All posts by Khabrain News

دلچسپ و عجیب

103 سالہ خاتون نے طیارے سے چھلانگ لگا کر ریکارڈ قائم کردیا

اسٹاک ہوم: (ویب ڈیسک) سویڈن میں 103 برس کی معمر خاتون نے جہاز سے پیرا شوٹ کے ذریعے چھلانگ لگا کر ایک نیا ریکارڈ قائم کر دیا ہے۔
عالمی خبر رساں ادارے کے مطابق سویڈن میں 103 سالہ خاتون روت لارسن نے فضا میں ہوائی جہاز سے چھلانگ لگائی اور پیراشوٹ کے ذریعے زمین پر بحفاظت اترنے کا مظاہرہ کیا۔
اس کرتب کے دوران ان کی رہنمائی پیرا شوٹ جمپنگ کے ماہر جوکم جوہانسن نے کی۔ ہوائی جہاز سے چھلانگ لگانے کا یہ کرتب اسٹاک ہوم سے 240 کلومیٹر کے فاصلے پر موٹالا میں کیا گیا۔
روت لارسن نے اس کرتب کا مظاہرہ کرکے عالمی ریکارڈ توڑ دیا ہے اور وہ یہ کرتب دکھانے والی معمر ترین خاتون بن گئی ہیں۔ اس موقعے پر گنیز بک آف ورلڈ ریکارڈ کا اہلکار بھی موجود تھا جنہوں نے ریکارڈ کی تصدیق کی۔

دلچسپ و عجیب

جاپان میں ہارڈ ڈسک تباہ کرنیوالی مشینیں مقبول

ٹوکیو: (ویب ڈیسک) جاپان میں ایسی مشینیں کافی مقبول ہو رہی ہیں جو ہارڈ ڈسک کو تباہ کرنے میں کام آتی ہیں۔
میڈیا رپورٹ کے مطابق بعض افراد اور ادارے چاہتے ہیں کہ ان کی ہارڈ ڈسک کا ڈیٹا خفیہ ہی رہے اور کسی کے ہاتھ نہ لگے۔ اب جاپان میں ایسی مشینیں تیزی سے مقبول ہو رہی ہیں جو صرف 100 ین میں ہارڈ ڈسک کا حلیہ بگاڑ دیتی ہیں اور پھر ڈسک سے ڈیٹا حاصل نہیں کیا جا سکتا۔
اس مقصد کیلئے مخصوص دکانوں پر کوئی بھی آ کر معمولی قیمت پر اپنی ہارڈ ڈسک ایک خصوصی مشین میں ڈالتا ہے ، مشین چند منٹوں میں ہارڈ ڈسک کو تروڑ مروڑ کر ناقابل استعمال بنا دیتی ہے، 2020 میں اس سلسلے کی پہلی مشین لگائی گئی تھی جو اب تیزی سے مقبول ہو رہی ہے۔ ہارڈ ڈسک تباہ کرنے والوں میں کاروباری ادارے اور بینک سرفہرست ہیں کیونکہ وہ نہیں چاہتے کہ ان کے کاروباری راز کسی کے ہاتھ لگیں، اس کی قیمت صرف 160 پاکستانی روپے کے برابر ہے۔

