اسلام آباد: (ویب ڈیسک) اسلام آباد میں گزشتہ 24 گھنٹے کے دوران 96 نئے ڈینگی کیسز رپورٹ ہوئے ہیں جس کے بعد متاثرہ افراد کی تعداد ایک ہزار331 تک پہنچ گئی۔
اسلام آباد کے دیہی علاقوں میں 50 اور شہری علاقوں میں 46 کیسز رپورٹ ہوئے ہیں۔
گزشتہ 24 گھنٹوں میں پمزاسپتال میں 10 جب کہ پولی کلینک میں 3 ڈینگی مریض لائے گئے۔
گزشتہ روز نجی کلینک میں 44 افراد میں ڈینگی کی تشخیص ہوئی ہے۔ رواں سیزن ڈینگی کے باعث 4 افراد جان کی بازی ہار چکے ہیں۔
اسلام آباد: (ویب ڈیسک) وزیرخزانہ مفتاح اسماعیل نے کہا ہے کہ پیٹرول کی قیمتوں کا فیصلہ آج نہیں، کل ہو جائے گا۔
ایک انٹرویو میں انہوں نے کہا کہ پیٹرولیم مصنوعات کی قیمتوں میں اتنی کمی نہیں آ رہی،پیٹرول یا ڈیزل میں سے ایک آٹھ پیسے کم ہو رہا ہے۔
ان کا کہنا تھا کہ یہ کہنا مناسب نہیں ہو گا کہ ڈالر نیچے آئے گا لیکن ڈالر نیچے آنا چاہیے،سیلاب کے بعد مارکیٹ کا اعتماد کم ہوا تو روپے کی قدر گری ہے۔
مفتاح اسماعیل نے کہا کہ میں سمجھتا ہوں کہ ڈالر نیچے آئے گا، پاکستان ڈیفالٹ نہیں کرے گا، اسٹیٹ بینک کے پاس اتنے ڈالر نہیں کہ مارکیٹ میں مداخلت کرے۔
انہوں نے کہا کہ مہنگا ڈالر بیچنے پر آٹھ بینکوں کو شوکاز نوٹس دیا ہوا ہے، بینکوں کے جواب کے بعد جو مجرم ہوا اس کیخلاف ایکشن ہو گا۔
ان کا کہنا تھا کہ قطر، سعودی عرب اور یو اے ای 6 ارب ڈالر کی سرمایہ کاری کریں گے۔
وزیر خزانہ نے کہا کہ جرمنی اور فرانس میں بجلی کا یونٹ 250 روپے کا ہے جب کہ پاکستان 80 روپے کا یونٹ 35 روپے میں بیچ رہا ہے۔
اسلام آباد: (ویب ڈیسک) وفاقی حکومت نے ریٹیلر کے لیے پیراسیٹامول ادویات پر مارجن مقرر کر دیا۔
اس ضمن میں وزارت نیشنل ہیلتھ سروسز کی جانب سے جاری نوٹی فکیشن کے مطابق پیرا سیٹامول گولیوں، سسپنشن اور سیرپ پر مارجن کی حد مقرر کی گئی ہے۔
نوٹیفکیشن کے مطابق کمپیناں ریٹیلر کو پیراسیٹا مول پر 15 فیصد تک مارجن دے سکیں گی، 15 فیصد تک ڈسکاؤنٹ دینے پر اعتراضات 3 دن میں جمع کراسکتے ہیں۔
نئی دہلی: (ویب ڈیسک) دہلی پولیس کا کہنا ہے کہ اداکارہ جیکولین فرنینڈس بھتہ خوری اور منی لانڈرنگ کیس میں گرفتار ملزم سکیش چندر کے بارے میں سب کچھ جاننے کے باوجود ان سے شادی کی خواہش رکھتی تھیں۔
بھارتی میڈیا کے مطابق 200 کروڑ روپے کی بھتہ خوری اور منی لانڈرنگ میں ملوث سکیش چندر شیکھر تہاڑ جیل میں قید ہیں جہاں تفتیش کے دوران ملزم نے اداکارہ جیکولین فرنینڈس شیکھر کے ساتھ اپنے تعلقات سے متعلق مزید انکشافات کیے۔
