مریض جاں بحق ہو گیا، سندھ میں جاں بحق افراد کی تعداد 37 ہو گئی ہے۔
دوسری طرف پنجاب میں 401 نئے مریض رپورٹ ہوئے جبکہ لاہور میں بھی ایک اور مریض جاں بحق ہو گیا، خیبر پختونخوا میں بھی ڈینگی کے کیسز میں اضافہ جاری ہے، چوبیس گھنٹے کے دوران 342 مریض رپورٹ ہوئے ہیں۔

اسلام آباد: (ویب ڈیسک) وزیرخارجہ اور چیئرمین پیپلز پارٹی بلاول بھٹو زرداری نے اقوام متحدہ کی جنرل اسمبلی اجلاس کے موقع پر نیوزی لینڈکی وزیراعظم جیسنڈا آرڈرن سےملاقات کی تصویر ٹوئٹر پر شیئرکردی۔
ٹوئٹر پر نیوزی لینڈکی وزیراعظم سے ملاقات کے موقع پر لی گئی تصاویر پوسٹ کرتے ہوئے بلاول کا کہنا تھا کہ جیسنڈا آرڈرن سے ملاقات پسندیدہ ترین شخصیت سے ملنےکا لمحہ تھا، جیسنڈا آرڈرن نیوزی لینڈ کی سُپر ویمن ہیں۔
بلاول کا کہنا تھا کہ جیسنڈا آرڈرن بینظیر بھٹوکے بعد دنیا کی دوسری خاتون ہیں جو وزارتِ عظمیٰ کے دوران ماں بنیں۔
وزیر خارجہ کا کہنا تھا کہ جیسنڈا آرڈرن نے مجھے بتایا کہ ان کی بیٹی کی تاریخِ پیدائش بھی شہید بینظیر والی تاریخ پیدائش21 جون ہے۔

کوئٹہ: (ویب ڈیسک) بلوچستان کی سیاست میں نیاموڑ ، وزیراعلی عبدالقدوس بزنجو اور سابق وزیراعلی جام کمال کے درمیان برف پگھل گئی دونوں رہنماوں کے درمیان اختلافات ختم ہوگئے۔
کوئٹہ میں وزیراعلی بلوچستان عبدالقدوس بزنجو اچانک سابق وزیراعلی جام کمال کے گھر پہنچ گئے جہاں وزیراعلی عبدالقدوس بزنجونے سابق وزیراعلی جام کمال سے اہم ملاقات کی دونوں رہنائو نے ملاقات میں صوبے کی سیاسی صورتحال پر تفصیلی بات چیت کی۔
اس موقع پر سابق صوبائی وزراء عارف محمد حسنی اور سلیم کھوسہ بھی موجود تھے۔
واضح رہے کہ سابق وزیراعلی جام کمال کے خلاف تحریک عدم اعتماد لانے کے بعد عبدالقدوس بزنجو اور جام کمال کے درومیان دوریاں پیدا ہوئی تھیں ۔
ملاقات کے بعد وزیراعلی بلوچستان میرقدوس بزنجو نے میڈیاسے بات چیت کرتے ہوئے کہاکہ ملاقات میں سیاسی اور سیلابی صورتحال پر گفتگوہوئی،ملاقات کاایک اورمقصد پارٹی کو یکجا کرنا اور صوبے کو مشکلات سے نکالنا ہےلسبیلہ کی تقسیم کے معاملےپراپنی غلطی تسلیم کرکےجام کمال سے معذرت کرلی ہے۔
سابق وزیراعلی جام کمال کا کہنا تھا کہ ہماری ذاتی دشمنی نہیں سیاسی اختلافات ہوتے رہتے ہیں، وزرات اعلی کےجانے کے بعدبھی وزیراعلی قدوس بزنجو کو مشورے دیتا رہا، آج کی ملاقات میں بھی قدوس بزنجو کو صوبے کی مشکلات سے متعلق آگاہ کیا۔