سائنس و ٹیکنالوجی

گھومتے دل والا ڈبہ جو پیار کے پیغام دکھاتا ہے

بیجنگ: (ویب ڈیسک) آج کل ڈجیٹل دور میں ایک روایتی انداز میں یہ ایجاد بنائی گئی جو آپ کے 20 اہلِ خانہ اور دوستوں کے پیغامات ایک چھوٹے سے دل والے ڈبے پر ظاہر کرتی ہے۔
اسے اسپننگ ہاٹ میسنجر کا نام دیا گیا ہے۔ ایپ کی بدولت آپ 20 سے زائد دوستوں، اہلِ خانہ اور دیگر احباب سے وابستہ ہوسکتےہیں۔ کوئی عید مبارک کہے، یا سالگرہ مبارک کا پیغام بھیجے، یا پھر کسی جگہ سے اپنی خیریت کا سلام کہے تو ڈبے پر لگا چھوٹا سا پکسل زدہ دل گھومتا ہے۔ اس کا مطلب یہ ہے کہ کوئی پیار بھرا پیغام آیا ہے۔
پھراس کے اوپر کا ڈھکنا کھول کر اندر موجود ایک خوبصورت ڈسپلے پر پیغام، تصویر یا ویڈیو دیکھی جاسکتی ہے۔ ایپ پر بھیجا گیا پیغام فوری موصول ہوتا ہے اوربلو ٹوتھ سے اس چھوٹے خوبصورت ڈبے پر منتقل کیا جاسکتا ہے۔
بس دوستوں کو یہ کرنا ہوگا کہ Love box ایپ اتار کر آپ کو کوئی پیغام بھیجنا ہوگا اور ڈبے پر لگا چھوٹا دل حرکت کرکے اس کی خبردے گا۔ اس کے بعد آپ اندر لگے ڈسپلے پر اپنا پیغام، تصویر، آڈیو یا ویڈیو دیکھ سکیں گے۔ دن بھر لاتعداد پیغامات بھیجے اور وصول کئے جاسکتے ہیں۔
اس ایجاد کو پیار کا ڈبہ کہا جاسکتا ہے کیونکہ اسے ایک باکس کی صورت دی گئی ہے۔ یہ ڈبہ ہرقسم کے آئی فون، آئی پیڈ، اور تمام اقسام اینڈروئڈ فون سے جڑکر دو طرفہ پیغامات بھیجنے اور وصول کرنے کو ممکن بناتا ہے۔ تاہم وائی فائی کنیکشن درکار ہوگا۔
پیارے کے ڈبے کی قیمت 119 ڈالر ہے جو بہت زیادہ ہے تاہم صارفین نے اسے ایک مفید اور بامقصد تحفہ قرار دیا ہے۔