جس پر دہلی پولیس نے جیکولین فرنینڈس سے بھی تفتیش کی جس میں انھوں نے اعتراف کیا کہ وہ شیکھر کے بارے میں جاننے کے باوجود ان سے شادی کرنا چاہتی تھیں۔
دہلی پولیس کے افسر نے بتایا کہ جیکولین کا سکیش چندر شیکھر کی حقیقت آشکار ہونے کے باوجود تعلقات برقرار رکھنے کا اعتراف اداکارہ کے لیے مشکلات کھڑی کرسکتا ہے۔
خیال رہے کہ سکیش چندر شیکھر کی منی لانڈرنگ میں مدد کرنے اور اس سے تحائف لینے کے الزام میں جیکولین فرنینڈس اور مشہور رقاصہ نورا فتحی سے تفتیش کی جارہی ہے۔
نورا فتحی کے بارے میں تفتیش کار پولیس افسر کا کہنا ہے کہ شکیس چند کے جرائم میں ملوث ہونے کا شک ہونے پر ہی نورا نے اپنی راہیں جدا کرلی تھیں اس لیے معروف ڈانسر سے مزید تفتیش روک دی گئی ہے۔
تائیوان: (ویب ڈیسک) تائیوان کے مشرقی ساحلی علاقے میں 6.6 شدت کا زلزلہ ریکارڈ کیا گیا ہے۔
غیر ملکی خبر ایجنسی کے مطابق امریکی زلزلہ پیما مرکز نے بتایا ہےکہ زلزلےکا مرکز ٹائیٹنگ کاؤنٹی میں 7.3 کلومیٹر کی گہرائی میں تھا۔
خبرایجنسی کے مطابق زلزلے سے فوری طور پر کسی جانی و مالی نقصان کی اطلاع نہیں ملی۔
زلزلے کے معمولی جھٹکے تائیوان کے دارالحکومت تائی پے میں بھی محسوس کیےگئے۔
اسلام آباد: (ویب ڈیسک) صدر عارف علوی نے سوئی ناردرن گیس پائپ لائنز لمیٹڈ کو غیر منصفانہ بل پر نظر ثانی کرنے کی ہدایت کرتے ہوئے وفاقی محتسب کے فیصلے کے خلاف دائر گیس کمپنی کی درخواست مسترد کردی۔
صدر مملکت نے کہا کہ گیس کمپنی شہری سے بلاجواز بل، میٹر کی قیمت وصول کر کے بدانتظامی کی مرتکب ہوئی،گیس کمپنی نے پشاور کے شہری کو 44 ہزار روپے سے زائد کا بل بلاجواز چارج کیا۔شہری کا گیس میٹر فائرنگ کے تبادلے کے نتیجے میں خراب ہوا، صارف کی کوئی غلطی نہیں، شکایت کنندہ نے اپنے میٹر کو پہنچنے والے نقصان کی ایف آئی آر بھی درج کرائی،یہ میٹر کو نقصان پہنچنے کا معاملہ ہے نہ کہ میٹر سے چھیڑ چھاڑ کا معاملہ ہے ۔ گیس کمپنی کی رپورٹ میں بھی شہری کی جانب سے گیس معاہدے کی خلاف ورزی کا ذکر نہیں، شہری کی باضابطہ درخواست کے بعد کمپنی نے گیس میٹر تبدیل کیا، گیس کمپنی اوگرا قواعد و ضوابط کے مطابق گیس میٹر 5 دن کے اندر مقامی لیبارٹری کو بھیجنے میں ناکام رہی۔میٹر ایک ماہ سے زائد عرصہ گزرنے کے بعد مقامی لیبارٹری کو بھیجا گیا، کمپنی کے پاس جرمانہ عائد کرنے کا اختیار نہیں ، یہ ایک مجاز عدالت کا دائرہ کار ہے،میٹر کے ساتھ چھیڑ چھاڑ کی مدت غیر معین ہونے پر صرف ایک سال تک کا بل وصول کیا جا سکتاہے۔
