پی پی پی خواتین ونگ کی مرکزی صدر فریال تالپور نے کہا ہے کہ ہر ماہ بجلی مہنگی کر کے عوام پر بم گرایا جا رہا ہے۔

چیئرمین پیپلز پارٹی بلاول بھٹو زرداری کی زیرِ صدارت پیپلز پارٹی کی سندھ کونسل کا وزیر اعلیٰ ہاؤس میں اجلاس ہوا جس میں فریال تالپور، صوبائی صدر نثار کھوڑو، وزیر اعلیٰ سندھ اور کابینہ کے وزراء نے شرکت کی۔

بلاول بھٹو زرداری نے سندھ کونسل اجلاس میں اسلام آباد سے وڈیو لنک کے ذریعے شرکت کی، اجلاس میں 27 فروری کو مزار قائد سے لانگ مارچ کے انتظامات و تیاریوں کا جائزہ لیا گیا۔

فریال تالپور نے اجلاس سے خطاب کرتے ہوئے کہا کہ عوام اس حکومت کی مہنگائی، بے روزگاری، ٹیکسز کی بھرمار سے بیزار ہوچکی ہے، ہر ماہ بجلی مہنگی کر کے عوام پر بم گرایا جا رہا ہے۔

ان کا کہنا تھا کہ یوریا کھاد کے بحران سے گندم کی فصل بہت کم ہوگی جس سے ایک اور بحران جنم لے گا، اس حکومت نے ایسے حالات پیدا کر کے خود عوام کو لانگ مارچ پر مجبور کردیا ہے مارچ میں خواتین بھی بھرپور شرکت کریں گی۔

پی پی پی خواتین ونگ کی مرکزی صدر فریال تالپور نے مزید کہا کہ بلدیاتی انتخابات میں حصہ لینے والے پارٹی امیدواروں سے 30 جنوری تک درخواستیں طلب کی ہیں۔

دوسری جانب پاکستان پیپلز پارٹی کے چیئرمین بلاول بھٹو زرداری نے اجلاس سے خطاب کرتے ہوئے کہا کہ لانگ مارچ میں عوام کی بھرپور شرکت یقینی بنائی جائے، پیپلز پارٹی کا اس عوام دشمن پی ٹی آئی حکومت کے خلاف اعلان جنگ ہے۔

ان کا کہنا تھا کہ 27 فروری کو مزار قائد کراچی سے س نااہل حکومت کے خلاف لانگ مارچ کی شروعات ہوگی اور اسلام آباد پہنچ کر اپنے مقاصد حاصل کرلیں گے، پیپلز پارٹی حقیقی اپوزیشن کا کردار ادا کر کے اس پی ٹی آئی کی نااہل حکومت کو بے نقاب کر کے گھر بھیجے گی۔

انہوں نے کہا کہ ملک سنگین بحران سے دوچار ہے اور پیپلز پارٹی ہی ملک کو بحران سے نکالے گی، اس بار بھی عوام اور پیپلز پارٹی ہی کامیاب ہوگی۔

بلاول بھٹو زرداری کا کہنا تھا کہ پارٹی کارکنان و رہنما آپس کے خلاف ختم کر کے ایک ہو کر آواز بنیں پھر کوئی ہمیں نہیں ہرا سکتا، پیپلز پارٹی ملک بھر بلدیاتی انتخابات سمیت عام انتخابات میں بھی بھرپور کامیابی حاصل کرے گی۔

پاکستان پیپلز پارٹی کے چیئرمین بلاول بھٹو زرداری نے مزید کہا کہ ملک میں زراعت کے سیکٹر کے ساتھ ظلم کیا گیا ہے جس وجہ سے کسان مصیبت میں ہیں، کسانوں کے ساتھ یکجہتی کے لیے 21 جنوری 24 جنوری کو ملک بھر میں کسان مارچ ہوگا۔

اسلام آباد: (ویب ڈیسک) پیپلزپارٹی نے کسانوں کے مسائل پر آواز اٹھانے کے لیے ملک بھر میں ٹریکٹر مارچ کا اعلان کر دیا۔ نوید قمر اور شازیہ مری کا کہنا تھا کہ واشنگٹن کی سوچ رکھنے والوں کو یہاں کے کسان کے مسائل کا علم ہی نہیں، کھاد والا ٹرک گزرتا ہے تو لوٹ مار شروع ہو جاتی ہے۔
سید نوید قمر اور شازیہ مری نے اسلام آباد میں پریس کانفرنس کرتے ہوئے کہا کہ حکومت نے چینی کی طرح کھاد کا بھی بحران پیدا کر دیا، انہیں کسانوں کے مسائل کا ادراک ہی نہیں۔ رکن قومی اسمبلی شازیہ مری نے کہا کہ پیپلزپارٹی منی بجٹ کیخلاف احتجاج کا ہر جمہوری طریقہ اختیار کرے گی، مہنگائی کے مارے عوام کو اس سے نجات دلائیں گے۔ پیپلز پارٹی رہنماؤں کا کہنا تھا کہ حکومت مکمل طور پر ناکام ہو چکی۔

لاہور: (ویب ڈیسک) سپیکر پنجاب اسمبلی چودھری پرویز الہی نے کہا ہے کہ مہنگائی کنٹرول کرنے اور عوام کو ریلیف دینے کیلئے فوری اقدامات کرنا ہونگے، جمہوری حکومت کی مضبوطی کیلئے عوام کی پریشانیوں کو کم کرنا ہوگا۔
سپیکر پنجاب اسمبلی چودھری پرویز الٰہی لاہور میں جنرل سیکرٹری مسلم لیگ پنجاب سینیٹر کامل علی آغا کی رہائش گاہ پر پہنچے اور کامل علی آغا کے بڑے بھائی ڈاکٹر کاظم علی آغا کی وفات پر اظہار تعزیت کیا۔ اس موقع پر سابق ارکان اسمبلی وقاص حسن موکل اور آمنہ الفت سمیت مسلم لیگی رہنما و کارکن بھی موجود تھے۔ چودھری پرویز الٰہی نے کاظم علی آغا کے درجات کی بلندی کیلئے فاتحہ خوانی پڑھی اور لواحقین کیلئے صبر جمیل کی دعا کی۔
اس موقع پر گفتگو میں چودھری پرویز الہی کا کہنا تھا کہ عوام کو ریلیف دیئے بغیر جمہوری حکومت کی بنیاد نہیں رکھی جا سکتی، ہمیں اندازہ ہے اس وقت ملک میں مہنگائی کا شدید طوفان برپا ہے، روز بروز اشیائے ضروریہ کی قیمتوں میں اضافے سے عوام پریشان ہے، حکومت کو چاہیے عوام کی مشکلات اور پریشانیوں کو فوری حل کرے، حکومت مہنگائی کم نہیں کر سکتی تو بڑھنے بھی نہ دے۔