سائنس و ٹیکنالوجی

دونوں ہاتھوں کی پیوندکاری کا پہلا تجربہ کامیاب

لیڈز: (ویب ڈیسک) برطانیہ میں جلد کی بیماری کے سبب ناکارہ ہوجانے والے ہاتھوں کے حامل شخص کو دوبارہ تندرست ہاتھ لگایئے گئے ہیں۔ اس ٹرانسپلانٹ کو دنیا کی پہلی دوہرے ہاتھوں والی پیوندکاری قرار دیا جا رہا ہے۔
غیر ملکی خبر رساں ادارے کے مطابق 48 سالہ اسٹیون گیلیغر اسکلیرو ڈرما نامی جلد کی بیماری کا شکار تھے جس کی وجہ سے ان کی جلد عدم لچک کی وجہ سے کھینچنے لگی تھی اور ان کی انگلیوں نے مُڑ کر ایک مستقل مٹھی کی صورت اختیار کر لی تھی۔
اسٹیون کو یہ بیماری 13 برس قبل گال اور ناک پر غیر معمولی خراشیں لگنے اور دائیں بازو میں تکلیف ہونے کے بعد ہوئی۔
اس حالت سے ان کی ناک، منہ اور ہاتھ متاثر ہوئے اور تقریباً سات سال قبل ان کی انگلیاں مُڑنا شروع ہوئی اور تب تک مڑتی رہیں جب تک ان کے ہاتھ نے مٹھی کی صورت اختیار نہیں کر لی۔ اس صورت حال کے دوران وہ شدید اذیت میں مبتلا رہے۔
جب ماہرین نے انہیں دونوں ہاتھوں کے پیوندکاری کے متعلق بتایا تو پہلے تو انہوں نے یہ خیال ہنس کر مسترد کردیا لیکن بعد ازاں خطرات کے باوجود اس خیال پر عمل کا فیصلہ کیا۔
انہوں نے خبررساں ادارے کو بتایا کہ ان کے ہاتھ ناکارہ ہوچکے تھے، وہ چیزوں کو اٹھانے کے علاوہ کچھ نہیں کر سکتے تھے۔ جب گلاسگو کے ایک پروفیسر نے انہیں دونوں ہاتھوں کے پیوندکاری کے متعلق بتایا تو پہلے انہوں اس پر کان نہ دھرے لیکن بعد میں اپنی اہلیہ سے مشورہ کرنے کے بعد اس عمل کے لیے رضامند ہوئے۔
گزشتہ سال دسمبر میں کیے گئے آپریشن کو پانچ ماہ سے زیادہ کا عرصہ گزرنے کے بعد ان کی حالت بہتر ہو رہی ہے اگرچہ وہ اب بھی شرٹ کے بٹن لگانے جیسے پیچیدہ عمل نہیں کرسکتے لیکن نل کھولنا اور گلاس بھرنا جیسے کام کر سکتے ہیں۔
اس پیوندکاری کے لیے کی جانے والی سرجری میں مختلف شعبوں سے تعلق رکھنے والے 30 زبردست ماہرین کی ٹیم نے حصہ لیا۔
لِیڈز ٹیچنگ ہاسپیٹلز این ایچ ایس ٹرسٹ کے پروفیسر سائمن کے کا کہنا تھا کہ یہ آپریشن ایک بہت بڑی مجموعی کاوش ہے۔
انہوں نے کہا کہ ہاتھ کی پیوندکاری، گردے یا دیگر عضو کی پیوند کاری سے بہت مختلف ہوتی ہے کیوں کہ ہم ہاتھوں کو روزانہ دیکھتے ہیں اور کئی طریقوں سے استعمال کرتے ہیں۔

اہم خبریں, پاکستان

لاہور پولیس نے 10 کروڑ تاوان کیلئے اغوا کئے گئے 5 سالہ عریض کو بازیاب کرالیا

لاہور: (ویب ڈیسک) پولیس نے 10 کروڑ تاوان کے لیے اغوا ء کئے گئے 5 سالہ بچے عریض کو بحفاظت بازیاب کروا لیا۔
سی آئی اے پولیس نے کارروائی کرتے ہوئے بچے کو بازیاب کرایا اور اسے اس کے والدین کے حوالے کر دیا۔ بچے کو سندر کے علاقے سے اغوا کیا گیا تھا، دو موٹرسائیکل سواروں نے عریض کو اغوا کیا جنہوں نے ماسک لگا رکھے تھے۔
ڈی آئی جی انویسٹی گیشن لاہور کامران عادل نے قلعہ گجر سنگھ میں پریس کانفرنس کرکے تفصیلات سے آگاہ کیا۔
پولیس حکام نے بتایا کہ ملزمان سجاد اور اکرم کو گرفتار کرکے ان سے جدید اسلحہ بھی برآمد کیا گیا ہے، مفرور ملزمان مہوش، شہباز اور اویس کی گرفتاری کے لیے چھاپے مارے جارہے ہیں، 13مئی کی شام بچے کو 10 کروڑ روپے تاوان کے لیے پارک سے اغواء کیا گیا تھا۔
وزیراعلیٰ پنجاب نے بچے کی بازیابی پر لاہور پولیس اور تفتیشی ٹیم کو شاباش دی اور کہا کہ بچے کی بحفاظت بازیابی پر اللہ تعالٰی کا شکر بجا لاتے ہیں۔

بزنس

روپے کے مقابلے میں امریکی ڈالر کی قدر میں کمی آنے لگی

کراچی: (ویب ڈیسک) سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں 70 پیسے کی کمی ریکارڈ کی گئی۔
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 199 روپے 76 پیسے سے کم ہو کر 199 روپے 6 پیسے ہو گئی ہے۔
گزشتہ دو کاروباری روز کے دوران انٹر بینک میں روپے کے مقابلے میں امریکی ڈالر کی قدر میں 2 روپے 95 پیسے کی تنزلی دیکھی گئی۔