انہوں نے کہا کہ موجودہ معاملے میں میٹر کے نقصان کی مدت 20 دن متعین ہو چکی تھی،کمپنی نے اوگرا کے وضع کردہ قواعد و ضوابط کی خلاف ورزی میں صارف کو زائد بل دیا،کمپنی بدانتظامی کی مرتکب ہوئی ، سوئی ناردرن گیس کی درخواست مسترد کی جاتی ہے،کمپنی فیصلے کے 30 دنوں کے اندر وفاقی محتسب کو حکم کی تعمیل کی اطلاع دے۔
یاد رہے کہ پشاور کے رہائشی ارباب گل محمد نے کمپنی کی جانب سے 44,525 روپے کی غیر منصفانہ بلنگ کا الزام لگایا تھا،شہری کے میٹر کو دو مقامی گروہوں کے مابین فائرنگ کے تبادلے کے نتیجے میں نقصان پہنچا تھا،گیس کمپنی نے شہری کو 9 ہزار روپے کے میٹر چارجز سمیت 44 ہزار روپے سے زائد کا بل چارج کیا۔ شہری کے وفاقی محتسب سے رابطہ کرنے پر محتسب نے شہری کے حق میں حکم صادر کیا ۔گیس کمپنی نے وفاقی محتسب کے حکم کے خلاف صدر مملکت کو درخواست دائر کی جو مسترد کر دی گئی۔
کراچی: (ویب ڈیسک) انگلش کرکٹر ڈیوڈ ملان نے نیشنل اسٹیڈیم میں پریس کانفرنس کے دوران کہا کہ ورلڈ کپ ٹی ٹوئنٹی سے قبل پاکستان کیخلاف سیریز انتہائی اہمیت کی حامل ہے۔
ڈیوڈ ملان نے کہا کہ پاکستان میں دوبارہ آکر کافی اچھا لگ رہا ہے، جوز بٹلر کا مکمل فٹ نہ ہونا مایوس کن ہے، پاکستان ایک زبردست ٹیم ہے جس کے پاس تمام آپشنز موجود ہیں۔
لیفٹ ہینڈ بیٹر ملان نے کہا کہ جو پلیئرز یہاں پی ایس ایل کیلئے آچکے وہ دیگر کو اپنے تجربات سے آگاہ کر رہے ہیں، پاکستان کیخلاف کھیلنا ہمیشہ چیلنج ہوتا ہے، جب پی ایس ایل ٹو کیلئے لاہور آیا تھا تو اندازہ نہیں تھا کہ ہمارا آنا کتنا اہم تھا۔
انہوں نے کہا کہ ورلڈ کپ سے قبل یہ سیریز کافی اہم ہے۔
خیال رہے کہ پاکستان اور انگلینڈ کے درمیان 7 ٹی ٹوئنٹی میچز پر مشتمل سیریز کا پہلا میچ 20 ستمبر کو کراچی میں کھیلا جائے گا۔
کراچی: (ویب ڈیسک) پاکستانی بیٹر شان مسعود کا کہنا ہےکہ مجھے جس نمبر پر بھی موقع ملا پرفارم کرنے کی کوشش کروں گا۔
انگلینڈ کے خلاف سیریز میں پاکستانی اسکواڈ میں جگہ بنانے والے پاکستانی بیٹر شان مسعود نے نیشنل اسٹیڈیم کراچی میں پریس کانفرنس کرتے ہوئےکہا کہ انگلینڈ وائٹ بال کی بہترین ٹیم ہے، میں نے انگلینڈ میں کاؤنٹی کھیلی ہے جس سے ان کی صلاحیت کا اندازہ ہوا، انگلش ٹیم ہمیں یہاں پر چیلنج کرے گی، ورلڈکپ سے قبل انگلینڈ کے خلاف اچھی تیاری ہوگی۔