اسلام آباد: (ویب ڈیسک) وزیراعظم شہباز شریف نے کہا ہے کہ پاک امریکا دوستانہ تعلقات باہمی اعتماد پر مبنی ہیں، دونوں ممالک کے تعلقات کو چین اور افغانستان کے تناظر میں نہیں دیکھا جا سکتا، مشکل حالات میں امریکانے پاکستان کی مدد کی۔ امریکا ہمارا بہترین دوست ہے۔
وزیرِاعظم نے اسلام آباد میں امریکی سفارتخانہ میں پاک ، امریکا تعلقات کی 75ویں سالگرہ کی تقریب میں شرکت کی۔ پاکستان میں امریکی سفیر ڈونلڈ بلوم، وفاقی وزراء اور دیگر شخصیات نے شرکت کی۔
تقریب میں سیلاب میں جاں بحق ہونیوالے افراد اور دیگر متاثرین سے اظہارِ یکجہتی کیلئے ایک منٹ کی خاموشی اختیار کی گئی۔
وزیراعظم نے کہا کہ پاکستان اور امریکاکے سفارتی تعلقات کی تقریب میں شرکت پر خوشی ہوئی ہے، امریکا اور پاکستان کے تعلقات 75 سال پر محیط ہیں، دونوں ممالک کے تاریخی اور دوستانہ تعلقات باہمی اعتماد پر مبنی ہیں، امریکاپاکستان کو سب سے پہلے تسلیم کرنے والے ممالک میں شامل ہے، دونوں اطراف سے تعلقات کو بہتر بنانے کیلئے کردار ادا کیا جاتا رہا ہے، امریکا کے ساتھ دوستانہ تعلقات کو فروغ دینے کے خواہاں ہیں، پاک۔ امریکا تعلقات کو چین اور افغانستان کے تناظر سے نہیں دیکھنا چاہئے، امریکانے مختلف پروگراموں اور منصوبوں کے ذریعے مشکل حالات میں پاکستان کی مدد کی۔
انہوں نے کہا کہ جب پاکستان میں بجلی کی شدید قلت تھی تو سابق وزیراعظم نواز شریف نے انتہائی مشکل معاشی حالات میں 5 ہزار میگاواٹ بجلی بنانے کا فیصلہ کیا، عمران خان کے دھرنے کی وجہ سے سی پیک متاثر ہوا، سی پیک منصوبے متاثر ہونے پر عوامی ردعمل کا سامنا کرنا پڑا، امریکی کمپنی نے ان حالات میں 3500 میگاواٹ بجلی کی پیداوار کیلئے پاکستان میں سرمایہ کاری کی اور تیز رفتاری اور شفافیت کے ساتھ بجلی کی پیداوار کے منصوبے لگائے۔
شہباز شریف نے کہا کہ ہم ان دوستانہ تعلقات کو فروغ دینے کے خواہاں ہیں، ماضی کو بھلا کر سنجیدہ بات چیت کے ذریعے آگے بڑھا جا سکتا ہے۔ نیویارک میں امریکی صدر جوبائیڈن اور وزیر خارجہ بلنکن کے ساتھ مفید ملاقات ہوئی اور سیلاب متاثرین کیلئے 53 ملین ڈالر امداد اور اظہار ہمدردی پر ان کا شکریہ ادا کیا، امریکی وزیر خارجہ نے وزیر خارجہ بلاول بھٹو زرداری کے ساتھ ملاقات میں بھی سیلاب متاثرین کی مدد کا عزم ظاہر کیا۔
وزیراعظم نے کہا کہ سیلاب سے ہونے والی تباہی بہت زیادہ ہے، پاکستان ایک ترقی پذیر ملک ہے، حالیہ تباہ کن سیلاب کی موجب موسمیاتی تبدیلی میں پاکستان کا کوئی کردار نہیں ہے،کاربن گیسوں کے اخراج میں پاکستان کا حصہ ایک فیصد سے بھی کم ہے، قدرتی آفت کا ہم کسی کو ذمہ دار نہیں ٹھہراتے۔
انہوں نے کہا کہ امریکا پاکستان کا بڑا تجارتی شراکت دار ہے، ماضی میں امریکا نے پاکستان میں 32 ارب ڈالر کی سرمایہ کاری کی، اگر منصوبہ بندی اور مناسب نگرانی میں سرمایہ کاری کو استعمال کیا جاتا تو آج ہم کسی کے سامنے ہاتھ نہ پھیلاتے، پاکستانی ایک مضبوط قوم ہے، یہاں کے لوگ پڑھے لکھے اور محنتی ہیں، ہم معاشی طور پر اپنے پائوں پر کھڑا ہونا چاہتے ہیں۔
شہباز شریف نے کہا کہ سیلاب سے پاکستان میں 4 ملین ایکڑ پر کھڑی کپاس، چاول، گنے اور کھجور کی فصلیں تباہ ہو گئی ہیں، 400 بچوں سمیت 1600 افراد جاں بحق ہوئے، 10 لاکھ سے زائد گھر تباہ اور لاکھوں مویشی ہلاک ہوئے ہیں، سیلاب متاثرین خیموں اور کھلے آسمان تلے رہنے پر مجبور ہیں اور وہ امداد کے منتظر ہیں۔
وزیراعظم نے کہا کہ سیلاب متاثرین کو ریلیف فراہم کرنا حکومت اور اداروں کی ذمہ داری ہے، سیلاب متاثرین کیلئے ہر ممکن اقدام کر رہے ہیں تاہم تباہی دستیاب وسائل سے بہت زیادہ ہے، سیلاب متاثرین کی طلب و رسد میں واضح طور پر فرق موجود ہے، ابھی سیلاب متاثرین کی بحالی اور آبادکاری کا مرحلہ باقی ہے، چاہتے ہیں عالمی برادری اس مشکل گھڑی میں ہمارے ساتھ کھڑی ہو اور بنیادی ڈھانچہ کی تعمیر میں مدد کرے، زراعت، انڈسٹری اور دیگر شعبوں کی بحالی میں معاونت کی جائے، ہم رقم نہیں عوام کی بحالی کیلئے اقدامات چاہتے ہیں۔