بزنس

پاکستان سٹاک مارکیٹ میں اُتار چڑھاؤ کے بعد 178.69 پوائنٹس کی تیزی ریکارڈ

کراچی: (ویب ڈیسک) پاکستان سٹاک مارکیٹ میں اُتار چڑھاؤ کے بعد 178.69 پوائنٹس کی تیزی ریکارڈ کی گئی اور 100 انڈیکس 43040.14 پوائنٹس کی سطح پر پہنچ بند ہوا، پورے کاروباری روزکے دوران کاروبار میں 0.42 فیصد کی بہتری دیکھی گئی جبکہ 8 کروڑ 12 لاکھ 94 ہزار 999 شیئرز کا لین دین ہوا۔

اہم خبریں, پاکستان

تحریک انصاف کا ضمنی انتخاب میں تمام حلقوں میں امیدوار اتارنے کا فیصلہ

لاہور: (ویب ڈیسک) تحریک انصاف نے پنجاب کے ضمنی انتخاب میں تمام حلقوں میں امیدوار اتارنے کا فیصلہ کر لیا۔
ذرائع کے مطابق ڈی نوٹیفائی ہونے والے اراکین کے حلقوں میں ضمنی انتخاب میں بھر پور حصہ لیا جائے گا۔پی ٹی آئی نے ضمنی انتخابات کیلئے پارٹی ٹکٹ کے خواہشمند افراد سے درخواستیں مانگ لیں۔
پارٹی ٹکٹ کیلئے درخواستوں کی آخری تاریخ یکم جون مقرر کی گئی ہے۔سیٹیں پی ٹی آئی کے منحرف اراکین اسمبلی کی نااہلی کی وجہ سے خالی ہوئی تھیں۔
صدر پی ٹی آئی پنجاب شفقت محمود کا کہنا ہے کہ منحرف ارکان کے مقابلے میں پارٹی کے وفادار امیدوار سامنے لائے جائیں گے۔لوٹوں کی سیاست کا حلقوں سے مکمل خاتمہ کیا جائے گا۔
واضح رہے کہ الیکشن کمیشن نے پنجاب اسمبلی کی 20 خالی نشستوں پر 17 جولائی کو ضمنی الیکشن کرانے کا اعلان کیا ہے۔
الیکشن کمیشن کی جانب سے جاری بیان میں کہا گیا ہے کہ ضمنی الیکشن کے لیے کاغذات نامزدگی 4 سے7 جون تک جمع کرائے جائیں گے جبکہ کاغذات نامزدگی کی جانچ پڑتال 11 جون کو ہو گی اور الیکشن ٹریبونل اپیلوں پر فیصلہ 21 جون تک کریں گے۔
اعلامیے کے مطابق کاغذات نامزدگی 23 جون تک واپس لیے جا سکیں گے اور امیدواروں کو انتخابی نشان 24 جون کو جاری ہوں گے۔
الیکشن کمیشن کے مطابق پنجاب اسمبلی کے جن حلقوں میں ضمنی انتخابات ہوں گے ان میں پی پی 7 راولپنڈی، پی پی 83 خوشاب، پی پی 90 بھکر، پی پی97 فیصل آباد، پی پی 125، پی پی127 جھنگ، پی پی 140 شیخوپورہ، پی پی 158، پی پی 167، پی پی 168، پی پی 170 لاہور پر ضمنی الیکشن ہو گا۔
اس کے علاوہ پی پی 202 ساہیوال، پی پی 217 ملتان، پی پی 224، پی پی 228 لودھراں، پی پی 237 بہاولنگر، پی پی 272، پی پی 273 مظفر گڑھ، پی پی 282 لیہ اور پی پی 288 ڈی جی خان پر ضمنی الیکشن ہو گا۔