شان مسعود کا کہنا تھا کہ پی ایس ایل اور انگلش کاؤنٹی میں رنز کرنے سے مجھے اعتماد ملا، مکی آرتھر نے وہاں میری بہت مدد کی، جب مجھے بیٹنگ کرنی ہوتی ہے تو زیادہ میچز کھیلنے میں مزہ آتا ہے،17 سال بعد انگلینڈ کی ٹیم کا آنا خوش آئند ہے ، پاکستان کے لوگ کرکٹ سے محبت کرتے ہیں، پاکستانی فینز چاہتے ہیں کہ بہترین ٹیمیں پاکستان آئیں۔
پاکستانی بیٹرکا کہنا تھا کہ ملتان سلطانز سے کھیلنےکا تجربہ بہترین تھا، میں نے اپنے ساتھی کرکٹرز سے بہت کچھ سیکھا، سیکھنےکا عمل کبھی بھی نہیں رکتا، میرا اگلا ہدف ٹی 20 فارمیٹ کے اسٹینڈرڈ کو میٹ کرنا ہے، ہر کرکٹر کی خواہش ہوتی ہےکہ ملک کے لیے تینوں فارمیٹ کھیلے۔
ان کا کہنا تھا کہ میری کوشش ہوگی کہ لیگ کرکٹ کے تجربے سے ٹیم کوفائدہ دلاؤں، ایسے بھی خیالات آتے تھےکہ شائدکبھی کم بیک نہ ہوسکے، مجھے جس نمبر پر بھی موقع ملا پرفارم کرنےکی کوشش کروں گا، جوٹیم کی ضرورت ہوگی اس نمبر پر جاکر بہتر کھیل پیش کروں گا، میں کبھی شکوہ نہیں کروں گا کہ مجھے میرے پسند کے نمبر پر نہیں کھلایا گیا۔
ٹیسٹ اوپنر کا کہنا تھا کہ اب تک میں جس نمبر پر پرفارم کرنے میں ناکام ہوا وہ میری اپنی غلطیاں تھیں،کپتانی کا کبھی نہیں سوچا، قومی ٹیم کی قیادت بہترین ہاتھ میں ہے، پی ایس ایل،کاؤنٹی اور نیشنل ٹی ٹوئنٹی کپ طرز کی کارکردگی انگلینڈ کے خلاف بھی دکھانےکی کوشش کروں گا۔
پنوعاقل: (ویب ڈیسک) سکھرکی تحصیل پنو عاقل کے علاقے رضاگوٹھ میں خاتون کے قتل کیس میں ایس ایچ او کو گرفتار کرلیا گیا۔
پولیس کے مطابق 12ستمبر کو بھائیوں نے اپنی بہن کو فائرنگ کرکے قتل کر دیا تھا، ایس ایچ او نے قتل چھپانےکے لیے مخالفین کوپھنسانےکی کوششں کی اور ملزمان کی مدعیت میں مقدمہ درج کرلیا۔
پولیس کا کہنا ہےکہ مقدمے میں ایس ایچ او سمیت دیگر 4 ملزمان نامزد ہیں، ایس ایس پی نے 3 رکنی کمیٹی قائم کردی ہے جو مزید تفتیش کرےگی۔
لاہور: (ویب ڈیسک) وزیراعلیٰ پنجاب چودھری پرویز الہٰی نے تعلیمی اداروں کو منشیات سے پاک کرنے کے لیے سخت قانون سازی کا فیصلہ کر لیا۔
اس ضمن میں منعقدہ اجلاس میں وزیراعلیٰ پنجاب نے تعلیمی اداروں میں منشیات کے بڑھتے رحجان پر تشویش کا اظہار کرتے ہوئے ہدایت کی کہ پنجاب کنٹرول آف نارکوٹکس سبسٹنس ایکٹ 2022 قانون کو جلد حتمی شکل دی جائے گی۔
انہوں نے کہا کہ اس ایکٹ کو پنجاب اسمبلی سے منظور کرایا جائے گا۔ان کا کہنا تھا کہ اینٹی نارکوٹکس پولیس اسٹیشن بھی بنائے جائیں گے۔
اجلاس میں منشیات کی خرید و فروخت اور استعمال پر سزائیں بڑھانے کا فیصلہ کیا گیا۔چودھری پرویز الہٰی نے کہا کہ منشیات کے سدباب کیلئے خود مختار ادارہ قائم کیا جائے گا اور خصوصی عدالتیں قائم ہوں گی۔