اہم خبریں, پاکستان

مہنگائی بم کی دوسری قسط جون میں آئے گی، پرویز الہیٰ

لاہور: (ویب ڈیسک) اسپیکر پنجاب اسمبلی پرویز الہیٰ نے کہا ہے کہ مہنگائی بم کی دوسری قسط جون میں آئے گی۔
اسپیکر پنجاب اسمبلی پرویز الہیٰ نے میڈیا سے گفتگو میں کہا کہ عمران خان کو گرفتار کرنے کا خواب دیکھنے والے اپنی حکومت کی فکر کریں تاہم خواب دیکھنے پر کوئی پابندی نہیں ہے۔ حقیقی آزادی لانگ مارچ کی بھر پور تیاریاں جاری ہیں۔
انہوں نے کہا کہ حکمران پی ٹی آئی چیئرمین عمران خان سے خوفزدہ ہیں اور جعلی حکمران لانگ مارچ کو روکنے کے لیے ہر غیر قانونی کام کر رہے ہیں۔ عوام کی ایک ہی دہائی ہے اگر حکومت سنبھال نہیں سکتے تھے تو آئے کیوں ہو ؟
پرویز الہیٰ نے کہا کہ عوام کے ساتھ عالمی مالیاتی ادارے (آئی ایم ایف) کو بھی عارضی حکومت پر اعتبار نہیں جبکہ حکومت کی جانب سے مہنگائی بم کی دوسری قسط جون میں آئے گی۔
انہوں نے کہا کہ عمران خان نے روس کے ساتھ 30 فیصد سستے تیل کا معاہدہ کیا تھا اور اگر اس پر عمل کیا جاتا تو آج ڈالر آسمان سے باتیں نہ کر رہا ہوتا۔ مہنگائی کی وجہ سے ملکی معیشت تباہی کے دہانے پر کھڑی ہے۔

اہم خبریں, پاکستان

بلوچستان بلدیاتی انتخابات :متحارب گروپوں میں لڑائی جھگڑے، 8 افراد زخمی

کوئٹہ: (ویب ڈیسک) بلوچستان میں بلدیاتی انتخابات کے دوران مختلف علاقوں میں لڑائی جھگڑے اور بدمزگی کے واقعات پیش آئے جس میں 8 افراد زخمی ہو گئے ہیں۔
لیویز حکام کے مطابق ڈیرہ بگٹی کوہلو کی یونین کونسل 06 وارڈ نمبر 02 ماکوڑی کے پولنگ اسٹیشن میں بد نظمی ،لڑائی کی وجہ سے 8 افراد زخمی ہو گئے تاہم پولیس نے بروقت کارروائی کرتے ہوئے 4 افراد کو حراست میں لے لیا، اور پولنگ اسٹیشن کے حالات کو نارمل کرکے پولنگ کو دوبارہ بحال کردیا۔
دوسری جانب دکی کی میونسپل کمیٹی وارڈ نمبر 2 میں پولنگ اسٹیشن پردوگروپوں کے درمیان لڑائی جھگڑے کا واقعہ ہوا پولیس نے بروقت مداخلت کر کے حالات کنٹرول کر لئے۔ چمن کے وارڈ نمبر 4 ایریگیشن پولنگ اسٹیشن پر دو گروپوں میں تصادم ہوا، دونوں جانب سے مشتعل افراد کی لڑائی مار کٹائی کے بعد پولیس نے حالات پر قابو پانے کیلئے ہوائی فائرنگ کی اور ہجوم کو منتشر کر دیا۔
جبکہ ڈیرہ بگٹی کے وارڈ نمبر 4 محلہ کالی پولنگ اسٹیشن میں بدمزگی کے باعث ریٹرننگ آفیسر اور عملے نے کچھ دیر کے لئے پولنگ روک دی تاہم 10 منٹ تاخیر کے بعد پولنگ کا عمل دوبارہ شروع کر دیا گیا۔